Při Šibojskim jězoru so něšto hiba
Město Wojerecy chce wot klětušeho nalěća na zapadnym přibrjoze Šibojskeho jězora wšelake turistiske twarske projekty zwoprawdźić. Jako prěnje ma so areal za wobchad a medije wotkryć a wuhladna wěža natwarić. To podšmórny wyši měšćanosta Torsten Ruban-Zeh (SPD) wčera na posedźenju měšćanskeje rady.
Wojerecy (AK/SN). „Móžemy projekt nětko zahajić. Wjeselu so na přichodne rozmołwy z wobydlerjemi na městnje“, hódnoći Torsten Ruban-Zeh do přichoda sahace wobzamknjenja rady.
Krótkopowěsće (27.09.23)
Maja spěšnišo jednać
Podstupim. Braniborske krajne knježerstwo je wčera wobzamknyło, zo maja šule w přichodźe spěšnišo w padźe ekstremizma jednać. Tak přihłosowaše kabinet naćiskej noweho šulskeho zakonja. We wotpowědnym paragrafje rěka, zo měli so pady ekstremistiskeho, antisemitiskeho abo rasistiskeho zadźerženja hnydom šulskemu zarjadej zdźělić.
Stipendijej přijimałoj
Budyšin. Lětušej stipendiatce Mättigoweje załožby staj minjenu njedźelu w Budyskej cyrkwi swj. Pětra šekaj po stajnje 1 200 eurach přijimałoj. Corneliji Müller ze Zhorjelca přiznachu spěchowanje za zdźuěłanje swojeje promocije wo hašenju wohenja w Hornjej Łužicy w 18. a 19. lětstotku a Drježdźanjance Lisy Hallex za spisanje masterskeho dźěła wo hajenju parka w Mohornje (Ohorn) pod aspektom pomnikoškita.
Zaso doma produkować
Ze zbrašenymi do Sakskeje Šwicy jěli
Radźićeljo wuradźuja
Chrósćicy. Přichodne posedźenje Chróšćanskeje gmejnskeje rady wotměje so štwórtk, 28. septembra, w 19 hodź. w tamnišim gmejnskim a kulturnym centrumje. Mjez druhim póńdźe wo wysokosć staršiskeho popłatka za hladanje dźěći w Chróšćanskej pěstowarni. Dale na dnjowym porjedźe steja wustawki wo wudawkach za zasadźenje wohnjoweje wobory a změna wobtwarjenskeho plana „Při pastyrni“ w Chrósćicach. Zjawnemu posedźenju přizamknje so njezjawny dźěl. Zajimcy su wutrobnje přeprošeni.
Wjelk dwě wowcy torhnył
Hórki. W nocy na minjenu sobotu je w Hórkach na kromje wsy do směra na Chrósćicy wjelk dwě wowcy morił. Jeju wobsedźer, kotryž měješe dohromady štyri wowcy na pastwje, je škodu hnydom přisłušnemu městnu přizjewił. Fachowc je hišće sobotu dopołdnja přijěł a po obdukciji wobkrućił, zo běše to wjelk. Tamnej wowcy móžeštej so wuchować a najprjedy raz ćeknyć. Jej su w běhu dnja zaso namakali.
Na slědach čłowjeka-kuzłarja
Krabatowu dobru dušu sej na mnohe wašnje wotkryć
Wojerecy (AK/SN). Lětuši Krabatowy tydźeń w Hornjej Łužicy zahaji tónle pjatk dožiwjenska tura KRABATschadowitz po starych Wojerecach z dźesać stacijemi. „Zasadźimy na turje zaměrnje měšćanskich přewodźerjow a specialistow, kotřiž Krabatowu powěsć derje znaja a ju sposrědkuja. Kóžda stacija je woprawnjeny segment wědy“, Belinda Grellmann z marketingoweho towarstwa Swójbny region HOY wuswětla. Krabat (Wolfgang Kraus z Wulkich Ždźarow) a jeho chronist (Hans-Jürgen Schröter z Kulowa) chcetaj ducy po měsće so z wopytowarjemi rozmołwjeć.
Klóšter w Oseku sej wobhladali
Předsydstwo Domowinskeje skupiny Pančicy-Kukow je sej za lětuši wulět skupiny cyle wosebity cil wupytało: cistercienski klóšter w čěskim Oseku. Osek je wjele wobydlerjam Pančic-Kukowa znate zapřijeće. Měješe dźě abt osekčanskeho klóštra mnohe lětdźesatki dohlad nad klóštrom Marijna hwězda a za čas wojowanjow na kóncu Druheje swětoweje wójny wućěkachu mniški wottud do Oseka.
Zašłu sobotu wužiwaše tójšto skupinarjow a někotři hosćo składnosć, pobyć w klóštrje w Oseku a sej wobhladać w baroknej pyše dorestawrowanu cyrkej Marije donjebjeswzaća kaž tež powostanki romaniskeje a gotiskeje architektury. Najžadniši tam wuchowany wuměłski eksponat je ambo z wudypaneho pěskowca a wjerćatym so pultom.
Žłobik, pěstowarnja a hort dróše
Worklecy (SN/MG). Ćežke běchu to rozsudy, kotrež mějachu čłonki a čłonojo Worklečanskeje gmejnskeje rady na swojim njedawnym posedźenju tworić. Prěni tajki bě doskónčne powyšenje popłatkow za žłobik, pěstowarnju a hort. Při tym złožowachu so na zakonske předpisy kubłanskeho ministerstwa. Wot 1. januara 2024 maja starši nětko slědowace popłatki zapłaćić: za žłobik 223 eurow, za pěstowarnju 123 eurow a za hort 70 respektiwnje 58,33 eurow. Tute popłatki wšak běchu radźićelki a radźićeljo hižo na zašłym wuradźowanju wudiskutowali a je nětko jeničce hišće wobkrućichu.
Doby přesahowaca hudźba a poezija
Bywši organist Berlinskeje katedrale swj. Jadwigi Tomaš Žur a jeho mandźelska Roswitha staj minjenu sobotu beneficne hudźbno-literarne popołdnjo w Pančicach-Kukowje wuhotowałoj. Po zarjadowanju zezběrane pjenježne dary maja so na „dobro tamnišeho klóštra Marijina hwězda nałožować“.
Pančicy-Kukow (SN/bn). „Dajmy so zawjesć do kuzła pišćeloweje hudźby. Hudźba je moraliski zakoń. Wona dari našim wutrobam dušu, spožči myslam křidła, da fantaziji rozkćěwać“, powita Leńka Andersowa něhdźe 60 wopytowarjow w klóšterskej cyrkwi, citujo filozofej Platonej připisane słowa. Skrótka předstaji wona organista a jeho mandźelsku a doda, zo nadźija so bohateje kolekty za wobchowanje mjeztym 775 lět wobstawaceje cistercienskeje abtownje a zo prosy wo to, so přikleska „mjez jednotliwymi přinoškami wzdać“.
