Šulski dwór njepřistupny
Přestrjeń kołowokoło šule dokładnje za wojerskimi srědkami přepytuja
Budyšin (SN). Šulski dwór inkluziwnje dalšich wonkownych a sportowych přestrjenjow Budyskeje zakładneje šule dr. Gregora Mättiga blisko sudnistwa su tuchwilu njepřistupne. Při twarskich dźěłach su dźěłaćerjo tam kónc julija granatu namakali, čehoždla njemóžachu nadawki kaž předwidźane zakónčić. Dokelž dokładne přepruwowanje na dalše móžne bojowe srědki a z tym zwisowace poćeženje pódy ze škódnymi maćiznami hišće dlěši čas traje, njemóža zamołwići dowolić, zo so wonkowne ležownosće wokoło šule wužiwaja. Mjeztym wuchadźeja z toho, zo budźe samo wobšěrne saněrowanje wonkowneho areala zakładneje šule trěbne. Tole wobwliwuje nachwilnje tež šulske a hortowe aktiwity, Budyske měšćanske zarjadnistwo nětko informuje.
Zo bychu škit šulerkow a šulerjow a šulskeho personala zaručili, přepytuja šulski dwór dokładnje dale a chcedźa wšitke móžne bojowe srědki wotstronić.
Najradšo na trawniku za bulom honi
Wot spočatka měrca 1992 wuchadźeja Serbske Nowiny jako wječornik. A wot toho časa je pomocnicy w mnohich wjetšich a mjeńšich wsach čitarjam do domu noša. Najwjetši čas tuž našich pilnych roznošowarjow w lětnjej seriji předstajić (18).
Jědźeš-li połdra kilometra z Chrósćic na směr do Baćonja, přijědźeš do Prawoćic. Wjeska ze swojimi dźensa něhdźe sto wobydlerjemi nad rěčnej niwu Satkule bu w lěće 1225 prěni raz jako Pravotice naspomnjena. Hač do 1974 běchu Prawoćicy wjesny dźěl Nuknicy a z toho časa přisłušeja Chróšćanskej gmejnje. Po planowanju Sakskeje železnicy před sto lětami bě předwidźane zapołožić trasu wot Radworja do Kamjenca přez Prawoćicy a z tym nastaće dwórnišća w njeposrědnjej bliskosći. Financnych ćežow dla pak so projekt zaćisny.
Pěskečanski wjesny dorost je zawčerawšim zhromadnje ze swojimi ...
Nowa elektriska łódź na jězoru
Dźensa wječor poskitk staršim
Biskopicy (SN/at). Po wčerawšej atace z nožom w Biskopičanskej zakładnej šuli na Cyrkwinskej kriminalni technikarjo a druzy specialisća policije dźensa dale slědy zwěsća. Zastojnicy chcedźa sej wobraz nastupajo motiw a wotběh njeskutka tworić, zdźěli rěčnik policije Maximilian Funke powěsćerni dpa.
Z nožom wobrónjeny 16lětny bywši šuler bě tam wčera dopołdnja wosomlětneho šulerja ćežko zranił. Spočatnje rěkaše, wopor je holca, to su tež Serbske Nowiny we wčerawšim wudaću pisali.
Poraženy je Budyski krajny rada Udo Wićaz (CDU) powěsć wo njeskutku přijimał. Wón a Biskopičanski wyši měšćanosta Holm Große (njestronjan) staj so wčera na městnje wobhoniłoj. „Perfidnym diskusijam w socialnych syćach nastupajo pochada skućićela so raznje spřećiwjam. Njeje scyła žadyn zwisk z politiku ćěkancow dla“, Wićaz wuwědomja.
Na zakładnej a wyšej šuli dźensa žana regularna wučba njeje. We 18.30 hodź. budźe wječor z krizy wotwobaranskim teamom policije w Chrystusowej cyrkwi jako poskitk staršim, kiž chcedźa so wo aktualnym połoženju na šuli rozmołwjeć.
Krótkopowěsće (24.08.23)
W Helsinkach wo Serbach rěči
Helsinki. Na mjezynarodnej konferency SIMILA, sympoziju wo přiswojenju indigenych mjeńšinowych rěčow, dźensa a jutře na Uniwersiće Helsinki w Finskej, změje sobudźěłaćerka projekta ZARI, prof. dr. Nicole Dołowy-Rybińska z Waršawskeho Instituta za slawistiku Pólskeje akademije wědomosćow, jutře druhi hłowny přednošk wo „Bilingualnym kubłanju jako wužadanje za rewitalizaciju a wobchowanje mjeńšinoweje rěče“.
