Rjana swěca a barokne kostimy
Budyska nakupowanska nóc Romantika tysacy wopytowarjow přiwabiła
Budyšin (CS/SN). Lětuša Budyska Romantika měješe předwčerawšim popołdnju rjany serbski zazběh z wernisažu Nowowješćanskeho drjeworězbarja Mikławša Dyrlicha w rumnosćach Serbskeje kulturneje informacije w Serbskim domje. Je to hižo třeći serbski wuměłski rjemjeslnik, kotrehož twórby tam zjawnosći předstajeja. Nic jeno Serbam derje znaty drje je Mikławš Dyrlich swojich drjewjanych běło-złotych narownych křižow na Ralbičanskim kěrchowje dla. Dohromady je něhdźe 600 tajkich w swojim wuměłsko-rjemjeslniskim žiwjenju stworił, kaž sam rjekny. Wón je dźěłarnju swojeho nana přewzał a wjedźe rězbarsku tradiciju swójby dale. Nadawki wšak dochadźeja z cyłeho swěta k njemu, samo za Vatikan je hižo dźěłał. Sobotu běše jeho tež bratr, basnik a awtor Benedikt Dyrlich, na wotewrjenje wustajeńcy přewodźał. Wón předstaji publikumej swój essay „Rězbarske wuměłstwo mojeho nana“, a to w serbskej runje tak kaž w němskej wersiji.
Policija (04.11.24)
Póćmje do howjadow zrazył
Chrósćicy. 30lětny šofer transportneho awta marki VW běše sobotu w połnocy na Puću při pomniku w Chrósćicach po puću. Wosrjedź njewobswětleneje dróhi stejachu tři młode howjada, kotrež jězdźer přepozdźe wuhlada, tak zo do jednoho z nich zrazy. Wone wobchadne njezbožo přežiwiło njeje. Tamne zwěrjata so nhjezranichu, wobsydnicy su je pozdźišo zapopadnyli. Howjada móžachu z pasty twochnyć, dokelž běše zastaranje elektriskeho płotu z milinu přetorhnjene. Cyłkowna škoda wobchadneho njezboža wučinja něhdźe 21 000 eurow. Policija nětko za přičinami wobškodźenja płotu slědźi.
Hdyž wutroba wosłabi
„Posłuchaj lěkarja, prjed hač jeho trjebaš!“, serbske přisłowo namołwja.
Tuž wěnuje so student mediciny Pětr Dźisławk znatym a mjenje znatym chorosćam, zo by je čitarjam trochu bliže rozłožował (57).
Insuficienca wutroby je w Němskej přičina čisło jedyn za zapokazanje do chorownje. Insuficienca wopisuje w medicinskim zmysle njezamóžliwosć organa abo organoweho systema, swoje nadawki w dosahacej měrje wukonjeć. Hłowny nadawk wutroby je krej klumpać a tak cyłe ćěło z kislikom zastarać. Je-li wutroba insuficientna, njeje to hižo na normalne wašnje date. Móžnych přičin za to je tójšto. W zapadnym swěće zawinujetej koronarne schorjenje wutroby – potajkim zatykane žiłki – a wysoki krejny ćišć 70 do 90 procentow wšěch insuficiencow wutroby. Wina na tym je předewšěm naš njestrowy žiwjenski stil. Dalše móžne přičiny su mylenja rytmusa wutroby, schorjenja wutrobowych zapadnicow abo infekcije.
Zarjadniski zwjazk přeprošuje
Pančicy-Kukow. Zarjadniski zwjazk „Při Klóšterskej wodźe“ přeprošuje wutrobnje na zjawnu zhromadźiznu, kotraž wotměje so jutře, 5. nowembra, w sydarni twarjenja Zarjadniskeho zwjazka w Pančicach-Kukowje. Započatk zjawneho dźěla posedźenja je w 19 hodź.
Z Argonawtami na dyrdomdej
Budyšin. We wobłuku swojeho rjadu zarjadowanjow „Stawizny hwězdow“ přeprošuje Budyska hwězdarnja sobotu, 9. nowembra, cyłu swójbu na přednošk wo grjekskej powěsći wo Argonawtach. Dyrdomdej započina so w 19.30 hodź. Zastup za dorosćenych płaći 10 a za dźěći hač do staroby 17 lět 5 eurow.
Na Kilimandźaro so podać
Łaz. Pod titulom „Třo přećeljo, jedyn Awstričan a zhromadny dyrdomdej“ rozprawja Łazowski wjesnjanosta Thomas Leberecht (CDU) pjatk, 8. nowembra, we Łazowskej radnicy wo „jednym z najwjetšich dyrdomdejow swojeho žiwjenja“, kaž sam praji: Wo postupje na Kilimandźaro, najwyšu horu Afriki. Spěchowanske towarstwo Zetkanišćo Dom Zejlerja a Smolerja wšitkich zajimcow wutrobnje na wobrazowy přednošk přeprošuje. Spočatk je we 18 hodź.
