Doskónčne „Ně“ za fotowoltaikowu připrawu
Konjecy (JK/SN). Nahladna ličba wobydlerjow je wčera do Konječanskeje burskeje stwy na posedźenje delanskeje gmejnskeje rady přichwatała. Na dnjowym porjedźe dźě steješe zajimawy dypk, kotryž mnohich wobydlerjow jimaše a kotryž měješe přinjesć wěstotu a měr do přichoda. Mišnjanske předewzaće UKA planuje na 70 hektarach mjez Šunowom a Smjerdźacej wulku fotowoltaikowu připrawu a je wotpowědnu próstwu za twar gmejnje Ralbicy-Róžant zapodało. Wčera mějachu gmejnscy radźićeljo wjesnjanostu Hubertusa Ryćerja (njestronjan) społnomócnić, zahajić planowanske jednanja a trěbne naprawy za twarsku dowolnosć.
Policija (22.09.23)
700 štomikow wutorhnyli
Smělnja. Wandalojo su minjeny čas w lěsu pola Smělnje w gmejnje Smělnja-Póckowy po wšěm zdaću bjez rozuma zachadźeli. Hdźež bu lěs hakle před třomi lětami zalěsnjeny, wutorhnychu woni něhdźe 700 douglasijow abo je wotłamachu, policija zdźěli. Štomiki běchu něhdźe pjeć lět stare. Wěcna škoda wučinja znajmjeńša něhdźe 7 000 eurow. Policija pad přepytuje.
Tomaš Žur koncertuje
Pančicy-Kukow. Bywši organist Berlinskeje katedrale swjateje Jadwigi Tomaš Žur wuhotuje jutře, sobotu, 23. septembra, w 15 hodź. w klóštrje Marijinej hwězdźe w Pančicach-Kukowje zhromadnje ze swojej mandźelskej Roswithu beneficny koncert na dobro 775 lět wobstejaceho cistercienskeho klóštra. Tema koncerta z rozmyslowacymi a lóštnymi basnjemi je „Rěka žiwjenja“. Organizatorojo nadźijeja so bohateho wopyta.
Seniorojo škotuja
Lejno. Přichodny škotowy turněr serbskich seniorow wotměje so wutoru, 26. septembra, w Lejnjanskim hosćencu. Započatk budźe w 14 hodź. Kaž organizator Měrćin Nowak zdźěli, su nowačcy stajnje rady witani. Dalše kartyplacanje budźe 31. oktobra, reformaciski dźeń, w Radworskej „Zelenej hałžce“.
Wjesela so na nowe hrajkanišćo
Złyčin (AK/SN). Wjele pilnych rukow je so njedawno při Złyčinskej starej šuli gratu přimało. K zhromadnemu dźěłu namołwjałoj běštej wjesna rada a towarstwo camprowarjow pod nawodom Gerda Hausteina. 25 wobydlerjow je přišło. Zhromadnje su woni stare a dodźeržane hrajkanišćo wotstronili a dźěry za nowe hrajkanske nastroje wuzběhali. Nětko móže fachowa firma hrajkanišćo natwarić. „Swójska iniciatiwa móže něštožkuli wuskutkować“, měni gmejnski radźićel a wjesny předstejićer za Złyčin, Bjedrichecy a Mortkow Udo Steglich.
Kónc septembra ma firma za hrajkanišća z Brandenburga nad Habolu dźěłać započeć. Na nowym hrajkanišću maja mała twjerdźizna, čumpjel, pěskowy kašćik a dalše nastroje nastać. Jedne ze starych krosnowanskich nastrojow chcedźa zachować, wuporjedźeć a wobarbić. Kaž Udo Steglich přeradźa, ma nowe hrajkanišćo „Kćějaca łuka při starej šuli“ rěkać.
Studenća na rybarskim dworje twaršćizny znowa wužiwali
Mały Holešow (UM/SN). Přetwar rybarskeho dwora w Małym Holešowje pola Njeswačidła derje pokročuje. Kaž do zahajenja twarskich dźěłow připowědźene, nasta jako prěnje nowa hala we wonkownym wobłuku areala. Ju chcedźa jako skład wužiwać, ale w njej tež swoje mašiny wotstajić. Na te wašnje móhli na poprawnym rybarskim dworje wjace městna wuzbytkować.
