Policija (17.02.23)
Pozdatna rubizna w garaži
Wojerecy. Po wjacorych lětach bě 78lětna žona we Wojerecach předwčerawšim zaso raz w swojej garaži. Dokelž so kluč njehodźeše, da wona wrota wot klučoweho serwisa wočinić. Na to wuhladachu w garaži wjacore wěcy, kotrež žonje njesłušachu. Hač jedna so wo rubiznu, policija nětko přepytuje.
Tež w starowni póstnicy swjećili
Zhromadnje přećiwo samotnosći
Hamor (AK/SN). W Hamoru hibaja so iniciatiwy za wjace zhromadnosće, kreatiwity a towaršliwosće. To je něhdyša wjelelětna šulska nawodnica Kristiane Wojcicki w aktualnym Hamtskim łopjenu gmejny Hamor podšmórnyła. „Měrimy so zhromadnje přećiwo samotnosći, wuměłsce dźěłajo a ze socialnym angažementom“, wona wujasni.
Wot septembra 2022 zetkawa so dźesać do dwanaće wuměłsce wobdarjenych staršich a młodych wjesnjanow, zo bychu zhromadnje dźěłali. W běhu krótkeho časa su sej rumnosće zarjadowali. Ze srědkami programa Leader bu projekt spěchowany. Bywši wjesnjanosta Achim Junker (CDU) bě jim rumnosće bywšeho frizerskeho salona přewostajił. Spochi konkretne předstawy zrawjachu. Wšitcy běchu najebać ćopłotu, dźěło w změnach a dalše wobmjezowanja zaměrnje barbili, šrubowali, znosyli, rjedźili a wuhotowali.
Kulow hotuje so na wjeršk
Lětsa je składnostnje karnewala 22 póstniskich barow
Kulow (SN/MWj). Najpozdźišo wot dźensnišeho wječora swjeća w Kulowje wjeršk tamnišeje 317. póstniskeje sezony. Po dwěmaj lětomaj nanuzowaneje přestawki smědźa nory zaso bjez wobmjezowanjow hejsować. Hižo jutře wočakuja tam tysacy wopytowarjow, hdyž poćahnu žony w swojich pisanych kostimach po měsće. Započatk budźe w 14 hodź. Wulki wjeršk docpěja potom róžowu póndźelu. Wot 13.30 hodź. budźe tradicionalny póstniski ćah z wjele wobrazami widźeć.
Karnewala dla přińdźe w Kulowje wot jutřišeho w 10 hodź. hač do wutory w 24 hodź. k wobmjezowanjam wobchada. W tym času wostanje nutřkowne město dospołnje zawrjene. Wokołopuć powjedźe přez Bebelowu, Dwórnišćowu a Salowsku dróhu. Za čas ćahow sobotu wot 13 do 16.30 hodź. a póndźelu wot 12 do 16.30 hodź. nutřkowne město hižo wot Schlegelec konjaceho dwora dospołnje zawru, tak zo so w tym času tež Bebelowa wužiwać móc njebudźe. Dwórnišćowa a Salowska budźetej tohorunja zawrjenej. Šoferojo měli so na wobjězdku wuwinyć.
Wuměnkarjo snědaja na farje
K posylnjenju ćěła a duše bě njedawno Slepjanska wosada přeprosyła. Mnozy starši ludźo tónle poskitk dźakownje přiwzachu, nic jenož čerstwych całtow a kofeja dla.
Slepo (CK/SN). Pod hesłom „Zhromadnje a nic samotnje“ je so njedawno prěni raz zhromadna snědań wuměnkarjow w zetkanišću Slepjanskeje fary wotměła. Wo čerstwe całty, butru a kofej staraše so wosada. Kołbasu, twarožk a pomazanki wobdźělnicy sami sobu přinjesechu, tak zo běchu blida bohaće kryte. Muž, kiž sam přińć njemóžeše, bě so zamołwił a wosom škleńcow domjaceje kołbasy z Njepilic statoka přewostajił.
