Kritiku staršich chutnje brali
W Zhorjelskim wokrjesu su jězbny plan z šulskim wobchadom předźěłali
Niska (AK/SN). Šulerski wobchad na sewjeru a wosrjedź Zhorjelskeho wokrjesa dyrbi so na nowe šulske lěto jasnje polěpšić. Šulerjo maja so spušćomnje, dypkowanje a njekomplikowanje do šule a zaso domoj transportować. Nowy jězbny plan, kotryž wobšěrnje přiměrichu, je wot dźensnišeho płaćiwy. Tole wujasni nawoda zarjada za infrastrukturu a mobilitu Zhorjelskeho wokrjesa Holger Freymann minjeny štwórtk w Niskej. „Z wokrjesom a wobchadnym předewzaćom moveas, kotremuž nadawk přepodachu, wšitko dokładnje wothłosowachmy. Chcemy wužadanja zmištrować.“
Wokrjes a wobchadne předewzaće reagujetaj na kritiki a skóržby staršiskich iniciatiwow, šulow a komunow. Spočatk junija so zamołwići na to dorozumichu, jězbne plany mjeztym dźewjaty raz předźěłać. Tónkróć su změny wobšěrniše. „W šulach a komunach so naprašowachmy. Cyłkownje 30 přizjewjenjow na to dóńdźechu. Dale dóstachmy 85 jednotliwych pokazkow. Z toho běchu 30 chutne problemy“, Holger Freymann rozłoži.
Na domizniskim a drastowym swjedźenju w Bórkowach dožiwichu ...
Krótkopowěsće (21.08.23)
Swjedźeń „Serbja-lěćo-słónco“
Bad Gandersheim/Northeim. Z koncertom serbskeho punka Pawoła „Geigerzähler“ Nagela je so swjedźeń „Serbja-lěćo-słónco“ wčera wječor na Delnjosakskej krajnej zahrodniskej přehladce w Bad Gandersheimje zakónčił. Přihladowarjow přewšo zawjeseliłoj stej tam runje tak Serbska rejwanska skupina Ćisk a cyłk Serbska reja. Wjace wo swjedźenju čitaće jutře.
Wopor přewjele zarjadowanjow
Dešno. Temowy kónc tydźenja wo rjemjesle w srjedźowěku wčera a předwčerawšim w Dešnjanskim muzeju pod hołym njebjom Stary lud bu wopor nadposkitka kulturnych zarjadowanjow. We wsy je młodźina kokota łapała, dokal je tójšto ludźi přichwatało, a ze stron muzeja mějachu so hišće na Domizniskim a drastowym swjedźenju w Bórkowach wobdźělić. Ličba zajimcow, kiž je do muzeja přišła, bě přewšo skromna.
Njetopyrje w chorowni
Policija (18.08.23)
Drohi njedostatk zwěsćili
Prěčecy. Wobchadna wobstražowanska słužba Budyskeho policajskeho rewěra je předwčerawšim w Prěčecach ratarske mašiny kontrolowała. Při tym napadny zastojnikam 33lětny wodźer traktora z připowěšakom. Wón wožeše wulke walčki słomy, kotrež njeběchu dosć zawěsćene. Nimo toho zwěsćichu techniske njedostatki. Za to změje młody muž 60 eurow płaćić a dóstanje dypk w Flensburgu.
Kedźbu, gymnaziasća!
Budyšin. Přijězd za nowačkow do internata Budyskeho Serbskeho gymnazija budźe njedźelu, 20. awgusta, wot 18 do 21 hodź. Póndźelu po wučbje w 13.30 hodź. wotměje so za nowych wobydlerjow zahajenska zhromadźizna, na kotrejž ma so kóždy wobdźělić. Njech potrjecheni šulerjo tole wobkedźbuja
Lisćiki sej zawěsćić
Pěskecy. Woblubowany winowy swjedźeń z dujerskej kapału Horjany budźe sobotu, 26. awgusta, wot 18 hodź. při Pěskečanskim sportnišću. Zastupne lisćiki w předpředani za wosom eurow dóstanu zajimcy w Róžeńčanskej Šołćic pjekarni kaž tež na Wätzigec kwětkowym a gratowym statoku w Serbskich Pazlicach. Při wječornej kasy płaća lisćiki dźesać eurow.
