Krótkopowěsće (02.08.23)
Kulturno-politiske spěchowanje
Budyšin. Pod titulom „Aller.Land“ staji Zwjazk komunam wšo dohromady 70 milionow eurow spěchowanskich srědkow k dispoziciji. Z tym chce kulturu a demokratiju, wosebje we wjesnych kónčinach ze słabymi hospodarskimi strukturami, po cyłej Němskej spěchować. Zajimowani njech so hač do lětušeho 21. awgusta na krajnoradnym zarjedźe pod: přizjewja.
„Akademija přichoda“ we Łužicy
Choćebuz. Energijowa změna a jeje wužadanja steja w srjedźišću „Akademije přichoda“, kotruž zarjaduja přichodny tydźeń we Łužicy. Planowane su ekskursije, přednoški a rozmołwne koła k wobswětowym a techniskim prašenjam. Na šěroko zapołožene zarjadowanje wočakuja 50 młodostnych z Berlina a Łužicy.
Stawk w Kamjencu
Kamjenc. 3. tarifowe jednanje dźěłarnistwa ver.di z dźěłodawarjemi we wobłuku drobno- a transportneho wikowanja w Sakskej, Saksko-Anhaltskej a Durinskej njeměješe spokojacy wuslědk. Tuž chcedźa sobudźěłaćerjo wjacorych filialow Kauflanda, mjez druhim w Kamjencu na dróze Willy Muhle, jutře stawkować.
Zastanišća bjez zadźěwkow
Inwestuja wjele pjenjez do zjawneho bliskowobchada
Malešecy (SN/MWj). Za něšto dnjow započnje Malešanska gmejna jednu ze swojich wulkich lětušich inwesticijow zwoprawdźeć. Wot přichodneje póndźele chcedźa w štyrjoch wsach dohromady sydom busowych zastanišćow tak přetwarić, zo wone hižo žane zadźěwki njezměja. „Z tymle wutwarom přinošujemy k polěpšenju wužiwanja zjawneho bliskowobchada w našej wjesnej kónčinje a polěpšimy zdobom wobchadnu wěstotu potrjechenych zastanišćow. Runočasnje zwyšimy tak atraktiwnosć našeje gmejny jako bydlenske městno“, praji wjesnjanosta Malešanskeje gmejny Matthias Seidel (CDU).
Wutwarić chcedźa zastanišća stajnje do wobeju směrow w Lemišowje, Połpicy a w Skanecach kaž tež jedne w Stróži. Na wšitkich městnach ma so čakanski wobłuk wobstejnosćam přiměrić. Dale natwarja moderne čakanske budki, hdźež móžeš so tež posydnyć. Nimo toho nastaja pódla zastanišća metalowe dźeržaki, zo móhli wobydlerjo tam swoje koleso přizamknyć a potom z busom dale jěć.
Mnohim pilnym pomocnikam so dźakowali
Rowno (JoS/SN). Tradicionalny lětni swjedźeń wotmě so zańdźeny kónc tydźenja na Rownjanskim Njepilic statoku. Z kofejom, tykancom, pomazkami a překwapjenkami dźakowachu so na te wašnje přećelam, susodam a pomocnikam, kotřiž spěchowanske towarstwo Njepilic statoka podpěruja. „Sami to njezdokonjamy“, rozłoži předsyda towarstwa Manfred Nikel. „Smy stajnje zaso na mnohostronsku pomoc pokazani.“
W prěnim rjedźe dźakowaše so předsyda čłonam towarstwa, mjenowaše pak tež wšitkich dalšich. „Čłonojo Rownjanskeje wohnjoweje wobory su stajnje zwólniwi, hdyž jich pomoc trjebamy. Samsny dźak słuša młodźinskemu klubej, wjesnemu klubej, Domowinskej skupinje a hońtwjerskemu drustwu Rowno-Mułkecy. Dale dźakuju so žonam, kotrež nas při pjerjodrěću podpěraja. Pjenježnu pomoc dóstawamy wot Załožby Slepo-Rowno-Mułkecy, wot Załožby lutowarnje Zhorjelc-Hornja Łužica-Delnja Šleska a wot Załožby za serbski lud. Jich spěchowanje je nam wulka pomoc“, Manfred Nikel wuzběhny.
