Pěstuja tež serbske ludowe reje
Krótkopowěsće (16.10.23)
Ličba nadpadow stupa
Drježdźany. Sakski krajny kriminalny zarjad zwěsća stupace ličby nadpadow na stronske běrowy w Sakskej. W prěnich třoch kwartalach loni běše jich 36, w samsnej dobje lětsa je 46 njeskutkow. Nadpady měrja so wosebje na běrowy zapósłancow strony Zelenych. Tu je so ličba wot 16 loni na 32 lětsa podwojiła. Ćežišći přeńdźenjow stej wokrjes Zhorjelc a město Lipsk.
Saksojo při Mohanje
Frankobrod nad Mohanom. Na lětušich knižnych wikach w Frankobrodźe nad Mohanom wobdźěli so wjace hač 30 wustajerjow ze Sakskeje. Nimo zhromadneho wustajenišća za spěchowanje hospodarstwa Sakska tzwr (WFS) prezentuja so nakładnistwa, ćišćernje a posłužbowarjo na swójskich stejnišćach. Wiki wotměwaja so wot 18. do 22. oktobra.
Aziski šeršeń w Čěskej
Saki přirodoškitarjow su zaso wottwarjene
Njeswačidło (SN/MWj). Wot meje su sobudźěłaćerjo spěchowanskeho towarstwa Njeswačanskeje ptačoškitneje stacije při Holešowskim haće populaciju spěwatych ptačkow přeslědźili. Za to kołowokoło hata 16 sakow nastajichu, je hodźinsce kontrolowachu a zapopadnjene ptački z nich wzachu. Při nich zwěsćichu starobu a splah. Po tym zo ptački wopjeršćenichu, je zaso do swobody pušćichu.
Wopak parkować je drohe
Zarjadniski zwjazk dotal wjace hač 20 pokutow wupisał
Pančicy-Kukow (SN/MWj). Při Dróze Ćišinskeho w Pančicach-Kukowje raz spěšnje z awtom pozastać a sej k wječeri dener sobu wzać abo něšto metrow dale we wotnožce lutowarnje skrótka pjenjezy wotzběhnyć a awto w tym času poł na puću a poł na chódniku stejo wostajić. Štož je móhłrjec hižo wěčnje z wašnjom a na čož je dotal lědma štó hladał, ma nětko konsekwency w formje pjenježneje pokuty.
„W zašłych tydźenjach dóstachmy přiběrajcy pokiwy a naprašowanja, zo awta při Dróze Ćišinskeho w Pančicach-Kukowje zdźěla na chódniku parkuja“, rozłoži předsyda zarjadniskeho zwjazka Při Klóšterskej wodźe Stefan Anders. W tajkim padźe na wonym městnje hižo z rolatorom abo chorobnym stołom nimo njemóžeš. „Tež zastupjerjo gmejnow w zhromadźiznje zarjadniskeho zwjazka su nas na to skedźbnili, zo měli tam trochu dokładnišo za prawym hladać“, praji Anders.
Ptački w srjedźišću stali
Hodźij (kž/SN). Najwšelakoriše ptački su njedawno w Hodźiju wjele zajimcow přiwabili. Tam wotmě so wustajeńca ptačkow, kotrež su hobbyjowi plahowarjo předstajili. Jich angažement słuži k zdźerženju jednotliwych družin. Tule wustajeńcu je Budyske towarstwo plahowarjow ptačkow, kotrehož předsyda je mjeztym hižo 50 lět Heinz Schlanstedt, organizował. Budyšin zhladuje na jara dołhu tradiciju plahowanja. Wšako wobsteji tudyše towarstwo plahowarjow hižo 130 lět, kaž je ze stawizniskich podłožkow wučitać. Z tym drje je wone w Němskej jedne z najstaršich tajkich cyłkow. Mjez wustajerjemi běše tež Jurij Žur z Pančic-Kukowa. „Wot kónca 1980tych lět eksotiske ptački plahuju. Zajim za to sym hižo jako dźěćo přez mojeho nana do kolebki połoženy dóstał“.
Šćežki Trija Misterio po wjace hač 13 lětach rozeńdu. Wčera ...
