Aku za e-bike w Radworju nabiwać
Konop, lisćo za nowotne twaršćizny
Chěžine sćěny z konopje? Za tym chcedźa w přichodnym technikumje „Centrum twarić a bydlić“ we Wojerecach slědźić. Za to je trjeba, staru halu přestrjencow saněrować a přetwarić.
Wojerecy (AK/SN). W něhdyšej hali přestrjencow we Wojerowskim přemysłownišću nastanje na arealu 7 000 kwadratnych metrow „technikum Centrum twarić a bydlić“. „Lětsa w septembrje budźe twarski započatk. Dotwar je za lěto 2025 planowany. Cyłkowne kóšty za projekt je 5,95 milionow eurow“, podšmórny Kathrin Schlesinger, jednaćelka Łužiskeho centruma technologijow Lautech tzwr na januarskim posedźenju Wojerowskeje měšćanskeje rady.
Krótkopowěsće (07.02.23)
Chróšćanka politikarka ÖDP
Kamjenica. Ekologisko-demokratiska strona (ÖDP) je na swojim stronskim zjězdźe Serbam zhromadne dźěło při klětušich wólbach na komunalnej a krajnej runinje poskićiła a podpěruje wutworjenje ludoweho zastupnistwa Serbow. Chróšćanku Annu-Rosinu Wjeselinu su do krajneho předsydstwa wolili. Při wólbach do zwjazkoweho sejma 2021 je ÖDP w Sakskej 0,2 procentaj hłosow dóstała.
„Grammy“ za DJja z Drježdźan
Drježdźany/Los Angeles. Drježdźanski „DJ Purple Disco Machine“ Tino Piontek je wčera w nocy wažne myto w ramiku „Grammy Awards 2023“ žnjał. Woni su jeho w kategoriji „Best Remix Recording“ za remix titula „About Damn Time“ US-spěwarki Lizzo wuznamjenjeli. „Grammy Awards“ słušeja do najawažnišich mytow za hudźbu na swěće, kotrež su lětsa w 91 kategorijach spožčili.
Křesćan Baumgärtel njebohi
Chcedźa turistow přiwabić
Bukečanska gmejna ma tójšto planow za ponowjenje napohlada
Bukecy (CS/SN). Hišće pobrachuja na busowymaj zastanišćomaj we Wuježku nowe čakanske chěžki. Tute njemóžachu wjedra dla hišće stajić, štož pak w prěnim kwartalu lěta nachwatać chcedźa. Bjezbarjerowy wutwar busowych zastanišćow we wšěch wjesnych dźělach doprědka ćěrić, to je sej nowy, loni wuzwoleny Bukečanski wjesnjanosta Thomas Meltke (njestronjan), předewzał. Pjenjezy za to steja z fondsa za změnu strukturow k dispoziciji. Štož dróhi gmejny nastupa, chce sej Meltke jich tučasny staw wobhladać, zo by priority za wuporjedźenje postajił.
Njedawno je gmejnska rada wobzamknyła, sej trjebane hašenske jězdźidło za dobrowólnu wohnjowu woboru w Pomorcach kupić. Tamni wobornicy wužiwaja tučasnje wjace hač 40 lět stary Barkas B 1000.
Žiwjenje a skutk Grünewalda
Přewjele jatram škodźi
„Posłuchaj lěkarja, prjed hač jeho trjebaš!“, serbske přisłowo namołwja.
Tuž wěnuje so student mediciny Pětr Dźisławk w nowej seriji znatym a mjenje znatym chorosćam, zo by je čitarjam trochu bliže rozłožował (12).
Hody, nowe lěto, ptači kwas, póstnicy – kónc stareho a spočatk noweho lěta mamy tójšto swjedźenjow a nałožkow pěstować, prjedy hač „wuchowa“ nas póstny čas před hejsowanjom. Na wjetšinje mjenowanych podawkow wšak so derje jě a pije. Zo přewjele tuka a alkohola strowoće runjewon njetyjetej, drje je powšitkownje znate, přiwšěm wjetšina čłowjekow hakle reaguje, hdyž je škoda hižo naparana. Jara znata a struchła chorosć, kotraž so ze žiwjenskim stilom zwjazuje, je jatrowa ciroza. Je to takrjec kónčny stadij mnohich chroniskich schorjenjow jatrow. W Němskej ćerpi 300 000 do 400 000 ludźi na jatrowu cirozu, dwójce telko muži kaž žonow. Tak słuša ke chorobam, kotrež so často jewja, byrnjež dobra prewencija za kóždeho móžna była.
Policija (06.02.23)
Tukowy woheń při warjenju
Budyšin. Přihotujo wječer je Budyšanej woda přewariła. Tohodla je pódla warjenskeje płoniny wotstajena plastikowa bleša škrěła. W njej bě jědźny wolij, kotryž so zapali a tukowy woheń wuskutkowa. Hobbyjowy kuchar je wuchowansku centralu we Wojerecach informował. Na to je wón hromadźe z přećelku woheń w kuchni hašał. Tón bě hižo dospołnje zhašany, hdyž je Budyska powołanska wohnjowa wobora přijěła. Wobornicy mějachu jenož hišće elektriske kuchinske kachle wotpinyć a bydlenje přewětrjeć. Kaž policija zdźěli, staj mějićel bydlenja kaž tež jeho 20lětna žiwjenska partnerka snadnuške zajědojćenje dymoweho płuna dla poćerpiłoj.
Što je woprawdźite, što je fake?
Starši žadaja sej korekturu plana
Brězowka (AK/SN). Tež w Dźěwinskej gmejnje je nowy plan šulskich busow problemy wotkrył. Na to skedźbni wjesnjanosta Sebastian Bertko na naprašowanje Brězowskeje staršiskeje iniciatiwy na minjenym posedźenju gmejnskeje rady. „Zamołwity je a problemy rjadować ma wokrjes. Gmejnje je wid policije wažny“, wuwjedźe Bertko.
Komuna zasadźuje so za wobmjezowanje spěšnosće wokoło Stareje šule na 30km/h. Trěbne postajenje za to hižo předleži. Bórze chcedźa wotpowědne wobchadne znamjenja připrawić. Z wobmjezowanjom spěšnosće ma so wěstota šulerkow a šulerjow w Brězowce zwyšić.
Staršiska iniciatiwa zasadźuje so za zachowanje busoweho zastanišća na Wjesnej dróze w Brězowce. Městnosć pak měli wutwarić. „Je ćma. Dźěći steja, kaž ‚kokoše na žerdźi‘. Nječuja so derje. Nimo toho faluje jasna pokazka ‚Kedźbu, dźěći‘“, měnitaj zastupjerjej staršiskeje iniciatiwy Janine Maßnick a Markus Güttler. Sebastian Bertko pokaza na přepytowanje policije a wuslědki tuteje. Za Wjesnu dróhu je wokrjes Zhorjelc zamołwity.
