Z natočenjom njejsu zbožowni
Budyšin (CS/SN). Z mjenje abo bóle spektakularnymi padami zaběrało je so w lěće 2022 Zhorjelske krajne sudnistwo. Wo tym staj w jeho Budyskej wotnožce prezident krajneho sudnistwa Friedrich-Leopold zu Stolberg Stolberg a nowy wiceprezident Elmar Kirchberg na nowinskej rozmołwje informowałoj. Tak wobjednachu sydom njeskutkow přećiwo seksualnemu samopostajenju. Wosebity medijowy wothłós měješe jednanje přećiwo nawodźe Mikowskeje wyšeje šule znjewužiwanja dźěći dla. Wobdźěłać dyrbjachu štyri delikty morjenja. Wusahowacy bě pad młodostneho, kotrehož wobskoržichu pospytneho mordarstwa žarliwosće dla. Registrowali su pjeć deliktow z drogami. Skerje směšny bě při tym pad muža, kiž chcyše w Zgorzelecu chrystal w hódnoće 12 000 eurow kupić. Jemu předachu porno tomu kilogram tak mjenowanych wudospołnjacych žiwidłow.
Wjace infekcijow karnewala dla
Berlin (dpa/SN). Po karnewalowych a póstniskich zarjadowanjach je Roberta Kochowy institut wjace natyknjenjow z koronawirusom registrował. Přiběracu ličbu incidencow wobkedźbuja wosebje „w regionach ze sylnymi póstniskimi aktiwitami“, rěka w kónctydźenskej rozprawje instituta. Po tym je so minjeny tydźeń cyłoněmski rozrost incidency na niskim niwowje pokročował. Wón wučinja 14 procentow wjace hač tydźeń do toho. Wosebje raznje přiběrachu ličby w Porynsko-Pfalcy (36 procentow), Sewjerorynsko-Westfalskej (35 procentow) a Posaarskej (34 procentow) kaž tež w starobnej skupinje ludźi mjez 20 a 29 lětami. Ličby poćahuja so jenož na w laborje wobkrućene pady infekcijow z koronawirusom, institut zdźěla.
W Kölnskim centrumje karnewala wuchadźeja z wulkeje ličby natyknjenjow, kotrež njebuchu wozjewjene. Sydomdnjowska incidenca wučinja tam wokomiknje 385 wozjewjenych padow na 100 000 wobydlerjow. Město z toho wuchadźa, zo je woprawdźita incidenca dźesać króć wyša. Po wšej Němskej podawaja incidencu ze 118.
Alianca za Hornju Łužicu rosće
Budyšin (WL/SN). Zwjazkowa awtodróha A 4 je wjace hač žiwjenska žiłka Swobodneho stata Sakskeje. Wona je tež wobchadna magistrala mjez wuchodnej a zapadnej Europu. 2015 zličichu so přerěznje wšědnje wjace hač 38 000 jězdźidłow. Aktualnje su ličby wšědnje pola wjace hač 50 000 jězdźidłow, wot tutych něhdźe 33 procentow nakładnych awtow. Tute wuwiće pohnu zwjazkowe knježerstwo, 2019 w Budyšinje wotnožku za přihot wutwara A 4 zarjadować. Tři lěta pozdźišo rěka ze stron noweho zwjazkoweho knježerstwa, zo wutwar po jich ličbach wobchada trěbny njeje. „Rozsud, kotryž njeje akceptabelny“, podšmórnje wyši měšćanosta Budyšina Karsten Vogt (CDU) a so z wuprajenjom stejnišću hornjołužiskeje předewzaćelskeje iniciatiwy přizamkny, kotraž bě před tydźenjomaj hižo njezrozumliwosć zwurazniła.
Krótkopowěsće (06.03.23)
Na Jana Haješa spominali
Łaz. Na přeprošenje „Spěchowanskeho towarstwa zetkanišćo dom Zejlerja a Smolerja Łaz“ su pjatk jako serbski wječork na Jana Haješa z přednoškom a prezentaciju historiskich wobrazow spominali. Składnostnje lětušich 150. posmjertnych narodnin sobuzałožerja Domowiny a dołholětneho župana župy „Handrij Zejler“ (1921–1937 a wot 1945) steji žiwjenje Łazowskeho překupca w fokusu zjawneho zajima (wjac jutře w SN).