Krótkopowěsće (13.10.23)
Dźensa jubilej klóštra
Pančicy-Kukow. Klóšter Marijina hwězda w Pančicach-Kukowje zhladuje dźensa na 775 lět swojeho wobstaća. 13. oktobra 1248 je Bernhard III. Kamjenski klóšter załožił. We wopismje z tymle datumom je mjez druhim rjadowane, kotre wobsydstwo so klóštrej přewostaji, zo bychu knježny hospodarsce zastarane byli. W tym zwisku su mjez druhim Chrósćicy a Nowoslicy mjenowane.
„Prjedy hač woteńdźeš“ w SLA
Budyšin. W knize kaž tež na DVDji pod titulom „Prjedy hač woteńdźeš“ su so basnica Róža Domašcyna, fotograf Maćij Bulank a komponist Měrćin Weclich z pozhubjenjom serbskeje drasty ze wšědneho žiwjenja zaběrali. Nětko předstaji SLA w komornohudźbnym kruchu dźěła tutych wuměłcow, a to 14. kaž tež 31. oktobra serbsce a 15. oktobra němsce.
Filmowy festiwal z nowej rubriku
Stawiznički podłu kolijow
Nowa wosebita wustajeńca wěnuje so 150lětnym stawiznam železnicy
Łaz (AK/SN). Figurina šafnerki wopytowarja přećelnje wita. Wokoło njeje su tafle a dźěle signalowych připrawow wustajene. Ćišćak za jězdźenki dopomina na wšědny dźeń na bywšim Łazowskim dwórnišću. „Chcemy stawizny tak pokazać, zo su zrozumliwe. Staršim wobydlerjam su to dopomnjenki, nowšim skerje nastorki“, praji Reinhardt Schneider z předsydstwa spěchowanskeho towarstwa Domu Zejlerja a Smolerja wo nowej wosebitej wustajeńcy „150 lět železnica we Łazu“. Jutře, pjatk, přehladku we 18 hodź. wotewru.
„Podłu železniskeje čary Wojerecy – Kohlfurt so lětsa stajnje zaso na jeje nastaće před 150 lětami dopomina“, praji Reinhardt Schneider. Mjez druhim přewjedźechu we Wojerecach dwórnišćowy swjedźeń. Nowa wustajeńca we Łazu swójske dopomnjenki přida, wšako běchu so tu kolijow dla stajnje zaso dróhi, puće a mosty změnili. Tež železnisku čaru su wjacore razy přepołožili.
Policija (12.10.23)
Wandalojo zachadźeli
Njeswačidło. Po wšěm zdaću bjez rozuma su wandalojo minjene dny w parku Njeswačanskeho hrodu zachadźeli a kóncowali. Tam powalichu woni pěskowcowu figuru z jedneje ze studnjow. Při tym so figura chětro wobškodźi. To pak njeznatym njedosahaše, přetož woni tež hišće škleńcu durjow bliskeho hrodu rozbichu. Dohromady nasta tak něhdźe 5 200 eurow škody.
Móžnosće dźěła pola BKA
Budyšin. Informaciske zarjadowanje zwjazkoweho kriminalneho zarjada (BKA) wotměje so štwórtk, 19. oktobra, wot 16.30 do 18 hodź. w powołanskim informaciskim centrumje Budyskeje agentury za dźěło. Karjerowy poradźowar předstaji móžnosće wukubłanja a wuwića za šulskich wotchadnikow, studijnych absolwentow a fachowcow. Zajimcy móža so darmotnje wobdźělić, a to wosobinsce abo online. Při přizjewjenju pod telefonowym čisłom 03591/ 661 410 abo e-mailnje pod měli woni zdźělić, w kotrej formje so wobdźěla.
Hdyž zwěrjenc wotući
Wojerecy. Při wosebitym wodźenju po Wojerowskim zwěrjencu móža zajimcy njedźelu, 15. oktobra, wot 8 hodź. wobkedźbować, kak zwěrjenc wotući. Zwěrjencowa pedagogowka Silke Kühn wobdźělnikam přeradźi, što so w zwěrjencu stawa, prjedy hač prěni wopytowarjo přichadźeja, kotre zwěrjata jako prěnje swoju snědań dóstawaja a štó nowy dźeń wobstajnje zaspi.
