W tunlu połčas twarskich dźěłow
Zhorjelc (SN/MWj). Po tym zo je modernizowanje sewjerneje roły tunla pod Limasom wotzamknjene, poćahnu twarscy dźěłaćerjo 6. měrca wječor do južneje roły. Tole zdźěli Awtodróhowa tzwr minjeny pjatk, jako wuslědki dotalnych dźěłow zjawnosći předstajichu. Po wšěm zdaću wostanje južna roła nětko hač do nowembra 2025 za wobchad dospołnje zawrjena. Awta móža potom jenož do wobeju směrow w sewjernej role jězdźić.
Kaž předewzaće dale zdźěli, wostanje awtodróha A 4 pod Limasom wot jutřišeho ranja 8 hodź. hač do 6. měrca 22 hodź. dospołnje zawrjena. W tym času změnja techniske připrawy tak, zo přepołoža wobchad z južneje do sewjerneje roły. Runočasnje hišće raz wšu zašłe měsacy instalowanu nowu techniku dokładnje přepruwuja, zo by wot 6. měrca wječor porjadnje fungowała. Mjez druhim su nowe kabiny za nuzowe telefonaty připrawili, nowe LED-wobswětlenje zatwarili a wótřerěčaki wuměnili. Sćěny tunla dóstachu nowu swětłu barbu. Dale maja w sewjernej role tunla nětko wjace sensorow za spóznawanje wohenjow a wjace widejoweje techniki za kontrolu wobchada.
Zhromadnje spěwać
Dróhu hakle za pjeć lět saněruja
Dróhotwarske projekty přihotować móže druhdy jara dołho trać. Wosebje komplikowane su naprawy wokoło bywšich brunicowych jamow, kaž aktualny přikład nazornje pokazuje.
Wojerecy (AK/SN). Łužiska a srjedźoněmska towaršnosć hórnistwoweho zarjadnistwa (LMBV) chce zwjazkowu dróhu B 97 wot wotbóčki do Noweje Wsy do směra na Sprjewiny Doł a Grodk saněrować. Tole rjekny nawoda łužiskeho saněrowanskeho wobłuka LMBV Gerd Richter na zašłym posedźenju Wojerowskeje měšćanskeje rady. „Twarske dźěła pak njezapočnu so do lěta 2030. Projekt traje pjeć do dźesać lět. Njebudźe potajkim žanoho spěšneho rozrisanja“, Richter rozłoži. W mjenowanym wobłuku leži B 97 na nasypanej kónčinje. Areal chcedźa tam z ćežkej techniku zhusćić.
Barbojty spektakl za wšitkich
Přećah žonow sobotu w Kulowje tysacy přihladowarjow fascinował
Kulow. Małe městačko Kulow je so sobotu do błazniweho paradiza přeměniło, jako tradicionalny póstniski ćah po dróhach ćehnješe. Stajnje póstnisku sobotu fascinuja w Kulowje holcy a žony tysacy přihladowarjow z wulkotnym přećahom. Lětsa w 319. póstniskej sezonje přichadźachu prěni hosćo hižo po připołdnju na torhošćo, hdźež so wobdźělnicy ćaha zhromadźichu.
Poł hodźiny zašo hač hewak so přećah potom hibać započa. Z hudźbu, reju, spěwom a kostimami skupiny publikum zahorichu a so wo wjesołu naladu postarachu. 127 skupin, dźesać wjace hač loni, je so lětsa wobdźěliło. Wot klasiskeho klawna hač k mystiskim stworjenjam – fantazija wobdźělnicow zdawa so lěto wob lěto bjezkónčna. Tak běchu na přikład karusele, saznicy, sněženki, lěsne soniny abo lizawki widźeć. Přećah nawjedowachu na zwučene wašnje mužojo jako klawnojo a skupina jěcharkow na konjach.
Krótkopowěsće (03.03.25)
„Monika“ znapřećiwiła
Zhorjelc. Pad „Monika“ pokročuje. Wusudej krajneho sudnistwa w Berlinje je skoržerka nětko znapřećiwiła. Wo tym informowaše modowy label „Laba“ zašły tydźeń na swojej internetnej stronje a na Instagramje. Hižo z lěta 2022 wadźa so starša serbska žona a wobsedźer labela Gerhard Zschau před wšelakimi sudnistwami (SN wospjet rozprawjachu).
Dalše wubědźowanje idejow
Budyšin. Załožba za serbski lud tež lětsa wubědźowanje „Rěč zwjazuje“ přewjedźe. Zaměr wubědźowanja je, ideje spěchować, z kotrymiž móže so originelnje, regionalnje skutkownje a směrodajnje na Serbstwo skedźbnić. Dźe při tym wo podpěru a dalewuwiće dwurěčnosće, kotraž k tomu přinošuje, zo so serbska rěč zachowa. Za mytowanje idejow je cyłkownje 70 000 eurow k dispoziciji.
