Za kolesowanje so přizjewić
Tři konje su jeho wulki konik
Wot spočatka měrca 1992 wuchadźeja Serbske Nowiny jako wječornik. A wot toho časa je pomocnicy w mnohich wjetšich a mjeńšich wsach wšědnje čitarjam do domu noša. Najwjetši čas tuž našich pilnych roznošowarjow w lětnjej seriji předstajić (12).
Stary kanal přeco hišće stabilny
Překwapjenka při saněrowanju wopłóčkoweje syće w sprjewinym měsće
Budyšin (CS/SN). Wot spočatka junija tohole lěta zwoprawdźeja na Budyskej Pawlijowej twarske předewzaće, kotrež je dołho planowane. Hižo wot lěta 2015 chcedźa tam wopłóčkowu kanalizaciju ponowić. Tuchwilu su sobudźěłaćerjo Berlinskeje firmy za saněrowanje kanalow na wotrězku mjez Thomasa Mannowej a Weigangowej při dźěle. Tam běchu při wurywanskich dźěłach zwěsćili, zo kanalizacija z tak mjenowaneho kamjentneho kanala wobsteji. To woznamjenja, zo je kanal z kamjenjow murjowany a ma štyriróžkaty přerěz. Kaž fachowcy zwěsćichu, je kanal něhdźe 120 lět stary a je nastał, jako na Kantowej a Lubijskej kaserny twarjachu.
Krótkopowěsće (03.08.23)
#WHY! goes international
Wojerecy. Wuznamjenjena komunikaciska a marketingowa strategija města Wojerecy je nětko tež mjezynarodnje prezentna. Informacije ze strony „#WHY – Wandel in Hoyerswerda“, kotraž je digitalne srjedźišćo prezentacije, móža sej zajimcy wotnětka tež w jendźelskej rěči zbližić. Logo je z „Welcome to Hoyerswerda“ wotpowědnje přiměrjeny.
Wjace přizjewjenych awtow
Kamjenc. Ličba přizjewjenych nowych jězdźidłow w Sakskej je prěnju połojcu lěta přirunujo ze samsnym časom loni wo 5,9 procentow přiběrała. Kaž statistiski krajny zarjad w Kamjencu zdźěla, su w prěnim połlěće tutoho lěta 58 345 jězdźidłow přizjewili. Wjace hač 75 procentow z nich běchu wosobowe awta. Runočasnje dósta 136 574 trjebanych awtow noweho wobsedźerja.
Pomnik Atatürka w Praze?
Wóz po krótkim času skóncowany
Młody pišćeler zaměrnje na puću wuspěcha
Budyšin (CRM/SN). W lěće 2017 maturowaše Johannes Kral z Dobranec pola Hodźija na Serbskim gymnaziju w Budyšinje. W samsnym lěće wobdźěli so (hižo) na XIII. mjezynarodnym wurisanju Gottfrieda Silbermanna za pišćelerjow w Freibergu. Z toho časa ma nimoměry nadarjeny a dale přewšo wuspěšny student cyrkwinskeje hudźby w Lipsku priwileg, kaž profilowany wuměłc směć koncertować na wosebje sławnych pišćelach.
Mjeztym liči 24lětny student do „wodźacych dorostowych organistow“ a jeho terminowu protyčku njepjelnja jenož wustupy w Lipsku, Drježdźanach abo Berlinje, ale tohorunja we wukraju – samo w Moskwje. Njeje tuž jenož zbožowny připad, ale poprawom samozrozumliwa naležnosć, zo zarjadowa so runje tak do wonych organistow, kotřiž hraja składnostnje Budyskeho pišćeloweho lěća na wulkich byrglach z Eulec manufaktury w Budyskej tachantskej cyrkwi. Njedawno zahori wón znowa ze swojim wirtuoznym hraćom mnohich wobydlerjow města, w kotrymž běše so před 24 lětami narodźił. Při tym je wón swojeju staršeju runje tak putał kaž někotrych Serbowkow a Serbow z přećelskeho kruha.
