Dubjanski lěs stanje so zaso z bahnojtej krajinu
Dubjanski lěs w biosferowym rezerwaće Hornjołužiska hola a haty skići tójšto bohatstwow přirody. Projekt na dobro jednoho z nich je sakski minister za wobswět Wolfram Günther (Zeleni) generalnemu sekretarej Zwjazkoweje załožby za wobswět (DBU) Alexanderej Bonde a medijam minjenu srjedu na ekskursiji předstajił.
Jubilej w Delnjej Łužicy
Krótkopowěsće (11.04.23)
Serbski přinošk na festiwalu
Lipsk. Na w srjedźnej Němskej produkowane krótkofilmy wusměrjeny festiwal „Kurzsüchtig“ bu dźensa w Lipsku zahajeny. Wosebity hóstny kraj je lětsa Čěska. Mjez paskami, kotrež so w cyłkownje šěsć segmentach wo wuznamjenjenje wubědźuja, je tež dokumentacija „Hinterberg“ režisera Erika Šyški.
Nowa Doba single wozjewiła
Budyšin. Skupina „Nowa Doba“ je wozjewiła nowu single. Hudźbna produkcija z titulom „nalěćo“ je mjeztym druha pokazka na album skupiny „stara šula“, kotryž ma w lěću wuńć. Za nowy spěw móžachu sebi Gretu Čórlichec jako interpretku zdobyć, kaž band na Instagramje piše. Spěw je wot wčerawšeho na wšěch streamingowych platformach přistupny.
300 póstow zběhnu
Nowy spěw k jubilejej zanjesli
Přihotowanska doba za róčnicu wosady a gmejny oficialnje zahajena
Chrósćicy (MDź/SN). W Chrósćicach je so wčera wabjenski plakat k 800. jubilejej wsy w lěće 2025 zjawnosći předstajił. K tomu su tamniše pěstowarske a šulske dźěći krótki pisany program prezentowali. Mjez druhim zaspěwachu prěni króć spěw, kiž je Fabian Kaulfürst składnostnje jubileja napisał. „Naša wosada, wjele ludźi ma. Kóždy hinak tikoce – štó pak dźerži hromadźe? W njebjesach, naš Bóh tón knjez, to wě tola cyła wjes“ dźěći při słónčnym wjedrje zaspěwachu.
Cyła wjes je tež při přihotach pódla. Wot 13. do 22. junija 2025 je swjedźenski tydźeń planowany. Kaž farar Měrćin Deleńk zdźěli, „su dny rozrjadowane po hesłach a po skupinach, kotrež maja so wo wobrubjenje postarać. Hišće pak je wjele wotewrjene.“ Wosada prosy tuž wo dalše ideje za jednotliwe projekty.
Jutry rano spěwaja
Wuježk. Serbske ewangelske towarstwo přeproša njedźelu, 9. apryla, w 6 hodź. „na jutrowne spěwanje z nutrnosću do Wuježka“. Lětsa budźe „na Pawlikec statoku tež 14 potomnikow serbskich wupućowarjow z Awstralskeje pódla, kotřiž chcedźa tež serbske kemše ćichi pjatk w Budyskej Michałskej cyrkwi a jutrowničku kemše w Bukecach wopytać“.
Pytaja pomocnikow za „Žně“
Budyšin. Za předstajenje oratorija „Žně“ Handrija Zejlerja a Korle Awgusta Kocora z nahrawanjom CDje pyta chór 1. serbskeje kulturneje brigady něhdźe 15 přidatnych muskich spěwarjow – tenorow a basow – k podpěrje nětčišich brigadnikow. Štóž móže so na probach sobotu, 6. meje, wot 9.30 do 13 hodź. a sobotu, 3. junija, wot 9.30 do 13 hodź. w klóštrje Marijinej hwězdźe w Pančicach-Kukowje kaž tež w tydźenju wot 14. do 20. awgusta w Budyskej „Krónje“ wobdźělić, njech přizjewi so z mejlku na . Dokelž chce so Friedemann Böhme z tutym projektom jako nawoda a dirigent brigady rozžohnować, by so ćim bóle nad podpěru a zwólniwosću wjeselił.
