Policija (15.10.24)
Žane zwiski přerězaneho kabla dla
Žitawa. Pućowacy su póndźelu wječor na Žitawskim dwórnišću podarmo na ćah čakali. Po rozprawje zwjazkoweje policije su njeznaći skućićeljo škleńčnonićowy kabl při železniskej čarje Habrachćicy – Žitawa přerězali. To zawinowaše wupad wuhibowarnje a z tym wupad kóždežkuli ćaha. Narunanski wobchad z busami su zamołwići mjeztym zarjadowali. Woni liča z wupadom ćahow přez cyły dźeń. Potrjechene su zwiski na čarje mjez Žitawu a Choćebuzom kaž tež zwisk Drježdźany – Žitawa – Liberec. Wěcna škoda wučinja po měnjenju fachowcow 25 000 eurow.
Šoferow pod drogami lepili
Tež w Njebjelčicach Krabata dodnili
Mjez Budyšinom, Kamjencom a Wojerecami su so wot 3. oktobra wulcy kaž tež mali wopytowarjo na dohromady 29 zarjadowanjach z temu „Krabat“ zaběrali.
Njebjelčicy (SN/lmc). Wot spočatka swojeho załoženja w lěće 2001 angažuje so Krabatowe towarstwo w Njebjelčicach za wuwiće Hornjeje Łužicy we wobłukach nałožki, tradicije a kultura kaž tež turizm a hospodarstwo. Wosebje wažne je towarstwu při tym spěchowanje serbšćiny. Tydźeń Krabata, kotryž je so kónc tydźenja zakónčił, běše dalša dobra składnosć, wopytowarjam serbsku kulturu zbližić. Zajimcam njejsu so jenož wobšěrne informacije wo Krabaće sposrědkowali, ale čłonojo towarstwa su jich tež do aktiwneho rozestajenja z temu wabili.
Srjedźowěk na wopyće
Energijowa fabrika na pućowanje po časowych dobach přeprosyła
Hórnikecy (KD/SN). Sapace płomjenja wohenja w železnych šklach, pozabyte rjemjesła ze srjedźowěka abo hercow, na starožitnych instrumentach hudźo – wšo to su wopytowarjo minjenu sobotu na Nazymskim swjedźenju wohenja wonka na arealu wokoło Energijoweje fabriki w Hórnikecach dožiwili. Wo srjedźowěkowske poskitki su so wosebje čłonojo towarstwa Eysenkraut ze Sakskeje a Bayerskeje starali. Wosebje dźěćom su mjez druhim stare rjemjesło tkanja, rězbarjenja, ćahanja swěčkow, ale tež předźěłanje kože abo kowanje zbližili.
Krótkopowěsće (15.10.24)
Wupad přemało wučerjow dla
Drježdźany. Po informacijach Sakskeho statneho ministerstwa za kultus je w minjenym šulskim lěće w swobodnym staće oficialnje něhdźe 1,7 milionow šulskich hodźinow wupadnyło. W Budyskim wokrjesu njewotmě so na wyšich šulach samo pjećina wučby po planje. Přičina noweho negatiwneho rekorda je „nadal napjate połoženje nastupajo personal“.
Knižne myto Martinje Hefter
Frankobrod nad Mohanom. Lipšćanska spisowaćelka Martina Hefter je z lětušej lawreatku Němskeho knižneho myta. Bursowe towarstwo němskeho knihikupstwa wuznamjenja ju za „mudrje choreografowany“ roman „Hey guten Morgen, wie geht es dir?“, kiž „nawigěruje wušiknje mjez euforiju a melancholiju a wutwori tak cyle swojoraznu přićahliwosć“. Z 25 000 eurami dotěrowane myto přepodadźa jej jutře na zahajenju Frankfurtskich knižnych wikow.
Husitski choral zaspěwali
Róžojte nawoči abo tola pink woči
Nic jenož na wsach, ale tež w městach maja mnozy doma skót. Něchtóžkuli nimo toho drobny skót plahuje. Wšitcy so wo strowotu swojich lubuškow prócuja. K tomu přinošować chce naša serija z pokiwami z weterinarneje mediciny. (43)
Wězo skót žane nawoči nima, chiba zo sadźiš pleńčatku raz nawoči na nós za šikwane foto. Wobłuk woči je tež we weterinarnej medicinje šěroki. Genetiske defekty, kotrež žadaja za kosmetiskej operaciju, lochke zahorjenja wokoło woči, ćeže na wóčku, defekty na zakładźe bakterijow a wirow abo tež problema cyłeho ćěła dla – warianty su mnohostronske. Za čłowjeka je widźenje něšto wulkotneho. Widźimy barby poměrnje jasnje w dalinje a w bjezposrědnjej bliskosći. Pola zwěrjatow je to hinak. Mnohe z nich widźa jenož w šěrych barbach, abo mozy njemóža wobrazy tak derje předźěłać. Někotre zwěrjata hladaja runjewon, druhe widźa, što so pódla nich stawa. Jasne pak je, spušće-li so zwěrjo na woči jako pomoc k orientaciji, je bjezdwěla ćežko za nje, jeli so zamóžnosć widźenja nadobo pohubjeńši, abo samo zhubi.
