Krótkopowěsće (08.06.23)
Krizowy kružk zwołali
Choćebuz. Pobrachowacych spadkow dla je „hydrologiska situacija podłu Čorneho Halštrowa dźeń a bóle napjata“. Tohodla bu „ad hoc dźěłowy kružk ‚Extremsituation‘ znowa zwołany“, kotryž ma mjez druhim „naprawy za zlutniwy wobchad z wodu zdźěłać a mjez Braniborskej a Sakskej koordinować“, Braniborski krajny zarjad za wobswět zdźěla.
Nowa platforma a test hry
Drježdźany. W prěnjej połojcy šulskeho lěta su přihotowanske rjadownje na wjace hač 300 sakskich šulach poskitk Sakskeho krajneho zarjada za šulu a kubłanje (LaSuB) na platformje Minticity za digitalne wuknjenje w předmjeće němčina jako druha rěč wužiwali. Nětko chcedźa prěnje nazhonjenja wuměnić. Wuknjacy su zapřijeći a móža z wuwiwarjemi platformy interaktiwnu, k nałožowanju rěče motiwowacu hru wuspytać.
Hašek kritizuje NHL
Hród w Rakecach móža saněrować
Rakecy (SN). Hižo dlěši čas planowane saněrowanje Rakečanskeho hrodu a jeho pódlanskich twarjenjow móža skónčnje zahajić. Kaž rěčnik Sakskeho statneho zawoda za imobilijowy a twarski management (SIB) na naprašowanje potwjerdźi, su wotpowědne planowanje nětko wobkrućili. Kompleks twarjenjow a k tomu słušacy hrodowy park stej we wobsydstwje Swobodneho stata Sakskeje. W nim stej referat rybarstwo krajneho zarjada za wobswět, ratarstwo a geologiju (LfULG) kaž tež šula rybarstwa zaměstnjenej, kotraž přisłuša Powołanskošulskemu centrumej Budyšin. To je jeničke kubłanišćo za rybarskich hospodarjow w nowych zwjazkowych krajach.
Policija (07.06.23)
Kolesowarka znjezbožiła
Lejno. Njejapki kónc měješe předwčerawšim kolesowanski wulět mandźelskeju w Lejnom w gmejnje Halštrowska Hola. Wobaj běštaj z elektrokolesom po puću. Jako muž naprawo wotboči, chcyše jeho žona runje naprawo přesćahnyć. Wona do njeho zrazy a padny. Při tym so tak zrani, zo dyrbješe do chorownje.
Ze swjedźenjom jubilej woswjećili
Wustajeńca w nakupowanišću
Wojerecy. „Serbske nałožki“ rěka wustajeńca, kotruž wotewru jutře, štwórtk, w 11.30 hodź. na swětłowym dworje Wojerowskeho Łužiskeho centera. Přehladka dopomina na korjenje, hódnoty a tradicije, kotrež zhromadnosć wobydlerjow zesylnjeja. Wona je hač do 24. junija we Wojerecach widźeć a potom na druhe městna pućuje. W zwisku z wustajeńcu budźe móžno, zastupnej lisćikaj za lětuše Krabatowe swjedźenske hry dobyć.
Jubilejny koncert brigady
Pančicy-Kukow. Chór 1. serbskeje kulturneje brigady wuhotuje sobotu, 17. junija, we 18 hodź. swjedźenski koncert składnostnje 775. załoženskeho jubileja klóštra Marijineje hwězdy w klóšterskej cyrkwi. Nawod změje cyrkwinskohudźbny direktor Friedemann Böhme, na klawěrje přewodźa spěwarjow Gina Hentsch. Mjez druhim zaklinča twórby Jana Pawoła Nagela, Korle Awgusta Kocora, Antona Brucknera a Měrćina Weclicha. Zastup je darmotny, zarjadowarjo pak proša wo kolektu za wuprawu chóra, kotryž wospjetuje koncert 21. junija w baroknej katedrali w Ljubljanje.
Pražene kołbaski w srjedźišću byli
Budyšin (CS/SN). Z telko wothłosom jednaćel Matthias Handy a towaršnik Karl Dominik ličiłoj njeběštaj. Prěni festiwal praženych kołbaskow na teritoriju předewzaća za mjaso a kołbasu Meisters na Budyskej Edisonowej bě minjenu sobotu połny wuspěch. Při stejnišćach, hdźež na wšěch 20 družin praženych kołbaskow grilowachu, so ludźo w dołhich rynkach nastupachu. Mnozy dyrbjachu chětro dołho čakać, prjedy hač móžachu bohaty wuběr praženych kołbaskow woptać.