„Ideja snědanje wuměnkarjow hižo dlěje wobsteji, dokelž je dźeń a wjace ludźi samotnych“, praji fararka Jadwiga Malinkowa. Wona so wjeseli, zo su tajke zetkanja po koronje zaso móžne. Něhdźe 200 seniorow we wosadźe su informowali, nimale 30 žonow a muži w starobje 70 do 85 lět bě přišło. Z wothłosom bě Jadwiga Malinkowa spokojom. Přizjewjenjow běchu so wědomje wzdali, zo njeby to za nikoho zadźěwk był.
Rjany cil za prózdninski wulět je wjes lodoweje doby w Krušwicy. ...
Krótkopowěsće (17.02.23)
Přichodnje zdarma do muzeja?
Lipsk. Zastup do trajnych wustajeńcow měšćanskich muzejow w Lipsku ma wot 2024 darmotny być. Tutón namjet bu na słužbnym posedźenju wyšeho měšćanosty wothłosowany, kaž město wčera zdźěli. Měšćanska rada pak hišće přihłosowała njeje. Z „atraktiwnym poskitkom“, kiž móhł so z modelom za dalše wustajenišća stać, chcedźa sej „korony dla zhubjeny publikum wróćo zdobyć“.
Filmowy festiwal zahajili
Berlin. Mjezynarodny filmowy festiwal Berlin 2023 bu wčera ze swjatočnej galu zahajeny. 19 paskow wubědźuje so wo „złoteho a slěborneho bara“; dohromady pokazaja na mjeztym 73. festiwalu, kotryž słuša k najwjetšim zarjadowanjam swojeho razu na swěće, něhdźe 250 produkcijow wšitkich žanrow. Lawreataj wosebiteju mytow za žiwjenski skutk staj režiser Steven Spielberg a kamerownica Caroline Champetier.
Wobdźělenje Rusow njedowolić
Posledni wječor kulturneje zymy
Nowačkow přizjewić
Budyšin. Přizjewjenje do 5., 6., 7. a do 10. lětnika Budyskeho Serbskeho gymnazija je w tydźenju wot 27. februara hač do 3. měrca móžne. A to póndźelu, srjedu a štwórtk wot 8 do 15. 30 hodź., pjatk wot 8 do 12 hodź. a wutoru, 28. februara, wot 8 do 18 hodź. Trěbne za přizjewjenje su wupjelnjeny přizjewjenski formular, kubłanske doporučenje zakładneje šule, narodźenske wopismo, połlětna informacija, zdźělenje k zastaranskemu prawu (jeli přitrjechi) a zdźělenje k wosebitemu pedagogiskemu spěchowanju (jeli přitrjechi). Dokładniše informacije nadeńdu zajimcy pod .
Ralbicy. Přizjewjenje šulerjow do 5. lětnika Serbskeje wyšeje šule Ralbicy je wot póndźele, 27. februara, hač do pjatka, 3. měrca, póndźelu a štwórtk wot 8 do 14 hodź., wutoru wot 10 do 18 hodź., srjedu wot 8 do 12 hodź., pjatk wot 8 do 10 hodź. a po dorěčenju móžne. Informaciju nańdźeće tež na internetnej stronje .
Zhromadnje jejka debić
Policija (16.02.23)
Młodostny do jastwa zaćahnył
Budyšin. 42lětna žona je njedźelu na Budyskej Sukelnskej wobkedźbowała, kak młody muž wotpadkowe sudobja spowala. Jako wona jeho napominaše, je zaso stajić, započa 18lětny do njeje storkać a jej skónčnje mjezwoči dyri, na čož dyrbješe so žona w chorowni zastarać dać. Młody muž dósta wotpowědne přizjewjenje policije. Bórze na to zjewi so wón před Budyskim policajskim rewěrom na Tuchorskej. Tam spyta wón ze sprayjom a zapalakom woheń zamiškrić, štož pak so na zbožo njeporadźi. Přećiwo zasadźenym policistam so 18lětny mócnje wobaraše a jich křiwdźeše, do jednoho wón samo kopny. Póndźelu dowjezechu młodostneho najprjedy do fachoweje chorownje. Dokelž bě wón w zašłosći hižo wjacekróć policiji napadnył, sudnistwo rozsudźi, jeho do přepytowanskeje jatby tyknyć.
