Njeswačidło (ML/SN). Dwuhodźinski zhromadny koncert 50 młodych hudźbnikow na dworje Njeswačanskeje młodownje je njedźelu nawječor něhdźe 300 připosłucharjow wulce zawjeselił. Derje radźeny hudźbny poskitk dźesać šalmajowych ćahow a dalšich hudźbnych ćělesow je dopokazał, što 50 šulerjow a młodostnych mjez dźesać a 16 lětami zdo­konjeja a što su noweho w zwučowanskim lěhwje w dnjach do koncerta sej přiswojili. Wobdźěleni běchu hudźbne ćělesa z Biskopic, Połčnicy, Radeberga, Małych Rědorjec, Drježdźan, Freitala, Lommatzscha, Wurzena a Nossena.

Lóštny program bě miks mjez hudźbu šlagrow, bajkowych a młodźinskich spěwow, rockoweje hudźby, pochodow a pop. Melodije znatych dźěćacych němskich pěsnjow kaž „Mužik steji w lěsu“, „Mały Jank“ a „Pućowanje je lóšt młynka“ bě měšany ze zynkami moderneje hudźby. Dirigowali su wšelacy wobdźělnicy proboweho lěhwa, najmjeńša bě dźesaćlětna holčka.

Wojerecy. Při wosebitym wodźenju po Wojerowskim zwěrjencu móža zajimcy njedźelu, 30. junija, w 13 a w 15 hodź. mnohotnosć w zwěrinje nazhonić a dožiwić. Zwěrjencowa pedagogowka Silke Kühn wopytowarjam přeradźi, hač so homoseksualita tež mjez zwěrjatami jewi, čehodla někotre zwěrjata swój splah wonkownje změnja a kak pinguiny spó­znaja, hač je tamny mužik abo žónka.

Na wjesny swjedźeń

Nowa Wjeska. Z natočenjom piwa a „Malle Party“ započnje so dźensa wjesny swjedźeń w Nowej Wjesce. Jutře ­přizamknjetej so w 14 hodź. sportowe wubědźowanje a w 16 hodź. dźěćacy swjedźeń. Wječor přeprošuje wjesny klub na reje z diskoteku Melodia. Po njedźelnym rańšim piwku budźe wot 15 hodź. popołdnjo za swójby z kofejom, zabawu a programom za młodych a starych. Mjez druhim wustupi spěwna skupina Přezpólni. Dźeń wuklinči wječor z kónčnej party. Na wšitkich dnjach je zastup darmotny.

Wulka škoda nastała

Šćeńca. Z dotal njeznatych přičin je w nocy na štwórtk w Šćeńcy woheń w pensiji wudyrił a so na cyłe twarjenje wupřestrěł. Mužojo w starobje 50, 42 a 35 lět móžachu dom sami wopušćić, ale so při tym zranichu. 79lětnu žonu dyrbjachu wohnjowi wobornicy wuchować. Wona so žiwjenja ćežko zrani. Hakle wčera dopołdnja běchu płomjenja po­dušene. Zasadźenych bě wjace hač 70 wobornikow ze 14 jězdźidłami. Škodu trochuja na poł miliona eurow.

We Wojerecach wuwićowy plan za sportowe připrawy wobzamknyli

Wojerecy (AK/SN). Z mnohostronskim katalogom naprawow chce město Wojerecy swoje sportowe připrawy dołho­dobnje zachować a modernizować. Na swojim zašłym posedźenju su měšćanscy radźićeljo změnjene wužiwanske a popłatkowe wustawki za sportowe připrawy kaž tež wuwićowy plan za nje wobzamknyli. „Plan je zaměrny koncept. W nim zapřijata je prognoza sportowych zarjadnišćow hač do 2040“, rozłoži Gisela Zumpe z Drježdźanskeho inženjerskeho běrowa, kotraž je koncept zdźěłała.