Krótkopowěsće (18.01.23)
MSPI dla FUEN znowa skorži
Flensburg. Wuběrk wobydlerskeje iniciatiwy MinoritySafepack (MSPI) a prezidij Federaciskeje unije europskich narodnosćow (FUEN) znowa na Europskim sudnistwje skoržitej, kaž FUEN w interneće zdźěli. Wobaratej so přećiwo rozsudej sudnistwa z 9. nowembra 2022. Po tym je Europska komisija ze swojim wotpokazanjom, prawniske akty na zakładźe MSPI namjetować, prawje jednała.
Rozmołwa w Kulowje
Kulow. Budyski krajny rada Udo Wićaz (CDU) je wčera předewzaće MAJA-meble w Kulowje wopytał. Z jednaćelom Uwe Gottschlichom a zawodnym nawodu Jansom Antalijom je wón aktualnu situaciju twornje rozjimał, hdźež nimale 200 ludźi pušća (SN rozprawjachu). Po zetkanju je so Wićaz z Budyskej dźěłowej agenturu skontaktował a wo podpěru za Kulowske předewzaće prosył.
Hara přińdźe z Němskeje
Lubowarjo konjow sej wujěchali
Šesta wotnožka fyzioterapije
Radźićeljo wuradźuja
Róžant. Předstajenje přizwoleneje twarskeje naprawy a doby realizowanja nowotwara Ralbičanskeje pěstowarnje budźe jedna z temow přichodneho posedźenja gmejnskeje rady Ralbicy-Róžant štwórtk, 19. januara, we 18.30 hodź. w sydarni gmejnskeho zarjada w Róžeńće. Dale póńdźe wo busowe zastanišćo w Hrańcy a wo popłatki za Ralbičansku sportownju.
Na popołdnjo za swójby
Budyšin. „Barby rejuja!“ rěka hesło popołdnja za swójby, na kotrež přeproša Budyski Serbski muzej njedźelu, 22. januara. Zarjadowanje wotměje so we wobłuku wuměłskeje wustajeńcy „Wšo je krajina. Serbski moler Jan Buk“. Wot 15 hodź. čaka na wopytowarjow wotměnjawy program. Zajimcy budu so móc po wustajeńcy wodźić dać, mały pokład pytać, so z wuměłskim paslenjom k temje mozaik zaběrać a rejwać. Štóž ma lóšt, njech sej drastu ze swojej najlubšej barbu zwoblěka, přetož hesło rěka „Barby rejuja“.
Pytaja rjemjeslnikow
Policija (17.01.23)
Ćeknjeneho tola lepili
Biskopicy. Na Cyrkwinskej dróze w Biskopicach chcyše so njedźelu wječor 41lětny wodźer wosoboweho awta wobchadnej kontroli wuwinyć. Jako policisća jemu signal k zadźerženju dachu, stupi muž na płun swojeho Golfa. Na šulskim dworje pak jeho zastojnicy tola spěšnje dosahnychu. Při alkoholowym tesće so wukopa, zo měješe muž 1,78 promilow alkohola w kreji. Nimo toho wón žanu płaćiwu jězbnu dowolnosć předpołožić njemóžeše. Na njeho čaka nětko jednanje třoch deliktow dla.
Njedostatki internetnje přizjewić
Turistisku infrastrukturu polěpšić
W městach a gmejnach na spočatku noweho lěta bilancuja, što je so loni docpěło. Runočasnje hladaja, što chcedźa w přichodnych dwanaće měsacach zwoprawdźić.