Přepodadźa čestne myto
Slepo. Swjedźeń za swójby přewjedźe Slepjanska wjesna rada njedźelu, 20. awgusta, wot 14 hodź. na Slepjanskej nawsy. Při tej składnosći chcedźa čestne myto wsy přepodać a tak angažowanych wobydlerjow počesćić. Nimo toho witaja nowonarodźene dźěći. Na jewišću wustupi mjez druhim skupina dujerjow na hońtwjerskim róžku. Dale budźe móžno derje zdźeržanu dźěćacu drastu měnjeć.
Nóc njetopyrjow
Wulki wokomik dožiwili
Zakładny kamjeń za nowu Ralbičansku pěstowarnju połoženy
Ralbicy (JK/SN). Wažny krok při zwoprawdźenju nowotwara Ralbičanskeje pěstowarnje je so wčera na tamnišim twarnišću wotměł, jako połožichu zakładny kamjeń. Na tutu ceremoniju witachu wjesnjanosta Hubertus Ryćer (njestronjan) a gmejnscy radźićeljo sakskeho ministerskeho prezidenta Michaela Kretschmera, zapósłanca Sakskeho krajneho sejma Alojsa Mikławška, Budyskeho krajneho radu Uda Wićaza (wšitcy CDU) kaž tež předsydu Domowiny Dawida Statnika, předsydku Serbskeho šulskeho towarstwa Katharinu Jurkowu a mnohich dalšich zastupjerjow z twarom a gmejnu zwjazanych institucijow.
Wuhódanje dowoloweje křižowki
Tablet njeje jenož za zabawu
Smjerdźaca (aha/SN). Před wosom lětami je Smjerdźečanske Serbske kubłanske srjedźišćo LIPA započało, w poslednim tydźenju lětnich prózdnin za šulerjow w starobje hač do dźesać lět přewjesć wočerstwjace prózdninske lěhwo. Zaměr bě, holcam a hólcam na lóštne wašnje motiwaciju do noweho šulskeho lěta dać. Minjene dny su dalše tajke lěhwo přewjedli.
Michaela Rabowa jako sobudźěłaćerka kubłanskeho srjedźišća, kotrež je nětko w nošerstwje Serbskeho šulskeho towarstwa, a zamołwity za medijo-pedagogiski projekt SŠT LUCIJA Michał Cyž staj za to spřihotowałoj přewšo powučny wobsahowy wotběh. Jeju wotpohlad, mjez 30 wobdźělenymi dźěćimi přewažnje Worklečanskeje a Chróšćanskeje zakładneje šule zajim za matematiku, informatiku a techniku zbudźić, je so poradźił. Tak dźěći při wobchadźenju z tabletom nazhonichu, zo njeje tón jenož za zabawne hry, ale trěbny wuknjenski nastroj. Zanurili su so do wobšěrneho pola robotiki. Wědźa nětko tež, zo móžeš coding nawuknyć a zo je programěrowanje přewšo zajimawa zaběra.
W klóštrje su zaso zela w srjedźišću
Pančicy-Kukow (SN). Křesćansko-socialny kubłanski skutk přeprošuje zhromadnje z abatisu Gabrielu Hesse a sotrami konwenta klóštra Marijineje hwězdy njedźelu, 20. awgusta, wot 11 hodź. na zelowu njedźelu do zežiwjenskeho a zeloweho centruma w Pančicach-Kukowje. Składnostnje Dnja Hornjeje Łužicy, kotryž so kóžde lěto 21. awgusta woswjeći, wotměje so we wobłuku zeloweje njedźele prěni raz tradicionalne hornjołužiske domizniske zetkanje zwjazka Łusatia pod hesłom „Z horow hač do hole“. Tak ma 6 000 kwadratnych metrow wulka zahroda wopytowarjow z cyłeje Hornjeje Łužicy přiwabić.