Star-Wars-dźeń w bibliotece
Strategiju naslědnosće schwalili
Na swojim posedźenju minjenu srjedu je měšćanska rada w Běłej Wodźe zakładny koncept komunalneje přirady za naslědne wuwiwanje města schwaliła.
Běła Woda (AK/SN). Z dwanaće hłosami porno sydom wzdaćam hłosow su radźićeljo zakładny koncept k dołhodobnej strategiji naslědnosće města přiwzali. „Na nim sobu dźěłali su wobydlerjo, towarstwa, předewzaćeljo kaž tež zastupjerjo politiki a zarjadnistwow“, podšmórny społnomócnjeny za naslědnosć w měsće Běła Woda Martin Gärtner.
Krótkopowěsće (04.11.24)
Předpředań zahajili
Budyšin. Załožba za serbski lud informuje, zo su zastupne lisćiki za lětušu 150. schadźowanku wotnětka online na předań. Wotpowědny link podawaja pod https://stiftung.sorben.com. Tradicionalne „zetkanje serbskich studentow, gymnaziastow a absolwentow kóždeježkuli starobneje skupiny“ wotměje so na zwučene wašnje tydźeń do prěnjeho adwenta, lětsa potajkim sobotu, 23. nowembra, w Budyskej měšćanskej hali „Króna“.
Šulerka z Budyšina na 2. městnje
Drježdźany/Budyšin. W Sakskim krajnym sejmje su so kónc tydźenja zaso šulerjo z cyłeje Sakskeje wo titul najlěpšeho rěčnika wubědźowali. Druhe městno – snadnje za dobyćerjom Jakobom Paridonom z Drježdźan – docpě 17lětna Nathalie Juhnke z 12. lětnika Budyskeho Schilleroweho gymnazija. Wona bě so prašenju wěnowała, hač „słušeja klasikarjo literatury hišće do wučby šulow“.
Dźesać kandidatow přizwolili
Wokrjes na zymu přihotowany
Běrow zapósłanče wopytać
Kamjenc. Elaine Jenčec, nowa zapósłanča CDU w Sakskim krajnym sejmje, kotraž zastupuje region kołowokoło Kamjenca, přeprošuje wšitkich zajimowanych na „dźeń wotewrjeneho běrowa“ štwórtk, 7. nowembra, wot 15 do 17 hodź. na Zapadnej 4 w Kamjencu. Wona wjeseli so na zabawne popołdnjo při kofeju a tykancu a přeje sej „diskusiju, wuměnu nazhonjenjow a dobru mjezsobnosć na wužitk našeje domizny“. Přeprosyła je wona tež něhdyšeho sakskeho ministerskeho prezidenta prof. dr. Georga Milbradta, kiž bě wot 1994 do 2009 zapósłanc samsneho wólbneho wokrjesa. Přizjewjenja za tutón dźeń trěbne njejsu.
Zhromadnje spěwać
Budyšin. Zwjazk serbskich spěwarskich towarstwow přeprosy wšitkich zajimcow wutrobnje na přichodne zhromadne spěwanje do rumnosćow Serbskeho ludoweho ansambla a to wutoru, 5. nowembra, wot 18 hodź. Dalši termin je za 3. december planowany.
Zarjadniski zwjazk přeprošuje
Přehladka drjewjanych twórbow
Podpěruja w ćežkej financnej situaciji
Wojerecy (AK/SN). Město Wojerecy podpěruje powšitkownowužitny Kulturny zawod zwěrjenc, kultura a kubłanje w swojej tuchwilnej ćežkej hospodarskej situaciji. To su měšćanscy radźićeljo wutoru na swojim posedźenju z wjetšinu wobzamknyli. Zo by aktualny deficit w zawodowym wuslědku wurunać móhł, dóstanje lětsa hišće 500 000 eurow a přichodne lěto w januaru jónkrótnje wo 200 000 eurow wyšu přiražku za swoje zawodne kóšty přepokazane.
Přičiny njedobreje financneje situacije kulturneho zawoda su předewšěm lěto a stupace personalne kóšty kaž tež stupace płaćizny w dalšich wobłukach, na přikład za energiju. Pozitiwne wuwiće hladajo na dochody a konstantne přiražki města njejsu stupace kóšty wurunali. W lěće 2011 załoženemu kulturnemu zawodej přisłušeja dźensa ludowa uniwersita, hudźbna šula, hród, měšćanski muzej, měšćanska biblioteka Brigitte Reimann kaž tež Wojerowski zwěrjenc. Město Wojerecy je po sto procentach towaršnik zawoda.
