W měsće zelene hwězdy pytać
Wojerecy (SiR/SN). Po měsće dundać, hwězdy ličić a dobyć – pod tymle hesłom přeprošuje marketingowe towarstwo Wojerowski region swójbow na wosebitu akciju, kotruž hišće hač do kónca lěta pod mjenom „#WHY!NACHT“ přewjedu. Z kampanju chcedźa domjacym wikowarjam a přemysłownikam wjace kedźbnosće wěnować a wobydlerjow kaž tež wopytowarjow na nich skedźbnjeć. Za to wobstarachu zelene Ochranowske hwězdy, kotrež nětko w mnohich wukładnych woknach wisaja, rozłoži sobudźěłaćerka marketingoweho towarstwa Anja Hillmann.
Štóž chce so na dobyćerskej akciji wobdźělić, móže so hač do 31. decembra w starym a nowym měsće na puć podać a wšitke zelene hwězdy we wukładnych woknach zličić. We wšitkich wobdźělenych wobchodach maja wosebite karty, kotrež dyrbiš wupjelnić a na nich prawu ličbu zelenych hwězdow nakřižować. „Wobdźělene předewzaća spóznaja wobydlerjo a wopytowarjo na nalěpku z hesłom „#WHY!NACHT““, praji hospodarski spěchowar města Robert Böhme.
Mjeztym zo so zjawne swjedźenje w Nowej Wjesce hewak zwjetša při ...
Kulturny dom budźe zetkanišćo
Město Wojerecy chce dalši projekt we wobłuku změny strukturow zwoprawdźić. W nowym měsće inwestuja něhdźe dźewjeć milionow eurow do kulturneho domu OSSI.
Wojerecy (AK/SN). Dźěćacy a młodźinski kulturny dom OSSI we Wojerecach ma so z forumom za wšitke generacije stać a mjeno „Nikolai Ostrowski“ nosyć. Za njón je měšćanska rada wčera koncept wužiwanja a wobhospodarjenja wobzamknyła. Nimo toho přepodachu Wojerowskemu inženjerskemu běrowej nadawk za dalše planowanje. Projekt ma něhdźe dźewjeć milionow eurow płaćić. Z toho dóstanu wjace hač wosom milionow eurow spěchowanja z hornca za změnu strukturow. Město same ma 770 000 eurow financować.
Nimo Regionalneho běrowa za kubłanje, demokratiju a žiwjenske perspektiwy (RAA) a rejowanskeje šule Hartwig, kotrejž twarjenje nětko hižo wužiwatej, budźe Astrocentrum Łužica (DZA) nowy partner. Wón chce planetarij a slědźerski centrum zaměstnić. DZA płaći wob lěto 20 000 eurow podruže a chce nimo toho projekty we wobjimje 15 000 eurow wob lěto podpěrować.
Krótkopowěsće (20.12.23)
Rozšěrjeny słownik online
Budyšin. Rozšěrjeny druhi nakład „Němsko-hornjoserbskeho słownika noweje leksiki“ steji wužiwarkam a wužiwarjam w portalu k dispoziciji. Wo tym je Serbski institut informował a zdobom na to skedźbnił, zo LND ćišć słownika přihotuje. Rěčespytnicy instituta su serbske wotpowědniki kritisce přepruwowali a nowe hesła dodali.
AOK zwyši přinoški
Erfurt/Drježdźany. Najwjetša chorobna kasa Sakskeje a Durinskeje AOK Plus, zwyši přidatny přinošk za swojich zawěsćenych spočatk lěta 2024 na 1,8 procent. Jako přičiny mjenowaše zarjadniska rada mjez druhim: Podróšenje lěkarstwow a lěkowanjow. Předsydka zarjadniskeje rady Daniela Kolbe praji, zo su tež zasahowanja politiki wudawki AOK zańdźene lěta šwarnje zwyšili.
Hudźba z najstaršeho žórła na CD
Ćerpjeć na dušaty dych 2. dźěl
„Posłuchaj lěkarja, prjed hač jeho trjebaš!“, serbske přisłowo namołwja.