Do toho běchu studenća Techniskeje uniwersity Drježdźany we wobłuku dźěłarnički stary seminarny dom wottwarili. Při tym mějachu woni cyle dokładne předpisy dodźeržeć. „Při wottorhanju měješe so po móžnosći jara kedźbliwje z resursami wobchadźeć a tak ekologiskemu wusměrjenju rybarskeho dwora wotpowědować. Hižo srjedź meje běchu sej studenća dom wobhladali a twaršćizny, kotrež hodźeli so znowa wužiwać, do kataloga zapisali. Mjez druhim běchu to izolacija, wokna, durje, drjewjane špundowanje a lampy“, rěka w zdźělence Njeswačanskeje přirodoškitneje stacije, kotraž rybarski dwór wobhospodarja. Při twarje noweje hale su tele twaršćizny znowa wužiwali.
Porjedźernju železnicy wopytali
Krótkopowěsće (22.09.23)
Dalše zetkanje phōnē
Santiago de Compostela. Intendant Němsko-Serbskeho ludoweho dźiwadła, Lutz Hillmann, a zamołwita za serbske dźiwadło, Madleńka Šołčic, podaštaj so dźensa na dalšu konferencu w zwisku z projektom phōnē w Španiskej. W galiciskim měsće Santiago de Compostela wuměnjeja sej zamołwići a režiserojo mjeńšinoweho dźiwadła.
Přikrótši jězbny plan za liniju S8
Kamjenc. Zastupjerjo Němskeje železnicy kaž tež wobchadneho zwjazka VVO su so srjedu w Kamjencu z měšćanskimi radźićelemi zetkali, zo bychu wo rozrisanju kopicy ćežow na železniskej čarje mjez Kamjencom a Drježdźanami (S8) diskutowali. Z nowym jězbnym planom z jasnje mjenje zwiskami wot oktobra sem chce Němska železnica problem rozrisać.
Dilema wokoło wulkopósłanca
Kónčna etapa kolesowanja po wólbnym wokrjesu
Hórki/Sernjany. Po šěsć tydźenje trajacej jězbje po wólbnym wokrjesu staj požadarka wo kandidaturu za wólby Sakskeho krajneho sejma Elaine Jentsch kaž tež zapósłanc krajneho sejma Alojs Mikławšk (CDU) swoju kolesowansku turu srjedź septembra zakónčiłoj. Wšelake etapy skićachu móžnosć předewzaća, towarstwa a institucije zeznać a sej při tym přehlad wo wužadanjach jednotliwych akterow tworić. Poslednja etapa wjedźeše po serbskich gmejnach podłu Klóšterskeje wody a bu wot komunalnych politikarjow přewodźana.
W Hórkach pobychu na 30. jěchanskim a skakanskim turněrje a rozmołwjachu so tam mjez druhim z předsydku konjaceho sportoweho towarstwa Při Klóšterskej wodźe Sandru Bernd wo wuwiću towarstwa. W 20 wubědźowanjach nastupi nimale 200 jěcharjow z pjeć wšelakich zwjazkowych krajow. Babylětnje wjedro njestaraše so jenož wo optimalne wubědźowanske wuměnjenja, ale přiwabi tež mnohich hosći.
Kritiske zynki w radźe
Radźićeljo přeja a žadaja sej lěpše podłožki za swoje dźěło
Njeswačidło (JK/SN). Tež hdyž je minjene posedźenje Njeswačanskeje gmejnskeje rady zastupowacy wjesnjanosta Norbert Braun (rjemjesło a přemysło) nawjedował, su radźićeljo jasnje a wuraznje swoju njespokojnosć we wjacorych dypkach zwuraznili. Hladajo na wažne rozsudy kaž zwyšenje staršiskich přinoškow za dźěćace dnjowe přebywanišća je trěbne, zo dóstawajo radźićeljo sčasom dosć jasne a wuprajace ličby a fakty na blido. To pomha sej tworić měnjenje, wolóža rozsudy a hustodosć wuradźowanja gmejnskeje rady přikrótša.
Policija (21.09.23)
Wobšudnistwu zadźěwał
Budyšin. Žonje w Budyšinje je wutoru pozdatny sobudźěłaćer předewzaća Paypala při telefonje napowědał, zo je něchtó 500 eurow wot jeje konta wotzběhnył. Žona pak móhła to storněrować, hdyž tak mjenowane steam-karty kupi a tajne čisła zdźěli. Jeje mandźelski so tuž na puć do přichodneho wobchoda nastaji a chcyše tam tajke karty kupić. Při kasy jeho kedźbliwy sobudźěłaćer wobchoda na to skedźbni, zo móhło so snano wo wobšudnistwo jednać a zo měł tuž radšo na policiju zwonić. Sobudźěłaćer wobchoda a přiwołani policisća móžachu tak pjenježnej škodźe zadźěwać.
