Za rozmołwu so přizjewić
Do Miłoraza bus dale pojědźe
Gmejna Trjebin, LEAG a Zhorjelski wokrjes su sej přezjedni
Trjebin (AK/SN). Wot přesydlenja potrjecheny Miłoraz wostanje dale ze zjawnym bliskowobchadom za šulerski transport do Slepoho a wróćo zwjazany. K tomu wuzna so wčera Trjebinska gmejnska rada. Dwě předłoze radźićeljo jednohłósnje wobzamknychu. W prěnim rozsudźe přihłosowachu zrěčenju Trjebinskeje gmejny z energijowym koncernom LEAG wo financowanju čary 79 Slepo-Miłoraz-Slepo. LEAG přewozmje swójski podźěl gmejny. Druhe wobzamknjenje wopřijima zrěčenje Trjebinskeje gmejny ze Zhorjelskim wokrjesom wo podźělnym financowanju samsneje busoweje čary. Je to zasadne wuznaće, zo ma so šulerski wobchad mjez Miłorazom a Slepom dale wjesć.
Bulank: Gmejna je wulke twarnišćo
Wjele lět płaćeše Njebjelčanska gmejna jako wulce přikładna. Z nowym wjesnjanostu so nětko wukopa, zo maja tójšto njerozrisanych problemow, kotrež dyrbja přichodny čas zrjadować.
Njebjelčicy (SN/MWj). Přewjele přičiny k spokojnosći Njebjelčanski wjesnjanosta André Bulank nima, hdyž lěto 2022 bilancuje a wuhlad na přichodnych dwanaće měsacow poda. „Mamy jako komuna nimale milion eurow dołha. To woznamjenja, zo dyrbimy přichodnje mjeńše całty pjec a so na swoje winowatostne nadawki kaž pěstowarnju a wohnjowu woboru wobmjezować. Wšitke dobrowólne wobłuki kaž hrajkanišća abo podpěru towarstwam dyrbimy bohužel přepruwować“, praji wjesnjanosta, kiž je swoje zastojnstwo w awgusće nastupił.
Koala-žónka na kwasnej jězbje
Lěkarjo faluja
Drježdźany (SN/mb). W 32 wot cyłkownje 48 regionalnych wobłukow w Sakskej hrozy njedostatk domjacych lěkarjow. To praji dźensa Kevin Reißig, rěčnik frakcije Lěwicy w krajnym sejmje, na zakładźe wotmołwy socialneje ministerki Barbary Klepsch na naprašowanje zapósłanče Susanny Schaper, předsydki sakskeje Lěwicy. 426 městnow resp. praksow domjacych lěkarjow je dotal njewobsadźenych. Přerězna staroba lěkarjow za powšitkownu medicinu w swobodnym staće běše 54,4 lět (2021).
Najebać to, zo njejsu pozdatnje ličby za jednotliwe wokrjesy přistupne, móžeš ze statistiki „stopjeń zastaranja“ wučitać, hač su wšě městna wobsadźene (100 procentow). W kónčinach wokoło Běłeje Wody (2021: 81,8%/2018: 86,9%), Wojerec (88,1%/87,3%) a Kamjenca (89,3%/ 102,3%) je deficit. Dokoławokoło Budyšina je swět statistisce nimale w porjadku, ale połoženje je so pohubjeńšiło: 99,1%/109,1%. Plan ma zjednoćenstwo kasowych lěkarjow na starosći, wone dyrbi so po postajenjach zhromadneho zwjazkoweho wuběrka lěkarjow, chorownjow a chorobnych kasow měć. Hižo dołho so kontrowersnje diskutuje, hač plan lokalne wosebitosće dosć wobkedźbuje.
Krótkopowěsće (12.01.23)
Łužica stolica kultury?
Choćebuz. Kulturna ministerka Braniborskeje, Manja Schüle (SPD), je swój namjet wobkrućiła, zo by so Łužica jako europska stolica kultury požadać móhła. Schüle: „Mamy wulkotnu kulturnu krajinu we Łužicy“, do kotrejež słuša tež „jónkrótne herbstwo Serbow“. W zwisku ze změnu strukturow něhdyšeho brunicoweho rewěra dźe wo to, „potenciale zwjazać a něšto nowe kreěrować.“
Prěnja indigena ministerka
Brasilia. W Brazilskej su prěnju indigenu ministerku w stawiznach kraja spřisahali. Sônia Guajajara nawjeduje wotnětka nowe ministerstwo za indigene ludy, kotrež je dobyćer wólbow, nowy prezident Lula, wutworił. Guajajara běše koordinatorka indigeneho třěšneho zwjazka Abip. Jeje spřisahanje dyrbjachu nadpada militantnych přiwisnikow něhdyšeho prezidenta Bolsonara dla přestorčić.
Hotuja so na jubilejny swjedźeń
Prěni wulki wjeršk za wjetšich a mjeńšich w běhu lěta
Přinošuja energijowej změnje
W Klětnom přetwarja nadróžne wobswětlenje na LED
Hamor (AK/SN). Energijowemu drustwu Perspektiwa Hamor tež Hamorska gmejna přistupi. Tole je předwčerawšim gmejnska rada jednohłósnje rozsudźiła. Komuna wuznawa so z tym k cilam towarstwa ze samsnym mjenom. Zaměr drustwa je, wobswětej přichilenu a po płaćiznje přijomnu milinu produkować. Hamorska gmejna ma so poněčim awtarkna komuna stać a so z milinu sama zastarać. „Tónle zaměr chcemy jako gmejna podpěrać“, praji wjesnjanosta Hendryk Balko (Wolerske zjednoćenstwo Hamor). Jako přinošk płaći gmejna symboliske 50 eurow.
7. decembra 2022 je 27 wobydlerjow energijowe drustwo załožiło. Do předsydstwa słušeja Helmut Perk, Christian Damian a Guido Ludwig. Drustwo chce přinošować, zo je region naslědny a wobswětej přichileny, rěka na internetnej stronje .
Dale předwčerawšim wobzamknychu, w Klětnom nadróžne wobswětlenje na LED-techniku přetwarić. Tole płaći něhdźe 120 000 eurow. Najwjetši dźěl toho Zhorjelski wokrjes spěchuje. Hamorska gmejna trjeba jeničce swójski podźěl 6 000 eurow płaćić.
Policija (11.01.23)
Kóčce pomhali
Wudwor. Jako pomocnicy w nuzy a přećeljo domjacych zwěrjatow su so předwčerawšim wječor policisća we Wudworju wopokazali. Kedźbliwy wobydler bě zastojnikam zdźělił, zo bě na hłownej dróze zranjenu kóčku wuhladał. Policisća přijědźechu, ale kóčku najprjedy njenamakachu. Hakle jako so woni z tak mjenowanej ćopłotnej kameru bliže rozhladowachu, woni zranjene zwěrjo zwěsćichu. Štyrinohača dowjezechu skótnemu lěkarjej. Komu kóčka słuša, dotal znate njeje.
