Wokrjes so z deficitom bědźi
Město wurunaneho budgeta změje Zhorjelski wokrjes w najlěpšim padźe dwójny budget 2023/2024, kotryž hodźi so přizwolić. To je komornik Thomas Gampe wčera w Zhorjelcu podšmórnył.
Zhorjelc (AK/SN). „Deficit wučinja – 2023 a 2024 – stajnje 43 milionow eurow. Wuměnjenje za to je zwyšenje wokrjesneho wotedawka wot 35 na 37 procentow. Bjez toho by lětny deficit 50 milionow eurow wučinił“, je komornik rozłožił.
Wokrjes Zhorjelc wysoki deficit sam zawinił njeje. Přičiny su wšelake. Tak su we wokrjesu wudawki za socialnu pomoc porno loni wo 17,9 milionow eurow stupali. Wokrjes dyrbi nimo toho Komunalnemu socialnemu zwjazkej wysoki wotedawk płaćić. Runje tak ma hladanja potrěbnych podpěrać, kotřiž swoje městno w hladarni z rentu zapłaćić njemóža. Te płaći mjeztym 2 500 do 3 000 eurow. „Telko renty nichtó njedóstanje. Jako wokrjes mamy chcyjo nochcyjo zaskočić“, Thomas Gampe wujasni.
Krótkopowěsće (02.02.23)
Protest krajny sejm dosćahnył
Drježdźany. Protest přećiwo wudobywanju šćerka w lěsu Łužničanskeje hole je wčera Sakski krajny sejm dosćahnył. W debaće wo klimyneutralnym twarjenju, nastorčenej wot Zelenych, je politikar Lěwicy Marco Böhme kritiku swojeje strony na předewzaću wobnowił. „Trěbne su nětko dialog a rozmołwy, zo njeby k namócnemu rumowanju přišło“, rjekny wón z widom na wobsadźerjow štomow.
Kemše za Alojsa Andrickeho
Drježdźany. Składnostnje 80. posmjertnin Alojsa Andrickeho so jutřiši pjatk w Drježdźanskej katedrali kemše z biskopom Heinrichom Timmereversom wotměja. Kapałnicy je hudźbnje wobrubja, na spočatku budźe modlitwa při relikwiji zbóžnoprajeneho martrarja w nabóčnym wobłuku cyrkwje. Kemše móžeš tež wot 18 hodź. na youtube-kanalu biskopstwa sćěhować.
Dom zaso „w čěskich rukach“
Z 2 859 dypkami 300. turněr dobył
Policija (01.02.23)
Přez WhatsApp seniora přelesćił
Podhladne powěsće přez powěsćowu słužbu WhatsApp je minjene dny něchtó z Ottendorfa-Okrille dóstał. Njeznate čisło wuda so jako syn tutoho. Wón jemu pisaše, zo by nowy handy měł a njeby hišće onlinebanking wužiwać móhł. Na to sćěhowaše próstwa, přepokazanku něhdźe 1 720 eurow přewzać. To zjebany tež sčini. Po tym zo bu jemu wobšudnistwo wědome, wobroći so wón na policiju. Kriminalna policija pad přepytuje a warnuje wospjet před tym, so na pjenježne žadanja pušćić. Njedawno započachu powěsće zwjetša z narěču „Witaj mama, halo papa“.
Lód z awta padnył
Spadowace lodowe a sněhowe skaliska su póndźelu rano małotransporter na A 4 mjez Delnim Wujězdom a Słonej Boršću wobškodźili. Zmjerznjene kruchi padnychu wot jěduceho Daimleroweho sedłoweho ćaha, kotryž bu wot 24lětneho wodźeny. Šofer njebě jězdźidło do zajězda jězby po wšěm zdaću porjadnje kontrolował. Na naslědnym małotransporteru nasta wěcna škoda něhdźe 500 eurow. Awtodróhowi policisća přiwzachu njezbožo a zhotowichu pokazku.
Festiwal wopačneje wěrnosće
Wojerecy (SN). Wot 4. małeho róžka hač do 15. nalětnika so we Wojerecach „Festiwal wopačneje wěrnosće“ wotměje. Start budźe sobotu w Kulturnej fabrice (Kufa) w starym měsće. Cyły dźeń chcedźa we wobydlerskim domje na Piwarskej hasy „Hamt za cyłu wěrnosć“ zaměstnić, jeho centralu móžeš aktualnje hišće we wustajeńcy „Fake. Die ganze Wahrheit“ w muzeju hygieny w Drježdźanach wopytać. Kulturna fabrika potom hinak wupada hač hewak, wopytowarjow wočakuje dosć akcijow za hraće a wobdźělenje. Woni přilubja zabawny spektakl z wjacorymi wuměłcami a dalšimi sobuskutkowacymi z Wojerec. Zarjadowanje so tež za dźěći hodźi. Drježdźanski muzej kooperuje wot lońšeho nalěća ze wšelakimi partnerami we Wojerecach. Nastork k tomu je mjenowana „Fake“-wustajeńca na stejnišću w Drježdźanach dała. Z tuteje kooperacije je festiwal wurostł, kiž ze sydom zarjadowanjemi na wšelakich městnosćach temje łža a wěrnosć z rozdźělnych perspektiwow wobswětluje. Prowokantne prašenje: By swět woprawdźe lěpši był, jeli bychu wšitcy přeco jenož wěrnosć powědali?