Tuž wěnuje so student mediciny Pětr Dźisławk znatym a mjenje znatym chorosćam, zo by je čitarjam trochu bliže rozłožował (34).
Adwentne woknješko
Policija (19.12.23)
Z bagrom so zadobyli
Rozwodecy. K njewšědnemu padej zadobywanja wołachu policiju we wčerawšich rańšich hodźinach do Rozwodec (Rodewitz) pola Budestec. Z ležownosće pokradnychu njeznaći bager a jědźechu z nim k bliskemu wobchodej. Tam z bagrom wokno wutorhnychu. Na te wašnje dóstachu so skućićeljo do twarjenja a pokradnychu z njeho trezor. Po informacijach policije bě w nim srjedźna pjećcyfrowa suma pjenjez. Nimo toho nasta něhdźe 10 000 eurow wěcneje škody. Kriminalni technikarjo móžachu někotre slědy zawěsćić. Kriminalisća so z tymle njewšědnym padom dale zaběraja.
Nowa skulptura za torhošćo
Měšćanscy radźićeljo wyše staršiske přinoški za pěstowarnju schwalili
Kulow (AK/SN). Město Kulow chce 2024 swoje torhošćo porjeńšić. Tole zdźěli nawoda twarskeho zarjada města Stephen Rachel srjedu na posedźenju měšćanskich radźićelow. Při dźensnišej Krabatowej steli chcedźa mjedźanu skulpturu chorwatskeho obrista Janka Šajatovića (1624–1704) nastajić.
Nadawk we wobjimje 80 000 eurow přepodachu hižo 20. nowembra Jörgej Tauschej ze Slepoho. Moler, restawrator a wučer za wuměłske kubłanje na Slepjanskej šuli bě hižo za Krabatowu wustajeńcu w Budyšinje postawu Šajatovića jako jěcharja a ławku Šajatovića na Wojerowskim torhošću stworił. Nowa postawa w Kulowje ma pokazać Šajatovića, kiž na stelu kaž tež na katolsku cyrkej hlada. Při skulpturje maja informaciska tafla, ławki a małe zelenišćo nastać, tak zo móžeš tam pozastać. „Klětu w juniju chcemy skulpturu poswjećić“, praji Stephen Rachel. „Potom swjećimy 400. narodniny Janka Šajatovića.“ Nimo toho chcedźa na Kulowskim torhošću dalše ławki, městna za přizamknjenje kolesow a reparaturnu připrawu za kolesa za dohromady 68 000 eurow nastajić.
Dźěćatko pobyło
Hodowne wjeselo wobradźili
Budyšin (SN/MG). W połnje wobsadźenej žurli Budyskeho Domu swj. Jadwigi čakachu wčera wobydlerki a wobydlerjo cyle wćipni na swoju lětušu hodownu překwapjenku. Tutu skićachu jim šulerki a šulerjo 2. lětnika Budyskeje serbskeje zakładneje šule. „Hody njeměli jenož čas dóstawanja być, ale tež darowanja“ rozłoži wučerka Gabriela Bajtlowa, kotraž dźěći z gitaru přewodźowaše.
Sobu přinjesli běchu dźěći najwšelakoriše spěwy, kotrež běchu před dwěmaj njedźelomaj tež hižo na Wjacławskich wikach zanjesli. Ideju wopyta w starowni mějachu starši dźěći rjadownje. Jako bě wučerka to wšo dopowědała, dachu so šulerki a šulerjo z wulkim elanom do spěwanja. Derje pytnyć bě, zo dźěći z wulkim wjeselom a z wjele energiju spěwaja. Tak zaklinčachu wjacore serbske hodowne spěwy, mjez nimi derje znate kaž „Bórze přińdźe rumpodich“ abo tež „Sněženki padaja“. Wězo přednjesechu dźěći tež někotryžkuli němski spěw. Štučku „W lěsu steji jědlenka“ zaspěwachu samo w třoch rěčach: serbsce, němsce a rusce.
