Stworja dobre wuměnjenja
Najwjetše twarske předewzaće w Slepjanskej kónčinje je tuchwilu nowotwar gratownje Slepjanskeje dobrowólneje wohnjoweje wobory. Projekt bě wčera tema na posedźenju gmejnskeje rady.
Slepo (AK/SN). Nowotwar Slepjanskeje wohnjowoborneje gratownje je w lěćnych měsacach dale pokročował. Tole podšmórny nawoda twarskeho wotrjada Slepjanskeho zarjadniskeho zjednoćenstwa Steffen Seidlich na wčerawšim posedźenju gmejnskeje rady. „Hruby twar kaž tež wukubłanska wěža stej hotowej. Mjeztym su so klinkerowe dźěła zahajili“, Seidlich rozłoži. W lěćnych měsacach bě wjesnjanosta Jörg Funda (CDU) twarske nadawki we wobjimje 392 000 eurow přepodał. Gmejnska rada bě jeho za to społnomócniła. Spočatk tydźenja dojednachu so na městnosć za antenu decentralneho škričkowanišća wobory. Tohorunja póndźelu bě prěnje wuradźowanje wo elektroinstalaciji, kotruž přichodny tydźeń zahaja.
„Dyrbiš ludźi z nosom na serbsku tematiku storčić“
Lětni serial SN
8. dźěl
Załožba za serbski lud je loni idejowe wubědźowanje „Rěč wjaza. Rěc zwězujo. Sorbisch verbindet.“ přewjedła. 27 projektow su w pjeć kategorijach z pjenježnym mytom 500 do 10 000 eurow mytowali. W našej lětnjej seriji předstajamy wubrane dobyćerske projekty, dźensa: „Natwar zběrki serbskeje literatury“.
Wot meje 2017 słuša Zły Komorow do serbskeho sydlenskeho ruma Braniborskeje. Tohodla widźi měšćanska biblioteka jedyn z hłownych nadawkow w tym, swój teritorialny wobstatk ze šěrokim poskitkom serbskeje literatury – beletristika, wěcna literatura, periodika – wudospołnić. 500 eurow su za to we wobłuku idejoweho wubědźowanja dóstali. Hižo loni w decembrje je nawodnica Złokomorowskeje měšćanskeje biblioteki Kerstin Bischoff prěni medijowy pakćik wo Serbach braniborskeho ministerstwa za wědomosć, slědźenje a kulturu dóstała (SN rozprawjachu). „Chcemy našu zamołwitosć chutnje brać. Je nam to wulke wužadanje, serbsku rěč a kulturu tudyšim ludźom jenož njezbližić, ale tež wožiwić“, rjekny Kerstin Bischoff.
Krótkopowěsće (07.09.22)
Emmy za Olivera Lattu
Koćina/Los Angeles. Z Koćiny pochadźacy Oliver Latta je wčera w Los Angelesu zhromadnje z Teddyjom Banksom myto „Emmy“ přijał. Wuměłc z pseudonymom „extraweg“ bu wuznamjenjeny w kategoriji „Outstanding Main Title Design“ (někak: wusahowace wuhotowanje hłowneho titula) w ameriskej sciencefiction- seriji „Severance“, přistupnej na Apple TV.
Jubilej Serbskeho gymnazija
Budyšin. Serbski gymnazij Budyšin woswjeći jutře 75. róčnicu załoženja. Předwidźane je swjatočne zarjadowanje z čestnymi hosćemi, něhdyšimi šulerjemi prěnjeho maturitneho lětnika kaž tež z něhdyšimi wučerkami a wučerjemi. Aktualni šulerjo na ekskursiji po Budyšinje stejnišća zeznaja, hdźež je gymnazij něhdy zaměstnjeny był.
Dźesać miliardow za kredity
Policija (06.09.22)
Kolesowar a motorski znjezbožiłoj
Hamor. Při wobchadnym njezbožu předwčerawšim w Hamorje je so kolesowar ćežko zranił. 65lětny přeprěči ze swojim e-bikeom zwjazkowu dróhu B 156, njeje pak předjězbu motorskeho wobkedźbował. 49lětny wodźer Kawasaki so snadnje zrani. Wuchowanske mocy so wo znjezboženeju starachu. Kolesowarja dowjezechu z helikopterom do chorownje.
