Chcedźa energiju ze słónca wužiwać
Hamor (AK/SN). Twarscy dźěłaćerjo bórze do Hamorskeho gmejnskeho zarjadnistwa zaćahnu. Komuna da fasadu saněrować a fotowoltaikowu připrawu z bateriju kaž tež nabiwansku staciju instalować. Tomu je gmejnska rada na swojim zašłym posedźenju přihłosowała. Fotowoltaiku za 73 000 eurow natwari elektrozawod z Delnjeho Wujězda, firma z Rychwałda za 103 000 eurow fasadu ponowi.
„Dyrbimy telko pjenjez za fasadu wudać a našu kasu tak jara poćežować?“, so radźićel Thomas Stenzel prašeše. Twarska nawodnica Cortina Kokles skedźbni na to, zo je projekt hižo wjacore lěta planowany. „Dom je nětko 25 lět stary. Saněrowanje je tuž nuznje trěbne“, wona rjekny. Gmejna nadźija so spěchowanja we wobjimje 70 procentow. We wobłuku twarskich dźěłow zatwarja do gmejnskeho zarjadnistwa lift, zo móhli tež starši ludźo zarjadnistwo jednorišo docpěć.
Mongolska kultura w Njebjelčicach
Kamjenc/Njebjelčicy (SN/MiR). Cyłoněmski lětuši interkulturny tydźeń steji pod hesłom „Nowe rumy“. Do toho hodźi so poskitk Drježdźanskeho towarstwa GER (Zhromadne wuwiće realizować). Zhromadnje z Njebjelčanskim towarstwom Sowutu přihotuja jeho čłonojo prěni króć tónle „Mongolski kulturny dźeń“ w Njebjelčicach. Poboku maja woni čłonow towarstwa Witajće do Kamjenca a njedawno hakle załoženeho towarstwa Kultur Club XDörfer z Drježdźan. W kooperaciji z Mongolskim młodźinskim zwjazkom su so wo wobdźělenje prócowali. Ze swojej ideju Mongolsku na wsy předstajić pak su sej mjez organizatorami interkulturnych tydźenjow w Budyskim wokrjesu wjele sympatije zbudźili. Tuž wotměje so „Mongolski kulturny dźeń“ 23. septembra wot 11 hodź. na swjedźenskej łuce při Njebjelčanskim gmejnskim zarjedźe. Tuchwilu wšak přewjedu so zarjadowanja interkulturelneho tydźenja přewažnje w Budyšinje, Kamjencu a Wojerecach.
Reichsbürgerow domoj pósłali
Hamorska gmejna so zarjadowanju prawicarjow wuspěšnje wobarała
Hamor (AK/SN). Z wulkozasadźenjom zastojnikow je policija minjeny kónc tydźenja zakaz swjedźenja reichsbürgerow na Bjerwałdskim hrodźe přesadźiła. Wot pjatka su wšěch kontrolowali, kiž chcychu na tři dny trajace zarjadowanje přijěć. Nimale 250 jězdźidłow su přepruwowali a 153 ludźi, kotřiž chcychu so na swjedźenju tak mjenowaneho „kralowstwa Němska“ wobdźělić, su wróćo pósłali. Někotři z nich su so pozdźišo na statok w srjedźnej Sakskej wuwinyli.
Bjez wukrajnikow žadyn přichod?
Tema připućowanje dźěłowych mocow je na njedawnej Łužiskej konferency DGB wažnu rólu hrała. Krótko na to je so komunalne zwjazkarstwo Łužiske koło tež z tym zaběrało.
Wojerecy/Běła Woda (SN/at). Přińć a wostać, jenož tak móže so změna strukturow we Łužicy radźić. To snadź je hłowne poselstwo lětušeho třećeho schadźowanja Łužiskeho koła minjeny štwórtk we Wojerecach. Brizancy temy připućowanja dla běše sakske hospodarske ministerstwo na zetkanju we Wojerecach derje zastupjene. Jeho statna sekretarka Ines Fröhlich zawodnje wuzběhny, zo je dalše wuske strategiske a krajej přesahowace zhromadne dźěło mjez komunami a krajnymaj knježerstwomaj trěbne. Fröhlich wuraznje chwaleše něšto dnjow po wopyće delegacije Łužiskeho koła pola zwjazkoweho ministra za hospodarstwo a klimu Roberta Habecka (Zeleni) w Berlinje iniciatiwu, tež ze zwjazkowej politiku so direktnje rozmołwjeć.
