Wokrjes zawjedźe pjenježnu kartku
Wokrjes Budyšin chce lětsa wot prěnjeho apryla pjenježnu kartku za ćěkancow zawjesć. Za to pyta tuchwilu wotpowědneho dodawarja. Dotalny system přepokazanja na konto abo direktneho wupłaćenja so z tym wotstroni.
Budyšin (SN/MiP). „Kóždy wokrjes w Sakskej dźěła tuchwilu na tym, tutón zapłaćenski system za ćěkancow zawjesć. Wón wšak je jenož mjezykrok po puću k jednotnemu zwjazkowemu rozrisanju, kotrež je za lěto 2025 planowane“, zdźěli zastupowaca jednaćelka Sakskeho sejma wokrjesow. W Sakskej je w tutej naležnosći jedyn z pilotnych wokrjesow Budyski.
Krótkopowěsće (30.01.24)
Kompetency přepruwuja
Drježdźany. Na zakładźe wuslědkow kubłanskich přepytowanjow přewjedu so lětsa 28. a 29. meje přepytowanja kompetencow šulerjow 2. lětnika na wšitkich zjawnych zakładnych a spěchowanskich šulach w Sakskej. W předmjetomaj němčinje a matematice chcedźa tak rozdźěle w dale a heterogenišim šulerstwje zwěsćić.
Rjemjesło nadal woblubowane
Drježdźany. Zajim za rjemjeslniske wukubłanje bě tež loni w Sakskej wulki. Kaž zdźěli rjemjeslniski zwjazk Sakskeje póndźelu, podpisa 2023 5558 wučomnikow swoje wukubłanske zrěčenje. Tole běchu jeno dźewjeć mjenje hač hišće 2022. Přirunujo z předlońšim běchu wosebje městna jako muler a rybar prašane.
Městnosće UNESCO we Łužicy
Mužakow. Na dźensnišim wuradźowanju zastupjerjow městnosćow UNESCO we Łužicy wo lětušich projektach wobdźělitaj so tež referentaj Domowiny Clemens Škoda a Pětr Brězan. Do zwjazka „UNESCO5“ słušeja nimo Błótow, hornjołužiskeje hole a hatow, Mužakowskeho parka a zahorka tež nałožki serbskeho ludu. Tema dźensa budźe mjez druhim lěpša zhromadna prezentacija w přichodźe.
Tajke běchu zymske wjesela
Serbska bajka w srjedźišću stała
Twar dróši, wottorhanje tuńše hač planowane
Chrósćicy (SN/MG). Na swojim prěnim posedźenju w nowym lěće měješe gmejnska rada dwě ćežišći na dnjowym porjedźe. Twarske dźěła wosrjedź wsy, kotrež wšak su hižo zakónčene, zaběrachu radźićelow a radźićelku tež w nowym lěće hišće. Wyše cyłkowne kóšty za twar dróhi po Cyrkwinskej horje maja wuskutki na hospodarske lěto 2023. Dohromady někak 16 000 eurow mějachu čłonojo rady dodatnje za loni schwalić. Radźićeljo namjetej jednohłósnje přihłosowachu. Cyłkownje płaćeše projekt něhdźe 100 000 eurow wjace hač w prěnim naćisku planowane. Tole zaleži hłownje na tym, zo su so twaršćizny wot projektneho planowanja hač k spočatkej doby wupisanjow jednotliwych twarskich nadawkow masiwnje podróšili. Gmejna Chrósćicy pak je njehladajo na to jenož snadny dźěl kóštow ze swójskeje kasy zapłaćić trjebała, wšako su hłowny dźěl něhdźe 500 000 eurow ze spěchowanskich pjenjez a z mytom financowali.
Policija (29.01.24)
W kupjeli so paliło
Smječkecy. Wohnjowu woboru, wuchowansku słužbu a policiju wołachu sobotu rano do Smječkec. W kupjeli jednoswójbneho domu bě z dotal njeznatych přičin woheń wudyrił. Płomjenja na wšelake meble w kupjeli přeskočichu. Zasadźeni wohnjowi wobornicy woheń zhašachu. Jako 37lětny wobsedźer swój dom wopušći, so wón na noze zrani, tak zo dyrbjachu jeho w chorowni zastarać. Kelko škody je cyłkownje nastało, dotal znate njeje.
Seniorojo škotuja
Informować na nowe wašnje
Za hamtske wozjewjenja chcedźa so digitalnemu swětej wotewrić
Pančicy-Kukow (SN/MWj). W gmejnach zarjadniskeho zwjazka při Klóšterskej wodźe móhła so lětsa w lěću nowa forma hamtskich wozjewjenjow zawjesć. Wo tym je předsyda zarjadniskeho zwjazka Stefan Anders njedawno zastupjerjow pjeć přisłušnych gmejnow informował.
Tuchwilu rozšěrjeja gmejny Chrósćicy, Pančicy-Kukow, Njebjelčicy, Worklecy a Ralbicy-Róžant swoje wozjewjenja w hamtskej nowinje „Mitteilungsblatt“ a na tele wozjewjenja w informaciskich kašćikach w jednotliwych wsach skedźbnjeja. We wšitkich pjeć gmejnach je to we wustawkach wo zjawnych wozjewjenjach rjadowane. Gmejna Ralbicy-Róžant čini to přidatnje w swojej gmejnskej nowinje, kotraž měsačnje serbsce a němsce wuchadźa. Problematiske je, zo so „Mitteilungsblatt“ w někotrych wjeskach stajnje njeroznošuje, dokelž zdźěla dosć roznošowarjow nimaja. Nimo toho so wozjewjenja w nowinje wobstajnje podróšuja.
20 lět w słužbje moderneje mody
Budyšin (CS/SN). Martina Glücklichowa čaka na nowu kolekciju. Potom mjenujcy zaso nalěćo do jeje wobchoda „Tina’s Modeladen“ na Budyskej Seminarskej zaćehnje. Je to mjeztym hižo 20. nalěćo a mějićelka swjeći tuž tele dny jubilej. Wona njeje stajnje lochke časy dožiwiła. Ćim bóle je horda na to, zo je tak dołho předźeržała.
