Požadanska faza zahajena

Kamjenica. Hač do 29. februara móža so wšitcy zajimcy, kotřiž chcedźa so z domjacym lěkarjom we wjesnych kónčinach Sakskeje stać, za zymski semester 2024/25 požadać. Wosebitosć je, zo zamóža so za 40 městnow w přichodnym semestrje tež zajimcy zwonka NC (Numerus Clausus) požadać. 29. januara wotměje so online informaciske zarjadowanje.

Wubědźowanje Simul-plus zahajił

Drježdźany. Wot dźensnišeho móža towarstwa, zjednoćenstwa, města a komuny w Sakskej ze swojimi idejemi na dobro swojeho regiona zaso wo Simul-plus-myta wojować. Sakski statny minister za regionalne wuwiće Thomas Schmidt (CDU) je wčera nowe koło wubědźowanja z dohromady 3,8 milionami mytowanskimi pjenjezami zahajił. Zajimcy móža so hač do 11. měrca požadać.

Štyrilětna pod Everestom

Chrósćicy. Přichodny wječor „Kulturneje zymy“ w putniskej hospodźe Chrósćicy wěnuje so putnikowanju ze spirituelneje stronki. Načasne putnikowanje zda so być wobdate wot swojorazneho kuzła. Dale a wjace ludźi pěši putnikuje – to płaći jako hojace, haj wumóžace. Wone fascinuje miliony ludźi tak, zo so na njeznate, hustohdy dołhe a tež napinace puće po­dadźa. Tola kak móžeš tutu žadosć tak žiwy być, zo je putnikowanje na kóncu, po doběženju, woprawdźe wozbožace? Zo je za dušu a duch spo­kojace? Što je najwažniše, zo by pućowanje było dołhodobnje hojace za žiwjenje? Tajke prašenja hodźa so zjimać w zapřijeću „duchowne putnikowanje“. Wo tym je jezuit Michael Hainz knihu napisał, z kotrejež čita sobotu, 13. januara, w putniskej hospodźe w Chrósćicach. Sam je nazhonity putnik a po­dawa putniske kursy. Započatk čitanja w němskej rěči budźe w 19.45 hodź. ­Hižo wot 16 hodź. su sobotu dźěći na serbske dźěćace kino přeprošene.

Prócuja so wo zmysłapołne rozrisanje za Miłoraske duby

Trjebin (AK/SN). Wjes Miłoraz ma so hač do kónca lěta 2024 přesydlić. Tole podšmórny Trjebinski wjesnjanosta Robert Sprejz (Trjebinske wolerske zjednoćenstwo) srjedu na posedźenju gmejnskeje rady. Wažny krok do tohole směra bě srjedź nazymnika. „15. nowembra 2023 smy w Miłorazu třistronski statok, kupjel a sportnišćo energijowemu koncernej LEAG přepodali“, wjesnjanosta rozłoži. We wšitkich objektach je mjeztym milina wotpinjena. Dale prócuje so komuna wo zmysłapołne rozrisanje za Miłoraske duby. Spočatna ideja bě, štomy za Rulec młyn wužiwać. Bě to něhdyši wjesny dźěl Miłoraza, hdźež ma so móst ponowić.

Mała Anna Mae Kolodiecek je so 13. oktobra 2023 jako 500 dźěćo zašłeho lěta w Budyskej chorowni narodźiła. Po rjanym wašnju dósta jubilejne dźěćo šek we wysokosći 500 eurow wot Ludoweje banki Drježdźany-Budyšin. Čłon předsydstwa banki ­Remo Teichert je šek wčera přepodał. Staršej Jessica Pinzke a Marcel Kolodiecek bydlitaj tuchwilu w Budyšinje, chcetaj pak bórze do Dalic (Dahlowitz) we Wulkodubrawskej gmejnje přećahnyć. Anna Mae je jeju prěnje dźěćo. Foto: Carmen Schumann