Prewenciju nazornje dožiwjeja
Wojerecy (SiR/SN). Wyši šulerjo z Wojerec dožiwjeja tuchwilu wjacore móžnosće sobuskutkowanja we wobłuku prewenciskeho tydźenja přećiwo wotwisnosći. Zazběh bě spočatk tydźenja we Wojerowskim kinje. Tam njestejachu jenož filmy na dnjowym porjedźe, ale tež praktiske nazhonjenja. Tak mějachu so šulerjo z wosebitymi nawočemi na parcours podać a móžachu so na te wašnje čuć, kaž zo bychu přewjele alkohola pili. Při tym runowahu dźeržeć scyła tak jednore njebě. Dalša stacija bě wuhotowana kaž twarnišćo, hdźež šulerjam hódnoty žiwjenja sposrědkowachu a na strachi wotwisnosće skedźbnjachu.
Wutoru předstajichu w młodźinskim klubje „Ossi“ dźiwadłowu hru kołowokoło přećelstwa. Wčera móžachu so šulerjo powołanskeho šulskeho centruma „Konrad Zuse“ z wot wotwisnosće potrjechenymi rozmołwjeć.
Wustawki, lisćiny a lutowanje
Wo zarunanju zastupowaceho wjesnjanosty diskutowali
Worklecy (JK/SN). Wjacore wustawki maja so w čłonskich gmejnach zarjadniskeho zwjazka „Při Klóšterskej wodźe“ znowa wobzamknyć. K tomu je zarjadnistwo zwjazka wot fachowcow wotpowědne naćiski wudźěłać dało, wo kotrychž gmejnske rady wuradźuja a je wobzamknu. Tak tež we Worklecach. Na minjenym posedźenju tamnišeje gmejnskeje rady jednachu radźićeljo wo naćisku k zarunanju čestnohamtskeho dźěła w gmejnje. Wosebje dźěše wo to, kak měł so zastupowacy wjesnjanosta w padźe zastupa prěnjeho muža gmejny zastopnjować. K diskusiji steješe po naćisku pak pawšalne zarunanje 100 eurow wob měsac abo dwanaće eurow na aktiwnje dźěłanu hodźinu. Zarunanje dźěła zastupowaceho wjesnjanosty wšak hakle po štyrjoch tydźenjach w tutej funkciji do prašenja přińdźe.
Spjatnišćo ma rezerwatej přisłušeć
Łaz (AK/SN). Biosferowy rezerwat Hornjołužiska hola a haty móže so na teritoriju Łazowskeje gmejny rozšěrić. Přichodnje ma jemu tež spjatnišćo Łaz II přisłušeć. Wjetše wobłuki w jeho zapadnym dźělu wupisaja jako škitne pasmo II. Na kupach płaći potom škitne pasmo I. Wone nimaja so na žanežkuli wašnje wužiwać a su wosebje škitane. Tomu je wjetšina Łazowskeje gmejnskeje rady předwčerawšim na swojim posedźenju přihłosowała. Wuměnjenje je, zo njejsu saněrowanske naprawy w zwisku z brunicu wohrožene, rjekny wjesnjanosta Thomas Leberecht (CDU).
Slěborny a Mortkowski jězor wot rozšěrjenja potrjechenej njejstej. Na to su so gmejna, zarjadnistwo biosferoweho rezerwata a wjesni radźićeljo dojednali. Wobaj jězoraj chce sej komuna za turistiske wuwiće wobchować. „Naš zaměr je, zo móža zaso čołmiki po jězoromaj jězdźić a zo za to tež małe přistawnišćo twarimy. Woboje by jenož we wobmjezowanej měrje móžno było, byštej-li jězoraj biosferowemu rezerwatej přisłušałoj“, Leberecht rozłoži.
Wohnjowu show dožiwichu minjeny kónc tydźenja wopytowarjo ...
