Do mlokoweho awta zrazył
W Krabatowym młynje zaso kino
Čorny Chołmc (SN/MWj). Runje hakle su so lětuše Krabatowe swjedźenske hry w Čornochołmčanskim Krabatowym młynje skónčili, to čaka tam na wopytowarjow dalši wjeršk lětušeje zarjadowanskeje protyki. Wot jutřišeho hač do 27. awgusta přeprošuja na kinowe předstajenja pod hołym njebjom. K zahajenju pokazaja jutře wuspěšnu produkciju z Tomom Hanksom „Ein Mann namens Otto“. Hanks hraje wobužneho wudowca Otta, kiž scyła přezjedny njeje, zo w susodstwje wjesoła a žiwa swójba zaćehnje.
Na cyłkownje 24 zarjadowanjach pokazaja wotměnjawy program, wobstejacy z blockbusterow a Disney-filmow. „Njebě lochko, z wulkeje ličby te filmy wupytać, kotrež měli na kóncu w programje filmowych nocow stać“, praji Matthias Pfitzner, kiž je sobu ideju filmowych nocow zrodźił. Wón je jednaćel firmy za logistiku zarjadowanjow a kulturnu gastronomiju PAN. „Smy filmy jara dołho wupytali, přetož poskitk nowych paskow bě tónraz jara wulki. Na kóncu mamy nětko program, kiž je dobra měšeńca filmow z Hollywooda, němskich produkcijow a dźěćacych filmow. Za kóždy słód je něšto pódla.“
Jězor jako zběrnik wažny
Towarstwo wojuje dźesać lět za přichod Hórnikečanskeho jězora
Wulke Ždźary (AK/SN). Aktualneho połoženja při Hórnikečanskim jězoru dla je so towarstwo Rebelow Hórnikečanskeho jězora na sakskeho ministerskeho prezidenta Michaela Kretschmera (CDU) wobroćiło. W nim mjez druhim porokuja, zo ma jězor suwanja zemje 11. měrca 2021 dla dalšich wosom lět zawrjeny wostać. „Tajke něšto njemóžeš nikomu sposrědkować“, měni předsyda towarstwa Werner Petrick. W mjenje towarstwa wón namjetuje, zo měli so zesuwane mnóstwa zemje z jězora wubagrować a za saněrowanje wužiwać. Tak móhł Hórnikečanski jězor zaso jako zběrnik słužić. Hladajo na přiběrajcy pobrachowacu wodu we Łužicy je to rozmyslowanje do praweho směra, praji Petrick. „Pruwować so tohorunja měło, hač dyrbi twar 300 metrow dołheho wotrězka pobrjoha woprawdźe wosom lět trać, štož ma dalšich 30 milionow eurow płaćić“, předsyda towarstwa argumentuje.
Nowy rekord wobdźělnikow
Bórkhamor (JoS/SN). Mjeztym hižo 14. raz wotmě so při Jantarowym jězoru pola Bórkhamora wulke zetkanje motorskich. Z wjace hač 220 motorskimi a kwadami běchu wobdźělnicy z cyłeje Němskeje přijěli a z tym nowy rekord wobdźělenja nastajili. Z tym móžachu organizatorojo z hosćićelskeho towarstwa Kurvenliga Lausitz na čas do korony nawjazać. Přetorhnyli pak tele zarjadowanje tež za čas pandemije njejsu, wone bě jenož trochu mjeńše.
Towarstwu přisłuša dźensa něhdźe 40 čłonow, mjez nimi tójšto žonow, rozprawja předsyda Bastian Lowke. Štyri žony jězdźa mjeztym ze swójskim motorskim, pjata zmištruje tuchwilu runje swoju jězbnu dowolnosć. Mjez druhim přihotowachu čłonojo a pomocnicy – dohromady bě jich něhdźe 65 ludźi – swjedźenišćo a natwarichu jewišćo. Na nim wotměchu so tři koncerty, na kotrež přichadźachu tohorunja zajimcy z Bórkhamora a wokolnych wsow.
Krabatowy mlokowy swět w Koćinje poskićuje w prózdninach ...
Prawicarski ekstremizm je změnje struktury na škodu
Zjednoćenstwo regionalnych měšćanostow a wjesnjanostow „Łužiske koło“ je warnowało, zo móhł so prawicarskoekstremizm ze zadźěwkom wuspěšnej změnje struktury stać.