Krajnu mjezu překročaca pomoc
Drjezdźany. Hromadźe z čěskim regionom Ústečký kraj Swobodny stat Sakska dalše pomocne srědki medicinskim zarjadnišćam a chorownjam do Transkarpatiskeje w Ukrainje dodawa. Sakska wobdźěli so z medikamentami w hódnoće nimale 10 000 eurow. Ústečký kraj přewostaji sydom chorobnych awtow, z kotrymiž pomocne twory tež transportuja.
Šulscy planowarjo spali
Policija (03.03.23)
Wjelk po njezbožu zahinył
Mučow. K zražce z dźiwinu je předwčerawšim rano na zwjazkowej dróze B 96 mjez Mučowom a Wulkimi Ždźarami dóšło. 41lětny muž bě tam ze swojim Fordom do směra na Budyšin po puću. Jako jemu w prawej křiwicy wjelk wotprawa před awto zaběža. Šofer drje borzdźeše, njemóžeše pak zražce zadźěwać. Wjelk na městnje zahiny. Škoda na awće wučinja 3 000 eurow. Njezboža dla informowachu wjelči monitoring. Jeho sobudźěłaćerka so wo mortwe zwěrjo staraše.
Na jutrowne wiki
Budyšin. Spěchowanski kruh za serbsku ludowu kulturu přeprošuje jutře a njedźelu na 30. Serbske jutrowne wiki do Budyskeho Serbskeho domu. Na woběmaj dnjomaj móža wopytowarjo wot 10 do 18 hodź. debjerjam na žurli domu přihladować a sej najrjeńše jutrowne jejka kupić. Zajimcy budu so sami w debjenju jutrownych jejkow pospytać móc. Dźěći su nimo toho na paslenje a walkowanje jutrownych jejkow prošeni. Nimo debjerjow jejkow budźetej Carola Eitnerjec z keramiku a Birgit Patokowa z wudźěłkami ze škleńcy přitomnej. Runje tak so sobudźěłaćerjo Smolerjec kniharnje na kupcow w Serbskim domje wjesela. Tež wušiwarka swoje dźěło předstaji.
Na 12. schadźowanku swójbow
Gala Serbskeho ludoweho ansambla za wšitke zmysły
We Wěteńcy žehlawku testuja
Přednoški fachowcow při wažnych rozsudach za gmejnu pomhaja
Njebjelčicy (JK/SN). Gmejnscy radźićeljo a wopytowarjo mějachu so wčera w Njebjelčicach we wobłuku posedźenja tamnišeje gmejnskeje rady na dlěšej přednoškaj nastajić. W prěnim předstaji Martin Sünder z Wysokeje šule Žitawa/Zhorjelc wuslědki studije, kak gmejnu njewotwisnje z energiju zastarać. Studija pokazuje na wjacore žórła wobnowjomnych energijow a kak so tute w gmejnje za produkciju miliny a ćopłoty zasadźić hodźa. Dospołna awtarkija pak so njehodźi za gmejnu docpěć, dokelž su problemy składowanja a transporta miliny hišće njerozrisane abo předrohe. Nadrobniše informacije k temje podadźa 13. měrca we 18.30 hodź. we wobłuku informaciskeho zarjadowanja na žurli Njebjelčanskeho gmejnskeho zarjada, k čemuž su wšitcy wobydlerjo a zajimcy prošeni.
Swjedźenski ćah budźe wjeršk
W lěće 2025 swjeća w Chrósćicach 800. róčnicu wosady a gmejny. Hižo nětko so na wulki podawk wusměrja. Wčera su na farje zajimcam tuchwilny staw přihotow předstajili.
Chrósćicy (SN/MWj). Z 800 dnjow trajacym countdownom zahaja w Chrósćicach 5. apryla, to je srjeda w martrownym tydźenju, oficialne přihoty na 800. róčnicu wosady a gmejny. Tón dźeń připrawja nad zachodom farskeho dwora a při gmejnskim zarjadnistwje wulki baner, kiž na jubilej skedźbnja. Na nim widźeć budźe tohorunja logo za jubilej. Tón staj farar Měrćin Deleńk a wjesnjanosta Marko Kliman (CDU) na wčerawšim informaciskim wječoru prěni raz zjawnosći prezentowałoj. Wonaj a dalši wobdźěleni wo tuchwilnym stawje přihotow swjedźenja informowachu.
