Skótny lěkar Měrćin Kilank poda so na wuměnk
Róžant (DFG/SN). Skótnolěkarska doba wosebiteho razu je so minjeny pjatk w Róžeńće skónčiła. Po wjelelětnym skutkowanju w powołanju je skótny lěkar Měrćin Kilank swoju praksu zawrěł a so na wuměnk podał.
Rodźeny w Bronju pola Radworja je wón 1970 tam swoje prěnje dźěłowe rumnosće zarjadował. Po studiju weterinarneje mediciny w Lipsku skutkowaše mjez druhim jako skótnolěkarski asistent w Lejnjanskej kobłarni a měješe w Kamjenskim regionje 1969 zaručić skótnolěkarske zastaranje wobłuka schorjeneho lěkarja Brojera. Jako młody lěkar w 1970tych lětach zastarowaše tak mjenowany wulki skót, potajkim howjada, konje a swinje, pozdźišo tež pjeriznu. Tak bě w konjencach, wulkohródźach a wulkich chlěwach mjez Njebjelčicami, Ralbicami a Hrańcu po puću.
Nowe hrajkanišćo wosrjedź wsy
Pančicy-Kukow (SN/MWj). W zwisku z hrajkanišćemi w Pančicach-Kukowje wjele lět ničo noweho nastało njeje. To ma so lětsa změnić. Na terenje bywšeho hosćenca napřećo klóštrej chcedźa nowe hrajkanišćo twarić. Za nje su gmejnscy radźićeljo na swojim zašłym posedźenju twarski nadawk přepodali. Natwarić ma projekt krajinotwarska firma z Wósporka. Za nimale 83 000 eurow ma wona mjez druhim čumpjel, krosnowanski nastroj, ławki a nimo toho tež nabiwanske stacije za elektrokolesa natwarić. Hrajkanske nastroje njebudu z drjewja, kaž to dźensa na mnohich městnach widźiš, ale z drohowocla, wjesnjanosta Markus Kreuz (CDU) rozłoži. W płaćiznje zapřijate su mjez druhim mjechke městna wokoło jednotliwych nastrojow, zo njebychu so dźěći zranili, hdyž raz z tajkeho nastroja padnu.
Debjenje jejkow podróša
W Serbskim kulturnym centrumje maja wot apryla nowe popłatki
Slepo (CK/SN). Wokoło jutrow sej w Slepjanskim Serbskim kulturnym centrumje (SKC) wopytowarjo klinku do rukow dawaja. Tež 24. wiki serbskich jutrownych jejkow z rekordnej ličbu wopytowarjow wuznam zarjadnišća podšmórnychu. „Dyrbjeli wšitko za to činić, zo objekt zachowamy“, apelowaše wjesny předstejićer a gmejnski radźićel Wolfgang Goldstein na zašłym posedźenju gmejnskeje rady. Wot 1. apryla płaća za wšitke poskitki SKC nowe popłatki, město dotalnych z lěta 2018. Nowe płaćizny su gmejnscy radźićeljo jednohłósnje schwalili.
Tež za gmejnu wažna adresa
Jitkowski Krabatowy dwór njewabi jeno z nowej taflu za sebje a Rakečansku gmejnu. Zajimcy maja tam přez cyłe lěto najwšelakoriše poskitki, na kotrež je wothłós dźeń a wjetši.
Jitk/Rakecy (JK/SN). Jitkowčan Sven Helm je so z minjeneho posedźenja Rakečanskeje gmejnskeje rady spokojom domoj na swój Krabatowy dwór wróćił. Přilubjenje gmejny, puć k dworej wobnowić, podpěruje tež prócowanja Helmec swójby, statok dale a wobšěrnišo na magnet přećelam Krabata a konjaceho sporta wutwarić. Nimo toho je statok znaty za swoje najwšelakoriše zarjadowanja, wosebje w meji a k zakónčenju sezony w oktobru. To je dwór stajnje z ludźimi přepjelnjeny. Helmecy so w tajkich situacijach jara derje čuja a swojim hosćom wjele poskićuja. Dobrym znatym tež wjacore razy wob lěto słódne wěcy z domjaceho rěznistwa předawaja. A štóž Helmec wašnje ratarjenja znaje, wě, što tam dóstanje. Zajimcow je tuž dźeń a wjac, a rady bychu Helmecy wšitkich spokojili.
Spalowske domizniske towarstwo je wčera swójby do towarstwoweho domu ...
