Policija (03.05.23)
Parašutist znjezbožił
Wojerecy. K njewšědnemu zasadźenju wołachu policiju předwčerawšim připołdnju we Wojerecach. Tam bě na křižowanišću Stara Berlinska dróha/Einsteinowa parašutist znjezbožił. 54lětny sportowc bě z dotal njeznateje přičiny ze swojim parašutom najprjedy do štoma a na to na zemju padnył. Při tym so wón ćežko zrani, tak zo dyrbjachu jeho do chorownje dowjezć. Jeho wuhotowanje nětko na techniske njedostatki pruwuja.
Wobornicy so dźakuja
Róžant. Dobrowólne wohnjowe wobory zarjadniskeho zwjazka Při Klóšterskej wodźe a susodne wobory swjeća pjatk, 5. meje, dźaknu Božu mšu składnostnje swjedźenja swjateho Floriana. Wona započnje so w 19 hodź. w Róžeńčanskej hnadownej cyrkwi. Wšitcy wobornicy kaž tež hosćo su k tomu přeprošeni. Lětuši organizator Božeje mšě je Worklečanska gmejnska wohnjowa wobora.
Duwo zahudźi z hosćom
Smochćicy. Přichodne zarjadowanje w rjedźe Smochčanske jewišćo wotměje so sobotu, 6. meje, w 19.30 hodź. w Smochčanskim kubłanišću swjateho Bena. Tam zahraje jazzowy duwo Focus z Aninu Batz (spěw) a Janom Brězanom (gitara) kaž tež z hosćom Philippom Adamom (gitara). Młodźi wuměłcy prezentuja nimo jazza a popa tež soul, funk a blues. Koncert wotměje so w bróžni. Zastup je darmotny, organizatorojo proša wo dar za zarunanje wudawkow.
„Wandalizm Serbam napřećo“
Worklečanska šulska meja powalena a přidatnje hišće rozrězana
Worklecy (MG/SN). Zo so w Serbach hdys a hdys meje na wsach dočasnje podrězuja abo powaleja, drje nikomu nowum njeje, wšako słuša to tež někak k nałožkam kołowokoło meje k tomu. Wosebita šamałosć pak sta so nětko we Worklečanskej šuli. Tam běchu šulerjo 9. lětnikow minjeny pjatk pletwu a wěnc wili a na to meju swjatočnje stajili. W nocy na sobotu njeznaći meju powalichu. Po wšěm zdaću jim to hišće njedosahaše, přetož w nocy na 1. meju skućićeljo meju tež hišće srjedźa rozrězachu.
Šulerjo a wučerjo po wuprajenju šulskeje nawodnicy Diany Šołćineje „za to žane zrozumjenja nimaja a su šokowani“. Za njemało wučerjow powěsć wo rozrězanej meji swjatk prěnjeje meje porjadnje skazy, kaž wona dale praji. Tež wjesnjanosta Clemens Poldrack je zludany. Wón zdźěli: „Skutk raznje zasudźuju. To je wandalizm Serbam a wosebje šulerjam napřećo.“ Wjesnjanostu wosebje zrudźi, zo so nałožowana próca šulerjow na tak hanjace wašnje wonječesći.
Krótkopowěsće (03.05.23)
Myto Ćišinskeho J. Łušćanskemu
Budyšin. Lawreat Myta Ćišinskeho 2023, najwjetšeho wuznamjenjenja Serbow, budźe publicist a kulturnik Jurij Łušćanski z Budyšina. Spěchowanske myto k Mytu Ćišinskeho spožča kulturnikej a hudźbnikej Gregorej Kliemej z Choćebuza. To je za počesćenje přisłušny kuratorij na swojim posedźenju wčera w Budyšinje wobzamknył, předsydka gremija Susann Šenkec informowaše. Wuznamjenjenska swjatočnosć budźe 14. oktobra w Smochćicach.
Šula z nowym mjenom
Kamjenc. Spěchowanska šula w Kamjencu ma wot wčerawšeho nowe mjeno. Tak rěka nětko Zapadnołužiska šula Kamjenc – Šula ze spěchowanskim ćežišćom wuknjenja. Na swjedźenskim zarjadowanju běchu wčera zastupjerjo Budyskeho wokrjesa, šule, starši chowancow a Kamjenski wyši měšćanosta Roland Dantz (njestronjan) přitomni.
Naslědnistwo zawěsćene
Sćin farmakologije: Contergan-skandal
„Posłuchaj lěkarja, prjed hač jeho trjebaš!“, serbske přisłowo namołwja.
Tuž wěnuje so student mediciny Pětr Dźisławk znatym a mjenje znatym chorosćam, zo by je čitarjam trochu bliže rozłožował (19).