Nowotwar nuznje trěbny
Při Slěbornym jězoru ma multifunkcionalne twarjenje nastać
Łaz (AK/SN). Při južnym přibrjohu Slěborneho jězora chce Łazowska gmejna do infrastruktury inwestować. Tam ma multifunkcionalne twarjenje nastać. Nadawk za planowanje we wobjimje 35 000 eurow je Gumpertec planowanski běrow přewzał. Nowotwar ma tuchwilne sanitarne twarjenje na městnje za stajnych stanowarjow narunać.
„Nowotwar je nuznje trěbny, dokelž trjebamy moderne nuzniki a duše za wopytowarjow, so kupacych a stanowarjow“, praji nawoda twarskeho wobłuka gmejny Jens Kieschnick. Tuchwilu gmejna wjacore móžne warianty přepytuje. Po słowach Kieschnicka chcedźa hišće lětsa tak mjenowane wukonowe fazy 1 do 3 zmištrować. To potrjechi zakładne planowanje, předplanowanje a planowanje naćiska.
Policija (02.08.23)
Paducha lepili
Wochozy. Hnydom dwójce su so paduši minjene dny na teren Wochožanskeje brunicoweje jamy zadobyli a kable pokradnyli resp. pokradnyć chcyli. Njedźelu rano stej dwě wosobje něhdźe sto metrow kabla spakosćiłoj a při tym něhdźe 5 000 eurow škody načiniłoj. Wobstražowanska kamera hišće wobkedźbowaše, kak paduchaj ćeknyštaj. Nazajtra z kameru znowa cuze wosoby zwěsćichu. Přiwołana policija lepi na to 31lětneho pólskeho staćana, kiž chcyše runje 300 kilogramow ćežke kable wotnjesć.
Wustajeńca k jubilejej
Slepo. „Serbski folklorny ansambl Slepo – poł lětstotka hudźby, reje a spěwanja“ rěka wustajeńca, kotruž wotewru pjatk, 4. awgusta, we 18 hodź. w Slepjanskim Serbskim kulturnym centrumje. Wona je wěnowana lětušej 50. róčnicy załoženja Slepjanskeho folklorneho ansambla. Lawdaciju změjetaj předsydka towarstwa Stephanie Bierholdec a Wolfgang Kottissek, kiž je ansamblej wot lěta 1979 hač do 2017 předsydarił. Hudźbne wobrubjenje změje folklorny ansambl na starosći. Wšitcy zajimcy a lubowarjo Slepjanskeje folklory su na wotewrjenje přehladki wutrobnje přeprošeni. Wustajeńca je hač do 13. oktobra 2023 přistupna.
Do kina we wowčerni
Móža we wsy zaso kehelować
Smjerdźaca (aha/SN). Dokładnje před měsacom wotewrěchu w Smjerdźečanskim kubłanskim srjedźišću LIPA „Zahrodu talentow“. Wjesnjanow a dalšich hosći witaše minjenu njedźelu nawoda tamnišeje wohnjoweje wobory Norbert Róbl na dalše zarjadowanje, kotrež pak bě tónraz cyle hinašeho razu. Přičina bě, zo je so předwidźany přetwar tamnišeho kehelowanišća wuspěšnje zakónčił a nětko swojemu wužiwanju přepodał. Zo je tomu dóšło, je zasłužba jednaćela Serbskeho šulskeho towarstwa Andreasa Ošiki, kiž je so wo spěchowanske srědki ze fondsa simul+ starał. Po tym zo dóstachu je přizwolene, stej so wjesna rada a kameradojo wjesneje wohnjoweje wobory kaž tež młodźinski klub wo zaručenje wobšěrnych trěbnych dźěłow starali. Před 40 lětami natwarjene kehelowanišćo njewotpowědowaše předpisanym žadanjam a tež wěstotne normy njeběchu dodźeržane.