Krótkopowěsće (18.09.23)
Přećiwo wuswojenju lěsa
Freiberg. Sakski wyši hórnistwowy zarjad w Freibergu je dźensa wo wuswojenju priwatneho lěsa blisko Rownoho za Wochožansku jamu jednało. Mějićeljo a Zelena liga jako najenk přećiwjataj so předani woneje połhektarskeje přestrjenje LEAG. Wažny argument přećiwnikow je, zo wot 2026 žadyn wobkrućeny ramikowy zawodny plan jako zakład móžneho wuswojenja njepředleži.
Hornjołužiska firma w Gdańsku
Drježdźany/Gdańsk. Sakski know-how na kolije wjazanu mobilitu nastupajo steji w srjedźišću mjezynarodnych wikow železniskeje techniki TRAKO wot jutřišeho hač do pjatka w pólskim Gdańsku. Na zhromadnym stejnišću z Clusterom za železnisku techniku Rail.S a z Hospodarskim spěchowanjom Sakskeje je mjez dźesać předewzaćemi tež firma Lakowa z Wjelećina zastupjena.
Tarifowy konflikt so přiwótřa
Statoki znowa přeprošuja
Wjace hač nazymska dekoracija
Hród je wjeselo a brěmjo
Što njewšědne wobsydstwo za gmejnu scyła woznamjenja?
Njeswačidło (UM/SN). Štó drje wo tym njesoni, měć swójski hród? Za Njeswačansku gmejnu je tónle són woprawdźitosć. Wona wobsedźi daloko znaty hród z parkom, kiž wjele wopytowarjow do gmejny sewjernje Budyšina přiwabja. Lětsa swjeći barokna připrawa, do kotrejež słušeja tohorunja wjacore pawiljony, 300. róčnicu. Wo tym swědči mjez druhim z wjele prócu zestajena wustajeńca w domizniskim muzeju. Što pak za mału wjesnu gmejnu kaž Njeswačidło woznamjenja, hród wobsedźeć? „Je to wjeselo a zdobom brěmjo“, wjesnjanosta Gerd Schuster (CDU) wuznawa, jako wón durje hrodu wotamknje. Wopytowar hnydom do dawnych časow zastupi. Na wulkej žurli jako žro hrodu je wjele pychi widźeć. Wot wulkeho swěčnika pućuje wóčko k wjerchej a sćěnam, kotrež su ze stukom a mólbami wudebjene.
Zelena swěca za festiwalej
Hamor (AK/SN). Při Bjerwałdskim jězoru w Hamorskej gmejnje smětej so tež klětu wulkej festiwalej pod hołym njebjom wotměć. To je gmejnska rada na swojim zašłym posedźenju wobzamknyła. HOLI open air budźe 8. junija 2024 na Hamorskim pobrjohu. Je to mjeztym dźesate zarjadowanje tajkeho razu. Zarjadowar je předewzaće GBG z Niskeje. Jednaćel Toni Heide liči z něhdźe 5 000 wopytowarjemi.
Přewjesć smědźa tež festiwal „Break the Rules“, a to wot 25. hač do 28. julija 2024 na Klětnjanskim pobrjohu. Za to gmejna a Nišćanske předewzaće za gastronomiju a catering HKH zrěčenje wotzamknjetej. Z nim rjaduja wužiwanje jednotliwych ležownosćow. Tu liča z něhdźe 9 000 wopytowarjemi.
Policija (15.09.23)
Wopiteho dwójce lepili
Budyšin. Policajscy zastojnicy su srjedu na Cyhelskim nasypje w Budyšinje wodźerja Fiata kontrolowali. Pola 45lětneho naměrichu 1,94 promilow alkohola w kreji. Policisća přikazachu, zo ma muž krej wotedać, a jemu dalšu jězbu zakazachu. To pak bě jemu po wšěm zdaću smorže. Połdra hodźiny pozdźišo mjenujcy muža znowa kontrolowachu, tónraz na Tuchorskej. Tam měješe wón mjeztym 2,0 promilow intus. Zastojnicy wupisachu wospjet chłostanske přizjewjenje a kluč awta sćazachu.