Grodk/Běła Woda (SN/mb). Rěčnikaj Łužiskeho koła w Braniborskej a Sakskej, Grodkowska měšćanostka Christine Herntier a Běłowodźanski měšćanosta Torsten Pötzsch, staj so nawjazujo na prawicarske podawki zašłych tydźenjow w aktualnej zdźělence słowa jimałoj. „Toleranca, wotewrjenosć napřećo swětej a stawizniske wědomje su njeparujomne za tworjenje změny strukturow a z tym za zaručenje přichoda našeje Łužicy“, wonaj pisataj. A zdobom warnujetaj: „Prawicarskoekstremizm, relatiwizowanje a zaprěwanje złóstnistwow nacionalneho socializma kaž tež wokrasnjenje a rozšěrjenje nacionalsocialistiskeho myslenja škodźa Łužicy.“
Nowa webstrona za inkluziju(3)
Cyłkownje 18 towarstwow je so w zwisku z wubědźowanjom Leaderoweje kónčiny Hornjołužiska hola a haty „Podpěra regionalneho dźěła“ wuznamjeniło. W swojej lětnjej seriji wěnuje so wječornik dobyćerjam a chce towarstwa a jich zaměry předstajić.
Njeje tomu hišće dołho, zo bu něhdyše dwórnišćo w Radworju ze zjawnymi srědkami renowěrowane a na zetkanišćo přetwarjene. „Dwórnišćo inkluzije“ wone nětko rěka a towarstwo stara so wo to, je ze žiwjenjom pjelnić. Nětko planuje dohromady dźesać čłonkow a čłonow nowostku za inkluziwne zetkawanišćo: Nowa webstrona ma cilam towarstwa polěkować. Nimo poskitkow w formje projektow abo podobneho maja na dwórnišću mjenujcy tež hóstne stwy. Dohromady pjeć jich je, nimo toho poskićuja bydlenje. Jedna z hóstnych stwow je samo specielnje za zbrašenych ludźi wuhotowana. Tute hóstne stwy, tak powěda čłonka towarstwa Raphaela Wićazowa, maja so w přichodźe přez webstronu knihować hodźeć.
Krótkopowěsće (26.07.23)
Čas pandemije derje přetrali
Bóšicy. Po słowach předsydki Zwjazka serbskich rjemjeslnikow a předewzaćelow Móniki Cyžoweje, njeje mjez čłonami žadyn zawod, kotryž dyrbi statne pomocne srědki w času korona-pandemije wróćo płaćić. „Wjetšina předewzaćow pak je so sama starała a tutón čas bjez financneje podpěry přetrała – my Serbja wšak smy jara skedźbliwy lud“, wona doda.
Z AfD pragmatisce wobchadźeć
Drježdźany. W rozmołwje z nowinu FAZ je so ministerski prezident Sakskeje Michael Kretschmer (CDU) wčera za pragmatisku strategiju we wobchadźe z AfD na komunalnej runinje wuprajił. Zdobom pak warnuje tež před bagatelizowanjom prawicarskeho populizma. Podobnje běše so njedźelu CDU-šef Friedrich Merz w lěćnym interviewje ze sćelakom ZDF wuprajił a z tym kontrowersnu debatu wubudźił.
Atrakcija dale priwatna
Krótki puć k hašenju měli
Jednory trik móže přećiwo njezbožam pomhać
Budyšin (SN/MWj). Při tak mjenowanym dooring-njezbožu bu tele dny w Budyšinje 64lětny kolesowar ćežko zranjeny. 42lětna wodźerka Mercedesa bě swoje awto na Róžowej do směra na Pchalekowu wotstajiła. Jako wona durje wočini, zo móhła z awta wulězć, přewidźa wona wotzady přijěduceho kolesowarja, tak zo dóńdźe k zražce a 64lětny padny. W samsnym wokomiku jědźeše na Róžowej 32lětny wodźer transportera. Wón njemóžeše hižo sčasom reagować a z lěwym prědnim kolesom přez ruku na zemi ležaceho kolesowarja jědźeše. 64lětneho dyrbjachu z ćežkimi zranjenjemi do chorownje dowjezć. Wěcna škoda wučinja něhdźe 600 eurow, kaž policija informuje. Dóńdźe-li k zražce mjez wočinjenymi durjemi awta a kolesowarjom, rěča fachowcy wo tak mjenowanym dooring-njezbožu. Njetrjeba pak stajnje k zražce wjesć. Wotpowědnje spěšnosći kolesowarja móže tež k strašnemu manewrej wuwinjenja dóńć. W tym zwisku policija prosy, předewšěm na wokolny wobchad kedźbować, hdyž něchtó do awta zalěze abo z njeho wulěze. Tež kolesowarjo móža sebje a druhich škitać, hdyž dosć wěstotneho wotstawka k parkowacym awtam dodźerža.