Policija (01.08.23)
Wopiteho lepili
Budyšin. Dlěši čas nóžkować drje dyrbi nětko wodźer BMWja, kotrehož je policija njedźelu dopołdnja na Einsteinowej w Budyšinje kontrolowała. Pola njeho naměrichu 1,78 promilow alkohola w kreji. Jemu njejsu na to jenož krej wotewzali, ale tež jězbnu dowolnosć.
Za ratarstwo so stajnje zajimował
Wot spočatka měrca 1992 wuchadźeja Serbske Nowiny jako wječornik. A wot toho časa je pomocnicy w mnohich wjetšich a mjeńšich wsach wšědnje čitarjam do domu noša. Najwjetši čas tuž našich pilnych roznošowarjow w lětnjej seriji předstajić (11).
Derje wopytana bě minjeny kónc tydźenja mjeztym třeća Black ...
Krótkopowěsće (01.08.23)
ZDF so wot tweeta distancuje
Mainz. Rozhłosowy sćelak ZDF distancuje so wot wuprajenjow satirikarja Jana Böhmermanna, kotryž je w swojim tweeće wo stronje CDU jako „nacijach ze substancu“ rěčał. Tweet běše satiriski komentar na wuprajenja CDU-šefa Friedricha Merca na lěćnej klawsurje swojeje strony w Andechsu, w kotrejž běše swoju stronu jako „alternatiwu za Němsku ze substancu“ wopisał.
Čitanja w prózdninach
Bórkowy. Awtor knižneho rjada Sams Paul Maar, wotewrě dźensa wječor rjad zarjadowanjow w prózdninach w Literarnym salonje Blejcha w Bórkowach. Přichodne tydźenje předstaja tam awtorojo, kotřiž su jako mytowani Błótowskeho literarneho stipendija w hotelu přebywali, ze swojich tam spisanych tekstow.
Hród dale w nošerstwje gmejny
Dalše formy wopuchlinow
„Posłuchaj lěkarja, prjed hač jeho trjebaš!“, serbske přisłowo namołwja.
Tuž wěnuje so student mediciny Pětr Dźisławk znatym a mjenje znatym chorosćam, zo by je čitarjam trochu bliže rozłožował (24).
W septembru kupjel zdźěla zaso spřistupnja
Wojerecy (SiR/SN). Před 24 lětami wotewrjena Wojerowska Łužiska kupjel je tuchwilu twarnišćo. Přetwar na tak mjenowane kwalifikowane wólnočasne zarjadnišćo su w aprylu ze symboliskim prěnim zarywom a přepodaćom spěchowanskich srědkow přez sakskeho ministra Thomasa Schmidta zahajili. Štwórtk, 27. julija, slědowaše na twarnišću dalši oficialny akt.
Přetwar a modernizaciju kupjele spěchuja z 22,5 milionami eurow z hornca za změnu strukturow we łužiskim brunicowym rewěrje. Hač do lětušeho oktobra dóstanje kupjel přidatny 25 metrow dołhi płuwanski basenk kaž tež dalši za gymnastiku we wodźe a płuwanje z ćěšenkami. Dale wonkowne připrawy znowa wuhotuja, a to ze sportowymi a hrajkanskimi připrawami, kotrež hodźa so cyłe lěto wužiwać.
Žiwe městno wosrjedź města
Radźićeljo přećah biblioteki na dwórnišćo wobzamknyli
Běła Woda (AK/SN). Běłowodźanska měšćanska biblioteka ma na dwórnišćo přećahnyć, hdyž budźe wone přetwarjene. Tónle zasadny rozsud schwalichu měšćanscy radźićeljo na swojim zašłym posedźenju. Dwórnišćo ma přichodnje jako wobydlerske dwórnišćo biblioteku, turistisku informaciju a kulturne wužiwanje zjednoćić. Na te wašnje ma so wone ze žiwym městnom wosrjedź Běłeje Wody kaž tež ze socialnym a kulturnym zetkawanišćom stać.