Policija (02.05.23)
Tři wosoby so zranili
Janecy. Wobchadne njezbožo z třomi zranjenymi je so předwčerawšim wječor w Janecach (Jannowitz) w Hodźijskej gmejnje stało. Z Bolborc jěduca 75lětna wodźerka VWja započa so ze swojim jězdźidłom na statnej dróze suwać a zrazy do napřećo jěduceho jězdźidła samsneho typa. Rentnarka, 45lětna wodźerka tamneho awta a jeje jědnaćelětna sobu jěduca so při zražce zranichu. Wšitke tři dowjezechu do chorownje. Wobě awće dyrbjachu wotwlec. Statna dróha S 107 bě na městnje njezboža něhdźe połdra hodźiny zawrjena. Policija nětko za dokładnymi přičinami zražki slědźi.
Regionalne wudźěłki požadane
3 500 wopytowarjow na wikach přirody w Stróži zličili
Stróža (CS/SN). Byrnjež wjedro lětsa z organizatorami 20. němsko-serbskich wikow přirody w Stróži tak derje njeměniło, hižo dopołdnja mnozy wopytowarjo na dwór zarjadnistwa biosferoweho rezerwata Hornjołužiska hola a haty w Stróži pola Hućiny přichadźachu. Wječor při bilancowanju móžachu dohromady něhdźe 3 500 wopytowarjow zličić.
Zarjadowanje je sej w běhu lět dobre mjeno wutworiło a je mjeztym daloko za hranicami Budyskeho a Zhorjelskeho wokrjesa znate. Wopytowarjo waža sej přećelnu a přijomnu atmosferu a tohorunja fakt, zo móžeš so na městnje z regionalnymi wudźěłkami zastarać. Mnozy wobstarachu sej w Stróži rostliny za zahrodu a balkon a woptachu speciality najwšelakorišich poskićowarjow. Rjemjeslnikam móžachu zajimcy při jich dźěle přihladować a tak nazhonić, kak chošćo a keramiske wudźěłki nastanu abo kak so kosa prawje klepa. Tež kobjeler Thomas Scheffel z Minakała bě ze swojim stejnišćom zastupjeny. Jeho najnowša wosebitosć su korby z rozdźělnymi barbami.
Towarstwo poskitk rozšěrił
Zeleń młodeho nalěća stupa do kruha ze žołtym mlóčom, kotryž łuki wokoło Miłočanskeje skały „Při Krabatowym kamjenju“ pyši. A słónčne pruhi łamaja so w pozłoćanych skulpturach ze zornowca.
Miłoćicy (MiR/SN). Tajki wobraz skićeše kulturno-wuměłske towarstwo Kamjenjak wopytowarjam prěnich rjemjeslnisko-wuměłskich wikow na terenje skały. Wot zašłeho pjatka hač do póndźele su kamjenjećesar Bernhard Männel, tkalča Johanna-Elisabeth Nehm, škleńčerka Henriette Preuß kaž tež designerka debjenkow Beate von Appen při domje towarstwa swoje stejnišća natwarili. „Ideju smy loni zrodźili“, čłon předsydstwa towarstwa Kamjenjak a wuměłc Bernhard Männel rozłožuje. „Naš wotpohlad bě, nimo mjezynarodneje wuměłskeje dźěłarnički poskitk towarstwa rozšěrić.“
Runjewon optimalne bě wjedro, jako so předwčerawšim wječor na ...
Krótkopowěsće (02.05.23)
CDU dale najsylniša strona
Drježdźany. Wolacy w Sakskej CDU najbóle dowěrjeja. W měsačnym woprašowanju instituta Civey a „Sächsische.de“ z njedźelnym prašenjom („Koho byšće wolili, bychu-li njedźelu wólby krajneho sejma w Sakskej byli?“) je CDU znowa 34 procentow docpěła, kaž hižo 2. apryla. Za AfD hłosowaše 26 procentow (-1), Zelenych dźewjeć (+1), SPD wosom (-1) a Lěwicu 10 (+1). Štyri procenty za FDP njedosahaja za zaćah do krajneho sejma.
Swoje žadanje wobnowił
Budyšin. Zapósłanc sakskeho krajneho sejma Marko Šiman (CDU) je swoje žadanje za wutwarom zwjazkoweje awtodróhi A4 wobnowił. Pozadk toho su wólby noweho wyšeho měšćanosty Berlina Kaia Wegnera (CDU), kotryž nochce plany za wutwar zwjazkoweje awtodróhi A100 w němskej stolicy podpěrać. Po słowach Šimana měli srědki za wutwar A 4 mjez Drježdźanami a Zhorjelcom wužiwać.
Nowa atrakcija w parku
