Situacija dale stabilna
Gmejnske financy najebać přidatne wudawki dosć derje zrjadowane
Konjecy (JK/SN). Na minjenym posedźenju gmejnskeje rady Ralbic-Róžanta poda zamołwita komornica Franciska Čapikowa rozprawu k połlětnemu stawej lětušeho hospodarskeho plana gmejny. Najebać přidatne wudawki za nowotwar pěstowarnje we wobjimje nimale 840 000 eurow je pjenježny staw komuny poměrnje dobry. K spokojenju radźićelow, wjesnjanosty a komornicy je powěsć z Drježdźan dóšła, zo so tež přidatne wudawki za twar Ralbičanskeje pěstowarnje z 90 procentami spěchuja. Tak ma gmejna „jenož přidatny swójski podźěl we wysokosći 84 000 eurow zwjesć. Tutu sumu gmejna ma“, Čapikowa wobkrući. Wona pak dyrbješe tež rjec, zo njejsu dochody z přemysłoweho dawka w planowanej wysokosći dóšli, respektiwnje zo dyrbja dočasnje płaćene dawki zaso wróćić. Komornica pak liči z tym, zo so situacija hač do kónca lěta zaso změruje a gmejna lěto z wurunanej bilancu zakónči.
Pólsce a jendźelsce po muzeju
Budyšin. Serbski muzej w Budyšinje je zetkawanišćo za ludźi z regiona a z cyłeho swěta. Tu nadeńdźeš rěčnu mnohotnosć. Pjatk, 29. septembra, přeprošuje Serbski muzej w ramiku mjezykulturnych tydźenjow w Budyšinje hosći w 15 hodź. na wjedźenje w pólskej a w 16 hodź. w jendźelskej rěči. Stawizny Serbow a wosebita wustajeńca „Čej’ da sy?“ so při tym předstajeja. Zajimcy njech přizjewja so pod .
Knižna premjera na hrodźe
Lichań. W Ludowym nakładnistwje Domowina je w septembrje wobrazowy zwjazk Jürgena Maćija „Ducy domoj – Unterwegs nach Hause“ wušoł. Nakładnistwo a Domizniske towarstwo Lichań přeprošujetej wšitkich zajimcow na knižnu premjeru, kotraž budźe wutoru, 3. oktobra, we 18 hodź., na hrodźe w Lichanju.
Lipsk – něhdy a dźensa
Mnohe lěta hižo wjesela so čłonojo Serbskeho šulskeho towarstwa na jězby po rjanych kónčinach Němskeje. Lětuša dnjowa wuprawa wjedźeše při najrjeńšim nazymskim wjedrje do Lipska. Ze Šmitec wozydłownistwom podachu so pućowacy njedawno hižo rano zahe wot Budyšina přez Baćoń, Chrósćicy a Pančicy po awtodróze do Lipska. Wjace hač 40 čłonow a přećelow towarstwa bě so za jězbu přizjewiło.
Wot spočatka tydźenja trjebaja šoferojo na statnej dróze S 100 ...
Tradicionalne žiwjenje předstajili
106 projektow mytowali
Při Šibojskim jězoru so něšto hiba
Město Wojerecy chce wot klětušeho nalěća na zapadnym přibrjoze Šibojskeho jězora wšelake turistiske twarske projekty zwoprawdźić. Jako prěnje ma so areal za wobchad a medije wotkryć a wuhladna wěža natwarić. To podšmórny wyši měšćanosta Torsten Ruban-Zeh (SPD) wčera na posedźenju měšćanskeje rady.
Wojerecy (AK/SN). „Móžemy projekt nětko zahajić. Wjeselu so na přichodne rozmołwy z wobydlerjemi na městnje“, hódnoći Torsten Ruban-Zeh do přichoda sahace wobzamknjenja rady.
Krótkopowěsće (27.09.23)
Maja spěšnišo jednać
Podstupim. Braniborske krajne knježerstwo je wčera wobzamknyło, zo maja šule w přichodźe spěšnišo w padźe ekstremizma jednać. Tak přihłosowaše kabinet naćiskej noweho šulskeho zakonja. We wotpowědnym paragrafje rěka, zo měli so pady ekstremistiskeho, antisemitiskeho abo rasistiskeho zadźerženja hnydom šulskemu zarjadej zdźělić.
Stipendijej přijimałoj
Budyšin. Lětušej stipendiatce Mättigoweje załožby staj minjenu njedźelu w Budyskej cyrkwi swj. Pětra šekaj po stajnje 1 200 eurach přijimałoj. Corneliji Müller ze Zhorjelca přiznachu spěchowanje za zdźuěłanje swojeje promocije wo hašenju wohenja w Hornjej Łužicy w 18. a 19. lětstotku a Drježdźanjance Lisy Hallex za spisanje masterskeho dźěła wo hajenju parka w Mohornje (Ohorn) pod aspektom pomnikoškita.
Zaso doma produkować
Ze zbrašenymi do Sakskeje Šwicy jěli
Radźićeljo wuradźuja
Chrósćicy. Přichodne posedźenje Chróšćanskeje gmejnskeje rady wotměje so štwórtk, 28. septembra, w 19 hodź. w tamnišim gmejnskim a kulturnym centrumje. Mjez druhim póńdźe wo wysokosć staršiskeho popłatka za hladanje dźěći w Chróšćanskej pěstowarni. Dale na dnjowym porjedźe steja wustawki wo wudawkach za zasadźenje wohnjoweje wobory a změna wobtwarjenskeho plana „Při pastyrni“ w Chrósćicach. Zjawnemu posedźenju přizamknje so njezjawny dźěl. Zajimcy su wutrobnje přeprošeni.
Wjelk dwě wowcy torhnył
Hórki. W nocy na minjenu sobotu je w Hórkach na kromje wsy do směra na Chrósćicy wjelk dwě wowcy morił. Jeju wobsedźer, kotryž měješe dohromady štyri wowcy na pastwje, je škodu hnydom přisłušnemu městnu přizjewił. Fachowc je hišće sobotu dopołdnja přijěł a po obdukciji wobkrućił, zo běše to wjelk. Tamnej wowcy móžeštej so wuchować a najprjedy raz ćeknyć. Jej su w běhu dnja zaso namakali.
