Přeja sej lěpše wobswětlenje
Rachlow (AK/SN). Derje wopytane bě zašłe posedźenje Kulowskeje měšćanskeje rady. Do Rachlowskeho kulturneho domu, něhdyšeho Konsuma, je nimale 20 wobydlerjow přišło. Woni přednjesechu wšelake naležnosće.
„W Dubrjenku při zachodźe do wsy je so wodowód puknył“, rozprawješe wjesny předstejićer Mathias Brückner. Wone městno, tak wón prošeše, měło so nuznje zaso asfaltować. Za tych, kotřiž ze wsy won jědu, je to strašny blak. Měšćanosta Markus Posch (CDU) sej naležnosć zapisa. Za Rachlow naspomnichu wobydlerjo temy kaž spěšny internet, noworjadowanje ležownosćow a gulije.
Konjacy přećeljo z Jawory su minjeny pjatk do Hliny (Gleina) pola ...
Krótkopowěsće (07.09.23)
Kongres FUEN zahajeny
Pécs. W madźarskim měsće Pécs zahaja dźensa 67. kongres Federalneje unije europskich narodnosćow (FUEN). Hač do njedźele wuradźuja delegaća wo temach, kotrež tuchwilu mjeńšiny zaběraja. Nimo hłowneje zhromadźizny, kotraž budźe sobotu, informuja so wobdźělnicy wo połoženju němskeje mjeńšiny w hosćićelskim kraju a wopytuja jeje institucije. Domowina je z delegaciju přitomna.
Dźeń Saksow klětu wupadnje
Drježdźany. Najwjetši ludowy a domizniski swjedźeń w swobodnym staće, Dźeń Sakskow, klětu wupadnje. Město Zhorjelc je wuhotowanje wotprajiło, rěka z kuratorija Dnja Saksow. Za 2025 liča z požadanjom města Sebnicy. Runje tak rozmysluja, zarjadowanje z financnych přičin přichodnje jenož kóždej dwě lěće wotměwać, zdźěli prezident kuratorija a krajneho sejma Matthias Rößler (CDU).
Graubner dale w zastojnstwje
Policija (06.09.23)
Kolesa pokradnyli
Budyšin. Wosobowe awta, kotrež na terenje awtowych domow pod hołym njebjom steja, su stajnje zaso cil paduchow. Minjeny kónc tydźenja su sej njeznaći jedyn z Budyskich awtowych domow za padustwo wupytali. Kaž policija zdźěli, woni wot štyrjoch jězdźidłow wšitke kolesa wotšrubowachu. Jich hódnotu trochuja na něhdźe 16 000 eurow. Nimo toho načinichu skućićeljo něhdźe 22 000 eurow wěcneje škody. Kriminalna słužba pad přepytuje.
Serbske tradicije w koncepće
Nowotwar pěstowarnje jako projekt změny strukturow zapodali
Chwaćicy (UM/SN). Wulkodubrawska gmejna koncentruje so nětko na nowotwar pěstowarnje w Chwaćicach. „To ma za nas najwjetšu prioritu, planowansce kaž tež pjenježnje“, praji wjesnjanosta Hardy Glausch (njestronjan). Po tym zo je so wukopało, zo so nowotwar „Dźěćaceje kupy“ we Wulkej Dubrawje ze srědkami za změnu strukturow spěchować njehodźi, chcedźa tule móžnosć nětko za nowu pěstowarnju w Chwaćicach wužiwać. „Z tymle předewzaćom wutworimy dospołnje nowe kapacity. To so k směrnicam za změnu strukturow lěpje hodźi hač hdyž wobstejace twarjenje z nowym narunaš, kaž bě to we Wulkej Dubrawje předwidźane“, wjesnjanosta rozłoži.
Na Budyskich Židow spominali
Nowe hrajkanišćo přepodali
Bórk (JoS/SN). Stajnje prěni kónc tydźenja w septembru wotměwa so w Bórku pola Wojerec wjesny swjedźeń. Tónle termin maja wobydlerjo w protyce kruće zapisany. Tuž so woni minjenu sobotu k zhromadnemu kofejej zetkachu. Hižo wječor do toho bě młodźina na diskoteku prošena. Za nju běchu we wsy a wokolinje namołwjeli, zo móhli so zajimcy raz jako diskotekar wuspytać. Šesćo tónle poskitk wužichu. Sobotu móžachu so najmjeńši wopytowarjo šminkować dać. Starši pospytachu w tomboli swoje zbožo a někotrežkuli rjane myto dobychu.
Na poprawny wjeršk běchu předewšěm dźěći dołho čakali. Za nje natwarichu mjenujcy nowe hrajkanišćo, kotrež składnostnje wjesneho swjedźenja přepodachu. To wobstaraštaj ze symboliskim přetřihanjom banćika wjesnjanosta gmejny Sprjewiny Doł Manfred Heine a wjesna předstejićerka Bórka Veronika Büschel. Holcy a hólcy so wězo dołho prosyć njedachu a pěskowy kašćik, karusel, suwadło, čumpjel a krosnowadło wuspytachu. Gmejna je tule 50 000 eurow inwestowała, z toho je 20 000 eurow spěchowanskich srědkow.
Wječor w duchu Jurja Słodeńka
Po poswjećenju wopomnjenskeje tafle za Jurja Słodeńka póndźelu w Radworju je so wčera dalše zarjadowanje na česć wuznamneho narodneho prócowarja w Pančicach-Kukowje wotměło.
Pančicy-Kukow (SN/MWj). Z literarno-hudźbnym wječorom su Domowinska skupina Pančicy-Kukow, chór Lipa a Towarstwo přećelow Smolerjec kniharnje wčera na Jurja Słodeńka składnostnje jeho 150. posmjertnych narodnin spominali. Něhdźe 90 wopytowarjow a sobuskutkowacych z Pančic a wokoliny, ale tež ze zdalenišich kónčin dožiwi runje tak zabawne kaž powučne zarjadowanje.
