Nowy Sprjewiny móst: Haj abo ně?
Budyšin (SN/MiP). Hižo lěta dołho diskutuje Budyšin wo ideji, móst přez Sprjewiny doł wot parkowanišća na Schliebenowej direktnje do Budyskeho stareho města natwarić. W zwisku z financowanjom projekta pak je tute předewzaće dotal zwrěšćiło. Nětko pak wuhlady na pjenjezy ze spěchowanskich srědkow za změnu strukturow nowu dynamiku do planow přinjesu. Lětsa w oktobrje dyrbjała měšćanska rada hišće schwalić, zo hač do nowembra konkretnu próstwu na spěchowanje pola Sakskeje agentury za strukturne wuwiće zapoda. Tuchwilu trochowane kóšty za projekt: 13,5 milionow eurow. Nowy 122 metrow dołhi móst za pěškow a kolesowarjow zmóžnja wobydlerjam a wopytowarjam Budyšina direktny přistup do stareho města – wobchad w nutřkownym měsće so tak cyłkownje zniži, wšako wostanje awto na parkowanišću na Schliebenowej stejo. Tež wikowarjam a gastronomam móhło direktne wodźenje wopytowarstwa do stareho města z wužitkom być. Cyłkowny projekt wšak njewobsteji jenož z natwara filigraneho mosta, ale tež z jeho přizamknjenja dworej Budyskeho hrodu.
Z partnerami w měsće wulce swjeća
Wojerecy (SN/MWj). Cyle w znamjenju wjacorych jubilejow steji lětuši wulki Wojerowski měšćanski swjedźeń, kiž tam wot dźensnišeho hač do njedźele swjeća. Z nim spominaja na 600. róčnicu spožčenja měšćanskeho prawa, na 775. jubilej prěnjeho naspomnjenja Němcow a Ćiska, na 110lětne wobstaće Hórnikec, na 35lětne partnerstwo z Dillingenom a na 25lětne partnerstwo z finskim Huittinom. Z wobeju městow su sej na swjedźeń zastupjerjow přeprosyli, runje tak z pólskeho wokrjesa Środa Wielkopolska kaž tež z ukrainskeho města Pjervomaiskyi. Z nim su Wojerecy wčera dalše měšćanske partnerstwo wotzamknyli.
Nimo hermanka a wikow kołowokoło Łužiskeho naměsta dožiwja wopytowarjo a hosćo na jewišću před Łužiskej halu pisany program. Tam wustupi jutře dopołdnja Orchester łužiskeje brunicy, popołdnju předstaji so baletna skupina Łužiskeje hale. Wječor budźe rockowa show z „Art on fire“. K rańšemu piwku zahraja njedźelu dujerscy muzikanća z Carneho Gózda (Schwarzheide). Po wšelakich hudźbnych poskitkach změja wječor wohnjostroj.
Ze serbskim wodźenjom po sotrowni
Třicety raz wobdźěli so město Budyšin lětsa na cyłoněmskim dnju wotewrjeneho pomnika. Za to zestajichu wobšěrny program, kiž drje njedźelu tysacy wopytowarjow do sprjewineho města wabi.
Budyšin (SN/MWj). 30 twarskich pomnikow budźe 10. septembra na dnju wotewrjeneho pomnika w Budyšinje přistupnych. Tónle dźeń skići składnosć, za kulisy pomnikoškita pohladnyć a stawizny města na wosebite wašnje dožiwić. W Budyšinje je dohromady 1 180 twarjenjow ze statusom twarskeho pomnika.
Woblubowane městna budu tež lětsa wěže stareho města, z kotrychž změja wopytowarjo při připowědźenym rjanym wjedrje wulkotny wuhlad. Dale budu wosebite twarjenja wočinjene, kotrež hewak přistupne njejsu, kaž stukowa žurla na Hrodźe a Weigangec wila. Ze serbskeho wida zajimawy je ansambl sotrownje w Małym Wjelkowje. Tam wotměje so w 11.30 hodź. serbske wodźenje z historikarku Serbskeho instituta dr. Lubinu Malinkowej.
W gmejnje Pančicy-Kukow je dalša samoposłužowarnja nastała. Po ...