Wulka Dubrawa (CS/SN). Jako je Hardy Glausch (njestronjan) srjedź lěta 2022 zastojnstwo jako nowy Wulkodubrawski wjesnjanosta nastupił, dyrbješe najprjedy raz tójšto dźěła nachwatać a so z personalnymi ćežemi bědźić. Tohodla móžachu w gmejnje hospodarski plan 2022/2023 hakle loni w decembru nastajić. Jedyn z najwažnišich problemow, kotrež dyrbja přichodnje zmištrować, su pěstowarnje. Zo móhli hospodarski plan scyła wurunać, dyrbjachu planowany nowotwar „Dźěćaceje kupy“ wotstorčić, přetož za nju njedóstanu kaž wočakowane 90 procentow spěchowanja, ale jenož 50 procentow. Tuž koncentruja so nětko na nowotwar pěstowarnje w Chwaćicach. Za nju su wuhlady spěchowanja lěpše.
Z jasnymi hłosami zawjeselili
Tradicionelny lětny swjedźeń Kulowskeho Bratrowstwa z jubilejom
Sulšecy (SHR/SN). Kulowske Bratrowstwo dožiwja lětsa 125. lěto swojeho wobstaća. Cyle w znamjenju tohole jubileja steješe minjenu sobotu tradicionelny lětny swjedźeń jednoho z najstaršich serbskich towarstwow. Bratrowstwo je so 2. wulkeho róžka 1889 do towarstwoweho registra zapisało. Zabawny wječor w Sulšečanskim kulturnym domje bě zazběh do 125. jubilejneho lěta towarstwa. Na žurlu přichwatało je něhdźe 120 čłonow a hosći w starobje jědnaće hač do 85 lět.
Roland Dantz nowy předsyda
Kamjenc (SN/at). Wyši měšćanosta Lessingoweho města Kamjenca Roland Dantz je nowy předsyda wokrjesneho zwjazka Budyšin Swobodnych wolerjow. Wón naslěduje Biskopičanskeho kolegu w zastojnstwje prof. dr. Holma Großeho, kotryž z wosobinskich přičin znowa kandidował njeje. Na sobustawskej zhromadźiznje su čłonojo minjeny pjatk w Cunnersdorfje nowe předsydstwo wokrjesneho zwjazka wuzwolili. Dantzej po boku dowěrjachu zastojnstwje naměstnikow Wojerowčanej Sandrej Fiebigej a Markusej Neumannej z Njedźichowa. Kulowčana Ronalda Homolu a Gunnara Schneidera z Hodźij wuzwolichu za přisydnikow.
Kaž w nowinskej zdźělence Swobodnych wolerjow rěka, su w diskusiji do wólbow wuzběhnyli, zo „su zachowanje našich swobodowych a zakładnych wobydlerskich prawow, swójska wotewrjenosć za prašenja a pytanje za wěrnosćemi, nic pak za pozdatnej wěrnosću,“ za wotewrjeny diskurs z towaršnosću nuznje trěbne. Z rozmołwy je nastork wušoł, zhromadne dźěło z městnymi skupinami a čłonami bóle zaplesć.
Krótkopowěsće (17.01.23)
Zličbowanski zarjad kontra MDR
Erfurt/Drježdźany. Durinski zličbowanski kritizuje MDR, zo dosć nječini, „strukturelny deficit“ z prioritami a wužiwanjom synergijow wotbyć. Rozprawa w nadawku zličbowanskich zarjadow Sakskeje, Saksko-Anhaltskeje a Durinskeje je na internetnej stronje tamnišeho krajneho sejma přistupna. Kaž magacin „Flurfunk“ informuje, je MDR znapřećiwił, zo hižo wjele lutuje.
Sej předewzaća wobhladać
Drježdźany. Wot wčerawšeho je móžno, so za 17. tydźeń wotewrjenych předewzaćow „Schau rein“ přizjewić. Wot 13. do 18. měrca maja šulerki a šulerjo w Sakskej zaso přiležnosć, wšědny dźěłowy dźeń dožiwjeć. Jeli so šula na tydźenju njewobdźěli a termin w předewzaću je dopołdnja, je za šulerjow wuswobodźenje z wučby móžne. Informacije
Bože dźěćo durje zaprasnyło
