Rozłoži woznam serbskich mjenow
Wochozy (AK/SN). Serbske mjena swójbow a wsow wokoło Wochoz, jich pochad, woznam a rozšěrjenje steja w srjedźišću kulturneho popołdnja 25. awgusta w 15.30 hodź. we Wochožanskej Šwjelic bróžni. Na to přeprošujetej spěchowanske towarstwo bróžnje a motiwatorka za serbsku rěč w Slepjanskim a Wochožanskim regionje Juliana Kaulfürstowa.
Rozmołwny partner budźe dr. Hync Rychtaŕ ze Slepoho. Wot lěta 1972 hač do 2014 bě wón w Instituće za sorabistiku Lipšćanskeje uniwersity, najprjedy jako student, pozdźišo jako doktorand a wjele lět jako wědomostny sobudźěłaćer. Wólne rozmołwne koło z nim ma zajim a čućiwosć za serbsku rěč a předewšěm za serbske mjena budźić. Zarjadowanje wotměje so w rjedźe „Kofej w bróžni“. „Změje li wone dobry wothłós, chcemy z dalšimi swójbnymi mjenami pokročować a potom tež ležownostne mjena sobu zapřijeć“, Juliana Kaulfürstowa wuzběhnje. Štóž so za kulturu, stawizny a rěč zajimuje, je wutrobnje witany. Na kóncu by so towarstwo Šwjelic bróžnje nad małym darom wjeseliło.
Trójce tak drohe kaž spočatnje
Gmejna woteda próstwu wo spěchowanje za nowu pěstowarnju
Njeswačidło (UM/SN). Podłožki za spěchowanje nowotwara dźěćaceho dnjoweho přebywanišća je Njeswačanska gmejna Sakskej agenturje za strukturne wuwiće (SAS) zapodała. Kaž wjesnjanosta Gerd Schuster (CDU) zdźěli, wučinjeja planowane kóšty 11,3 miliony eurow. „To je něhdźe trójce telko porno trochowanju w tym času, jako smy prěni raz wo tym rozmyslowali.“ W juliju 2020 bě Njeswačanska gmejnska rada zasadnje rozsudźiła, nowu pěstowarnju twarić a nic dotalnu saněrować. Na tymle rozsudźe so tež tři lěta pozdźišo ničo změniło njeje, za to pak planowane kóšty. Gerd Schuster naliči za to wjacore přičiny: „Twarske wudawki su so zasadnje podróšili. Wulki podźěl na tym ma tež politika ze swojimi normami a standardami, předewšěm škita klimy dla.“
Za wučerjow a kubłarjow
Róžant. Wšitcy wučerjo a kubłarjo kaž tež něhdyši a přichodni pedagogojo su jutře, wutoru, we 18 hodź. na Božu mšu do Róžanta přeprošeni. Je to poskitk, so w poslednim prózdninskim tydźenju tež duchownje a z Božim žohnowanjom na nowe šulske lěto nastajić. Po Božej mši přeprošuje Serbske šulske towarstwo k zetkanju na zahrodźe při cyrkwi.
Radźićeljo wuradźuja
Radwor. Přichodne posedźenje Radworskeje gmejnskeje rady wotměje so srjedu, 16. awgusta, we 18.30 hodź. w jědźerni šule „Dr. Marja Grólmusec“. Mjez druhim budu radźićeljo plan naprawow za turistiske wuwiće gmejnow Radwor, Wulka Dubrawa a Malešecy rozjimować. Na dnjowym porjedźe steji dale diskusija wo podźělnym zapłaćenju wučbnicow, su-li je šulerjo skóncowali. Wobydlerjo su wutrobnje přeprošeni.
Z kolesom po Dubrjenskim bahnje
Kulow (DH/SN). Njewšědny napohlad skićeše so sobotu wobydlerjam Kulowa, jako so dopołdnja črjódka kolesowarjow na tamnišim torhošću zetka. Woni podachu so na kolesowansku jězbu pod hesłom „Kołowokoło Kulowa“ přez katolsku Łužicu. Tadej Šiman, kotryž je dohromady štyri jězby jako přidatny poskitk k wosebitej wustajeńcy „Čej’ da sy?“ Serbskeho muzeja w Budyšinje koncipował, dohromady 22 kolesowarjow nawjedowaše.
