Adwentny chór z premjeru
Hórki. Hórčanske wjesne towarstwo „Při skale“ přeprošuje na adwentne wiki njedźelu, 22. hodownika, wot 16 hodź. při gratowni wohnjoweje wobory w Hórkach. Dźěći móža tam paslić a tež rumpodich je wopyt připowědźił. Nowosć wočakuje wopytowarjow něhdźe w 17.30 hodź., hdyž wustupi prěni raz Hórčanski adwentny chór. Poskićuja tam horce wino wot winicarja, langoš, pražene kołbaski a dalše překwapjenki.
Hodowny nyšpor z Lipu
Róžant. Chór Lipa wuhotuje sobotu, 28. hodownika, w 17 hodź. tradicionelny nyšpor w swětle swěčkow w Róžeńčanskej swjatnicy. Zastup je darmotny. Zběrka po koncerće je lětsa za dźěćacu hospicnu słužbu, kotruž Zhorjelska Křesćanska hospicna słužba organizuje.
Zwukowa instalacija přistupna
Rakecy. Spirituelnu zwukowu instalaciju wo psalmje 23 móža wopytowarjo w Rakečanskej ewangelskej cyrkwi dožiwić. Wona je hač do njedźele, 2. februara, přistupna. Psalm wo dobrym pastyrju předstajeja w modernym wobdźěłanju a ze efektami swěcy. Wopytowarjo smědźa so, na hudźbu słuchajo, po cyrkwi pohibować. Boži dom je wšědnje wot 9 do 20 hodź. přistupny.
Parada jandźelow po měsće
Přidatne problemy tunla dla
Budyšin (SN/MWj). Hodowne swjate dny su stajnje tež čas přidatneho wobchada, hdyž swójbni domoj jědu a swojich lubych wopytaja. W kombinaciji ze zymskimi poměrami na dróhach je to w zašłosći často dołhe rynki čakacych awtow na awtodróze zawinowało. Wosebje do směra na Pólsku dyrbjachu mnozy hižo dołho čakać. Lětsa móhło twarnišćo w tunlu pod Limasom přidatny problem być, kaž Zhorjelska policajska direkcija informuje. Na to chcedźa sčasom skedźbnić, zo móhli pućowacy zadźěwki wobjěć, praji nowinska rěčnica policajskeje direkcije Anja Leuschner.
Lětsa zahajichu wobšěrne twarske dźěła, zo by tunl pod Limasom na najnowšim techniskim stawje był. Wot apryla ponowja sewjernu rołu tunla, přez kotruž wobchad w normalnym padźe do směra na Drježdźany ćeče. Klětu je južna roła na rjedźe. Rołu, kotruž runje njesaněruja, wužiwaja za wobchad do wobeju směrow.
Swójsku knižku předstajili
Za jubilej dopomnjenki bywšich šulerjow zezběrali
Ralbicy (WŽ/SN). Nimale kóždy stólc bě wčera wječor w Ralbičanskej sportowni wobsadźeny, jako šulerki a šulerjo 8. lětnika tamnišeje serbskeje wyšeje šule swoju knihu z titulom „Šula je wutroba wsy“ zjawnosći předstajichu. We wobłuku adwentnički běchu chowancy originelny program spřihotowali.
W lóštnymaj scenomaj předstajichu šulske žiwjenje dźensa a za čas NDR. Zahorjeny publikum njewuhlada jenož pioněrske rubiška abo chorhoj NDR, ale tež bronzowu bustu maršala Konjewa, po kotrymž bě šula hač do politiskeho přewróta pomjenowana. Žortnemu hračku přizamkny so čitanje z noweje publikacije, při kotrymž hosćo tójšto zajimaweho z połstalětnych stawiznow delanskeho kubłanišća zhonichu.
