Wobornicy dóstanu nowu gratownju
Wyše wudawki narunać spytać
Wo móžnym zwyšenju staršiskich přinoškow wuradźowali
Chrósćicy (JK/SN). Posledni raz je gmejna Chrósćicy staršiski přinošk za tamniše dźěćace dnjowe přebywanišća w lěće 2015 zwyšiła. Wot toho časa su wone konstantne wostali a přirunujo z druhimi komunami wokrjesa tež poměrnje niske. Aktualnje pak so změna tutoho popłatka připowědźa. Zo budu přinoški zwyšić, je jasne. Jenož po kotrym puću měło so to stać, maja radźićeljo nětko rozsudźić. Zwyšene wudawki za personal a energiju Chróšćansku gmejnu nuzuja, přinošk staršich zwyšić. To njestanje so po dobrozdaću, ale złožuje so na zakonske rjadowanja Swobodneho stata Sakskeje. Tute podadźa wěste móžnosće a sahaja wot 15 hač do 30 procentow cyłkownych kóštow.
Baraka ma so skónčnje zminyć
Pančicy-Kukow (SN/MWj). Dny stareje asbestoweje baraki při sportnišću w Pančicach-Kukowje zdadźa so doskónčnje ličene być. Na swojim wčerawšim posedźenju je tamniša gmejnska rada zasadnje rozsudźiła, zo ma so podołhojte twarjenje zminyć. To bě wuměnjenje za to, zo móža so wo spěchowanske srědki prócować.
Hižo w lěće 2009 bě tehdyši gmejnski parlament wobzamknył, baraku wottorhać, a wokrjes je tomu přizwolił. Wot toho časa so twarjenje hižo njewužiwa, chiba jako skład sportoweho towarstwa. Zo projekt nětko zaso na agendźe komuny steji, zwisuje z tym, zo su tuchwilu wuhlady na spěchowanje, kaž wjesnjanosta Markus Kreuz rozłoži. Kaž wón praji, drje so na druhich městnach hižo přizwolene srědki wužiwali njejsu. Wón liči z tym, zo wottorhanje něhdźe 40 000 eurow płaći. Z toho móhli 90 procentow spěchowane dóstać. Časowy plan, hdy móhła so baraka zminyć, dotal njeeksistuje.
Wohnjowi wobornicy Budyskeho wokrjesa móža wot wčerawšeho hač do ...
Krótkopowěsće (01.09.23)
Prěnje zrěčenja podpisane
Choćebuz. W nowej Choćebuskej tworni Němskeje železnicy ma wot januara 400 z cyłkownje 1 200 dźěłowych městnow nastać. Tole zdźělištaj wčera braniborski ministerski prezident Dietmar Woidke (SPD) a Němska železnica. Prěnje dźěłowe zrěčenja su přichodni sobudźěłaćerjo hižo podpisali.
Přepokazaja towarstwu pjenjezy
Njebjelčicy. Njebjelčanske wuměłske a kulturne towarstwo Kamjenjak dóstanje do hospodarskeho plana za lěto 2023 zapisane a wobzamknjene pjenjezy. To zdźěli wjesnjanosta André Bulank (njestronjan) na naprašowanje SN. Wón je připokazał sumu we wysokosći 2 250 eurow towarstwu přepokazać. Financne srědki su za lětušu 17. mjezynarodnu rězbarsku dźěłarničku předwidźane.
Warnowanske stawki pola LEAG
Choćebuz. Dźěłarnistwo IGBCE je nastupajo druhe tarifowe koło z koncernom Łužiska energija a milinarnje (LEAG) něhdźe 7 200 přistajenych k warnowanskim stawkam namołwjało. Dźens stawkowachu sobudźěłaćerjo LEAG před hłownym zachodom industrijoweho parka Čorna Pumpa žadajo sej jasnje wyše mzdy.
Policija (31.08.23)
Wjele škody načinili
Brězowka. Tež hdyž swój poprawny plan zwoprawdźić njemóžachu, su njeznaći w nocy na wutoru w Brězowce w Dźěwinskej gmejnje wjele škody načinili. Tam chcychu wulki traktor pokradnyć, štož pak so jim njeporadźi. Dokelž so po wšěm zdaću bjez rubizny spokojić nochcychu, pokradnychu prědnje čisło jězdźidła a wutwarichu z njeho drohu elektroniku. Rubizna ma hódnotu něhdźe 20 000 eurow.