Wojerecy nětko we wuchodnej Ukrainje z přikładom
Wojerecy (SN/mb). Mykola Baksheev, měšćanosta města Pervomaiskyi, mysli hižo na čas „po wójnje a dobyću“: Woni chcedźa nazhonjenja Wojerowčanow ze změnu strukturow za swoje industrijne město we wuchodnej Ukrainje wužiwać. Tam su so tež dawno z wotpućowanjom młodźiny bědźili. Wčera staj Baksheev a jeho kolega w zastojnstwje Torsten Ruban-Zeh (SPD) składnostnje lětušeho přijeća wyšeho měšćanosty na jewišću žurle Łužiskeje hale oficielne partnerstwo městow podpisałoj. Ruban-Zeh, kiž běžnje rusce rěči, njetrjebaše tołmačerja. Baksheev powědaše tež wo dóńće ludźi we wójnje: Wot nimale 30 000 wobydlerjow města w regionje Charkiv wojuje 1 100 na fronće, 46 je hižo padnyło. Hakle 32 lět ma Pervomaiskyi status města, Wojerecy hižo 600 lět, spožčenje prawa města w lěće 1423 su wčera wječor z wustupom dźiwadźelnika-prěnjeho měšćanosty na zabawne wašnje wopominali.
Krótkopowěsće (08.09.23)
Do wuchodneje Azije
Drježdźany. Sakski hospodarski minister Martin Dulig (SPD) startuje njedźelu do wuchodneje Azije. Delegaciji přisłušeja zastupjerjo předewzaćow, slědźenišćow, komunow, Hospodarskeho spěchowanja Sakska a krajneje politiki. Woni přebywaja hač do 20. septembra w Japanskej a Južnej Koreji. Do wobeju krajow so minister druhi raz poda. Wón wočakuje nowe nastorki nastupajo inowaciju w swobodnym staće.
We Wulkim domje zaso hrać
Zhorjelc. Po dramatiskej škodźe wody dla loni w nowembrje móže Zhorjelske Gerharta Hauptmannowe dźiwadło swoje hłowne jewišćo znajmjeńša zaso prowizorisce wužiwać. W domje su koncept zdźěłali, kotryž połnohódne, chibazo wobmjezowane hraće pod wuměnjenjemi we Wulkim domje dowola. To rjekny intendant Daniel Morgenroth wčera předstajejo program noweje hrajneje doby.
500 km w běhu třoch dnjow
Puć wotewrjeny
Wulke Ždźary. Kolesowanski puć wot noweho mosta za pěškow we Wulkich Ždźarach podłu zwjazkoweje dróhi B 96 do Mučowa móžeš nětko zaso wužiwać. Saněrowanje zapadneho pobrjoha Hórnikečanskeho jězora je wotzamknjene, zdźěli LMBV. Hač dosrjedź septembra wobstaraja tam poslednje dźěła, čehoždla sčasami k wobmjezowanjam dóńdźe.
Babylěćo zaso wabi
Ralbicy. Wot pjatka, hač do njedźele, 8. do 10. septembra, swjeća w Ralbicach zaso babylěćo, kaž tam swój wjesny swjedźeń mjenuja. Pjatk wotměje so wot 20 hodź. wubědźowanje wohnjowych wobornikow. Sobotu wječor dožiwja wopytowarjo pisany program Ralbičanow. Njedźelu přeprošuja na rańše piwko z Ralbičanskimi pozawnistami. Po konjacym sporće a programje za rentnarjow předstaja historiske awtomobile.
Tworjace a hudźbne wuměłstwo
Budyšin. We wobłuku rjadu „Wuměłstwo w dźěłarni“ přeproša towarstwo Dźěłań dźeń dźensa, štwórtk, w 19 hodź. na wernisažu wustajeńcy Helly Stoletzki w swojej „dobrej jstwě“ na Budyskej Sukelnskej. Wo hudźbne wobrubjenje postara so Paul Geigerzähler. Zastup je darmotny.
Comicowa dźěłarnička
Šulerjo so zeznali
Kak přichodnje tepimy?
Wjacore wjesne skupiny CDU sewjerneho Budyskeho wokrjesa so zešli
Wulka Dubrawa (SN/MkWj). „Po puću ke klimje přichilenemu tepjenju“ bě tema wčerawšeje zhromadźizny wjacorych wjesnych skupin CDU sewjerneho Budyskeho wokrjesa we Wulkej Dubrawje. Na zarjadowanje přeprosyła bě bywša zapósłanča CDU w zwjazkowym sejmje Marja Michałkowa zastupnikow wjesnych skupin Wulkeje Dubrawy, Radworja, Malešec a Hućiny. Jako hósć přichwatał bě zapósłanc CDU w Sakskim krajnym sejmje Marko Šiman. Přeprošenju sćěhowałoj staj tež Radworska wjesnjanostka Madeleine Rentsch a Wulkodubrawski wjesnjanosta Hardy Glausch.