Do přirody sej wujěchali
Gmejnska rada Pančicy-Kukow
Pančicy-Kukow. W Lejnjanskim hosćencu „K Lipje“ wotměje so wutoru, 15. oktobra, w 19 hodź. zhromadźizna gmejnskeje rady Pančicy-Kukow, na kotruž wjesnjanosta Markus Kreuz wutrobnje přeprošuje. Mjez druhim poda so rozprawa gmejny k dodźerženju hospodarskeho plana 2024 a znazorni so próstwa wo zwyšenje kapacity wot 32 na 50 pěstowarskich městnow w serbskej pěstowarni we Wotrowje.
Saněruja móst w Koćinje
Koćina. Po tym, zo je so tele dny na sewjernej kromje Koćiny saněrowanje betona při mosće přez Čorny Halštrow zahajiło, je puć do Salowa nětko na wosom dnjow zawrjeny. Wobjězdka přez Hózk je zarjadowana.
Serbske baje za cyłu swójbu
Kulow. Rěčnej motiwatorce projekta ZARI Marija Šołćic a Juliana Kaulfürstowa přeprošujetej wosebje swójby štwórtk, 17 oktobra, wot 10 hodź. do zetkawanišća wustawa Jakubetz w Kulowje na wosebite zarjadowanje k temje „serbske baje“. Tute nochcytej jenož čitajo předstajić, ale so tež zhromadnje na cyle kreatiwne wašnje z nimi rozestajeć.
Gmejnska rada w Radworju
Wočerstwjacy program zahorił
Slepo (JoS/SN). Dobrych sydom lětdźesatkow hižo pěstuja Serbja tradiciju nazymskich koncertow. Po cyłej Łužicy su wone mjeztym z kulturnej tradiciju. Na wčerawši koncert w Serbskim kulturnym centrumje w Slepom, kotryž wuhotowa Serbska rejowanska skupina Smjerdźaca, je něhdźe 50 wopytowarjow přichwatało.
Před 60 lětami załoženy ansambl woswjeći za tři njedźele w Chrósćicach swój wulki jubilej. Něhdźe 80 čłonow wšelakeje staroby kulturnemu ćělesu přisłuša. Někotři z rejowarkow a rejowarjow, kotřiž běchu skupinu za swój čas załožili, so dźensa hišće aktiwnje na wustupach wobdźěluje. Tež w Slepom tomu tak běše. Wšitcy čłonojo kulturneho ansambla bydla w Smjerdźacej abo wokolnych wsach. Hłowny zaměr cyłka je pěstowanje a zachowanje serbskich rejow a serbskich pěsnjow, serbskeje hudźby scyła. Do kruha sobuskutkowacych słušeja nimo rejowarjow tež hercy a spěwarjo.
Łužiske speciality wosebje wabili
Jednaćel Tobias Kockert je sobotu mnohich hosći na swjedźeń domchowanki witał, kotryž zawod Krabatowy mlokowy swět mjeztym hižo dwanaty raz składnostnje Kulowskeje kermuše na swojim dworje wuhotuje.
Koćina (aha/SN). Njeličomne parkowace awta ze wšěch kónčin Sakskeje a Braniborskeje su přeradźili, zo běchu mnozy rjane wjedro wužili a sej do Koćiny dojěli. Kulowski farar Gabriš Nawka žohnowaše płody ratarskeho dźěła a zhromadnje so wšitcy „Strowa sy, Marija“ tež serbsce pomodlichu. Marta Zahrodnikec zahra dopołdnja na swojich dudach tež wjacore serbske pěsnje. Z tym njeje jenož serbskich wopytowarjow zahoriła.
Zabawny, powučny a słódny
Poskitk na nazymskim swjedźenju w Małym Holešowje wjele ludźi přiwabił
Mały Holešow (CS/SN). Loni so nazymski swjedźeń na rybarskim dworje w Małym Holešowje wotměł njeje, dokelž objekt na moderny centrum za kubłanje wo wobswěće přetwarjowachu. Nětko je twarjenje, kotrež wulkotnje z krajinu hornjołužiskeje hole a hatow harmoněruje, hotowe. Na nazymskim swjedźenju wčera dožiwi móhłrjec swoje njeoficialne wotewrjenje – oficialnje poswjeći so přichodny pjatk. Nětko, w nazymskich prózdninach, witaja tam hižo prěnje skupiny šulerjow, kotrež přenocuja. Hač do 15 šulerjow a kubłarjow ma tu nóclěh.
