We Wojerowskim zwěrjencu su zaso pinguiny widźeć. Dźewjeć ...
Krótkopowěsće (11.10.23)
Serbowka wuspěšna z filmom
Lipsk. We wobłuku festiwala DOK Lipsk wotmě so wčera prapremjera dokumentarneho filma Grit Lemke „Bei uns heißt sie Hanka – Pla nas gronje jej Hanka – Pola nas rěka wona Hanka“. Pask wobswětluje „njefolkloristisce prašenja serbskeje identity“.
Dóstanu nowu sportowu halu
Budyšin. Po wobzamknjenju měšćanskeje rady natwarja Budyskej wyšej šuli Dr. Salvadora Allendy nowu sportowu halu. Za projekt chcedźa dohromady 7 milionow eurow nałožować. Dotalna ćěłozwučowarnja njehodźi so hižo ponowić. Start twarskich dźěłow planuje město za lěto 2024. Wjace hač 200 wosobow budźe přichodnje nowu wjacezaměrowu halu runočasnje wužiwać móc.
Jamy dla twarja nasyp
Uhelná/Bogatynia. W zwisku z čěsko-pólskim dojednanjom nastupajo kontrowersnu brunicowu jamu Turów pola Bogatynije zahaji pólska strona natwar pjeć metrow wysokeho nasypa. Tón měł čěskej namjeznej wsy Uhelná jako „wizuelny škit“ słužić. Tule funkciju pak nabudźe hakle za dźesać do 15 lět, hdyž budu sadźene štomy wulke dosć. Wobydlerjo Uhelneje projekt tuž skerje skeptisce hódnoća.
Hdyž bańki pućuja
„Posłuchaj lěkarja, prjed hač jeho trjebaš!“, serbske přisłowo namołwja.
Tuž wěnuje so student mediciny Pětr Dźisławk znatym a mjenje znatym chorosćam, zo by je čitarjam trochu bliže rozłožował (29).
Twarnišćo drje zašo hotowe
Njeswačidło. Statnu dróhu S 98 (Bóščanska dróha) w Njeswačidle budu šoferojo po wšěm zdaću hižo srjedź tohole tydźenja wužiwać móc. Tole zdźěli nowinski rěčnik krajneho zarjada za dróhotwar a wobchad (Lasuv) Franz Großmann. To pak je wot wjedra wotwisne. Poprawom bě předwidźane, dróhu hakle pjatk přepodać. Kružny wobchad wosrjedź wsy je wot spočatka tydźenja zaso wužiwajomny.
Wot apryla 2023 su jězdnju Bóščanskeje dróhi kaž tež Njeswačanski kružny wobchad a krótki dźěl Hłowneje dróhi hač k wotbóčce ponowili. We wobłuku twarskich dźěłow su Budyske wokrjesne zawody nowy wodowód do zemje połožili. Njeswačanska gmejna je kable za nadróžne wobswětlenje składła a chódnik ponowiła. Twarski wotrězk bě 650 metrow dołhi. Dohromady inwestowachu 875 000 eurow.
Za rěčny kurs so přizjewić
Policija (10.10.23)
Při njezbožu so zraniłoj
Pančicy-Kukow. Dwě zranjenej wosobje a tójšto wěcneje škody je wuslědk wobchadneho njezboža njedźelu popołdnju pola Pančic-Kukowa. Tam jědźeše wodźer Renaulta z Chróšćanskeho směra, po wšěm zdaću wosrjedź dróhi, kaž policija zdźěli. Jemu napřećo přijědźe wodźerka VWja. Wona drje spyta so hišće wuwinyć, njemóžeše pak zražce zadźěwać. Při tym so 42lětna šoferka VWja a jeje dźěćo zraništej. Jeju dowjezechu do chorownje. Na jězdźidłomaj nasta něhdźe 30 000 eurow škody. Wobě awće dyrbjachu wotwlec. 26lětny wodźer Renaulta změje so lochkomyslneho zranjenja ćěła dla zamołwić.
Motorsport mjezynarodnje
Łužiska rallye wotměje so spočatk nowembra zaso wokoło Hamora
Hamor (AK/SN). Na 26. mjezynarodnej Łužiskej rallye ADMV (Powšitkowny němski motorsportowy zwjazk) wot 9. do 11. nowembra witaja jězdźerjow z cyłeho swěta. „Nimo mišterstwow ADMV ma runje Łužiska rallye wulki wuznam, dokelž je wona po wšej Europje jónkrótna rallye na šćerku. To wjele jězdźerjow přićahuje“, praji jednaćel ADMV André Reichelt.
Přihoty traja hižo wjacore měsacy. Organizator je towarstwo za rallyejowe jězdźenje a wodosport Club Łužica. Najwjetši dźěl 142 kilometrow dołheje čary jědu jězdźerjo na šćerku, 17 kilometrow na asfalće. Srjedź septembra dochadźachu prěnje přizjewjenja, mjez druhim z Nowoseelandskeje. Znowa wobdźěli so Anders Gröndal z Norwegskeje, kiž je Łužisku rallye hižo štyri razy dobył, zdźěli předsyda přihotowaceho towarstwa Wolfgang Rasper. Prěni raz so lětsa dorostowi jězdźerjo w starobje 19 do 24 lět wobdźěla. Woni přijědu z Peruwa, Omana, Estiskeje a Awstralskeje, praji nowinski rěčnik Łužiskeje rallye Bastian Hartman.
Rybjacy „burger“ derje předawali
Radwor (SN/MkWj). Kóždolětny rybjacy swjedźeń w Radworju je zamołwitym tamnišeho Kupoweho towarstwa jako hłowneho zarjadowarja kóžde lěto znowa wulke wužadanje. Minjene lěta móžachu spochi přiběracy zajim wopytowarjow zwěsćić. Tež lětsa telefonaty a přizjewjenja zamołwitym wokoło předsydki Claudije Steglichoweje signalizowachu, zo dyrbja sobotu, 7. oktobra, z wulkim nawalom ludźi z bliska a daloka ličić. Samo z Drježdźan so zajimcy na Radworsku kupu měrjachu. Wułójenje hata je prastara tradicija kupoweho towarstwa, kotrež woswjeći klětu 50. róčnicu swojeho wobstaća. Wot lěta 2009 wobdźěluja so Radworčenjo na rybjacych tydźenjach.
Něhdźe 90 lubowarjow serbskeje a dujerskeje hudźby je njedźelu ...
Krótkopowěsće (10.10.23)
MDR mjezynarodnje kooperuje
Lipsk. Rozhłosowa rada MDR podpěruje dobre zhromadne dźěło zjawnoprawniskeho rozhłosa krajow Sakska, Saksko-Anhaltska a Durinska z partnerami w srjedźnej a wuchodnej Europje. Předsyda gremija Dietrich Bauer hódnoćeše binacionalne studijo MDR a Radija Wrocław w Zhorjelcu/Zgorzelecu jako přikład za hranicy přesahowacu kooperaciju, kotruž chcedźa dale wutwarjeć.
Mało za małych
Drježdźany. Sakska je za wottwar indiwiduelnych njedostatkow při wuknjenju korony dla měła 95 milionow eurow k dispoziciji. Z małeho naprašowanja Mariki Tändler-Walenta (Lěwica) na sakske knježerstwo wuchadźa, zo su z tutych pjenjez jenož njecyłych šěsć procentow zažnodźěsćowemu wobłukej, programej „Rěčne pěstowarnje“ přewostajili.
Nowy Kodiaq předstajili