Na pjećorych pišćelach koncertował
Budyšin. „Jedna cyrkej – pjećore pišćele“ rěkaše hesło poslednjeho koncerta Budyskeho pišćeloweho lěća 2023 zašły tydźeń w Budyskej tachantskej cyrkwi swj. Pětra. A zajim běše wosebje wulki. Michael Vetter, kantor ewangelskeje tachantskeje wosady a jako tajki zdobom iniciator a zamołwity za tutón hudźbny rjad, mjenowaše wopyt samo grandiozny. Na spočatku předstaji wón hłowne pišćele w katolskim dźělu Božeho domu z lěta 1866, kotrež pochadźeja z dźěłarnje Leopolda Kohla w Budyšinje. Pozdźiši załožićel dźensa dale sławneje pišćeloweje manufaktury Hermann Eule absolwowaše w tutej dźěłarni swoje wukubłanje a běše tuž tohorunja na twarje tohole najstaršeho instrumenta w simultanej cyrkwi hižo wobdźěleny.
Srjedźišćo sydlenskeho ruma
Drěwcy (AK/SN). Před 20 lětami je hornjoserbski telewizijny magacin Wuhladko zwěsćiło, zo su Drěwcy geografiske srjedźišćo serbskeho sydlenskeho ruma Sakskeje. „Na wonym městnje sadźichu lipu a wupyšichu ju z banćikami w serbskich barbach“, powěda předsyda Drěwčanskeho domizniskeho towarstwa Andreas Trell. Ideju za geografiske srjedźišćo měješe Marko Šiman. Jenož lipa pak Drěwčanam njedosahaše. Woni nastajichu zornowcowy kamjeń a jón dwurěčnje popisachu. Podawkej před 20 lětami je wěnowany wjesny a rybarski swjedźeń, kiž sobotu, 2. septembra, přewjedu.
Město nima žadyn wliw
Kulowscy radźićeljo wo zawrjenju mebloweho zawoda rěčeli
Rachlow (AK/SN). „Kotre wuskutki změje zawrjenje mebloweje twornje Maja w Brěžkach na hospodarski plan města Kulowa a dołhodobnje na naše dochody z přemysłoweho dawka?“, chcyše Kulowska měšćanska radźićelka Susanne Kockert (Powšitkowne wobydlerske zastupnistwo) na wčerawšim po- sedźenju měšćanskeje rady w Rachlowje wědźeć. Nadrobnje so na to hišće wotmołwić njehodźi, wotmołwi komornik Mathias Kockert. Kelko přemysłoweho dawka ma předewzaće płaćić, so stajnje hakle wróćo skutkujo wobliči. „Za lěto 2023 so zawrjenje twornje na naš měšćanski etat njewuskutkuje“, komornik rozłoži. „Wažne je, zo so nětko rozrisa, što so přichodnje z ležownosću stanje. Runje tak wažne je, zo změjemy wottam dale dochody z ležownostneho dawka a z popłatkow za wopłóčki“, Mathias Kockert dale praji.
Wjesny swjedźeń k jubilejej
Smječkecy. 25lětnemu wobstaću Smječkečanskeho wjesneho kluba „Při winowej horje“ je wěnowany tamniši wjesny swjedźeń. Jón zahaja jutře, pjatk, w 19 hodź. z natočenjom piwa, z lěhwowym wohenjom a ze zhladowanjom na minjeny štwórć lětstotk, w kotrymž skutkowaše wjesny klub na dobro wjesneje zhromadnosće. Sobotu wot 14 hodź. přewjedu sportowe wubědźowanja w pěsku, wot 17 hodź. su připowědźene hry a wjeselo z młodźinskej wohnjowej woboru. Wječor budu reje z kapału SerBeat. Njedźelu po ewangelskej słownej Božej słužbje w stanje, kotraž započnje so w 9.30 hodź., přeprošuja na rańše piwko z livehudźbu skupiny Chmjelowanka. Wot 14 hodź. přizamknje so popołdnjo za swójby z programom, kofejom, tykancom a zabawu za dźěći. Zastup na wšitkich dnjach je darmotny. Wjesny klub wšitkich zajimcow wutrobnje přeprošuje.
Seniorojo škotowali