Hišće na torhošću powita jězdźerjow farar Gabriš Nawka. We wosadnej farskej cyrkwi informowaštaj farar Nawka a Tadej Šiman wo historiskich a architektoniskich zajimawosćach gotisko-barokneho twara a Kulowskeje wosady. Z kolesom poda so skupina na to nimo stareje katolskeje Křižneje cyrkwje přez Nowu Wjes a nimo Zelderec hatow k wuhladnišću w Dubrjenskim bahnje. Tam rozprawješe biologa a ornitologa Syman Šołta z Budyšina wo florje a fawnje najwjetšeho přirodoškitneho pasma wuchodneje Němskeje. Tadej Šiman tón abo tamny historiski fakt wo bahnje a jeho wužiwanju doda.
Dźesać młodostnych poda so wčera z Chrósćic na putnikowanje do ...
Krótkopowěsće (14.08.23)
Jan Hrjehor jenički požadar
Budyšin. 45lětny Jan Hrjehor, nawoda Wyšeje šule Slepo, je jenički požadar za wólby štwórteho serbskeho naměstnika ze Sakskeje w radźe Załožby za serbski lud. Wólbny wuběrk Domowiny je požadanske podłožki minjeny pjatk pruwował a kandidaturu, kotruž Serbski Sokoł podpěra, wobkrućił. Wólby budu 22. septembra na posedźenju Zwjazkoweho předsydstwa Domowiny w Trjebinje.
Serbskej programaj dožiwili
Budyšin. Słónčnej wječoraj wabještej kónc tydźenja mnohich ludźi do Sundowner-bary na zahrodźe Serbskeho ludoweho ansambla. Tam zabawještej hosćinu serbskej cyłkaj. Pjatk zaspěwa muski kwartet PoŠtyrjoch někotre štučki a sobotu hip-hopowa trójka Nowa Doba.
Budyski tydźeń šacha nimo
Policija (11.08.23)
Dwě zranjenej po wohenju
Běła Woda. Woheń hašeć dyrbjachu předwčerawšim w Běłej Wodźe. Njeznaći běchu na nutřkownym dworje wjacebydlenskeho domu wotpadkowe sudobjo zapalili. Te steješe pod drjewjanym balkonom, kotryž so tohorunja zapali. Płomjenja rozpřestrěchu so na pincu a chódbu twarjenja. Kaž policija rozprawja, chcyštej žonje w starobje 20 a 66 lět dom přez chódbu wopušćić. Při tym pak přewjele kura dychaštej. Wuchowanske mocy dowjezechu wobě do chorownje.
Hodowne kule po serbskim
Ludowa uniwersita poskitki za nazymski semester předstajiła
Wojerecy (SiR/SN). 4 500 eksemplarow z 81 stronami, pjelnjene z poskitkami wědy a přeprošenjemi ke kreatiwnym, kulinariskim a sportowym móžnosćam – takle hodźi so nowy zešiwk Wojerowskeje ludoweje uniwersity wopisać. Pod hesłom „Klasiske sej lubić dać, nowe wuspytać a mnohotnosć dožiwić“ su sobudźěłaćerjo wokoło nawodnicy Uty Grun kaž kóžde lěto rešeršowali, ideje zběrali a kmanych referentow pytali, zo móhli wšitkim starobnym skupinam něšto poskićeć. Při tym wobkedźbowachu, što ludźi zajimuje, dokal so trendy wuwiwaja a što by móžnym wobdźělnikam wjeselo wobradźiło.
Organizuja zaso wiki
Radwor. Čaporowe wiki a měnjenska bursa za dźěćacu drastu wotmějetej so sobotu, 2. septembra, wot 14 do 18 hodź. na Radworskej kupje. Po dlěšej přestawce a tójšto naprašowanjach chce kupowe zjednoćenstwo tele zarjadowanje pjaty raz přewjesć. Za nje pytaja hišće wikowarjow. Popłatk płaći dźesać eurow. Wotpowědnje wulke blido měł sej kóždy sam sobu přinjesć. Zajimcy njech přizjewja so hač do 26. awgusta pod telefonowym čisłom 0173 90 25 365 abo e-mailnje pod .
Lisćiki sej zawěsćić
Pěskecy. Woblubowany winowy swjedźeń z dujerskej kapału Horjany budźe sobotu, 26. awgusta, wot 18 hodź. při Pěskečanskim sportnišću. Zastupne lisćiki w předpředani za wosom eurow dóstanu zajimcy w Róžeńčanskej Šołćic pjekarni kaž tež na Wätzigec kwětkowym a gratowym statoku w Serbskich Pazlicach. Při wječornej kasy płaća lisćiki dźesać eurow.
