W nocy do biblioteki
Budyšin. Hnydom dwě zarjadowani wočakujetej jutře wječor, 17. měrca, wopytowarjow Budyskeje měšćanskeje biblioteki. We wobłuku nocy bibliotekow, kotraž so po cyłej Němskej přewjedźe, čita Wienski awtor Kaśka Bryla w 19.30 hodź. ze swojeje knihi „Die Eistaucher“. Slěduje předstajenje filma „Straight Outta Crostwitz“. Wobě zarjadowani budźetej we hłownej wotnožce biblioteki na Hrodowe čo. 2. Zastup je darmotny.
DADA-centrum přeprošuje
Kamjenc. Jutře, 17. měrca, wotewru nowe kreatiwne wuměłstwowe srjedźišćo w Kamjencu. „DADA-centrum“ přeprošuje w 19 hodź. na prěnje zarjadowanje do stareje póšty na Zwingerowej čo. 20. Nimo swjedźenskich přednoškow a wernisaže prěnjeje wustajeńcy DADA z twórbami sakskich wuměłcow Franka Voigta, Petry Lorenz a Volker Lenheit, budu wjacori hudźbnicy a performance-wuměłcy wustajene twórby hudźbnje wobrubić.
Na serbske burske blido
Poskićuja wosebity čaj
Policija (16.03.23)
Domy přećežke byli
Rödertal. Wobchadna dohladowanska słužba je wutoru dopołdnja tři transporty domow Tiny na parkowanišću Rödertal kontrolowała. Tute typy domow su kruće z jězdźacym krosnom zwjazane a njepłaća z tym jako nakładowanje. Byrnjež hišće dospołnje zarjadowane njebyło, wučinješe cyłkowna masa připowěšaka po waženju 3 790 kilogramow. To wotpowěduje „přećeženju“ 290 kilow, štož wjedźeše k zběhnjenju zawodneje dowolnosće wšitkich třoch domow. Z tym policisća dalejězbu zakazachu.
Z awtom do konja zrazyła
Kamjenc. Wutoru wječor je na dróze pola Kynitzscha k zražce z ponyjom dóšło. Šoferka wosoboweho awta njemóžeše koliziji ze zwěrjećom zadźěwać. Při tym zemrě kóń na městnje njezboža. Na jězdźidle nasta wěcna škoda něhdźe 10 000 eurow.
Wjesnjanosta spěšnje jednać dyrbjał
Po wohenju w Rakečanskim přemysłownišću při Jitkowskej dróze nasta nuznosć jednanja za gmejnski zarjad.
Rakecy (JK/SN). Zo ma wjesnjanosta druhdy wažne naležnosće spěšnje a bjez dorozumjenja z gmejnskej radu rozsudźić, je legitimne a we wustawkach gmejny a w jednanskim porjedźe gmejnskeje rady jasnje rjadowane.
Loni je so w Rakečanskim přemysłownišću při Jitkowskej dróze smjećowe wozydło tam wotpadki wotwožaceje firmy paliło. Zo njeby so awto zapaliło, je šofer hižo zezběrane smjeće na dróhu wusypał. Při tym bě hakle krótki čas dozhotowjena dróha wjetšu škodu poćerpjeła. Smjećowa firma je tež hnydom reagowała a zawěsćernju informowała, zo by naležnosć rjadowała. Za zwěsćenje wysokosće škody pak bě fachowa firma dróhotwarstwa trěbna, kotraž by škodu a tak trěbne wobnowjenje trochowała a zawěsćerni zdźěliła. Tajku firmu pak gmejna w postajenym času njenamakała njeje, dokelž běchu firmy wšě z nadawkami přećežene.
Namjety hosći jara witane
Wochožanski park błudźenkow hotuje so na 20. róčnicu wobstaća
Wochozy (AK/SN). Łužiski park błudźenkow we Wochozach chce přichodnje swójby ze dožiwjenskej šćežku zwjeselić. Hłownej postawje stej holanska sonina Erika a błudźenk Skandy. „Wonej přeprošujetej na wosom stacijach k wotkrywanju a sobuskutkowanju. Dźe wo hry, hódančka a pozadkowe informacije. Chcemy po tutym puću docpěć, zo je park swójbam hišće atraktiwniši a na informacijach hišće bohatši“, podšmórny jednaćelka Anita Schwitalla wčera składnostnje wotewrjenja, mjeztym 20. sezony 2023. Wjeršk zarjadowanjow budźe jubilejny swjedźeń 1. meje.
