Z nowej mocu zaměrnje dale
Clemens Poldrak zastojnstwo Worklečanskeho wjesnjanosty nastupił
Worklecy (JK/SN). Jako prěnja gmejna w zarjadniskim zwjazku „Při Klóšterskej wodźe“ je Worklečanska po lětnej přestawce swoju radu wčera k posedźenju zwołała. Radźićeljo mějachu noweho šefa Clemensa Poldraka spřisahać a wón swój hamtski slub wotpołožić. Nimo toho chcychu dotalneho wjesnjanostu Franca Bruska (CDU) rozžohnować. K tomu běštej so wjednistwje wobeju wohnjoweju woborow gmejny přidružiłoj. Zastupowacy wjesnjanosta dr. Beno Wałda wupraji Bruskej w mjenje gmejny wulki dźak za wuspěšne a spomóžne 40lětne dźěło na dobro komuny, Měrko Šmit dźakowaše so w mjenje gmejnskeje rady. Franc Brusk přija widźomnje hnuty a dźakowny tež dźak a počesćenje wobornikow.
Njewšědny zazběhdo noweho šulskeho lěta
Přihotowanski tydźeń za nowe šulske lěto 2022/2023 zahaji dźěl wučerkow a wučerjow Kulowskeje wyšeje šule „Korla Awgust Kocor“ z wopytom swjedźenskeho ćaha šulerkow a šulerjow minjenu póndźelu we wobłuku Kamjenskeje Boršće.
Zetkachmy so w bjezposrědnjej bliskosći Lessingoweho gymnazija, kiž bu po wobšěrnym ponowjenju kaž tež po při- a wutwarje hakle minjenu njedźelu znowa wotewrjeny. Smědźachmy samo skrótka do noweho kubłanišća nutř pokuknyć. Šulerjow a wučerjow wočakuja tam wuběrne wuknjenske a dźěłowe wuměnjenja, tak facit nas Kulowskich pedagogowkow a pedagogow.
Sćerpni być dyrbjachu šoferojo a wobydlerjo wčera w Kulowje. Tam ...
Krótkopowěsće (26.08.22)
„Sorbisch? Na klar.“ z podcastom
Drježdźany. Pod hesłom „Tu móžeće sej něšto naposkać!“ poskići imagowa kampanja „Sorbisch? Na klar.“ nětko tež podcast. W nim maja připosłucharjo móžnosć, serbske wosoby zeznać. W premjernej epizodźe je Delnjoserbowka Hella Stoletzki z hosćom. Jako jingle přewodźa podcast spěw „Dwaj Hrodaj“ skupiny Astronawt. (Čitajće tež w Předźenaku.)
Smjerdźečenjo w Strakonicach
Strakonice. Na 24. mjezynarodnym festiwalu dudakow w čěskich Strakonicach wobdźěli so wot wčerawšeho hač do njedźele Serbska rejwanska skupina Smjerdźaca. Nimo 20 rejwarkow a rejwarjow, dweju dudakow a dalšich hudźbnikow z Łužicy předstaja tam 16 dalšich skupin ze Słowakskeje, Chorwatskeje, Běłoruskeje a Pólskeje swój program.
Z łódźu po Berzdorfskim jězorje
Zarjady zawrjene
Budyšin (SN). Wokrjesne zarjadnistwo wostanje srjedu, 31. awgusta, dospołnje zawrjene. Wo tym informuje Budyski krajnoradny zarjad w nowinskej zdźělence. Přičina zawrjenja je personalna zhromadźizna. Kaž krajnoradny zarjad dale zdźěli potrjechi to wšitke zarjadniske stejnišća w Budyšinje, Kamjencu a we Wojerecach kaž tež wšitke wotnožki zarjada za jězbnu dowolnosć a přizjewjenje jězdźidłow a wobydlerskeho hamta.
Štyri na raz
Budyšin (SN). Tak rěka njedźelu, 28. awgusta, wot 17 hodź. w Zemičansko-Tumičanskej cyrkwi. Tam zaklinči koncert štyrjoch smyčkarjow Serbskeho ludoweho ansambla. Woni zahudźa wjesołe a mjenje znate twórby za smyčkowe kwartety, mjez druhim w Mužakowje rodźeneho Leopolda Schefera (1728–1805). Słyšeć budźe tež 1. smyčkowy kwartet pólskeho komponista, kotrehož w jeho domiznje tež „Pólski Schubert“ mjenuja, Stanisława Moniuszka. Tohorunja zaklinča twórby Helmuta Fryče, kiž bě w 1950- a 1960tych lětach chórowy nawoda a dramaturg w SLA.