Politika přirodźe njetyje
Policija (28.02.25)
Znowa awtomat rozbuchnyli
Kamjenc. W Hornjej Łužicy njeznaći dale cigaretowe awtomaty rozbuchaja. Srjedu wječor su dalši pad w Kamjencu zwěsćili. Tam je so awtomat na Macherowej z woporom skućićelow stał. Dźěl cigaretow a pjenjez woni na městnje ležo wostajichu. Kelko su pokradnyli, porno tomu znate njeje. Policija trochuje škodu na něhdźe 4 000 eurow. W zašłosći su njeznaći hižo awtomaty w Biskopicach, Hbjelsku a Lubiju rozbuchnyli. Policija wšitke pady přepytuje.
W hosćencu drastu a baje zeznali
Šulerjow přizjewić
Worklecy. Starši, kotřiž chcedźa swoje dźěćo za šulske lěto 2025/2026 na Worklečanskej serbskej wyšej šuli „Michał Hórnik“ přizjewić, móža to přichodny tydźeń k slědowacym časam činić: póndźelu, srjedu a štwórtk wot 7.30 hač do 14 hodź, wutoru wot 10 hač do 17 hodź. a pjatk wot 7.30 hač do 10 hodź. Komuž so žadyn z terminow njehodźi, njech sej ze šulu hinaši čas dorěči. Wšitke trěbne informacije nadeńdu zajimcy internetnje pod www.schule-raeckelwitz.de.
Poslednje wodźenje
Budyšin. W Muzeju Budyšin móža so zajimcy njedźelu, 2. měrca, w 15 hodź. wobdźělić na poslednim wodźenju po wustajeńcy, kotraž je Helfriedej Winzerej (1924–2010) a jeho měšćanskim napohladam sprjewineho města wěnowana. Winzer je w Drježdźanach a Berlinje nutřkownu architekturu studował. Za swoje diplomowe dźěło je 1953 měšćanske napohlady Budyšina rysował. Při tym nastachu wobrazy znatych twarjenjow Budyšina a měšćanske panoramy, na kotrychž su zdźěla hišće slědy Druheje swětoweje wójny spóznać.
W gmejnje planuja mjeńše projekty
Bóšicy (UM/SN). Nimo wulkeho dróhotwarskeho projekta wot statneje dróhi S 98 a Nowymi Bóšicami (SN rozprawjachu) planuje Bóšičanska gmejna tež někotre mjeńše předewzaća. Tak matej puć wot Wětrowskeho kulturneho domu hač k deponiji kaž tež komunalny puć w Nowej Jaseńcy nowu asfaltowu worštu dóstać. Bjezzadźěwkowy přetwar busoweho zastanišća před zawodom RHI (něhdy Preiss-Daimler) hišće zwoprawdźić njemóžachu, dokelž za to spěchowanje njedóstachu. Dale planuja we Łusču nowe wjesne wobswětlenje. „To su projekty z dwójneho etata 2025/2026, kotrež tuchwilu zdźěłamy. Njeje hišće jasne, hač je lětsa abo klětu zwoprawdźimy. To tež wot spěchowanja wotwisuje“, praji Bóšičanski wjesnjanosta Stanisław Ryćer.
Inwestuja w Sulšecach a Dubrjenku
Kulow (AK/SN). Dźakowano zlutniwemu hospodarjenju móže město Kulow lětsa 570 000 eurow do wšelakich naprawow inwestować. Za někotre projekty je so jim spěchowanje hižo připrajiło. Nimo toho chcedźa 527 000 eurow kredita wotpłaćić. „To je lětsa wosebje wjele“, praji komornik Mathias Kockert srjedu na posedźenju měšćanskeje rady. Jeje čłonojo hospodarski plan 2025 jednohłósnje wobzamknychu.
Tak chcedźa w Sulšečanskim kulturnym domje towarstwowe rumnosće ponowić. Za to trjebaja 66 000 eurow, z toho je 50 000 eurow spěchowanje. We wjesnym towarstwowym domje w Dubrjenku su kachle skóncowane, čehoždla je so tam tež paliło. Nětko ponowja dom a wotstronja škody. Město zaplanuje 100 000 eurow. Spěchowanje za to wučinja 74 000 eurow. Swójski podźěl 26 000 eurow chcedźa z pjenjezami zapłaćić, kotrež wot zawěsćernje dóstanu.