Krótkopowěsće (03.04.23)
Pawkojo w Awstriskej
Budyšin. Wčera podachu so štyrjo zastupjerjo Serbskeho młodźinskeho towarstwa Pawk na jutrowny seminar Młodźiny europskich narodnych skupinow (MENS) do Awstriskeje. Pod temu tradicije zaběra so tam cyłkownje 45 młodostnych z cyłeje Europy hač do Wulkeho pjatka ze swójskimi tradicijemi a pyta za móžnymi nowymi pućemi, je přesadźić.
Sezonu ze swjedźenjom zahajili
Slopišća. W Błótach su čołmikarjo minjeny kónc tydźenja lěćnu sezonu zahajili. Zawčerawšim su prěnje čołmy w Slopišćach startowali, k čemuž su zamołwići tež wopytowarjow witali. Na swjedźenju je tež Lubnjowski žónski chór w serbskej swjedźenskej drasće wustupił. Tež na tamnych znatych blakach, kaž w Lubnjowje, zaso čołmy po groblach jězdźa.
Přihłosowanje je signal
Policija (31.03.23)
Dźiwja honjeńca
Rózbork. Dokelž 42lětny muž wupožčeny VW Golf wróćił njeje, je wobsedźer wupožčowarnje awtow policiju wo pomoc prosył. Předwčerawšim wuhladachu pytane awto na parkowanišću w Rózborku. Jako so policisća bližachu, stupi 42lětny na płun a wotjědźe. Jedyn z policistow dyrbješe při tym nabok skočić. Zastojnicy hnydom za ćeknjenym smalachu, tak zo so dźiwja honjeńca započa. Ta wjedźeše najprjedy po lěsach a łukach wokoło Zentendorfa a Nieder Neuendorfa. Skónčnje dźěše wróćo do Rózborka. Na torhošću měrješe so pytany z awtom na skupinu pěškow, kotraž dyrbješe nabok hić. Na to policisća VW najprjedy z wočow zhubichu. Pozdźišo namakachu prózdne jězdźidło w bliskim lěsu. 42lětny bě so mjeztym zhubił. Dokelž pak je wón po mjenje znaty, drje tež jeho hišće lepja.
Twarske plany w měsće porokuja
Wojerecy (KD/SN). Plany noweje twarskeje štwórće z předawanskimi móžnosćemi su na zašłym posedźenju Wojerowskeje měšćanskeje rady diskusiju wubudźili. Pozadk je, zo chcedźa w Nowej Kinajchtskej holi w bywšej bydlenskej štwórći IX při Grodkowskej šoseji a Stauffenbergowej nimo bydlenjow tež předawanišća na něhdźe 5 600 kwadratnych metrach twarić. Mjez druhim maja tam discounter, žiwidłowe wikowanišćo z połnym poskitkom, drogerija a předawanišćo picy za domjace zwěrjata nastać. Wyši měšćanosta Torsten Ruban-Zeh (SPD) liči z tym, zo přichodne lěta w industrijnišću w Čornej Pumpje 5 000 dźěłowych městnow nastanje. Wulki dźěl dźěławych drje sej bydlenje we Wojerecach pyta, wyši měšćanosta měni.
Wolóžuje městna na awtodróze
Na kromje Budyšina priwatne parkowanišćo nakładnych awtow nastało
Tři Hwězdy (UM/SN). Nowe priwatnje wobhospodarjene parkowanišćo nakładnych awtow w Třoch Hwězdach w Hodźijskej gmejnje 21. apryla oficialnje wotewru. Po słowach zamołwiteho Budyskeje firmy za twarski transport a posłužby Kayja Wauricka, maja na bywšim składźe twaršćiznow 69 městnow za Lkw-je. Šěsć z nich maja přizamknjenje k milinje, zo móhli chłódźenske agregaty zastarać, bjez toho zo dyrbjał motor awta zaswěćeny być. Ze swojim poskitkom chce firma přinošować, napjate połoženje na parkowanišćach při awtodróze A 4 wolóžić.
Wotkryja wopomnjensku taflu
Budyšink. Składnostnje 250. posmjertnin Hadama Bohuchwała Šěracha wotkryja njedźelu, 2. apryla, w 14 hodź. wopomnjensku taflu při cyrkwi w Budyšinku. Porěča krajny rada Udo Wićaz, předsyda Domowiny Dawid Statnik, wjesnjanosta Matthias Seidel a naměstnik Zwjazka sakskich pčołarjow Hendryk Roloff. Dr. Lubina Malinkowa předstaji skutkowanje Šěracha. Přizamknje so kofej w domje Šěracha. W jubilejnym lěće Šeracha su wjacore zarjadowanja planowane. Tak 20. meje w 14 hodź. kołopuć Šěracha w Budyšinku předstaja. H. B. Šěrach je so 1724 w Nosaćicach narodźił a 1773 w Budyšinku zemrěł.
Klawěr w srjedźišću
