Smječkecy. Wobydlerjo Domu swjateho Jana w Smječkecach su tele dny runje tak wulku kaž njewšědnu překwapjenku ­dožiwili. Zmóžnili su ju čłonojo Kašečanskeho kluba ATV. Woni přijědźechu na swojich quadach, zo bychu sej z našimi wobydlerjemi ze swojimi jězdźidłami na małe koło wulećeli. Tak dachu sej wšitcy zhromadnje na krasnym nazymskim słónčnym popołdnju mjez Róžantom, Sernjanami a Worklecami miły wětřik wokoło nosa duć. Ze stajnje pjeć wobydlerjemi podachu so přećeljo quadow hnydom wjacore razy na puć. Samo za wobydlerjow, kiž so na tajke štyrikolesate jězdźidło hižo zady sydnyć njemóža, ­běchu myslili a tak mjenowany duo sobu přiwjezli. Z nim móžachu tež ći sobu jěć, kiž njejsu tak agilni. To běše za wšitkich wulkotne dožiwjenje a wobydlerjo ­mějachu wočiwidnje wulke wjeselo, štož na swoje wašnje tež zwuraznichu. ­Čłonam Kašečanskeho kluba ATV słuša za jich čestnohamtski angažement ­a jich prócu wosebity dźak. Micaela Krawcowa

Njeswačidło. Před 300 lětami bu stary hród w Njeswačidle twarjeny a barokny park załoženy. Hišće hač do reformaciskeho dnja 31. winowca je w Njeswačanskim domizniskim muzeju widźeć wosebita wustajeńca, kotraž tole kaž tež dalše twarjenja bliže předstaja. Něhdźe sto ­fotow a šěsć witrinow zbliži wopy­towarjej te­hdyše twary, tam so wotměwace po­dawki a swjedźenje a jich nětčiše wužiwanje. W jednej witrinje dopominaja fota a teks­ty na hońtwjerski pawiljon, kotryž bu wot lěta 1721 do 1725 twarjeny a kotryž běše w 19. lětstotku skład. W ­času hitlerskeho knjejstwa bě tam lěhwo muskich młodostnych dźěłoweje słužby a nětko je tam hižo lětdźesatki woblubowana młodownja. Wustajeńca je njedźelu popołdnju a přidatnje 31. winowca přistupna.

Holaski dwójce koncertuja

W Kulowskej wodočisćerni dźěła nětko fotowoltaikowa připrawa

Kulow (AK/SN). Z fotowoltaikowej připrawu, kotraž wot septembra w Kulowskej wodočisćerni dźěła, nadźija so město zalutowanjow při wudawkach za milinu a z tym wolóženja wobydlerjow. Tole rjekny komornik Mathias Kockert na zašłym posedźenju Kulowskeje měšćanskeje rady.

Naprawa bě w hospodarskim planje měšćanskeho zawoda předwidźana. Wona ma rjedźenske procesy we wodočisćerni potuńšeć. „Runočasnje wotpowědujemy tak zaměram wuwićoweho koncepta města Kulowa. W naprašowanju wobydlerjow kaž tež w dźěłowych skupinach su ludźo prajili, zo měli so wobnowjomne energije spěchować.

Kulturna kofejownja w Njebjelčicach wotnětka měsačnje kóždu 1. a 3. sobotu popoł­dnju na zhromadne akcije přeprošuje. Wotewrjenje zašłu sobotu je wosebje młodych zajimcow přiwabiło.

Njebjelčicy (SN/MiR). W rumnosćach Njebjelčanskeje gmejny klinčachu sobotu popołdnju njezwučene zynki. Błuke bubnowanje je ludźi pohnuło pozastać a posłuchać. Štóž je rejowarja Drježdźanskeho Statneho činohrajneho dźiwadła wuhladał, je so dźiwał a rady posydnył. Sekoo Bamogo, wukubłany rejowar a profi za afriske reje, je z wuzrawjenymi choreografijemi połnych elementow tradicionalnych afriskich rejow, přitomnych na swoje wuměłstwo putał. Wosebje pak druhi dźěl jeho poskitka, w kotrymž dóńt swojeje swójby tematizowaše, je kedźbnosć publikuma wubudźił. Pokazujo na to, kak wažnej stej měr a mjezsobnosć ludźi, dopominaše wón na morjenje swojeho nana a z tym na přiběracy njeměr a wójny we wšelkich krajach swěta.