Rejowanje za dźěći
Policija (25.08.22)
Kameru pokradnył a so filmował
Wojerecy. Spočatnje njeznata wosoba je so wutoru rano njewoprawnjena na ležownosć při Semmelowej dróze we Wojerecach podała a kameru pokradnyła. Při tym tuta njespózna, zo bě kamera zaswěćena a skućićelstwo runočasnje natoči. Tak zastojnicy městneho rewěra skućićela spěšnje nadeńdźechu. Paduch policistam njeznaty njebě. Woni podachu so k jeho bydlenju a zawěsćichu pokradnjenu kameru a ju škodowanemu wróćichu. Kriminalna słužba skóržbu kradnjenja přepytuje.
Zakazany symbol našmórali
Budyšin. Mjez póndźelu wječor a wutoru připołdnju su njeznaći awto namórali, kotrež na Róžowej dróze parkowaše. Skućićeljo zawostajichu na awće družiny VW up! mjez druhim přećiwowustawowy symbol. Wysokosć škody policiji hišće njepředležeše. Decernat statny škit kriminalneje policije pad přepytuje.
Koleso pokradnyli
Budyšin. Njeznata wosoba je wutoru dopołdnja na Drježdźanskej dróze žónske koleso družiny Stevens pokradnyła. Kriminalisća padustwo oranžojteho kolesa w hódnoće 630 eurow přepytuja.
Wo Čěskej a wo přirodźe
Nowa wustajeńca w Njeswačanskim Starym hrodźe wotewrjena
Njeswačidło (ML/SN). „Zynki barbow“ rěka přehladka mólbow 49lětneje molerki Doreen Marie Schöngart ze Smělneje, kotraž bu minjenu njedźelu w małej galeriji w Njeswačanskim Starym hrodźe wotewrjena. Jeje acrylowe mólby a pastele su harmonisce zrjadowane w třoch rumnosćach a při schodach Stareho hrodu. Wopytowar widźi tam słónčne krajiny, stare hrody a sydlišća, wosebje sewjerneje Čěskeje, a portrety ludźi z našeho južneho susodneho kraja.
W lěće 1973 we Worklecach rodźena wuměłča je w Nowym Měsće w Sakskej wotrostła a je hižo jako dźěćo a młodostna rady molowała a rysowała. Wona nawukny tři powołanja a zaběraše so jako mać ze swojimaj dźěsćomaj. Hakle před dźewjeć lětami započa so Doreen Maria Schöngart wuměłstwowemu zwobraznjenju jako swobodnje skutkowaca tworjaceho wuměłstwa wěnować. Do toho bě dwě lěće molerski kružk wopytała a w samostudiju wosebje w přirodźe molowała.
Zawěsćenske dźěła wot póndźele
Budyšin (SN). Na Sprjewinej hasy w Budyšinje je 20. awgusta k spadej kamjenjow dóšło. Z wěstotnych přičin je policija wobłuk najprjedy za wozydła zašlahała.
Po tym, zo su sej zamołwići w nadawku měšćanskeho zarjadnistwa nastate škody wobhladali, njeje wuzamknjene, zo móhli so dalše dźěle ze skały wotłamać. Tohodla je wobłuk nětko tež za pěškow a kolesowarjow zawrjeny. K tomu, tak měšćanske zarjadnistwo informuje, su warnowanske tafle a twarske płoty nastajili. Tafle, kotrež wužiwarjam Sprjewineje kolesowarskeje ščežki nowy puć pokazuja, přichodne dny instaluja.
Zo bychu skału zawěsćili, su wšelake dźěła trěbne. Wone hižo póndźelu, 29. awgusta započnu a dwě njedźeli traja.
Ma ludźom dowěru, zo su sprawni
Nimo dalšich insektow su předewšěm tež pčołki za přirodu nimoměry wažne. Často sej małe stworjenčka prawje wažić njewěmy. Tohodla so w lětnjej seriji na lokalnej stronje lětsa pilnym pčołkam a pčołarjam wěnujemy. (16)
Z busom Radworskeho Šmitec wozydłownistwa su so hrajerjo na europske koparske mišterstwa awtochtonych narodnych mjeńšin podali a z nim su so po wuspěšnym wobdźělenju zaso nawróćili. Zo mějachu za wodźidłom busa z 48lětnym Pětrom Wenclom wuběrneho šofera, je móhł kóždy sobujěducy nazhonić. Zo pak je tež agilny a mjeztym wuspěšny pčołar, su hakle pozdźišo zhonili.
Wotrostł je 1974 rodźeny Pětr Wencl w Kamjenej pola Radworja w ratarskej swójbje. Swoje narodne a nabožne kubłanje kaž tež hłuboko zakótwjenu lubosć k přirodźe je sej wón hač do dźensnišeho wobchował. Wuchodźiwši 1991 wuspěšnje 10. lětnik w Radworju nawukny blidarstwo we Łuze. Wušikny je w swojim powołanju nimale tři lětdźesatki dźěłał. Mjeztym wodźi bus po dróhach cyłeje Němskeje a hdyž je trjeba tež daloko za hranicy kraja.
