Reakcije čłonow Budyskeje měšćanskeje rady na předstajenu wariantu mosta nad Sprjewinym dołom su wčera pokazali, zo móža so radźićeljo po wšěm zdaću z tajkej konstrukciju spřećelić: Na jednym boku wot štomow schowany nachileny sćežor, na tamnym boku trochu bóle filigrany twar, po kotrymž móhli za něšto lět pěšcy z Hrodźiška hač na Budyski hród nóžkować. Wuměnjenje je, zo wobydlerjo sprjewineho města tomu we wobłuku wobydlerskeho rozsuda přihłosuja. Wjacori radźićeljo wšak mjenowachu wčera dalše wuměnjenje. Móst měł so jenož twarić, hdyž so runočasnje tak mjenowany Dołhi dom, kiž ma na wuchodnym boku kónčny dypk mosta być, sobu wutwari. Tuchwilu je dom wotnutřka prózdny a so tu ruinje runa. Nikomu pak rjany nowy móst njepomha, hdyž po nim do stareho města nóžkuješ a potom do ruiny zastupiš. Tu budźe hišće wjele wothłosowanja trěbne, zo by projekt mosta na kóncu dospołny a nic połojčny był. Marian Wjeńka

Budyšin (SN). Wo trěbnych naprawach korony za lětuše jutrowne křižerske procesiony su zastupowacy Budyska krajny­ rada Udo Wićaz (CDU) a zastupjerjo strowotniskeho zarjada kaž tež křižerjo za­wčerawšim w Budy­skim krajnoradnym zarjedźe wuradźowali.

Hinak hač loni njeběchu lětsa wot­po­wědne dowolenja za procesiony trěbne. Nowe wot 3. apryla płaćiwe sakske koronaprawidła přewidźa jenož hišće bazo­we škitne naprawy. Tuž strowotniski zarjad zwjetša někotre naprawy dopo­ruča, mjez druhim, zo maja so wob­dźěl­nicy zhromadneho konjenca z jich wo­­so­binskimi datami zwěsćić. Dale doporuča křižerjam, přez swjate dny dwaj testaj přewjesć a dokumentować. Kaž hižo­ loni je strowotniski zarjad wotpowědne testy zamołwitym procesionow přepodał. Ni­mo­ toho skedźbni zarjad na to, zo maja křižerjo znajmjeńša 1,5 metrow wotstawka zadźeržeć a, hdźež to wonka móž­no­ njeje, znajmjeńša nahubnik nosyć. W rumnosćach ma so FFP2 nahubnik nałožować. W gastronomiji maja so po nětčišich prawniskich předpisach 3G-rjadowanja wobkedźbować.

Předwidźany nowy móst nad Sprjewju w Budyskim starym měsće nabywa konkretniše formy. Wčera předstajichu měšćanskim radźićelam wariantu, kajkuž drje zwoprawdźa, jeli so wobydlerjo za móst wupraja.

Budyšin (SN/MWj). Z planowanjom noweho Budyskeho mosta nad Sprjewju wot Hrodźiška na Hród (Ortenburg) so renoměrowany inženjerski běrow „Schlaich Bergmann Partner“ z Berlina zaběra. Jeje sobudźěłaćer Boris Reyher je wčera měšćanskim radźićelam předstajił wariantu mosta, kotraž hodźała so po wšěm zdaću zwoprawdźić.

Zaručenje dorosta wužadace

Budyšin. Načolnicy serbskich institucijow rozjimachu na wčerawšim zeńdźenju zhromadnu starosć serbski dorost nastupajo. Namakać fachowje a rěčnje kmany dorost je dźeń a bóle wužadace, zdźěli Załožba za serbski lud. Podate ideje chcedźa hač do přichodneho zetkanja dale wuwić a kwalifikować. Nimo serbskich dźěłowych poskitkow měł dorost zhonić wo tym, kajke móžnosće w serbskich institucijach scyła wobsteja.

Wuznamjenjenje na dobro dźěći

Wojerecy. Dźěćaca klinika Wojerowskeho jězorinoweho klinikuma je kwalitny pječat „wuběrnje“ za medicinu dźěći a młodostnych přijała. Lěkarjo a sobudźěłaćerjo su je z wulkim wjeselom při­wzali. Mjeztym sedmy króć je Towaršnosć za chorownje a wotrjady za dźěći w Němskej z.t. klinice tele wuznamjenjenje spožčiła. Wona wuměnjenja kwality wot 2018 lěto wob lěto spjelni.

Postup a spad incidency