Kulow (lm/SN). Z kreatiwnymi poskitkami chce nowa motiwatorka za serbsku rěč Marija Šołćic we Wojerowskim regionje a w Kulowje serbsku rěč mjez ludźimi zaso do pomjatka přinjesć a pěstować. Hłowny cil je ludźi rozdźělnych generacijow hromadu wjesć, z nimi do rozmołwy přińć, wo nałožkach a kulturje rěčeć a serbšćinu wšědneho dnja pěstować. Motiwatorka so tak ludźom přibliži, so jim wotewri a jim zajimawe wobohaćenje wšědneho dnja poskići. Tak móža tež poskitki do přichoda nastać, kiž přiwabja a płody njesu.

Ultimatum w holi so skónči

Ottendorf-Okrilla. Hač do dźensnišeho maja młodźi ludźo, kotřiž we Łužničanskej holi přećiwo planowanej jamje za wudobywanje šćerka protestuja, lěs wopušćić. Rěčnica přisłušneho krajnoradneho zarjada w Budyšinje, Sabine Rötschke, praješe Serbskim Nowinam, zo „budu so nětko wšitcy dorozumjeć, kak póńdźe dale“. Aktiwisća protestuja přećiwo porubanju 900 hektarow lěsa.

Wjetša podpěra sadowcam

Drježdźany. We wobłuku inwestiwneho spěchowanja za přirodoškit je Sakska loni 1 080 próstwow z wolumenom ně­hdźe 17,5 milionow eurow přizwoliła. K tomu liča mjez druhim saněrowanje sadowych łukow, wožiwjenje lěsnych bahnow kaž tež wuwiće drobnych wodźiznow a hladanje biotopow z posykom. Hladanje młodych sadowcow je nowosć w spěchowanskim scenariju Sakskeje.

„Heřmanička“ njeje zabyta

Paduši w hosćencu

Budyšin. Hosćenc při Budyskim Bórklinje su sej njeznaći w nocy na srjedu jako cil swojeho njeskutka wupytali. Kaž policija rozprawja, so skućićeljo namócnje do lokala zadobychu a spytachu w nim so do dalšich rumnosćow předrěć. To pak so jim njeporadźi. Tuž cigaretowy awtomat namócnje wočinichu. Kelko cigaretow su pokradnyli, njeje znate. Wěcnu škodu powobliči policija na ně­hdźe 2 000 eurow.