Přewulki deficit
Překwapjenka při wólbach
Budyšin (CS/SN). Hinak hač wočakowane su wólby Budyskeho měšćanosty za twarstwo na wčerawšim posedźenju měšćanskeje rady zwrěšćili. Po předstajenju dr. Manuela Hentschela da jemu při tajnych wólbach jenož wosom radźićelow swoje haj, šěsnaće radźićelow hłosowaše z ně, jedna wosoba so hłosa wzda. Wyši měšćanosta Karsten Vogt (CDU) dyrbi so nětko z frakcijemi wothłosować, kak ma dale hić. Dr. Manuel Hentschel bě jako jenički kandidat z procesa požadanja wušoł. Po wupisanju, kotrež bě trěbne, dokelž dotalna twarska měšćanostka Juliane Naumann wot decembra hižo w zastojnstwje njeje, su tři požadanja předleželi. Jedne bu zaso cofnjene, tak zo buštaj dwaj zajimcaj k rozmołwje přeprošenaj. Wobaj měještaj so wčera měšćanskim radźićelam předstajić. Druhi zajimc pak je swoje požadanje cofnył. Manuel Hentschel mjeztym połdra lěta wysoko- a hłubokotwarski zarjad města nawjeduje. Při tym móžeše wjele nazhonjenjow zběrać, kaž wón wčera rjekny. Mjez druhim je při přihotach saněrowanja Allendoweje wyšeje šule sobu skutkował.
Problem wudawkow dla
Financne ćeže z hišće wyšim wokrjesnym wotedawkom njerozrisaja
Budyšin (CS/SN). Budyski wokrjes dotal špatnje hospodarił njeje. To wotbłyšćuje so w zadołženju 84 eurow na wobydlerja. Rezerwy pak budu hač do kónca přetrjebane. To staj nowy krajny rada Udo Wićaz (CDU) a dotalny komornik Jörg Szewczyk předwčerawšim na nowinarskej rozmołwje zwěsćiłoj. Njeje problema dochody nastupajo, ale tajki wudawkow dla. Wosebje bědźić ma so wokrjes ze stupacymi socialnymi wudawkami. Změny w socialnym zakonjedawstwje njejsu dosć předwobličene byli. Na kóncu pak su to wšelake přičiny: powšitkownje stupace płaćizny, wuwiće tarifow, situacija cyłkowneje towaršnosće a předewšěm postup ličbow padow, kotryž je dołženy wyšej ličbje ludźi, kotřiž maja prawo na podpěru stata. Wosebity efekt zwěsća, dokelž ćěkancy z Ukrainy status požadarjow azyla nimaja. Jich pak ma wokrjes nastupajo Hartz IV, w młodźinskej pomocy a při hladanju a strowotniskim staraćelstwje wobkedźbować. Lětsa je Budyski wokrjes dohromady hižo wjace hač štyri miliony eurow wjace za socialne wukony wudał.
Krótkopowěsće (13.10.22)
Za jenake wobchadźenje
Drježdźany. Sakska rada ćěkancow je wobchadźenje knježerstwa z ćěkanymi ze Syriskeje, Afghanistana a Iraka kritizowała. Tohodla je wjace solidarity z nimi trěbne, podobnje kaž ta napřećo Ukrainjankam a Ukrainjanam, kotřiž su domiznu ruskeje wójny dla wopušćili, wujasni Dave Schmidtke ze Sakskeje rady ćěkancow dźensa w Drježdźanach.
Hala wostanje zawrjena
Zły Komorow. Nazymu a w zymje wostanje jenička indoor-sněhakowanska hala Braniborskeje w Złym Komorowje energijoweje krizy dla zawrjena, rjekny nawoda tamnišeje šule za sněhakowanje a snowboard Thomas Köder. Smykanišćo za smykanje a lodohokej pak wotewru. Dotal dyrbjachu halu tež w lěću chłódźić, zo njeby hač do 50 centimetrow sylna lodowa woršta wottała. Nětko halu přetwarja, zo ju cyłe lěto chłódźić njetrjebaja.
Inspiracija z Němskeje
Po wobswětlenych hasach dundali
Planuja připrawu za krjepjenje
Njebjelčanska gmejna wočakuje mjenje dochodow a wjace wudawkow
Njebjelčicy (JK/SN). Znowa traješe minjene posedźenje gmejnskeje rady w Njebjelčicach jara dołho, hačrunjež steješe na dnjowym porjedźe jenož mało dypkow. Wo nich pak radźićeljo ćim bóle diskutowachu. To bě hladajo na temy zdźěla tež jara trěbne, zo bychu konsens namakali.
Mału kapku optimizma přinjese do sydarnje jara zajimawy přednošk jednaćela Miłočanskeje agrarneje tzwr Pawoła Matki. Wón předstaji radźićelam načasne ratarjenje, kotrež je wusměrjene na škit přirody a pódy a kotrež tež wobkedźbuje hospodarske a přirodne nadawki dźensnišeho rólnistwa. Přednošowar pokaza wosebje na nowowusměrjenje Miłočanskeho agrarneho předewzaća, kotrež je na dobrym puću k nowym wuspěcham.
