Štóž bě sej myslił, zo změje na Kralec dworje na kromje wsy trochu wjace měra wot hołka a tołka tamnych dworow, tón dyrbješe spěšnje zwěsćić, zo tomu tak njeje. Na dworje w zamołwitosći sćelaka MDR knježeše samsna mjerwjeńca ludźi kaž druhdźe tež. Pomocnicy w piwowym wozu, w kuchni a při grilu mějachu ruce połne dźěła. Na jewišću wustupowachu folklorna skupiny madźarskeje mjeńšiny w Rumunskej Szarkalab, Serbska rejwanska skupina Smjerdźaca z hercami a Zespół Pieśni i Tańca Łany z Pólskeje. Po programje wjedźeše rozhłosownica Diana Fryčec-Grimmigowa.

Jedyn z wjerškow sobotnišeho wječora bě wopyt sakskeho ministerskeho prezident Michaela Kretschmera (CDU) na Kralec statoku. Přišedši wot oficialneho witanja wón wopytowarjow festiwala wopyta a njeda so dołho prosyć, jako jeho do polonezy na jewišćo prošachu.

Runje tak rozdźělne kaž kulturne poskitki na jewišću běchu kulinariske wosebitosće za Zahrodnikec/Grutkec statoku. Tam móžachu sej wopytowarjo pječene mjaso runje tak słodźeć dać kaž wšelake družiny pizzy a waniljowu jušku z bucht­lemi, kotrež bě pjekarska swójba wězo sama napjekła. Paleta folklornych skupin sahaše wot cymbaloweje hudźby Dušana Kotlára, při čimž samo znata melodija Bedřicha Smetanoveje „Vltavy“ zaklinča, přez estiski cyłk Wiljandi Gümnaasiumi rahvatantsurühm Hebe a rejwanski ansambl „Ihna“ z Erlangena hač k skupinje Ndungu Kina z Konga. Jeho bubnarjo su přihladowace dźěći sobu na jewišćo prosyli a so tak wo pisany wobraz mjezynarodnosće starali. Patricija Kralec je program moderěrowała

Z programom serbskich a mjezynarodnych skupin na pjeć statokach w Chrósćicach dožiwi Mjezyna­rodny folklorny festiwal „Łužica 2023“ sobotu ­wječor a w nocy na njedźelu swój wjeršk. Miłe lětnje wjedro je tysacy wopytowarjow na statoki ­wabiło. Ale tež na puću a na nawsy pohnuwaše hudźba ­k sobuspěwanju­ a rejwanju, hdźež kapale ­Čilaki a „Fünf an der Feier“ zahudźištej.