Město dyrbi chětro lutować
Tak mjenowane tučne lěta města Budyšina su wočiwidnje nimo. Nětko dyrbi komuna lutować, a to nic přemało. Z tym dyrbjachu so wčera radźićeljo města na swojim posedźenju rozestajeć.
Budyšin (CS/SN). Na wčerawšim posedźenju Budyskeje měšćanskeje rady je financny měšćanosta dr. Robert Böhmer swoje namjety k hospodarskej konsolidaciji předstajił. W etaće sprjewineho města je něhdźe 3,5 milionow eurow wulka dźěra. Dźěl naprawow hodźał so we wobłuku zarjadnistwa zwoprawdźić, tamnemu dźělej dyrbja měšćanscy radźićeljo přihłosować. W času krizy dyrbi so město znowa wusměrić, kaž dr. Böhmer rjekny, a při tym priority sadźeć. K nim słušeja na kóždy pad šule a dźěćace dnjowe přebywanišća, w kotrychž njeměli lutować.
Přichod KaBi pod třěchu OLK
Budyšin (SN/at). Hornjołužiske kliniki ptzwr (OLK) stanu so z nowym mějićelom Kamjenskeje kubłanskeje towaršnosće ptzwr (KaBi). Wokrjesny sejmik je na swojim posedźenju minjenu póndźelu předani dospołnych wobchodniskich podźělow Budyskeho wokrjesa přihłosował. Kaž zastupowacy krajny rada Udo Wićaz (CDU) nowinarjam rjekny, maja z OLK partnera, kiž je kmany tuchwilne potenciale KaBi wužiwać a wutwarjeć. Předań bě trěbna, dokelž zaměr towaršnosće při załoženju 1992, posłužby zaručić na polu wu- a dalekubłanja dorosćenych a wosebje spěchowanja potrěbnych młodostnych, dźensa wjace w srjedźišću jeho skutkowanja njesteji. Mjeztym koncentruje so KaBi na zastaranje z jědźu, čehoždla bě so wokrjes za kupcom za swójske podźěle na předewzaću rozhladował.
Klětu 1. januara OLK KaBi ze wšitkimi tuchwilnymi sobudźěłaćerjemi nimo jednaćelki přewozmje. Jako riziko za kupca móhł so špatny twarski a techniski staw produkowanišća w Kamjencu wopokazać.
Krótkopowěsće (22.07.21)
Dwě koronanatyknjeni
Budyšin/Zhorjelc. W Hornjej Łužicy je incidenca dale na niskim niwowje. Roberta Kochowy institut je dźensa za Budyski wokrjes hódnotu 2,3 podał, za Zhorjelski 1,2. Budyski krajnoradny zarjad informowaše wčera wo dwěmaj natyknjenjomaj z koronawirusom. We wokrjesu Zhorjelc wčera žana infekcija njebě, zwěsćili pak su tam w dalšim, hižo wobkrućenym padźe delta-wariantu.
Lubijčan sobu wicemišter swěta
Drježdźany/Lubij. Silvius Perrert, šuler Lubijskeho Gymnazija bratra a sotry Scholl, je ze štyrjomi towaršemi z Kronacha, Lörracha, Weidena a Hamelna slěbornu medalju na wirtuelnym swětowym cupje w fyzice (International Young Physicists Tournament) dobył. 17lětny přisłušeše narodnemu mustwu Němskeje, kotrež bě z Bad Honnefa po pjeć kołach wo dobyće wojowało, kaž kultusowe ministerstwo rozprawja.
CO2-bilanca wozjewjena
Na jězbje z čołmom do raja bajow
Nimale 60 wobdźělnikow Chróšćanskeho wjesneho towarstwa Domizna a Kamjenskeje župy „Michał Hórnik“ poda so minjenu sobotu na wuprawu do Bórkowow. Jako so wobdźělnicy popołdnju při busowym zastanišću w Chrósćicach zetkachu, nochcyše nichtó tak prawje wěrić, zo planowane čołmikowanje woprawdźe budźe, wšako runje sylne zliwki zachadźachu. Před Choćebuzom pak so wulětnikarjam hižo słónco směješe, a w Bórkowach jenož hišće někotre łužički na dešćikojty dźeń dopominachu.
