Sydlišćo ma přichod měć
Wětrowske bydlenske domy skićeja zajimcam dobre wuměnjenja
Wětrow (UM/SN). Něhdźe 30 jednotliwych bydlenjow w bydlenskich blokach napřećo Wětrowskej šamotowni je tuchwilu prózdnych. To je něhdźe šesćina cyłkowneho wobstatka. To chce Bóščanski wjesnjanosta Stanisław Ryćer (Bóščanske rjemjesło) rady změnić. Wot toho časa zo je wón w lěće 2008 prěni raz jako wjesnjanosta nastupił, su Wětrowske bydlenske domy jedna z jeho najwažnišich komunalnopolitiskich temow. „Wětrowske sydlišćo scyła tak njeatraktiwne njeje“, wón měni. Wonkownje prezentuja so domy dosć nahladne, byrnjež raz trochu čerstweje barby trěbne było.
ZÜNDAPP najstarše jězdźidło było
Smjerdźaca (aha/SN). Jako přićahliwy wjeršk 19. razej přewjedźeneho třidnjowskeho wohnjowoborneho swjedźenja w Smjerdźacej wopokaza so minjenu sobotu přehladka oldtimerow a tež tak mjenowanych youngtimerow. Loni prěni raz přewjedźena přehladka z 23 wobrazami je tehdy dobry wothłós žnjała. Tónraz zličichu dwójce telko wobrazow. To je za wotběh zamołwiteju wobornikow Marcela Narčika a Marcela Rječku runje tak překwapiło, kaž wulku ličbu zajimowanych přihladowarjow. W dołhim ćahu wobdźěleni běchu kolesowarjo, mopedisća a wodźerjo traktorow znatych typow kaž Deutz, Famulus abo Belarus. Najstarše wobdźělene jězdźidło bě motorske Manfreda Krala z Róžanta, kiž předstaji swoju ZÜNDAPP z lěta 1950.
Přehladce přizamkny so wubědźowanje, hdźež dyrbješe wodźer jězdźidła 25 metrow dołhu čaru ze zawjazanymaj wočomaj wróćo jěć. Jako najlěpši a najbliši k markěrowanej liniji wopokaza so Smjerdźečan René Bulank před Milanom Lehmannom z Łazka.
Dobrowólne wohnjowe wobory gmejny Halštrowska Hola su wčera swojeho ...
Wot trajneho dešća so mylić njedali
Spěwanje a narodnu drastu pěstuja(5)
Cyłkownje 18 towarstwow je so w zwisku z wubědźowanjom Leaderoweje kónčiny Hornjołužiska hola a haty „Podpěra regionalne dźěła“ wuznamjeniło. W swojej lětnjej seriji wěnuje so wječornik dobyćerjam a chce towarstwa a jich zaměry předstajić.
Spěwne ćěleso pod nawodom Jadwigi Kaulfürstoweje wěnuje so serbskemu ludowemu spěwej, wobrubja serbske Bože mšě a předstaja zhromadnje z druhimi chórami serbske oratorije Handrija Zejlerja a Korle Awgusta Kocora. W Serbach wotměwaja prawidłownje wotpowědne zarjadowanja. Wjace hač 30 spěwarjow a spěwarkow wot młodostnych hač k wuměnkarjam zwučuje kóždy tydźeń wutoru wječor na žurli „Šule Ćišinskeho“.
Chór Lipa ma pak tež spěwansku skupinu dźěći, kotruž mjenuja Lipki. Młode spěwarki a spěwarjo wustupichu na přikład na swjedźenju swójbow na Kukowskim hrodźišću. Zo bychu so dźěći skupiny Lipki do wustupow towarstwa zapřijeli a prěnje nazhonjenja w chórje zběrali, chcedźa Lipjenjo zhromadnosć wobeju cyłkow – dźěći a dorosćenych – w towarstwje wobkrućeć.
Krótkopowěsće (09.08.23)
Kónčne wothłosowanje zahajili
Mnichow. Nakładnistwo Langenscheidt je po wuhódnoćenju wothłosowanja lisćinu kandidatow za němske „Młodźinske słowo lěta“ wozjewiło. Hač do 20. septembra móža zajimcy wotnětka online z dźesać namjetow tři słowa resp. wobroty za finale w septembrje wuzwolić. Lisćina wopřijima wopřijeća, kaž na přikład „Kerl*in“, „Digga(h)“ a wospjet akronym „Yolo“, skrótšenku za „Sy jenož jónu žiwy“.
