Njeskutka podhladneju lepili

Budyšin. Zastojnicy Drježdźanskeje slědźenskeje jednotki su wutoru rano na wotpočnišću A 4 Hornja Łužica-sewjer awto typa BMW X5 zadźerželi. Tute bu na předwječoru jako pokradnjene přizjewjene. Woni zajachu 32lětneho pólskeho šofera. W přewodźacym awće su policisća Zhorjelskeje policajskeje direkcije pozdźišo 20lětneho pólskeho staćana a sobuskućićela lepili. Njeskutka podhladnaj su srjedu do jastwa „zaćahnyłoj“, po tym zo bě sudnik přikaz zajeća wuprajił.

Ze strašnym nakładom w tunlu

Zhorjelc. Zastojnicy wobchadneje policije su srjedu wospjet nakładne awto ze strašnym nakładom w tunlu přez Limas zadźerželi. Nakładowane běchu bleše, napjelnjene z płunom, kotryž so spěšnje zapłomjeni. 58lětny słowakski šofer dósta wozjewjenje přeńdźenja dla.

Brězowka (AK/SN). Mjez Slepom a Dźěwinom ma bórze při jězdni přewodźaca kolesowarska šćežka nastać. Wo to prócujetej so komunje Slepo a Dźěwin zhromadnje. „Kolesowarska šćežka njeje jenož turistam wažna, ale tež za wšědny šulerski wobchad. Šulerjo z Dźěwina přińdu přichodnje bjez wjetšich problemow k Němsko-Serbskemu šulskemu centrumej do Slepoho“, rjekny nawoda zarjada za planowanje, twarstwo a hórnistwo w zarjadniskim zjednoćenstwje Slepo Steffen Seidlich njedawno na posedźenju gmejnskeje rady w Brězowce. Wón běše 5. junija na rozmołwje w Zhorjelskim krajnoradnym zarjedźe pobył. Wokrjes je wažny darićel spěchowanskich srědkow za projekt. Tam bě wažne detaile rozjimać. W Slepom ma so při wotbóčce do Noweho Miłoraza twar kolesowarskeje šćežki zahajić. Po postajenju směrnicow za spěchowanske srědki ma šćežka znajmjeńša 2,50 metrow šěroka być. Za wotrězk we wobłuku milinowoda chce so gmejna Dźěwin hišće z delnim přirodoškitnym zarjadom wothłosować. Dalša potrjeba wujasnjenja je za wobłuk křižowanišća při Dźěwinskej wodarni. Tam wšak so tři dróhi zetkawaja.

We Wojerowskej měšćanskej bibliotece su sobudźěłaćerjo w prózdninach poskitki za šulerjow přihotowali. Tola tež dalši zajimcy móža sej tam na zarjadowanja a k čitanju dóńć.

Wojerecy (SiR/SN). Prěnje prózdninske dny su nimo, je pak dale dosć časa so we Wojerowskej měšćanskej bibliotece na knižne lěćo přizjewić. Němski zwjazk bibliotekow tónle projekt, kiž so lětnje wotměwa, spěchuje. Cilowa skupina su w prěnim rjedźe dźěći a młodostni wot jědnaće do 16 lět. Tući móža so tež bjez přizjewjenja w knihowni na akciji wobdźělić. Přez cyły čas lětnich prózdnin móža sej tam filmy, knihi, hry a dalše medije z mnohostronskeho sortimenta wupožčić. Kóždy wobdźělnik a kóžda wobdźělnica dóstanje z přizjewjenjom lisćinu, do kotrejež titule zapisuje, kotrež čita. Za tři wučitane knihi dóstawaja woni certifikat.

Wjacori serbscy pjekarjo popřeja sej lětni dowol w samsnym času

Róžant (jp/SN). Mamy prózdniny. To rěka, zo je dowolowy čas zahajeny. Šulerjo móža so prawje derje wočerstwjeć. Kak pak je to w rjemjeslniskich zawodach abo w druhich powołanjach? Mnozy dyrbja dźěłać, dokelž su mulerjo abo molerjo – twarnišćo dowol njedowola. To samsne płaći za sobudźěłaćerjow medijow, kaž w nowinach a rozhłosu. Čitarjo chcedźa swoju nowinu dypkownje w póštowym kašćiku měć a pola mnohich ludźi słuša rańša serbska štučka k snědani. W tutych powołanjach maja jenož jednotliwi sobudźěłaćerjo dowol a to w rozdźělnych časach, tak, zo njedyrbi so zawod zawrěć.