35lětny Jacob (na kolesu) je jedyn z pjeć zbrašenych z dźěłarnje ...
Policija swoje dźěło předstajiła
Krótkopowěsće (07.07.23)
Dorostowe myto Helli Stoletzki
Podstupim. Wuměłču Hellu Stoletzki wuznamjeni kulturna ministerka Anja Schüle (SPD) z Dorostowym spěchowanskim mytom za tworjace wuměłstwo Braniborskeje njedźelu na hrodźe Neuhardenberg. Jeje molowanje a grafiske tworjenje stej bytostnje rysowanej wot předstajenja a kritiskeho woprašowanja traděrowanych předstawow serbskich identitow, rěka we wobkrućenju.
Namołwu k pruwowanju pósłali
Zły Komorow. Społnomócnjeni za serbske naležnosće braniborskeho knježerstwa kaž tež braniborskich wokrjesow su Budyskeho krajneho radu Uda Wićaza (CDU) wčera w lisće namołwili, lětsa wobzamknjene přikrótšenje městna społnomócnjeneje za serbske naležnosće tudyšeho wokrjesa „wobšěrnje“ pruwować .
Pogačar etapu dobył
Cauterets. Kolesowarski profi Tadej Pogačar je druhu a poslednju etapu přez Pyreneje na 110. tour de France dobył. Słowjenc přesadźi so na hórskej etapje w Cauterets-Cambasque a přizjewi so w duelu ze zakitowarjom titula Jonasom Vingegaardom. Dana bu na 6. etapje ze 24 sekundami zastatkom druhio.
Po katolskim kraju kolesować
Njebjelčicy. Dalša kolesowanska tura pod hesłom „Ke Klóšterskej wodźe a Delany“ pod nawodom Tadeja Šimana wotměje so sobotu, 15. julija. Wona powjedźe wot Njebjelčic do Delan a wottam wróćo do Njebjelčic. Mjezystacije su mjez druhim Miłoćicy, Worklecy a Róžant. Něhdźe 28 kilometrow dołha jězba započnje so w 10 hodź. na parkowanišću při wosadnicy „Bjesada“.
Pišćele zaklinča
Łaz. Spěchowanske towarstwo zetkanišća Dom Zejlerja a Smolerja kaž tež Łazowska wosadna cyrkwinska rada přeprošujetej na wosebity koncert sobotu, 8. julija, we 18 hodź. do Łazowskeje cyrkwje. Na tamnišich pišćelach zahraje Ulrike Scheytt, kotraž bě wjele lět w Zhorjelcu wokrjesna kantorka. Dźensa bydli wona w Simmerath w Eifeli. We Łazu zaklinča nimo twórbow Bacha, Mozarta a Vivalidija wjacore twórby Jana Pawoła Nagela. Koncert wuhotuje sobu trompetar Enrico Gnauk z Kubšic. Zastup je darmotny.
Policija (06.07.23)
Solarne platy pokradnyli
Wojerecy. Njeznaći paduši běchu w nocy na wutoru na Wojerowskej Semmelweisowej po puću. Z wjacorych ležownosćow pokradnychu woni solarne platy, wobstražowanske kamery a elektriske nastroje, z kotrymiž hodźi so lisćo na hromady duć. Po wšěm zdaću běchu skućićeljo lačni, přetož woni wzachu tež wjacore bleše cola sobu. Kelko škody su cyłkownje načinili, z policajskeje rozprawy bohužel njewuchadźa.
Někotre paralele zwjazuja
Ukrainske město a Wojerecy chcedźa partnerstwo wutworić
Wojerecy (AK/SN). Město Wojerecy prócuje so wo dołhodobne partnerstwo z ukrainskim městom Perwomajski we wobwodźe Losowa, region Charkiw. Tole podšmórny wyši měšćanosta Torsten Ruban Zeh (SPD) na zašłym posedźenju měšćanskeje rady. 18 radźićelow bě za to, měšćanske partnerstwo wotzamknyć, šěsć radźićelow bě přećiwo tomu, dwaj so hłosa wzdaštaj. Po Dillingenje w Posaarskej (wot 1988), Huittinen w Finskej (wot 1998) a Środa Wielkopolska w Pólskej (wot 2006) je Perwomajski w Ukrainje štwórte měšćanske partnerstwo za Wojerecy. „Móžemy wjele pomhać, móžnosće spěchowanja wotkryć a sej měnjenja wuměnjeć“, praji Ruban-Zeh. K měšćanskemu swjedźenjej w septembru chcedźa ukrainskich partnerow sobu přeprosyć.
Po šćežce serbskich kralow pućowali
Bělšecy (SN/MkWj). Spěwarki a spěwarjo Radworskeho chóra Meja su sej minjenu njedźelu wulećeli. Tónkróć wjedźeše jich puć na horu Lubin južnje Budyšina, hdźež wobhladachu sej šćežku sydom serbskich kralow. Wěcywustojnje přewodźeštaj Radworčanow mandźelskaj Judit a Markus Heroldec z Bělšec. Ideju bě młoda Serbowka ze swojim mandźelskim wuwiła, złožujo so na serbsku baju, kotraž wo Lubinje jedna. Po baji je sydom serbskich kralow na sydom kamjeniskach sedźo wuradźowało, kak měli so potłóčowani Serbja Němcam wobarać. Při krawnej bitwje je wonych sydom serbskich kralow zahinyło. Kamjenje ze zornowca, na kotrychž běchu sedźeli, pokrywaja jich rowy. Nětko čakaja woni na dźeń, hdyž jich serbski lud wo pomoc woła.
We wsy a we wosadźe aktiwna
Wot spočatka měrca 1992 wuchadźeja Serbske Nowiny jako wječornik. A wot toho časa je pomocnicy w mnohich wjetšich a mjeńšich wsach wšědnje čitarjam do domu noša. Najwjetši čas tuž našich pilnych roznošowarjow w lětnjej seriji předstajić (4).
Koslow ze swojimi wobstajnje něhdźe 100 wobydlerjemi bu 1974 do Njeswačidła zagmejnowany. We wsy kóždy kóždeho znaje, byrnjež so wšědnje njewidźeli. Tola nimale wšědnje, nic tak husto w zymskich měsacach, zetkawaja so ludźo ze stajnje přećelnej 42lětnej Katju Rauerowej, hdyž je wona po puću, Serbske Nowiny roznošować. Wjesnjenjo pak sej ju tež tohodla waža, dokelž so wjele dalšim nadawkam na dobro druhich wěnuje.