Wulka pomoc woporam wohenja
Loni nazymu je so palenja kabla dla swójbny dom Bianci Kuckei we Wulkich Ždźarach wotpalił. Nětko dósta wona pjenježny dar tamnišeje cyrkwinskeje wosady.
Wulke Ždźary (AK/SN). Wjeselo rozswětla mjezwočo Bianci Kuckei. Z tajkej překwapjenku njebě ličiła. Jens Gerber, předsyda wosadneje cyrkwinskeje rady Ewangelskeje wosady Wulke Ždźary, přepoda jej symbolisce dar we wysokosći tysac eurow. Wobydlerka je ze swojej swójbu po zahubnym wohenju loni w oktobrje bjez swójskeho bydlenja. Kóžda pomoc je jej witana. „Wjeselimy so jara. Wutrobny dźak za tutón spomóžny dar“, rjekny wona a přida: „Pjenjezy budźemy sej nabok połožić a lutować. Štó wě, kajke kóšty dyrbimy hišće njesć – hladajo na zawěsćenje, prawiznika abo dalše naležnosće.“
Dwójce camprowali
Rozžohnowanje w Miłorazu, witanje w Nowym Miłorazu
Miłoraz/Nowy Miłoraz (JS/SN). W stawiznach Miłoraza drje budźe minjeny kónc tydźenja wosebje w pomjatku wostać: Pjatk su posledni raz w starej wsy a dźeń na to hižo w nowej wsy camprowali. Camprowanje, serbski nałožk wućěrjenja zymy, ma w Miłorazu dołhu tradiciju. Wuwiće dokoławokoło wjeski je tež hejsowanje wobwliwowało: kónčina priority (za brunicu), přesydlenje, potom skónčnje Miłoraske zrěčenje a ze stron wjetšiny ludnosće (po)žadane přesydlenje na nowym městnje. Jedne pak su camprowarjo přeco zaso připowědźeli: Serbske nałožki wozmjemy sobu do noweje wsy. Cyle bjezporočnje pak to na kóncu tež wotběžało njebě. Poslednje camprowanje w póstniskim času w starym Miłorazu wotmě so 2. februara 2019. Njedyrbješe to po tutym starym wašnju poslednje być, ale potom přińdźe korona a bjez wotpohlada bě kónc. Mjeztym je natwar Noweho Miłoraza daloko postupił. Posledni zhromadny wustup měještej stary a Nowy Miłoraz składnostnje přećaha 750. jubileja w Slepom.
Ptači kwas w Praze
Slědźerjo w susodstwje Krabata
Dotal je Čorny Chołmc Krabatoweho młyna dla znaty – nětko ma so z centrumom za slědźenje a wuspytowanje awtomatizowaneho jězdźenja dalša wosebitosć přidružić.
Krótkopowěsće (01.02.23)
Poziciska papjera wo wjelku
Drježdźany. Pozicisku papjeru „Wjelk žane přitulne zwěrjo njeje“ je frakcija CDU w Sakskim krajnym sejmje wčera wobzamknyła. Za najbytostniši nadawk maja „wjelka do wobłuka normalneho managementa dźiwich zwěrjatow přewjezć“. Frakciski městopředsyda Georg-Ludwig von Breitenbuck rjekny, zo „ma wjelk škitny status, kiž sylnosće populacije dla hižo dołho wjace njetrjeba“.
Dom tysac hatow wotewrjeny
Stróža. Wot dźensnišeho je „Dom tysac hatow“ za informaciju wopytowarjow w biosferowym rezerwaće „Hornjołužiska hola a haty“ zaso wotewrjeny. Sezona so w 19 hodź. z přednoškom wo produkciji miliny z fotowoltaiku zahaji. Nimo stajneje wustajeńcy wo přirodźe regiona je hač do kónca měsaca wosebita wustajeńca „SerbskiKonsum – wobchod za serbske accessoiry“ darmotnje přistupna.
Protest přećiwo zaměstnjenju