Meyer sej kontrole žada
Zhorjelc. Zhorjelski krajny rada Stephan Meyer (CDU) je sej doraznje žadał nachwilne kontrole na němsko-pólskej hranicy zawjesć. „Přiběraceho ilegalneho zapućowanja migrantow a alarmowaceje aktiwity kriminelnych pašowarjow dla je nuznje trjeba, zo zwjazkowe knježerstwo hnydom jedna“, piše politikar we wčera wozjewjenym lisće zwjazkowej ministerce nutřkowneho Nancy Faeser (SPD).
Zelena Liga skorži jamy dla
Stare traktory so zetkaja
Koblicy. 20. raz wotměje so přichodny kónc tydźenja w Koblicach pola Wulkich Ždźarow zetkanje historiskich a nowšich traktorow, tak mjenowanych wlečakow. K tomu je towarstwo přećelow wlečakow wobšěrny program přihotowało. Pjatk wot 18 hodź. přeprošuja na wubědźowanje wohnjowych wobornikow. Sobotu w 13 hodź. započnje so kołojězba wobdźělenych mašinow. W 15.30 hodź. demonstruja, kak su něhdy žito młóćili. W połnocy startuja motory traktorow. Njedźelu wot 9 hodź. přewjedu wubědźowanja starych traktorow. W 13 hodź. přizamknje so bój gigantow.
Na hornčerske wiki
Hózk. 19. hornčerske wiki wotměja so sobotu a njedźelu, 12. a 13. awgusta, w Hózku. Stajnje wot 10 do 18 hodź. poskićuja hornčerjo z cyłeje Němskeje swoje wudźěłki. Za to su wšelake atrakcije přihotowali.
Podpěra klóšter a hrajny ćah
Pančicy-Kukow (SN). Składnostnje swojich 65. narodnin je zapósłanc Sakskeho krajneho sejma Alojs Mikławsk (CDU) prosył wo pjenježne dary za projekty přećelskeho kruha klóštra Marijineje hwězdy kaž tež za dalšu podpěru młodźinskeho dźěła w towarstwach. Mikławšk je zdobom předsyda přećelskeho kruha. W tutej funkciji přepoda wón tele dny abatisy Gabrieli Hesse 2 500 eurow. „Z tutej podpěru hodźa so dalše projekty za zachowanje klóšterskich připrawow dale wjesć a zwoprawdźić“, praji Mikławšk. Tak móža nětko wjacore ławki w Lipju ponowić
Přećelskemu kruhej přisłuša tuchwilu 170 čłonow z cyłeje Němskeje. Wón spěchuje kulturne, socialne, ludy zwjazowace a ekumeniske nadawki klóštra a zhladowaše w lěće 2019 na swoje 20lětne wobstaće. Wosebje při dospołnym ponowjenju špundowanja klóšterskeje cyrkwje w lěće 2012 je so přećelski kruh jako spušćomny partner wopokazał.
Dalšich 3 500 eurow je Mikławšk nazběrał za Oberlichtenauski hrajny ćah. Pjenjezy je wón tohorunja přepodał.
Před twjerdźiznu zaso dźiwadło
Z nowej techniku zajim zbudźić
Projekt Zuseuma powjedźe na slědy kompjuteroweho pioněra
Budyšin (CS/SN). Dźakowano mnohim sponsoram je Budyski Zuseum nětko modernu plasmowu rězansku mašinu dóstał, kotruž móža z techniku CNC wodźić. Jednaćel firmy za twar wosebitych mašinow z Amstettena Erwin Röder je mašinu dodawał a tež w sprjewinym měsće zarjadował.
Jedyn z prěnich, kotřiž su z nowej techniku dźěłali a ju zeznali, bě Max Petrick z Budyskeho Melanchthonoweho gymnazija. Hižo wot 3. lětnika wón w Zuseumje sobu dźěła. Kaž młodostny rozłoži, móže mašina wšelaki material rězać. Po słowach nawody Zuseuma Andreasa Samuela ma nowa inwesticija tomu přinošować, młodostnym modernu techniku zbližić, jich motiwować a jim wjeselo wobradźeć. Nastroj, kiž něhdźe tysac kilogramow waži, je předewzaće Schmalz & Schön w Amstettenje wotewzało a do Budyšina přiwjezło. Z wosebitym kranom firmy Hentschke su rězansku mašinu na jeje doskónčne městno stajili.