Informuja wo spěchowanju
Budyšin. Załožba za serbski lud přewjedźe informaciske zarjadowanje, na kotrymž chcedźa najwšelakoriše móžnosće spěchowanja předstajić. Při tym póńdźe wo prašenja, kotre spěchowanja załožba poskićuje, kotre projekty so spěchuja a na čo dyrbi so při zapodaću próstwy dźiwać. Zarjadowanje wotměje so online jutře, srjedu, w 17 hodź. Link so na internetnej stronje załožby wozjewi.
Demonstrować něhdy a dźensa
Wojerecy. Sakska krajna centrala za politiske kubłanje prezentuje jutře, srjedu, w 19 hodź. program a diskusiju „Domizna, hněw a trawma“ na Wojerowskim hrodźe. Dr. Jörg Heidig, awtor knihi samsneho mjena, a dr. Christoph Meißelbach rozjimataj rozdźělnej žiwjenskej pućej młodeju Saksow, kotrajž běštaj so kónc 1980ych lět na póndźelnišich demonstracijach we Wojerecach wobdźěliłoj a po politiskim přewróće z wočow zhubiłoj. Něhdźe 30 lět pozdźišo so znowa zetkataj, zwěsćujo, zo jedyn z njeju znowa póndźelu protestuje, z čimž tamneho chětro zamyla.
Porěči wo Židach
Zemrětych wopominali
Budyšin (CRM/SN). „Před dwaceći lětami wopytachu někotři z něhdyšich židowskich wobydlerjow ze swojimi dźěćimi zaso naše město a modlachu so z nami tu na městnje kadiš. Jich zasowidźenje w starej domiznje zarjadowachmy tehdy jako swjedźeń wujednanja. Nowu domiznu běchu woni w USA a Israelu kaž tež w hessenskim Pfundstadće namakali. Mjeztym pak hižo nichtó z tutych nacionalsocializm přežiwjenych žiwy njeje. Na nich chcemy dźensa wosebje spominać“, praji Hans-Eberhard Kaulfürst. Wón běše njedźelu znowa, a to hižo 33. raz na modlenje kadiša stajnje na prěnjej njedźeli septembra přeprosył. Přeprošenje sćěhował běše tež zaso kantor Michal Foršt z Praskeje židowskeje wosady. Wutrobnje powitany bu tónraz tohorunja nowy Budyski wyši měšćanosta Karsten Vogt.
Chronika tu skónčnje je
Awtor swoju nowu knihu wobydlerjam předstajił
Rowno (JoS/SN). Horstka wobydlerjow je minjenu sobotu na Rownjanskim Njepilic statoku dožiwiła premjeru wjesneje chroniki z pjera Gerharda Fugmanna. Witawši awtora a wopytowarjow wjesny předstejićer Matthias Jainsch rjekny, zo so w knize lětstotki dołhe stawizny wsy na jara wysokej kwaliće prezentuja. „Po wjele lětach, w kotrychž běchmy wot wotbagrowanja wohroženi, zhladujemy nětko zaso do wěsteho přichoda, w kotrymž změjemy chwile, chroniku woměrje čitać“, tak Jainsch.
Z nawěškom w nowinje pčołki pytał
Nimo dalšich insektow su předewšěm tež pčołki za přirodu nimoměry wažne. Často sej małe stworjenčka prawje wažić njewěmy. Tohodla so w lětnjej seriji na lokalnej stronje lětsa pilnym pčołkam a pčołarjam wěnujemy. (19)
Jedna ze serbskich swójbow w Lutobču, hdźež dohromady 160 ludźi bydli, su Krawžicy. Jich tam lochce nańdźeš, přetož na płoće před rjanym statokom při puću je přičinjena taflička, zo maja tam měd na předań. Mjeztym wosom lět tam Tomaš Krawža pčołari.
43lětny dopomina so rady na čas dźěćatstwa w Chrósćicach. Rady přebywaše tež pola wowki a dźěda we Wěteńcy. Dźěd bě tam swój čas wuspěšny pčołar. Tomaš hišće dźensa rady wo tym powěda, kak je dźědej pomhał měd wuwjerćeć. Wóń a słód čerstweho mjedu stej so jemu z tehdyšeho časa kruće do pomjatka zaryłoj. Zo su pčołki druhdy tež kałnyli, je porno tomu dawno zabył.
