Kopšin. Něhdźe 25 zajimcow je so minjenu njedźelu před Kopšinjanskim hrodźišćom na dwuhodźinske wjedźenje na starodawnym pomniku Milčanow pod nawodom archeologowki a nawodnicy Kamjenskeho muzeja zapadneje Łužicy dr. Friedericke Koch-Heinrichs zešło. Wot njeje zhonichu, zo je hrodźišćo nastało w njeměrnych časach kónc 9. hač do spočatk 10. lětstotka w zwisku z rozestajenjemi wuchodofrankskich kralow z ekspansiju Wulkomorawskeho mócnarstwa a wójnskich atakow Madźarow. Při tym mějachu Frankojo při zakitowanju swojeje wuchodneje hranicy problemy a Łužica bu sobu potrjechena. W njej bydlacy wobydlerjo so z hrodźišćemi škitachu, kaž Milčenjo, kiž mjez dźensnišim Budyšinom a Kamjencom sydlachu.

Wopačny poradźowar po puću

Slepo. Hižo minjeny pjatk bě w Slepom pozdatnje wopačny energijowy poradźowar po puću. Wón klinkaše pola 69lětneho wobydlerja, předstaji so jako zastupjer energijoweho hospodarstwa a da sej milinowe zrěčenje kaž tež ec-kartku pokazać. Slepjan nimo toho wjacore podłožki podpisa, kotrež pak na kóncu njedósta.

Rozsud wo tepjenju na přichodne posedźenje radźićelow přestorčene

Njeswačidło (JK/SN). Kusk bjezradni Njeswačanscy gmejnscy radźićeljo na jedyn z dypkow dnjoweho porjada swojeho ­minjeneho posedźenja hladachu. Dźěše wo to, wobzamknyć płaćizny za ćopłotu z nastawaceje připrawy za tepjenje z biomasu. Připrawa ma nastać njedaloko Njeswačanskeho kubła a ma zastarać zakładnu šulu, pěstowarnju, młodownju a samo sportowy dom. Připrawa hišće njedźěła, ale předleži naćisk zrěčenja z popłatkami za zastaranje z ćopłotu za gmejnske twarjenja. Mnozy radźićeljo njemějachu ani informacije k tutej připrawje, wo podłožkach k tomu ani njerěčo. Tohodla bě jim ćežko, poskitk firmy, kotraž chce připrawu twarić, posudźować. Tuž dojednachu so na to, so naj­prjedy z podłožkami zaběrać a hakle ­na přichodnym posedźenju wo naćisku ­zrěčenja rozsudźić.

Budyšin (SN/bn). Pod hesłom „Wuměłstwo w dźěłarni – Kleinkunstwerk“ wuhotuje towarstwo Dźěłań dźeń druhi raz rjad najwšelakorišich, zdarma přistupnych kulturnych zarjadowanjow w swojej „dobrej jstwě“ na Sukelnskej w Budyšinje. Wot 6. julija hač do 28. septembra tam stajnje štwórtk wječor tworjacy wuměłcy a hudźbnicy přichadźeja. Jako prěni prezentuje so fachowc za tattoowy ­a ilustrator HuGo Exhega z „wuměłstwom, kotrež pod kožu dźe“, kaž w zdźělence medijam rěka. Hudźbnej wjerškaj lubitaj mjez druhim koncert „Łužicana“ – wotwodźenka to wopřijeća „americana“ a pokazka na měšeńcu folka, country a bluesa – z Jacke Schwarzom a Willyjom Wilsonom kaž tež wječor soula a jazza pod nadpismom „Marie Hofmann & Guests“. Dale koncertuja hardcore-sludge-skupina Park+Riot, Jarése z akustiskim popom a band Solche z „poetiskim rockom“; Schönfeld „improwizuje na trompeće k loopam a beatam“. Wernisažu wustajeńcy Helle Stoletzki wobrubi huslacy punk-šansonier Paul Geigerzäh­ler. „Zynki do rejki“ připowědźa Tanz­atelier Kokü z prezentaciju „Kikorikü“.