Policija (07.03.23)
Dwójce so paliło
Kołwaz. Hnydom dwójce je so předwčerawšim w Kołwazu (Kohlwesa) pola Bukec paliło. Najprjedy so popołdnju z twarjenja třistronskeho statoka kurješe. Wobornicy płomjenja spěšnje podusychu, škoda je lědma nastała. Něhdźe w 22.30 hodź. w druhim domje we wsy zwěsćichu, zo so tam wobruče palachu, a to hnydom pódla płunoweho tepjenja. Na zbožo wobornicy hóršemu zadźěwachu a tež tónle woheń zhašachu. 65lětna žona so zrani.
Pěsnje a rejki nazwučowali
Dalekubłanje z nowymi serbskimi dźěćacymi spěwami za Witaj-dźěći je Rěčny centrum WITAJ minjeny štwórtk w bróžni Domowinskeho domu we Wojerecach za kubłarki a wučerki přewjedł. Prěni raz wuzwolichu sej tutu rumnosć, a běchu jara zahorjeni wo móžnosćach wužiwanja nowych meblow a wuběrnych wobstejnosćow. Přeprosychu sej wučerki delnjeho schodźenka, kotrež wuwučuja serbšćinu na šulach we Wojerecach, Nowej Wsy, Łazu a zdobom WITAJ-kubłarki z wjacorych dźěćacych kubłanišćow. Samo z Drježdźan bě kubłarka přichwatała.
Referentka Leńka Thomasowa, wjelelětna wučerka za hudźbu na Serbskej fachowej šuli za socialnu pedagogiku w Budyšinje, njenazwučowaše z nimi jenož wosom nowych abo znowa namakanych spěwow za pěstowarsku a zakładnošulsku starobu, ale podawaše tež wšelake metodiske pokiwy, kak so spěwčki a rejki we wučbje wariabelnje zasadźeć hodźa.
Weronika Butendeichowa
Porěča wo spěchowanju
Terminowy kalender radźićelow hižo derje pjelnjeny
Njebjelčicy (JK/SN). Nimo tak mjenowanych „normalnych“ terminow, kotrež dźěło w gmejnskej radźe ze sobu přinjese, maja Njebjelčanscy radźićeljo tež tójšto přidatnych terminow, kotrež su za dźěło w komunje trěbne a wažne. Nimo přihotow na přichodne posedźenje parlamenta, kotrež budźe 30. měrca a na kotrymž póńdźe wo lětuši hospodarski plan, budźe to zjawne informaciske zarjadowanje k přichodnemu zastaranju gmejny z energiju. Wone wotměje so 13. měrca w 18 hodź. w sydarni gmejnskeho zarjadnistwa.
Wo přirodnej zahrodce
Wojerecy. Kak móžeš swoju zahrodu přirodnje a bjez chemije wobhospodarić je tema zarjadowanja 11. měrca wot 10 hodź. na Wojerowskej dźěćacej a młodźinskej farmje. Tam porěči bioratar Ronny Rebiš z Kanec. Z prawym wobhospodarjenjom móža zahrodkarjo strowe žiwidła žnjeć a tež insektam přirodny žiwjenski rum skićeć. Wopytowarjo zhonja, kak móžeš to bjez mineraliskeho hnojidła a chemije docpěć. Wobdźělenje płaći dźesać eurow. Přizjewjenja přijimuja pod .
Za wiki so přizjewić
Stróža. Wikowarjo a rjemjeslnicy, kotřiž chcedźa so 29. apryla na nalětnich přirodowych wikach w Stróži wobdźělić, móža so e-mailnje pod adresu hač do 10. měrca přizjewić. Hesło wikow rěka „Zahroda“. Předewšěm prašane su přirodnje a regionalnje zhotowjene wudźěłki, rjemjeslniske pokazki a serbski kulturny program. Přirodne wiki organizujetej a přewjedźetej zarjadnistwo biosferoweho rezerwata Hornjołužiska hola a haty a Stróžanske Domizniske towarstwo Radiška.
Twarska naprawa zakónčena
Swjedźeń zymskeje swěcy su wopytowarjo minjenu sobotu w ...
Krótkopowěsće (07.03.23)
Termin wólbow postajili
Trjebin. Wobydlerjo Trjebinskeje gmejny wola 27. awgusta noweho wjesnjanostu. To su gmejnscy radźićeljo wčera wobzamknyli. Přičina je, zo je dotalny wjesnjanosta Waldemar Locke (CDU) strowotnych přičin dla zastojnstwo złožił. 60lětny bu 2017 za wjesnjanostu wuzwoleny. Ćežišća jeho dźěła běchu přesydlenje Miłoraza, wutwar spěšneho interneta a wopłóčkowa syć w Trjebinku.
Stawki dale rozšěrja
Zhorjelc. Dźěłarnistwo ver.di je nětko tež přistajenych zjawneje słužby w Běłej Wodźe, Rózborku a Niskeje namołwjało stawkować. Tak wostachu dźensa mjez druhim měšćanske a gmejnske zarjady a pěstowarnje zawrjene. Manifestaciju wotměchu před dwórnišćom w Běłej Wodźe. Tež jutře su stawki předwidźane, potom přizamknu so sobudźěłaćerjo zjawneje słužby Budyskeho wokrjesa.
Schubert přećiwo wutwarej A 4
Policija (06.03.23)
Tójšto deliktow zwěsćili
Stróža. Pod wliwom alkohola a drogow stejacych šoferow lepić je takrjec wšědny chlěb policije. Minjeny pjatk běchu zastojnicy w tym nastupanju jara wuspěšni, jako wot dopołdnja hač do wječora hnydom štyrjoch skućićelow dosahnychu. W Stróži pola Rakec bě 32lětny wodźer Golfa konop brał. W Mučowje kontrolowachu 25lětneho wodźerja Golfa. Pola njeho reagowaše drogowy test pozitiwnje na amfetaminy. W Rakecach zadźeržachu 46lětneho šofera Citroena a pola njeho zwěsćichu, zo steješe wón pod wliwom alkohola. Test wunjese 0,72 promilow. A skónčnje kontrolowachu wječor 35lětneho wodźerja Mazdy w Kulowje. Pola njeho naměrichu 0,82 promilow alkohola w kreji.
Jutry tule křižerjo pojěchaja
Dorost sylnje zastupjeny był
30. wiki jutrownych jejkow w Budyskim Serbskim domje ludźi přiwabili
Budyšin (CS/SN). Po lětomaj přestawki móžachu so sobotu a njedźelu w Budyskim Serbskim domje 30. wiki jutrownych jejkow wotměć. Kaž Spěchowanski kruh za serbsku ludowu kulturu jako wuhotowar zdźěli, zličichu něhdźe 1 500 wopytowarjow. Mjez 31 debjerkami a debjerjemi jejkow kaž tež mjez mytowanymi bě napadnje wjele młodych wobličow. Tak je Vanessa Trenschel hnydom štyri myta we wubědźowanju wo najrjeńše serbske jutrowne jejko dobyła. Wona a jeje sotra Linda stej hižo jako dźěsći z maćerju Ines Trenschel na wiki přijěłoj. Swójba bydli w 500 kilometrow zdalenym Allendorfje w Hessenskej. Mjeztym 20lětna Vanessa a 18lětna Linda swoje kmanosće runje tak pokazaštej kaž jeju mać.
