Łaz (AK/SN). Minjene dny zahajichu saněrowanje južneho pobrjoha Slěborneho jězora. Twarske dźěła maja najprjedy hač do apryla 2025 trać, zdźěli nowinski rěčnik LMBV dr. Uwe Steinhuber. Z pomocu ćežkeje techniki chcedźa tam pobrjóh zhusćić.

Spočatnje bě planowane, zo traje saněrowanje hač do nalěća 2024. Tónle cil pak njehodźi so dodźeržeć, tak dr. Steinhuber, dokelž dyrbja wjace materiala předźěłać hač dotal předwidźane. Zo ­móhli sezonu 2025 při jězoru za stanowanje wužiwać, dźěła kónc apryla 2025 přetorhnu a w oktobrje samsneho lěta pokročuja. Cyłkowna naprawa ma potom kónc lěta 2025 hotowa być.

W sezonje 2025 budźe tež kupanje zaso móžne. Do toho dyrbi Sakski wyši hórnistwowy zarjad zelenu swěcu dać a pruwować, kotry wobłuk budźe pozdźišo jako pobrjóh wužiwajomny.

Kaž nowinski rěčnik připowědźi, chcedźa přichodne lěta dalše wotrězki po­brjoha saněrować. Hdy maja wone dokładnje slědować, njeje hišće rozsudźene. „Cyłkowny Slěborny jězor njebudźe do lěta 2035 hotowy“, praji Steinhuber.

Radwor (BB/SN). Hnydom šěsć renoměrowanych běrowow so tuchwilu prócuje, w Radworju nowy hort projektować směć. Wo tym informowaše srjedu zastupowacy wjesnjanosta Pětr Kliman gmejnsku radu. Na swojim přichodnym posedźenju w nowembrje změje rada potom rozsudźić, komu nadawk přepoda. Po prěnich trochowanjach móhł nowotwar něšto wjac hač štyri miliony eurow płaćić.

Tuchwilnej hortaj, mjenujcy hort Katolskeho dźěćaceho doma a AWO-hort, matej na zakładźe časowje wobmjezowaneje wuwzaćneje dowolnosće wjac dźěći hač dowolene. Nimo toho je hort AWO w šulskich rumnosćach zarjadowany, štož njeje za šulske a zwonkašulske zaměry optimalne. Nowy hort nastanje na šulskej ležownosći, hdźež je tuchwilu šulski a ratarski muzej. Tón ma so potom znowa koncipować a do nowotwara zapřijeć.

Gmejny zarjadniskeho zwjazka maja nětko wohnjowoborne wustawki

Róžant (JK/SN). Dokelž přebywa wjesnjanosta delanskeje gmejny Hubertus Ryćer (njestronjan) tuchwilu na kurje, zastu­powacy wjesnjanosta René Wjacławk (Delanscy swobodni wolerjo) wčerawše posedźenje gmejnskeje rady nawjedowaše. Suwerenje wjedźeše po nim a dźakowaše so na kóncu posedźenja radźićelam za dobru disciplinu a konstruktiwne wuradźowanje, tež hdyž bě parlament runje tak wobzamknjenja kmany. Wobzamknyli su wjacore wažne naležnosće, mjez druhim wudospołnjace wustawki za Róžant. Z nimi so ležownosć za natwar ­jednoswójbneho domu do nutřkowneho wobłuka přewza.

Pančicy-Kukow (SN/MWj). Wobydlerjo z Kanec móža bórze wodychnyć. Wjacore lěta trajace twarske dźěła na wjesnej dróze so nachileja. Kaž wjesnjanosta gmejny Pančic-Kukowa Markus Kreuz (CDU) na wčerawšim posedźenju gmejnskeje rady zdźěli, póndźelu posledni wotrězk wot srjedź wsy hač ke křižowanišću asfaltować započnu. Wotpowědne twarske mašiny we wsy hižo steja.

Kaž wčera rěkaše, maja dźěła něhdźe tydźeń trać. Tak dołho njeměł nichtó po nowym asfalće jězdźić. „Prošu wšitkich tole wobkedźbować, zo njeby k škodam na asfaltowej woršće dóšło“, wjesnjanosta apelowaše a dopominaše w tym zwisku na ponowjeny puć na Kimbarku w Pančicach, hdźež něchtó dočakać njemóžeše a tak swoje slědy w nowym asfalće zawostaji. Nadawk we wobjimje něhdźe 71 000 eurow přewozmje twarska firma z Carneho Gózda (Schwarzheide). Samsne předewzaće je hižo puć w nowej bydlenskej štwórći w Pančicach asfaltowało.