Pozitiwnu bilancu sćahnyli
„Stara“ Kulowska měšćanska rada poslednje wobzamknjenje schwaliła
Hózk. (AK/SN). Kulowska měšćanska rada je srjedu na swojim posedźenju w Hózku jednohłósnje wobzamknyła, zo wušmórnje wosom pućow ze zapiska zjawneje wobchadneje syće. „Wšitke tute puće su we wobsydstwje města“, podšmórny měšćanosta Markus Posch (CDU). „Na nich hižo chodźić njemóžeš, jenož lěsnicy je hišće wužiwaja – potajkim tež žaneje zjawneje funkcije wjace nimaja“, wón doda. Běše to poslednje wobzamknjenje Kulowskeje měšćanskeje rady w tutej legislaturnej dobje. Wšitke puće wjedu přez Dubrjenske bahno. Přez wušmórnjenje ze zjawneho zapiska njetrjeba město Kulow hižo za wobchadnu wěstotu rukować. Za wužiwarjow pólnych pućow z toho samo na sebi negatiwne wuskutki njewurostu, rjadowanjow w lěsnym zakonju a w Zwjazkowym kaž tež w Sakskim přirodoškitnym zakonju dla. Wužiwanje leži w přichodźe we wosobinskej zamołwitosći.
Mjez Łužiskej kupjelu a psyčej šulu
W Psyčej šuli Łužiska jězorina w Lubušu je w poslednim času prawidłownje Colleen Neumann na wopyće. Fyzioterapeutka a osteopatka za zwěrjata tu psy hoji.
Lubuš (SR/SN). Runje je Colleen Neumann swoje kupanske tofle na sportowe črije změniła. Jeje słužba we Łužiskej kupjeli je za dźensa zakónčena. Něšto pozdźišo steji 34lětna hižo na psyčim treningowanišću Psyčeje šule Łužiska jězorina w Lubušu, kotruž Madlen Fischer dobre lěto wobhospodarja. Hižo něšto časa matej žonje wuspěšnu mjezsobnu symbiozu. Dokelž je Madlen Fischer strowota psow přewšo wažna, je sej wobšěrnu syć k wšelakim fachowcam natwariła, zo by wobsedźerjow psow wobšěrnje poradźować abo sej fachowcow na pomoc zwołać móhła. To w tutej branši samozrozumliwe njeje.
Wjedro bywa rjeńše a tak započinaja so pomału tež žně syna na ...
Kelko žonow je wolenych?
Krótkopowěsće (14.06.24)
Kruh dźěła zaměrnje dale
Mužakow. Łužica chce so z regionom zeleneje energije stać, kotryž je po cyłej Europje jónkrótny. Wčera su so zastupjerjo Łužiskeho kruha w Mužakowje zešli a so na dalše postupowanje dojednali. Hač do nazymy maja so konkretne namjety zdźěłać. Zdobom je dalše zeńdźenje ze zastupjerjemi EU w Brüsselu předwidźane.
Domowina prosy wo namjety
Budyšin. Zwjazkowe předsydstwo Domowiny namołwja župy, serbske towarstwa, druhe cyłki a jednotliwcow, namjety kandidatow za wólby noweje Rady za serbske naležnosće Sakskeje hač do 15. žnjenca zapodać. Namjety njech pósćelu z wupjelnjenym a podpisanym naprašnikom za kandidatow, kotryž je na internetnej stronje Domowiny přistupny, na .
Wokrjes dyrbi lutować
Wubědźowanje dweju krajow we Łužicy
Swjaty Pětr je pohončam po wšěm zdaću derje zmysleny, wšako su łuki kołowokoło pomnika w Chrósćicach zrumowane. Syno je w bróžni a tak móža so nětko poslednje přihoty dodźěłać, zo bychu so wot soboty (15.06.) potom zapřahi z wjacorych zwjazkowych krajow w Chrósćicach wubědźować móhli. Mjeztym šěsty króć zarjaduje Konjace sportowe towarstwo „Při Klóšterskej wodźe“ Pančicy-Kukow lětsa separatny turněr za zapřahi. A tak su so organizatorojo lětsa rozsudźili, sakske a zdobom durinske mišterstwa pola dwupřežnych zapřahow zarjadować. W Durinskej njeje so žadyn kmany organizator namakał, tak přijědu kónc tydźenja tež durinscy pohončojo do Hornjeje Łužicy.
