Róžant (JK/SN). Jedyn z dnjowych dypkow prěnjeho posedźenja gmejnskeje rady Ralbicy-Róžant běše wuzwolenje dweju zastupjerjow wjesnjanosty. Prěni za­stupjer budźe, kaž hižo zašłe lěta, René Wjacławk. Jako druheho wuzwolichu po tajnej wólbje Tomaša Glawša, kotryž so přećiwo Tilej Žurej přesadźi. W techniskim wuběrku budu po wuzwolenju ze stron gremija Sylwija Čórlichowa, Alojs Šefer, Krěsćan Gruhn a Józef Woko skutkować. Jich zastupjerjo su Eduard Luhmann, Tilo Žur, Jan Hrjehor a Detlef ­Šuster. Jako wěcywustojni wobydlerjo za tutón wuběrk nominowachu Stefana Šliša z Hrańcy a Róžeńčana Markusa Kobalca. Zastupjerjej gmejny do zwjazkoweje zhromadźizny zarjadniskeho zwjazka „Při Klóšterskej wodźe“ budźetaj nimo wjesnjanosty Hubertusa Ryćerja gmejnskaj radźićelej Eduard Luhmann a Jan Hrjehor. Jeju naměstnikaj staj Tilo Žur a Matthias Möller. W běhu zeńdźenja bě jasne, zo steji gmejna před nadawkom lutowanja, štož budźe wulke wužadanje po lětach dobreho hospodarjenja.

„Posłuchaj lěkarja, prjed hač jeho ­trjebaš!“, serbske přisłowo namołwja.

Tuž wěnuje so student mediciny ­Pětr Dźisławk znatym a mjenje znatym chorosćam, zo by je ­čitarjam trochu ­bliže rozłožował (52).

Budyšin. Přećeljo motorskich Hornja ­Łužica pytaja zajimcow, kotřiž chcyli na lětnym wulěće dźěćom a młodostnym njezapomnite dožiwjenje zmóžnić. Młodźina přebywa za tón čas w „Domje při Čornobohu“ we Wuježku. Witani su tež wšitcy, z wotpohladom pomhać chcyć. Organizatorojo wočakuja dale wobdźělnikow ze zarjadnišćow Dźěćaceje archi Sakska z.t.

Loni je so 184 motorskich, trikow a jězdźidłow z přiwozom na wulěće wobdźěliło, mjez kotrymiž běchu tež Serbja. A tak wočakuje towarstwo tež lětsa zaso wulku ličbu akterow, kotřiž ze swojimi mašinami na dwór dźěćaceho doma we Wuježku jědu a so potom na turu po Hornjej Łužicy podadźa. Wosebje witani su šoferojo trikow kaž tež motorskich z přiwozom, zo móhli tež mjeńše dźěći wěsće sobu jěć. Zajimcy zetkaja so přichodnu sobotu, 31. awgusta, w 9.15 hodź. při křižowanišću Lubijska/Carolagarten w Budyšinje. W 11.30 hodź. pojědu wšitke jězdźidła po B6 přez Budyšin. Wobjedować chcedźa zapadnje a swačić sewjernje sprjewineho města. Zajimowani šoferojo njech so pola Bernda Gnaucka pod telefoniskim čisłom 0173 6444416 přizjewja.

Njewšědny nakup

Wojerecy. 84lětna žona so sobotu dopołdnja we Wojerecach na Teschenowej dróze njemało dźiwaše, jako wona po nakupje wokoło 9 hodź. swój połny nakupowanski wóz před wulkim předawanišćom wotstaji. Cuzy muž składnosć wužiwaše a je cyle jednorje twory z naku­powanskeho woza do swojeho awta połožił. Přichadźacy šofer taksija jej pomhaše a napominaše muža twory wróćić, štož so tež sta. Na to pak dotal njeznaty muž ćekny. Kriminalisća nětko za nim, podhlada pospytneho rubježnistwa dla, slědźa.