Społnomócnjena za serbske naležnosće města Choćebuza Anna Kosacojc-Kozelowa je zhromadźiznje měšćanskich zapósłancow wo swojim skutkowanju w lěće 2022 njedawno rozprawjała. Serbska rěč w zjawnym rumje bě jedyn z hłownych dypkow, wo kotrychž je so wona wuprajiła.

Choćebuz (SN/at). „75 procentow mjenow dróhow w Choćebuzu je mjeztym dwurěčnje popisanych“, Anna Kosacojc-Kozelowa w swojej rozprawje zwěsći. Podźěl nowych nadróznych taflow chcedźa zaměrnje krok po kroku zwyšić. Za nimale wotzamknjene ma społnomócnjena delnjoserbsko-němske popisanje na zjawnych twarjenjach města. Pod aspektom docpěteho je porno tomu staw dwurěčnych taflow na twarjenjach zwjazkowych a krajnych zarjadow přewšo rozdźělny. Podobne je połoženje nastupajo wobchadnych a pokazowacych taflow, za kotrež stej Zwjazk a kraj přisłušnej. Městu ničo druhe njezbywa, hač nadrjadowanej runinje přeco zaso na to skedźbnić.

Pjeriznowa mrětwa we Łužicy

Budyšin. Budyski žiwidłowy a weterinarny zarjad (LÜVA) je nowy wukaz za plahowarjow pjerizny we wokrjesu wudał. Z tym reaguje zarjad na pady pjerizno­weje mrětwy we Łomsku pola Radworja. Dalše informacije su na pod hesłom „Geflügelpest“ podate.

Poezija a hudźba w muzeju

Budyšin. Budyski Serbski muzej přewjedźe zhromadnje z časopisom Rozhladom w ramiku wustajeńcy „Wšo je krajina. Serbski moler Jan Buk“ hudźbno-literarny wječor. Na nim čitaja jutře wječor we 18 hodźin mjez druhim Róža Domašcyna a Měrana Cušcyna. Wo hudźbne wobrubjenje postara so Jazztrio z Jacek Szreniawa.

Nowy zakoń w romašćinje

Praha. Pod „Romaňi Biblija – O Névo Zákonos“ je w Čěskej po dwanaćelětnym přihotowanju přełožk bibliskeho Noweho zakonja do sewjerocentralneje romašćiny z pjera Kolomana Staněka wušoł. Rěčna warianta so w Čěskej republice a Słowakskej wužiwa. Fachowcy su měnjenja, zo móže přełožk nimo duchowneho posylnjenja tež k zachowanju a rewitalizaciji romašćiny přinošować.

Baworčanki triumfowali