Dalšej jednani jutře
Choćebuz. Wo skóržbomaj komunow Cersk (Tschernitz) a Derbno (Döbern), přećiwo jeju přirjadowanju k serbskemu sydlenskemu rumej w Braniborskej jedna Choćebuske zarjadniske sudnistwo jutře. Dalše jednanje – gmejny Nowe Wiki (Neupetershain) – budźe 13. septembra, sudnistwo zdźěla. Rjad komunow wobora so přećiwo tomu, zo buchu 2018 na zakładźe změnjeneho Serbskeho zakonja sydlenskemu rumej přirjadowane.
Nowej přezmjeznej šćežce
Beneficny koncert za dwě cyrkwi
Policija (23.08.23)
Šofer policiji najprjedy ćeknył
Budyšin. Zastojnikam Budyskeho policajskeho rewěra napadny zawčerawšim wječor w Strowotnej studni čerwjeny Suzuki Alto. Šofer trochu spodźiwnje awto wodźeše. Zastojnicy spytachu jeho zadźeržeć, tola wón ćekny. Policisća awto hač do Krakec přesćěhowachu, hdźež zajědźe šofer na ležownosć. Zastojnicy awto tak wotstajichu zo njemóžeše wodźer Suzukija hižo ćeknyć. To bě jemu wšojedne a prasny do praweje strony policajskeho awta. Test pozdatnu přičinu strašneje jězby wujasni. Tak zwěsćichu pola šofera 2,82 promile w dychu.
Jedna wosoba zemrěła
Wojerecy. Z dotal njeznateje přičiny je wčera rano woheń při Wojerowskej Budyskej aleji wudyriło. Wobydler wjaceswójbneho domu bě to pytnył a wohnjowu woboru wołał. Zasadźenske mocy wobydlerjow wuchowachu a woheń hašachu. Jedna wosoba pak hišće na městnje zemrě. Kriminalna policija pad přepytuje
Hromadźa papjeru
Njebjelčicy. Njebjelčanska młodźinska wohnjowa wobora hromadźi přichodnu sobotu dopołdnja staru papjeru w Serbskich Pazlicach a Njebjelčicach. Rady móžeće swoju staru papjeru (nowiny, časopisy, ale žadyn papjerc) w kartonkach abo korbikach před durjemi wotstajić.
Kultura w bróžni
Wochozy. Wochožanske towarstwo Šwjelic bróžnja přeprošuje sobotu, 26. awgusta, na zarjadowanje, na kotrymž předstaji klankodźiwadźelnik Lutz Männel w 16 hodź. hru „Čert z třomi złotymi włosami“. We 18 hodź. sćěhuje kabaret „Der Kaktus“ skupiny „Kaktusblüte“ z Wjazońcy.
Kupnicu bórze přetwarja
Na bywšim arealu BHG w Njeswačidle zahaja druhi twarski wotrězk
Njeswačidło (UM/SN). Hižo loni připowědźeny přetwar Njeswačanskeje kupnicy nětko bórze zahaja. Kaž wuwiwar projekta a sobuwobsedźer Lars Gottschling wobkrući, kupnicu 31. awgusta zawru. To pak jenož za krótki čas. „Twarjenje wobšěrnje ponowimy a 13. nowembra zaso wotewrimy.“
Z tymle wuprajenjom reaguje Lars Gottschling na blady we wokolinje. Ludźo sej powědaja, zo chcedźa areal naprawo kupnicy bórze wottorhać. „Tomu scyła tak njeje. Tam chcemy započeć twarić. Tak nastanje wobłuk za bistro kaž tež předawanske přestrjenje za pjekarnju Dörfer a našeho noweho partnera Schiebocker.“ Mjeztym pak njebudźe to hižo kupnica Nah und Gut, kotraž skupinje Edeka přisłuša, ale předewzaću Rewe přisłušaca skupina Nahkauf. „Nimo zežiwidłow změja w kupnicy tež dalše wudźěłki, na přikład za domjacnosć, kaž tež drogerijowe produkty“, Lars Gottschling připowědźi. Dale wón Njeswačanow namołwja: „Trjebamy swojich swěrnych a spokojnych kupcow, zo móhli naslědnje a dołhodobnje zastaranje w našim regionje zawěsćić.“