Zašłe dny su lubowarjo konjaceho sporta a pomocnicy twarili, barbili, šrubowali a sadźeli. Tak změje na 60 zapřahow wot soboty najlěpše wuměnjenja, zo móže so w dresurje, jězdźenju po parcoursu z kehelow a w přezpólnym pruwowanju idealnje pokazać.
Misnjene padustwo
Spěwanje pod měrowym dubom
Židźino. Na lětsa hižo 36. wječorne spěwanje pod Měrowym dubom přeprošuje Židźinski chór wutrobnje wšitkich lubowarjow chóroweje hudźby. Zarjadowanje budźe srjedu, 19. junija, w 19 hodź. na Židźinskim swjedźenišću. Wosebity hósć wječora je chór Meja z Radworja.
Swjeća 650. róčnicu
Wulke Zdźary. Składnostnje 650lětneho wobstaća wjeski su we Wulkich Zdźarach na cyły kónc tydźenja wot 14. do 16. junija wulki swjedźeń z pisanym programom organizowali. Hosćo zbliska a zdaloka su wutrobnje přeprošeni, tutón jubilej zhromadnje woswjećić. Zastup na cyły kónc tydźenja je darmotny. Na zelenišću njeposrědnje pódla promenady při Hórnikečanskim jězoru je wulki swjedźenski stan postajeny. Tu woswjeći so sobotu a njedźelu wječor wulka party-nóc. Kołowokoło stana namaka wopytowar bohatu ličbu gastronomiskich a kulinariskich poskitkow. Swjedźeń zahaji so pjatk w 17 hodź. při cyrkwi ze swjedźenskim pochodom z dujerskej hudźbu „Fanfarow jězoriny“.
Gmejnska rada w Rakecach
Stara kowarnja prózdninski dom
Maš drje lědma někoho, kotryž njeznaje Lejno, wjes mjez Budyšinom a Kamjencom. Zo pak maš na sewjernej hranicy Budyskeho wokrjesa wjes ze samsnym mjenom, je mjenje znate. Je to němski Geierswalde.
Wjes ze swojimi dźensa 320 wobydlerjemi zhladuje na 450lětne stawizny prěnjeho naspomnjenja. Runje tak zajimawe kaž wuwiće rjemjeslnistwa we wsy su šulske cyrkwinske stawizny. Cyrkej, kotraž bu 1679 na městnje tamnišeje drjewjaneje natwarjena, njeměješe tehdy wěžu. Tutu přitwarichu hakle kónc 18. lětstotka. Hdyž započachu 1910 brunicu wudobywać, hładźina dnowneje wody spadny a cyrkwina wěža so na zapad nachili. Z wotpowědnymi twarskimi naprawami zaručichu, zo wěža njepadnje. Tuž steji wona hišće dźensa a je křiwej wěži w Pisy podobna. W lěće 1884 bě Lejno ryzy serbska wjes. Wot 395 wobydlerjow bě 387 Serbow. Srjedź 20. lětstotka hišće 225 ludźi serbsce rěčeše a 61 žonow chodźeše wšědnje w narodnej drasće. Před 20 lětami běchu to jeničce hišće štyri. Wšitke su mjeztym zemrěli.
Wěriwi sej wopomnišćo „darili“
Wulka Dubrawa ma nětko zaso swědk wěry na zjawnym městnje
Wulka Dubrawa (UM/SN). W kónčinach sewjernje Budyšina namakaš tójšto swědkow křesćanskeje wěry. Jenož we Wulkej Dubrawje sy dotal podarmo za tajkimi pytał. „Hač před krótkim njebě – nimo na kěrchowje – ani jeničkeho křiža na zjawnych městnach w našej wjesce“, wobkrući Gernot Walter. Čłon předsydstwa Chwačanskeje wosady je jedyn z małeje skupinki ludźi, kotřiž so na křižnu kapałku we Wulkej Dubrawje dopominaja.