Trochu komplikowany bě system, zo dyrbjachu sej wopytowarjo najprjedy bon wobstarać. Za to pak běchu mužojo při grilach wolóženi, dokelž njetrjebachu tež hišće kasěrować. „Dyrbimy hišće nazhonjenja zběrać“, praji Matthias Handy. Zawěsće klětu hinaše rozrisanje namakaja. Na kóždy pad ma so zarjadowanje přichodnje kóžde lěto k spočatkej grilowanskeje sezony wotměć. Z akciju chce firma dale na sebje skedźbnjeć a w zjawnosći zadomić, zo předewzaće hižo Löblein njerěka, ale Meisters.
Pjenjezy za woboru a internet
Gmejnscy radźićeljo hospodarski plan 2023 wobzamknyli
Trjebin (AK/SN). Do swojeje wohnjoweje wobory a do komunalneje infrastruktury Trjebinska gmejna lětsa inwestuje. To podšmórny komornica Dana Piehl na njedawnym wurjadnym posedźenju gmejnskeje rady, kotraž zaběraše so z hospodarskim planom 2023. Wjetšina radźićelow inwesticijam we wobjimje 668 000 eurow přihłosowaše.
Tak chcedźa gratownju wohnjoweje wobory w Trjebinje powjetšić. Za to maja 100 000 eurow předwidźane. Z tym nastanje městno za předrasćernju a za wukubłanišćo za młodźinsku woboru. Jej přisłuša tuchwilu 25 młodostnych. Tohorunja budźe potom městno za transportne jězdźidło. Dale wutwarić chcedźa šěrokopasmowu syć za spěšny internet, za čož chcedźa 480 000 eurow wudać. Za twarski dwór natwarja halu, zo móhli tam techniku wotstajić. Saněrowanje mosta při Rulec młynje ma něhdźe 70 000 eurow płaćić.
Přichod kupjele drje zawěsćeny
Korzym (CS/SN). Budyski wokrjes přisłuša nětko zaměrowemu zwjazkej Korzymskeje kupjele. Wotpowědne zrěčenje staj krajny rada Udo Wićaz (CDU) a předsyda zaměroweho zwjazka Sven Gabriel předwčerawšim w kupjeli podpisałoj. Z tym přewozmje wokrjes 51 procentow podźěla zwjazka. Tamne dźěla sej Šěrachow-Korzym, Załom, Hornja Hórka a Beiersdorf w Zhorjelskim wokrjesu.
Z tym drje stej přichod Korzymskeje kupjele a jeje planowane saněrowanje zawěsćenej. Spočatk tohole měsaca su próstwu wo spěchowanje Sakskej krajnej direkciji zapodali. Jeli dóstanu spěchowanske srědki přizwolene – a z toho wšitcy wobdźěleni wuchadźeja – móhli srjedź lěta 2024 twarić započeć. Hdyž tuchwilu planowany twarski čas 18 měsacow dodźerža, móhli so zajimcy wot nazymy 2025 w Korzymju zaso kupać. Mjez druhim chcedźa kupjel energetisce saněrować a jeje tepjenje wot płuna na drjewjane třěški přestajić. Dale ma so technika w kupjeli ponowić a dźěćacy wobłuk kaž tež sawny chcedźa powjetšić. Za to je 23 milionow eurow planowanych.
W Pančicach-Kukowje je minjene dny nowe zjawne městno k sedźenju ...
Krótkopowěsće (07.06.23)
Komunalne wólby klětu 9. junija
Drježdźany. Přichodne komunalne wólby w Sakskej budu klětu 9. junija. Wuzwolić maja so za pjećlětnu wólbnu dobu wokrjesne sejmiki, měšćanske, gmejnske a wjesne rady. Termin je sakske ministerstwo nutřkowneho postajiło a wčera wozjewił. Komunalne wólby wotměwaja so wot lěta 1994 w swobodnym staće paralelnje k wólbam Europskeho parlamenta samsny dźeń.
Za Opus Klassik nominowany
Berlin. Organist Johannes Kral, pochadźacy z Dobranec pola Hodźija, je w dwěmaj kategorijomaj za myto Opus Klassik 2023 nominowany. Ze swojim albumom „Elements of Bach“ požada so w kategorijomaj „instrumentalist lěta“ a „dorostowy wuměłc lěta“. Opus Klassik je myto za klasisku hudźbu w Němskej. Lětušich lawreatow w oktobrje w Berlinje počesća.
Lemke pólsku koleginu zetkała