Krótkopowěsće (20.12.24)
Město kołu přistupi
Choćebuz. Město Choćebuz je wot noweho lěta sobustaw Łužiskeho koła. Zastupjerjo měšćanskeje rady hłosowachu zawčerawšim za přistup města do zhromadneho zwjazka komunow. Kaž Choćebuski wyši měšćanosta Tobias Schick zwurazni, je město lokomotiwa změny strukturow a tuž běše přistup logiska konsekwenca. Łužiskemu kołu budźe wot 1. januara 57 komunow přisłušeć.
Płaćizny znowa stupali
Kamjenc. Twarić je w Sakskej dźeń a dróše. Hladajo na loni je indeks twarskich płaćiznow za bydlenske domy wo 3,3 proc. stupał, zdźěli wčera krajny statistiski zarjad Kamjenc. Hižo loni zwěsćichu statistikarjo rozrost wo 10,5 proc. Předewšěm je wutwar domu droha naležnosć.
Serbske powěsće z pomocu KI
Wiolinowy koncert w Kulowje
Kulow. Wobydlerske towarstwo za Kulow přeprošuje pjatk, 20. decembra, w 19.30 hodź. na wiolinowy koncert w Kulowskej Křižnej cyrkwi. Zarjadowanje wuhotuje Duo Lua – to stej sotře Aida a Lucía López Borrego ze španiskeho města Sevilla. W programje matej barokne twórby Bacha, Mozarta, Herranda a Chedevilla. Nimo toho zahrajetej sławny hodowny koncert „Fatto per la notte di Natale“ komponista Arcangela Corellisa kaž tež znate hodowne spěwy. Zastup je darmotny. Towarstwo prosy wo dary.
Fabrika zawrjena
Hórnikecy. Štóž planuje, hodowne swjate dny Hórnikečansku energijowu fabriku wopytać, dyrbi sej hinaši cil wupytać. Kaž turistiske zarjadnišćo zdźěli, wostanje wone wot njedźele, 22. decembra, hač do štwórtka, 26. decembra, za wopytowarjow zawrjene. Wot 27. decembra je fabrika zaso wotewrjena.
Ćežke časy wotwidźomne
Při zdźěłanju hospodarskeho plana so na napjate wuměnjenja přihotuja
Rakecy (JK(/SN). Rakečanska gmejnska rada wěnowaše so na swojim wčerawšim posedźenju prěnjemu čitanju hospodarskeho plana za lěće 2025 a 2026. Prjedy hač so nawodnica financneho wotrjada gmejny Franciska Pfeifferowa konkretnym ličbam za plan přiwobroćeše, poda wjesnjanosta Swen Nowotny (CDU) krótki zawod do temy. Při tym skedźbni na wužadanja, kotrež na gmejnu při planowanju a w přichodnych lětach čakaja.
W bydlenju konop namakali
Kooperaciske zrěčenje podpisali
Tež hdyž temperatury tuchwilu runje zymske njejsu, su ptački ...
Serbske hody dźěćom wosrjedź Wojerec znazornili
Wojerecy (SN/mb). Kak su ludźo před sto lětami we Wojerecach hody swjećili? Wotmołwu na to je wčera županka Gabriela Linakowa něhdźe połsta zajimcam, mjez nimi bě wjele dźěći, w měšćanskej Brigitty Reimannowej knihowni rozłožiła. A to w ramiku „žiweje adwentneje protyčki“, kiž je w starym měsće hižo wjele lět z tradiciju. Lětsa je wona zaso tež w nowym měsće po puću. Składnostnje durčkow 18. decembra stej Linakowa a filmowča Angela Šusterowa ludźi ze serbskimi hodami do doby kombinata Čorneje Pumpy a natwara noweho města zeznajomiłoj. Najprjedy witaše Linakowa wopytowarjow w swojej maćeršćinje: „Lube dźěći, lubi starši, lube wowki a dźědojo, lubi přihladowarjo!“ Zarjadowanje sćěhowachu tež čłonojo serbskeje přirady města.
