Na slědach swojich stawiznow byli
Swoju blišu domiznu móžeš sej na cyle nowe wašnje wotkryć, hdyž raz z hinašimi wočemi na nju hladaš a sej spytaš předstajić, kak je tu před tysac lětami wupadać móhło. Předwčerawšim je to kolesowanska jězba zmóžniła.
Horni Wujězd (MWj/SN). We wobłuku wustajeńcy „Čej’ da sy?“ Budyskeho Serbskeho muzeja je so sobotu prěnja ze štyrjoch wjedźenych kolesowanskich jězbow podłu Klóšterskeje wody wotměła. Pod wěcywustojnym nawodom Tadeja Šimana je so 15 wobdźělnikow na něhdźe 25 kilometrow dołhu čaru podłu južneho dźěla Klóšterskeje wody a Satkule na puć podało. Starobne skupiny zajimcow z Radworja, Chrósćic, Dobrošic, Pančic-Kukowa, Wotrowa a wot druhdźe sahachu wot wuměnkarja nad 75 lětami hač k dźěsćomaj na kolesu swojeju maćerjow.
Spěwna skupina Přezpólni je sobotu wječor na ...
Krótkopowěsće (12.06.23)
Kuraže dla so dźakowali
Choćebuz. Dwaj zastupjerjej zwjazkoweho ministerstwa za kubłanje staj so tele dny z čłonami zjednoćenstwa „Šula za wjace demokratije“ z Delnjeje Łužicy zetkałoj. Pódla běštaj tež wučerjej z Bórkowow, kotrajž staj w anonymnym lisće na prawicarske wuprajenja šulerjow kubłanišća skedźbnjałoj. Ministerstwo so jimaj za ciwilnu kuražu dźakowaše. Mjeztym je dale a wjace tajkich padow znatych.
Na stoty jubilej skedźbnili
Delni Wujězd. Na stoty jubilej poswjećenja chorhoje serbskeho towarstwa Zahrodka 10. juni 1923 je tuchwilny cyłk sobotu w Instagramje skedźbnił. Kaž předsyda Frank Knobloch našemu wječornikej rjekny, chcedźa hišće ze zarjadowanjom na tónle jubilej spominać. Čitarjo Instagrama mjez druhim zhonja, zo běše Jan Lajnert, wučer a basnik z Rakec, narěč napisał a ju tež přednjesł. Original chorhoje je w Serbskim muzeju.
Zadarmo z ćahom po Francoskej
Policija (09.06.23)
Twory za 40 000 eurow zničić dyrbjeli
Wojerecy. Njeznaći su so wo to postarali, zo je w nocy na štwórtk w kupnicy na Wojerowskej Šulskej hasy chłódźenska připrawa dospołnje wupadnyła. Najprjedy technikarjo z toho wuchadźachu, zo jedna so wo mylenje. Alarmowany monter pak zwěsći, zo běchu skućićeljo nuzowy zapinak na třěše kupnicy hasnyli. Z tym je chłódźenje za cyłe twarjenje dźěłać přestało. Wšitke w chłódźakach składowane twory dyrbjachu zničić. Škodu trochuja na něhdźe 40 000 eurow.
Přećeljo hudźby zaspěwaja na statoku
Ćisk. We wobłuku rjada Ćišćanske wotewrjene wokno, kotrež tamniše kulturne towarstwo organizuje, wustupi jutře, sobotu, w 15 hodź. wokalny ansambl „Amici della musica“ (Přećeljo hudźby) na Ćišćanskim statoku. Wosom spěwarkow a spěwarjow ma šěroki repertoire, kiž saha wot starych mištrow přez ludowe spěwy hač k modernemu popej. Zastup płaći dźesać eurow.
Na kreatiwne popołdnjo
Wojerecy. Dekoraciju z hliny zhotowić a připódla so w serbšćinje wukmanić móža zajimcy póndźelu, 12. junija, we Wojerowskim domje Domowiny. Wot 13.30 hač do 15 hodź. abo wot 15.30 do 17 hodź. su tam wopytowarjo pod hesłom „Wuměłstwo a rěč w bróžni“ na serbske kreatiwne popołdnjo z Mariju Šołćic přeprošeni. Zajimcy njech přizjewja so pod . Wobdźělenje płaći dźesać eurow na wosobu.
Wobdźěla so na protesće
Apoteka skedźbnja sobu na kritiske połoženje swojeje branše
Pančicy-Kukow (SN/MWj). Štóž chce sej přichodnu srjedu, 14. junija, z apoteki w Pančicach-Kukowje medikament wobstarać, steji tam před zawrjenymi durjemi. „Wobdźělimy so tón dźeń na cyłoněmskej akciji, z kotrejž apoteki po wšěm kraju na swoje tuchwilne połoženje skedźbnjeja“, praji mějićel apoteki Gert Müller-Gottschlik. Nuzowe zastaranje pak budźe po jeho słowach zaručene a tež sobudźěłaćerjo budu na swojim dźěłowym městnje. Wšako apoteka ze swojim centrumom za rozdźělenje medikamenty do 19 hladarnjow dodawa.
Špundowanje w gratowni zniža
Chróst (UM/SN). Za přetwar wohnjowoborneje gratownje w Chrósće su nětko rozrisanje namakali. W twarjenju ma so jězdźidło katastrofoweho škita Budyskeho wokrjesa zaměstnić. Městno za nje pak njedosaha. Wulkodubrawska gmejnska rada je tuž wjesnjanosće Hardyjej Glauschej (njestronjan) nadawk dała, wšitke trěbne kroki zahajić, zo móhli špundowanje znižić.
„Při wospjetnym terminje z njezbožowej kasu a z wokrjesnym wohnjowobornym mištrom smy hišće raz wšitke aspekty přetwara rozjimali“, praji wjesnjanosta. „Při tym smy na to skedźbnili, zo cyłkowna wěstota dotal dosć wobkedźbowana njeje“, tak Hardy Glausch dale. Tak so na parkowanišću při Módrej Adriji zjawny bliskowobchad a turistiski wobchad z alarměrowanskimi pućemi wohnjoweje wobory křižujetej. Po měnjenju wokrjesneho wohnjowoborneho mištra měli so městna za wosobowe awta a busowy wobchad přepołožić.
