„Najlěpši skótny lěkar NDR“
We Wósporkskim muzeju „Stara poprjancarnja“ su kónc junija wosebitu wustajeńcu wo zasłužbnym weterinarnym medicinarju, dr. Huberće Spieleru, składnostnje stolětneje róčnicy lěkarskeje praksy wotewrěli.
Wóspork (SN/MiP). W tutej wosebitej wustajeńcy předstajeja žiwjenje a skutkowanje weterinarneho rady dr. Huberta Spielera, kotryž je po studiju na třoch wysokich šulach před 100 lětami skótnolěkarsku praksu we Wósporku załožił a hač do lěta 1960 wobhospodarił. Naposledk je hač do 1964 jako nawjedowacy skótny lěkar w Mišnjanskej staciji za wosymjenjenje dźěłał, kotraž nawjedowaše a dohladowaše plahowanje wužitneho skotu w tehdyšim wobwodźe Drježdźany. Za swoje zasłužby jako praktiski skótny lěkar, kiž bě tež na polu veterinarno-medicinskeho slědźenja aktiwny, bu dr. Hubertej Spielerej w lěće 1961 titul weterinarneho rady spožčeny.
Wólbny bój – arena, pjenjezy, wjelki a wulke sony
Pančicy-Kukow (SN/MG). Zo je kandidatka CDU za wólby do krajneho sejma, Elaine Jenčec, swój wólbny bój zahajiła, to je nanajpozdźišo potom jasne, wuhladaš-li jeje transporter z wulkim popisom a jeje wobličom. Tutón transporter steješe wčera na dworje klóštra Marijina hwězda w Pančicach-Kukowje. Tola njeje tam jenož Jenčec, ale tež jeje předchadnik Alojs Mikławšk a jako wosebity hósć, statny minister za regionalne wuwiće, Thomas Schmidt (wšitcy CDU). Wón je přijěł, zo by so wo pokročowanju projekta „Pa-Ku – Kommunikations-ARENA“ informował. Za tutym dosć wulkim titulom chowaja so twarske dźěła wosrjedź wsy. Tam su w zašłych tydźenjach a měsacach mjez druhim hrajkanišćo a pawiljonaj nastali.
Krótkopowěsće (17.07.24)
Sakska kampanja za dialekty
Drježdźany. Z nowej kampanju za dialekty zhladuje třěšna marka „So geht sächsisch“ na wšelake narěče w Sakskej. Z hesłom „Saksce za wšěch“ nawjazuje kampanja na wuwiće, kotrež móžemy sakski dialekt nastupajo wěsty čas hižo w socialnych medijach wobkedźbować. Zajimcy móža pod pjeć rěčnych rumow zeznawać, tež hornjołužiski na wuchodźe.
Nowe noty Krawca a Mětška
Budyšin. Załožba za serbski lud a spěwar Roland Hein staj nowej partiturje wudałoj. „Zybol woheń duje“ je spěwny cyklus za bariton a klawěr, kotryž bě tehdy 13lětny Juro Mětšk skomponował. „Lumir“ za samsnu wobsadku je rewidowana wersija krucha Bjarnata Krawca. Hein a pianist Hiroto Saigusu chcetaj jej kónc septembra w Budyskim Serbskim muzeju premjernje předstajić.
Wjelk wulku škodu naparał
Kulturna sonina nowa posołka rěče a kultury
Jako „serbska kulturna sonina“ dźěła wotnětka Marion Kwicojc we wokrjesu Dubja-Błóta. Nadawk z Bórkowow pochadźaceje wuměłče je, dźěćom a dorosćenym serbsku rěč a kulturu zbližić. To krajnoradny zarjad w Lubinje zdźěla.
Lubin (SN/at). We wokrjesu Dubja-Błóta chcedźa nastupajo serbsku rěč a kulturu wobstejace aktiwity w sydlenskim rumje z tradicionalnymi hódnotami wobohaćić a kompetencu w serbskej rěči spěchować. Ideju „serbskeje kulturneje soniny“ stej Šula za delnjoserbsku rěč a kulturu z nawodnicu Utu Henšelowej a wokrjesna społnomócnjena za naležnosće Serbow, Sabrina Kuschy, zrodźiłoj.
Kino pod hołym njebjom
Budyšin. W kinje pod hołym njebjom při Sprjewinym kolenu w Budyšinje pokaza Kamjetny dom jutře francosku tragikomediju „Es sind die kleinen Dinge“. Přistup na ležownosć na Sprjewinej hasy 10 je wot 20 hodź. Film pokazaja wot 21 abo 22 hodź. Zastupny lisćik za wosom eurow móža sej zajimcy online skazać abo při wječornej kasy kupić.