Porjedźenka
Krótkopowěsće (16.03.23)
Helmut Kurjo njeboh
Bluń. Wutoru je we Wojerowskej klinice woblubowany dołholětny braška Helmut Kurjo, w starobje 88 lět, zemrěł. Lawreat Myta Domowiny, kotryž je so tež lětdźesatki dołho w třěšnym zwjazku angažował, běše posledni nošer Blunjanskeho dialekta. Wuběrny znajer a zběrar wšěch dźělow narodneje drasty regiona móžeše wšě wjesne narěče Wojerowskich Serbow rozeznawać (wjac jutře w nekrologu).
Wjace wuknjacych w Sakskej
Wiesbaden. Ličba šulerkow a šulerjow w Sakskej je přiběrała. W tuchwilnym šulskim lěće 2022/2023 wuwučuja 511 500 wuknjacych na powšitkownokubłacych a powołanskich šulach kaž tež na šulach strowotnistwa. Tu su tři procenty wjace hač w minjenym šulskim lěće. Na to skedźbni dźensa Statistiski zwjazkowy zarjad we Wiesbadenje.
Regionalisća so wjesela
Zaso statuwa Karla Blechena budźe
Choćebuz (WeM/SN). Wyši měšćanosta města Choćebuza Tobias Schick (SPD) je na wuradźowanju dźěłoweje skupiny „Serbske pomniki města Choćebuz“ (AG „Sorbische/Wendische Denkmale der Stadt Cottbus/Chóśebuz“) wosom wosobow do tutoho gremija powołał. Jich dźěłowa doba saha hač do lěta 2026. K powołanym słušeja zastupjerjo Serbskeho muzeja, Serbskeho instituta, župy Delnja Łužica, delnjeho pomnikoweho zarjada, fachoweho wobłuka za měšćanske wuwiće, muzejowych zběrkow města Choćebuza a wjednica 19 Choćebuskich pohrjebnišćow. Skupinu Serbske pomniki města Choćebuza nawjeduje zamołwita za serbske naležnosće města Ana Kosacojc-Kozelowa.
Z přepodaćom wopisma powołanja a z wobdźělenjom na wuradźowanju je wyši měšćanosta Tobias Schick (SPD) wysoke hódnoćenje dźěławosće serbskich pomnikoškitarjow potwjerdźił.
Křižerjo hotuja so po zwučenym wašnju na jutry
„Tu dźe wo ludźi!“
Wokrjes Zhorjelc w Hamorje znowa požadarjow wo azyl zaměstni
Krynhelecy (AK/SN). Zhorjelski wokrjes budźe w bywšim powołanskošulskim centrumje w Hamorje znowa dom za požadarjow azyla zarjadować a to hač do 22. apryla. Maksimalna kapacita domu je 150 městnow. Wokrjes pyta tuchwilu kmaneho, nazhoniteho wobhospodarjerja. Zhromadnje z nim chcetej Hamorska gmejna a energijowy koncern LEAG cyłkowny wěstotny koncept za nutřka a wonka wudźěłać. Tole rozprawješe přirjadnik krajneho rady, Thomas Gampe, póndźelu na posedźenju Hamorskeje gmejnskeje rady.
Wot Zwjazka připokazani azyl pytacy – přewažnje mužojo mjez 18 a 25 lětami – pochadźeja ze Syriskeje, Afghanistana, Irana, Iraka, Indiskeje a Pakistana. „Hižo w lětomaj 2015 a 2016 je objekt tu w Hamorje jako dom za požadarjow azyla słužił. Chcemy jón reaktiwizować“, podšmórny Thomas Gampe. „Je mi wědome, zo tutón rozsud mjez wšitkimi 900 wobydlerjemi Hamora přihłosowanje žnjeć njebudźe“, wón doda.