Čitaja basnje Lorenca
Policija (06.04.23)
Dźěl kubłanišća ewakuowali
Budyšin. W Budyskim powołansko-šulskim centrumje w Schillerowych zelenišćanach je so dźensa dopołdnjo kašćik za zawěstki w pincy stareho twarjenja palił.
Kaž Anja Leuschner ze Zhorjelskeje policajskeje direkcije zdźěla, je techniski defekt woheń wubudźił. Nastata škoda we wysokosći 5 000 eurow elektroniku nastupa. Wuknjacy, wuwučowacy a dalši sobudźěłaćerjo su twarjenje po zalarmowanju wopušćili. Po tym zo běštej policija a wohnjowa wobora swoje dźěło zakónčiłoj, su z wučbu pokročowali.
Do Budyskeho powołansko-šulskeho centruma słuša zdobom Serbska fachowa šula za socialnu pedagogiku.
Z tójšto złotymi jubilarami
Po zwučenym wašnju nastaji so jutrowničku dźewjeć serbskich křižerskich procesionow na puć do susodneje wosady, zo bychu poselstwo wo Zrowastanjenym wozjewili. Runje tak z wašnjom je, zo podawamy do toho přehlad wo zajimawosćach procesionow. Te su nam jich kantorojo a nawodźa sposrědkowali. Dalokož su nam znate, wozjewjamy tež mjena jubilarow a nowačkow.
Z něhdźe 60 křižerjemi poda so Budyski křižerski procesion lětsa na puć. Po informacijach kantora Bosćija Čórlicha je to 30. raz po wozrodźenju procesiona, zo pojěchaja do Radworja. Tónle mały jubilej bychu hižo loni měć dyrbjeli. Korony dla pak jónu jěchać njemóžachu. Jubilarow mjez Budyskimi žanych njezměja, za to pak třoch nowačkow. Mału změnu wuhladamy na čole procesiona. Dwójce je Tomaš Lukaš jednu z chorhojow njesł. Njedźelu přewozmje Marko Wićaz tele zastojnstwo wot njeho. Tamny chorhojnik budźe André Wowčerk.
Pjeku hišće serbske tykancy
Wotrow. Do jutrow maja we Wotrowskej Bulankec pjekarni kaž wšudźe ruce połnej dźěła. Zeleny štwórtk přińdu sej ludźo po kmótřiske całty. Wulki pjatk pak pjeku tam jutrowne tykancy. Někotre swójby skazaja sej za sebje a za klepotarjow cokorowy tykanc na wulkich blachach z přeměrom 45 centimetrow.
Tajke tak mjenowane serbske tykancy – druzy zaso na to burske tykancy prajachu – znajachu prjedy po wšěch Serbach, wězo tež ze štrajzlom, sadom a twarohom. W někotrych kónčinach rěkachu kołače, wšako běchu kulojte a zdźěla wulke kaž koło woza. W Slepjanskej kónčinje mějachu samo přeměr 70 centimetrow. Hižo wokoło lěta 1382 žadaše sej abatisa klóštra Marijineje hwězdy wot Wětrowskeho šołty wulki hodowny kołač jako wotedawk. Wotrowski pjekar tuž jako jedyn z poslednich wjesnych pjekarjow hišće woprawdźitu staru serbsku tradiciju zachowuje. Snadź je to dobra składnosć wo wožiwjenju tajkeho šwarneho tykanca jako speciality rozmyslować, wězo z ekstra wulkimi skibami.
Mali wobornicy na dnju swójbow
Pančicy-Kukow (SN/MWj). Křesćansko-socialny kubłanski skutk přewjedźe srjedu po jutrach, 12. apryla, w zahrodźe klóštra Marijineje hwězdy w Pančicach-Kukowje wot 14 do 18 hodź. lětuši swójbny dožiwjenski dźeń. Hišće do oficialneho zahajenja sezony dnja 23. apryla móža wopytowarjo zaso wjele poskitkow k sobučinjenju abo přihladowanju wužiwać.