Młodźina swjeći w Sulšecach
Sulšecy. Sulšečanska Halštrowska młodźina z.t. wuhotuje wot 19. hač do 21. julija „Beat na łuce“. Pjatk budźe wubědźowanje wohnjowych wobornikow w starobje nad 40 lětami. Na to sćěhuje party z hudźbu 1990 a 2000 lět. Sobotu je turněr jědnatkow a wječor hłowny event „Beat na łuce“. Njedźelu su młodostni wotměnjawy program w swjedźenskim stanje přihotowali. Dochody swjedźenja chce towarstwo za wšelake socialne projekty wužiwać.
Někotre městna swobodne
Pokazuja zhubjene objekty
Na Wojerowskim hrodźe, w tamnišim měšćanskim muzeju su nowu wosebitu wustajeńcu wuhotowali. Wona zaběra so z 65lětnymi stawiznami tamnišeho zwěrjenca.
Wojerecy (AK/SN). Nowa ekspozicija je wot 5. julija hač do 1. septembra na druhim poschodźe Wojerowskeho hrodu přistupna. Wona wopřija tekstowe a zwukowe dokumenty kaž tež fota a objekty. Móhłrjec tematiske žro je w lěće 1987 nahrawany interview tehdyšeho direktora coologiskeje zahrody dr. Wernera Jorga z tehdyšim direktorom muzeja a załožićelom Wojerowskeho zwěrjenca Günterom Petersom.
Policija (16.07.24)
Značce na policiskim awće pokradnył
Žitawa. 23-lětny je njedźelu w nocy wobchadnej znamješce na policiskim awće lokalneho policiskeho rewěra w Žitawje pokradnył. To sčini w času, jako zastojnicy policije runje pada kaženja měra dla w domje přebywachu. Jako so wróćichu jim falowacej značce njenapadnyštej. Hakle swědk njeskutka jich na to skedźbni. Zastojnikam poradźi so, skućićela wuslědźić a w susodstwje popadnyć.
Korčma – pjekarnja – hospoda
We łužiskich wsach běchu stajnje hižo najwšelakoriše rjemjesła zakótwjene a su so zdźěla lětstotki zachowali. Dźensa je so wulki dźěl z tychle rjemjesłow bohužel pozhubił. W našej lětnjej seriji chcemy wobswětlić, hdźe běchu kotre rjemjesła doma a kotre wosebitosće su so při tym wobkedźbowali. (11)
Stawizny šulstwa předstajene
Handrij Wirth je njedźelu w Njeswačidle wosebitu wustajeńcu wotewrěł
Njeswačidło (ML/SN). Wulka pisana karta wita hosći na 53. wosebitu wustajeńcu wo šulstwje w Njeswačanskej wosadźe z časa reformacije hač do lěta 1945 do domizniskeho muzeja. Wona bu minjenu njedźelu wotewrjena. Handrij Wirth, syn bywšeho wosadneho fararja a druheho serbskeho superintendenta Gerharda Wirtha, je přehladku z wjele prócu zestajał a ju tež wotewrěł. Něhdźe sto zajimcow běše njedźelu popołdnju do tamnišeho domizniskeho muzeja přichwatało. Handrij Wirth je skupinki hosći přewodźał a přewšo zajimawje do šěsć witrinow rjadowanu přehladku rozłožował.
Krótkopowěsće (16.07.24)
Nowa zamołwita powołana
Baršć. Nowa zamołwita za serbske naležnosće w delnjołužiskim wokrjesu Sprjewja-Nysa je powołana. Po połlětnym zadźěłanju přewza Romy Ruffowa z Janšojc prěnjeho awgusta zastojnstwo wot dotalneje zamołwiteje Kerstin Kosakoweje, kotraž so na wuměnk poda. W přihoće na nowu poziciju je Romy Ruffowa tež delnjoserbski rěčny kurs projekta Zorja wopytała.
Saksojo z lěsom wusko zwjazani
Drježdźany. Ludźo w Sakskej lubuja swój lěs a wužiwaja jón prawidłownje, zo bychu so wočerstwjeli. Woni widźa sćěhi změny klimy a podpěruja tohodla wobhospodarjenje a přetwar lěsa we wjetšinje. Woni su zaznawali, zo so staw lěsa škodow a skórnika dla pohubjeńši, a přeja sej wjace informacijow wo lěsnych temach. To wuchadźa z druheho woprašowanja ludnosće zawoda Sakski lěs.
Wišnje zastarske?
