Nowu pěstowarnju přihotuja
Na předwidźanym twarnišću w Ralbicach so pilnje dźěła
Róžant (JK/SN). W aprylu započnu nowu Ralbičansku pěstowarnju twarić. To wobkrući wčera na posedźenju gmejnskeje rady Ralbicy-Róžant wjesnjanosta Hubertus Ryćer (njestronjan). Zo bychu dźěła dypkownje a bjez problemow zahajić móhli, dyrbja twarnišćowu ležownosć zrumować a přihotować. Gmejnskaj dźěłaćerjej staj tuž tuchwilnje hłownje z tajkimi dźěłami zaběranaj a rumujetaj kontejnery a wšitko, štož by twar haćiło.
Ukrainjenjo w Serbach integrowani
Witalij je jedyn z 86 000 Ukrainjanow, kotřiž su po nadpadźe Ruskeje na Ukrainu jako ćěkancy w Němskej dźěłać započeli. Poł lěta je hižo muler pola Šěrakec twarskeje firmy w Konjecach.
Budyšin (SN/mb). „Smy spokojom z nim“, praji Rafael Šěrak dźensa Serbskim Nowinam a so wjeseli, zo je ukrainska swójba z pjeć dźěćimi w Serbach derje integrowana. Mandźelska mulerja dźěła w Chróšćan hladarni. So wě, zo je wšědna komunikacija na dźěle „serbsce, němsce, rusce, z wočimi, rukami, Google-translatorom atd.“, tak Šěrak, dale wulke wužadanje. Ale „wšo běži“, zawod liči tuchwilu dołhodobnje ze spušćomnym dobrym sobudźěłaćerjom. Herbert Brücker, eksperta za migraciju na Instituće za wuslědźenje dźěłowych wikow a powołanjow (IAB), wočakuje hladajo na ukrainskich ćěkancow na dźěłowych wikach hač do kónca lěta přirunujo ze stawom februara 2022 hač do 210 000 přidatnych dźěłowych mocow w Němskej. Tak praješe „medijowej skupinje Funke“.
Krótkopowěsće (24.02.23)
817 nowych wučerjow
Drježdźany. Z druhim šulskim połlětom započnje 817 nowych wučerkow a wučerjow w Sakskej wuwučować. Jich je mjenje hač bě planowane, prěnjotnje bě hač do 1 100 nowopřistajenjow předwidźanych. „Byrnjež něhdźe 100 wosobow wjace přistajeć móhli porno minjenemu połlětu, bych sej k wolóženju našich šulow wjace nowych pedagogow přał“, rjekny kultusowy minister Christian Piwarz (CDU) wčera w Drježdźanach.
Wokrjesnu dróhu wutwarja
Budyšin/Ptačecy. Budyski wokrjes wokrjesnu dróhu mjez Lejnjom a Ptačecami dospołnje wutwari. Zdobom připrawja dróhu přewodźacy kolesowarski puć, kaž krajnoradny zarjad dźensa informuje. Twarski čas ma wot 6. měrca hač do 15. decembra trać. Za tutu dobu přejězd přez Lejno a Ptačecy zawrjeny wostanje.
Přeprošenje na Dźeń Saksow
Policija (23.02.23)
Wjele pjenjez zhubiła
Mittelherwigsdorf. Njeznaći su wutoru popołdnju staršej žonje w Mittelherwigsdorfje pola Žitawy wšitke jeje nalutowane pjenjezy wulišćili. Při telefonje woni rentnarce napowědachu, zo bě jeje syn při wobchadnym njezbožu dźěćo ćežko zranił. Nětko sedźi wón w jastwje, z kawciju pak móhli jeho pušćić. Žona wza tuž dohromady 54 000 eurow a pjenjezy njeznatej wosobje přepoda. Wobšudnicy mějachu wšón čas ze žonu telefoniski zwisk. Hakle pozdźišo wona syna zazwoni, tak zo so wobšudnistwo wukopa.
Do nadróžneho dźěłaćerja zrazyła
Nowe špundowanje předwidźane
Z projektom zhromadnosć sylnić
Rybarski dwór wutwarja
Přirodoškitna stacija je spěchowanske srědki za wulki projekt dóstała
Mały Holešow (UM/SN). Wot srjedź měrca maja twarscy dźěłaćerjo teren rybarskeho dwora w Małym Holešowje wobdźěłać. Potom započnu wulki a hižo dlěje planowany projekt zwoprawdźić. „Planujemy jón hižo dwě lěće“, praji jednaćelka Njeswačanskeje přirodoškitneje stacije z.t. Angelika Schröter. Towarstwo ma swoje sydło w tak mjenowanym archiwnym pawiljonje Njeswačanskeho hrodoweho parka. Najwjetši dźěl wólnočasnych a kubłanskich poskitkow pak přewjedu na rybarskim dworje w bliskim Małym Holešowje.
Z wyšim měšćanostu rěčeć
Wojerecy. Město Wojerecy a tamniša biblioteka Brigitty Reimann pokročujetej 27. februara slěd zarjadowanjow pod hesłom „Prašej so wyšeho měšćanostu“. Tónraz njezměja krutu temu, tak zo móže kóždy swoje naležnosće přednjesć a so wo tym z Torstenom Rubanom-Zehom (SPD) rozmołwjeć. Wobdźělenje je darmotne a kóždy je přeprošeny, so wot 18 hodź. w měšćanskej bibliotece wobdźělić. Zarjadowanje wotměje so we wobłuku projekta „Wotewrjena dźěłarnička demokratije“. Z nim chcedźa wobydlerjow do procesa rozsudow wo měšćanskich naležnosćach zapřijeć.
Za wubědźowanje so přizjewić
Hózk. Za lětuše wubědźowanje Black Bird Run 3. septembra w Hózku móža so zajimcy nětko přizjewić. Kaž Hózkowske młodźinske towarstwo zdźěli, maja wobdźělnicy na dwanaće kilometrach 15 zadźěwkow přewinyć. Ličba wobdźělnikow je na 400 wobmjezowana. Startować móža zajimcy wot 18 lět. Přizjewjenja přijimuja pod blackbird.
Při haće planuja nowe hrajkanišćo
Často zwrěšćeja komunalne inwesticije na tym, zo města a gmejny dosć pjenjez za swójske podźěle nimaja. W Kulowje zda so to hinak być. Tam maja něštožkuli předwidźane.
Kulow (AK/SN). Najebać wulke poćeženja přiběracych wudawkow za energiju a wokrjesneho wotedawka dla chce město Kulow lětsa dale inwestować. Tole wuchadźa z hospodarskeho plana 2023, kiž su měšćanscy radźićeljo na swojim zašłym posedźenju schwalili. „Najwjetša naprawa je nowa wólnočasna a sportowa připrawa při měšćanskim haće za dohromady 310 000 eurow. Nimo spěchowanja je za to w etaće 80 000 eurow swójskich srědkow zaplanowane. Nastać matej wulke hrajkanišćo a čara za kolesowanje“, rozłoži komornik Mathias Kockert. Dźěći a wosebje młodostni su sej připrawu dołho přeli.
Poprawom chcychu etat hižo loni w decembru wobzamknyć. „Tehdy pak njebě hišće jasne, kak so kóšty za energiju wuwija, kelko dochodow změjemy z přemysłoweho dawka a kajke budu tarifowe jednanja w zjawnej słužbje. Tohodla smy rozsud přestorčili. Mjeztym su někotre dypki rozrisane, tak zo móžemy lěpje planować“, praji měšćanosta Markus Posch.
