Bohužel bjez bantoweje reje
W Stróži pola Hućiny so znowa němsko-serbske wiki přirody wotměli
Stróža (CS/SN). 19. němsko-serbske nalětnje wiki přirody na dworje zarjadnistwa biosferoweho rezerwata Hornjołužiska hola a haty w Stróži (Wartha) móžachu so předwčerawšim bjez koronowych wobmjezowanjow wotměć. Něhdźe 4 600 wopytowarjow je po wšěm zdaću jenož na to čakało, ze swójbu po wikach dundać, sej rostliny za balkon a zahrodu wobstarać, regionalne chłóšćenki woptać a znatych zetkać. Při słónčnym wjedrje běchu prěni hosćo hižo do wotewrjenja přišli a chwalachu sej dobru organizaciju, kotraž je kóždemužkuli stresej a wšej hektice zadźěwała. Wikowarjo njeposkićowachu jenož najwšelakoriše rostliny, ale tež drastu kaž tež drjewowe a keramiske wudźěłki. Tež Ludowe nakładnistwo Domowina bě z knižnym blidom zastupjene. Mnozy so za literarne dźěła a wobrazowe zwjazki zajimowachu. Dale sy přihladować móhł, kak so kosa klepa, korby pletu a powjazy nastawaja. Kwis drje njebě cyle lochki, za to pak kiwachu za prawe wotmołwy rjane myta.
Oldtimery zynčeli a rželi
Bóšicy (SN/MiR). Nadměru wulki bě wothłós na kónctydźensku jězbu dwu- a štyritaktowych oldtimerow po třiróžku mjez Bóšicami a Wětrowom. Wjace hač 1 500 wopytowarjow, kaž běchu organizatorojo wočakowali, je sej wobhladało jězbu 80 motorskich kaž tež tajkich z přiwozom, kotrež jězdźachu, haj samo smalachu, po dróhach, kotrež Wětrow, Bóšicy a Nowe Bóšicy zwjazuja. Wobdźělnicy běchu z cyłeje Němskeje a ze susodneje Čěskeje do Łužicy přijěli.
W Radworju su wčera dopołdnja na serbskich kemšach cyłkownje ...
Njespjelnjena nadźija
Krótkopowěsće (25.04.22)
Schuster zastojnstwo nastupił
Drježdźany. Armin Schuster je dźensa zastojnstwo sakskeho ministra nutřkowneho nastupił a powołanske wopismo z ruki ministerskeho prezidenta Michaela Kretschmera (wobaj CDU) dóstał. Wón chce w swojim skutkowanju komunalnej politice wulku wažnosć přicpěwać. 60lětny naslědnik minjeny pjatk pušćeneho Rolanda Wöllera je dotal zwjazkowy zarjad za škit ludnosće a katastrofowu pomoc nawjedował.
Incidenca znowa woteběrała
Budyšin. Přez kónc tydźenja je incidenca w Hornjej Łužicy wobstajnje woteběrała. Roberta Kochowy institut je dźensa za Budyski wokrjes ličbu 481,2 a za Zhorjelski 368,8 podał. Wčera a dźensa njeje RKI za wobaj wokrjesaj žane dalše zwěsćene natyknjenja wozjewił. Wokrjes Zhorjelc informowaše pjatk wo 295 infekcijach, mjez nimi bě 31 dźěći, a smjertnym padźe wot 11. apryla.
Ukrainske knihi zawěsćić
Policija (22.04.22)
Z předešćnikom biłoj
Wojerecy. We Wojerowskej kupnicy chcyštaj 36lětny muž a 34lětna žona předwčerawšim twory w hódnoće 50 eurow pokradnyć a schowaštaj je w dźěćacym wozyčku. Přistajeny pak to pytny a jeju narěča. Na to započeštaj skućićelej nakupowanske korbiki do přistajeneho mjetać a jeho z předešćnikom biještaj. Skónčnje so personalej tola poradźi, podhladneju zadźeržeć a přiwołanym policistam přepodać.
Wjele temow w planje
„Rapakowe hnězdo“ bórze poswjeća
Čorny Chołmc (AK/SN). Blisko farskeho hata w Čornym Chołmcu je w minjenych měsacach nowe hrajkanišćo „Rapakowe hnězdo“ z wjele fantaziju nastało. Tole zdźěli nowinska rěčnica města Wojerecy Corinna Stumpf. „Dokelž bu dotalne hrajkanišćo intensiwnje wužiwane a dokelž stej čas a wjedro swoje slědy zawostajiłoj, dyrbjachmy staru připrawu nuznje ponowić“, wona rozłoži. „Město Wojerecy a Čornochołmčanska wjesna zhromadnosć stej wusko hromadźe dźěłałoj a hrajkanišćo nowym žadanjam wotpowědujo wuhotowałoj.“
Městno wopřijima nětko wjacore hrajkanske elementy za dźěći hač do staroby dwanaće lět. Nastało je tohorunja beachvolleyballowe hrajnišćo. Jako hłowna tema noweho hrajkanišća słuži dwanaće rapakow z baje wo Krabaće. Dźěći wuhladaja je na wšelakich městnach na hrajkanišću, na přikład jako dekoratiwnu figuru na wjeršku nastroja abo na jednej z mnohich drjewjanych žerdźow. Dotalne nastroje su po dokładnym přepruwowanju ponowili a zaso do hrajkanišća zatwarili.
Zahaja předpředań
Budyšin. Za lětuše 26. Budyske lětnje dźiwadło započnje so jutře, sobotu, w 11 hodź. předpředań zastupnych lisćikow při dźiwadłowej kasy na Seminarskej. Hižo krótko do toho pokazaja prěnje sceniske a hudźbne zaćišće z hry „Sherlock Holmes a Budyska bestija“. Předstajenja pokazaja wot 23. junija hač do 31. julija stajnje wot srjedy hač do njedźele. Přeco wutoru wječor wotměja so w tym času Budyske filmowe nocy.
Dialogowe pućowanje
Njebjelčicy. Drježdźanske towarstwo Kultur aktiv, towarstwo Kamjenjak kaž tež akterojo z regiona a Njebjelčanskeje gmejny přeprošuja jutře, sobotu, na dialogowe pućowanje pod hesłom „Łamki a mosty“ do Njebjelčic. Započatk budźe w 15 hodź. na parkowanišću při gmejnskim centrumje. Čara powjedźe k Miłočanskej žabje, k Miłočanskej skale a skónči so w Miłoćicach pola Neumannec. Tam poskićuja zakuski, film a móžnosće k rozmołwje.
Na adresu njezabyć!