W Bórkowach poskića delnjołužiske zapisane kulturne towarstwo Studnja wosebitu dźiwadłowu jězbu z čołmikom do raja bajow. Na třoch čołmach dožiwi tuž skupina Hornjoserbow na hodźinje trajacej jězbje bajowe postawy kaž błudničku, wódneho muža a připołdnicu. Tele postawy a dalši su zdźěla tež delnjoserbsce rěčeli a spěwali. Wosebitosć tamnym turistam zawěsće bě, słyšeć z nimo jěducych čołmow rjane hornjoserbske pěsnje, kotrež sej wulětnikarjo zhromadnje zaspěwachu.
Poselstwo solidarity
Z akciju „Wojerecy strowja Mosambik“ na podawki 1991 dopominali
Wojerecy (AK/SN). Wjace hač sto wobydlerjow je so minjeny pjatk na njewšědnej akciji před Wojerowskej Łužiskej halu wobdźěliło. We wulkich pismikach bě tam na zemi čitać „HOYERSWERDA SAUDA MOCAMBIQUE“ (Wojerecy strowja Mosambik). Z tymile słowami solidarizowachu so z něhdyšimi mosambikskimi zrěčenskimi dźěłaćerjemi. Po wukročenjach přećiwo wukrajnikam 1991 dyrbjachu woni chcyjo nochcyjo město wopušćić. „Dopominamy na to a so tak z tehdyšimi potrjechenymi solidarizujemy“, podšmórny Cindy Paulick jako sobuorganizatorka z iniciatiwy za ciwilnu kuražu. Sobu skutkowali su zastupjerjo towarstwow, politiskich stron, sportowych skupin, wohnjoweje wobory a mnozy dalši. „Chcemy wědu wo tehdyšich podawkach žiwu dźeržeć. Tu njeńdźe wo prašenje winy, ale wo zamołwitosć“, praji dalša organizatorka Sabine Proksch.
Policija (21.07.21)
Twarski grat a material kradnyli
Wojerecy. Paduši běchu w nocy wot minjeneje njedźele na póndźelu we Wojerecach po puću. Woni měrjachu so na wšelki grat a twarski material, kotryž namakachu w pódlanskim twarjenju na kromje města. Hódnotu rubizny trochuje policija na něhdźe 2 000 eurow. Wěcna škoda wučinja dwaceći eurow.
Radźićeljo so schadźuja
Wosadni woblubowaneho duchowneho rozžohnowali
Chwaćicy (ES/SN). Hač na poslednje městno wobsadźena bě minjenu njedźelu Chwačanska cyrkej. Tam rozžohnowachu ewangelskeho fararja Wilfrieda Noacka na zasłuženy wuměnk.
Wilfried Noack bu spočatk septembra 1993 do zastojnstwa fararja zapokazany. Ze swojim čućiwym wašnjom zdoby sej wón spěšnje přichilnosć wosadnych a cyrkwinskeho předstejićerstwa. Do jeho časa jako farar sahachu wjacore naprawy k zachowanju cyrkwinskich twarjenjow a skrućenju wosady. Předewšěm twarske naprawy je w swojim 28lětnym skutkowanju w Chwaćicach přihotował a přewodźał. Wosebje wuzběhnyć ma so wobšěrne ponowjenje žarowanskeje hale kaž tež saněrowanje cyrkwineje wěže inkluziwnje jeje časnika. Dale su cyrkwine wokna, murju a naměsto před Božim domom ponowili. Jedyn z wjerškow w zastojnstwje Wilfrieda Noacka bě 100. róčnica natwara Chwačanskeje cyrkwje 1999.
Na chódniku wulka dźěra nastała
Girafy maja na coo skedźbnjeć
Wojerecy (AK/SN). Do Wojerowskeho coowa chcedźa přichodnje wjace kubłanja, přirodoškita a slědźenja zapřijeć. Wón ma wopytowarjam tež wjace wjesela wobradźeć. Tak rěka w aktualizowanym zwěrjencowym koncepće, kotryž su měšćanscy radźićeljo na swojim wčerawšim posedźenju nimale jednohłósnje wobzamknyli. „Kročimy dale po swojim koncepće geo-coowa“, podšmórny jednaćel tamnišeje zwěrjencoweje, kulturneje a kubłanskeje towaršnosće Arthur Kusber. Komunalne předewzaće je loni susodne ležownosće při zwěrjencu we wulkosći 13 000 kwadratnych metrow kupiło. Tak maja nětko dosć městna za moderne dźěłowe wuměnjenja z dobrym wobchadnym přizamknjenjom kaž tež za socialne rumnosće sobudźěłaćerjam.
