Nowu kolesowarsku šćežku zarjaduja tuchwilu na nutřkoměšćanskim ...
Boja so nacijow
Choćebuz (SN/mb). Wučerjo šule we wokrjesu Sprjewja-Nysa su so na braniborske medije z informacijemi wo prawicarskoekstremistiskich zjawach na swojim kubłanišću wobroćili. Dźe wo črjódku šulerjow, kotřiž wšědny dźeń dominuja, podpěrani wot wjele „sobuběharjow“. Jim rasistiske skřiwdźenje šulerjow z migraciskim pozadkom, pokazanje hitleroweho postrowa a zatrašenje ludźi z fyziskej a psychiskej namocu wumjetuja. List je drje anonymny, RBB a policija pak šulu znajetej. Kolegij wučerjow je pačeny, mainstream šulerjow prawicarski – při „wólbach młodźiny“ do wólbow zwjazkoweho sejma 2019 stej AfD a NPD wjetšinu docpěła.
Wotum za nowy projekt klinikuma
Z wulkej wjetšinu hłosowaše Wojerowska měšćanska rada na swojim wutornišim posedźenju za nowy, do přichoda sahacy projekt změny strukturow w regionje.
Wojerecy (AK/SN). „Natwar strowotniskeho regiona Łužica – digitalizowana medicinska powołanska fachowa šula“ rěka nowy projekt, kotryž je Klinikum Łužiska jězorina tzwr wuwił a w Sakskej agenturje za strukturne wuwiće zapodał. Za to přewza komuna sydom procentow trěbnych swójskich srědkow. W dwójnym etaće lětow 2023/2024 je to konkretnje 215 000 eurow. Cyłkowne kóšty projekta su nimale 3,2 milionow eurow. Wot tuteje sumy přewza Klinikum Łužiska jězorina tzwr dźesać procentow, to rěka 319 000 eurow. Tež Swobodny stat Sakska a Zwjazk so z 72 000 eurami respektiwnje 2,6 milionami eurami po Zakonju za sylnjenje strukturow na financowanju wobdźělitej.
Krótkopowěsće (26.04.23)
Wučbne myto Sakskeje
Drježdźany. Sakske ministerstwo za wědomosć je Wučbne myto Sakskeje wuwołało. Z tym chcedźa wusahowace docentki a docentow počesćić, kotřiž wučbnu maćiznu z nowymi, mudrymi idejemi a konceptami posrědkuja. Myto ma so dwulětnje spožčić wuwučowacym, jednotliwcam a skupinam, na uniwersitach, wysokich šulach w swobodnym staće a na powołanskej akademiji Sakskeje.
Minister wopyta Chrósćicy
Kamjenc. Na přeprošenje zapósłanca krajneho sejma Alojsa Mikławška (CDU) wopyta nutřkowny minister Sakskeje Armin Schuster (CDU) přichodny pjatk sportowe zjednoćenstwo Chrósćicy, zo by so wo stawje přihotow na Europeadu 2024 wobhonił. Rozmołwjeć chce so z trenarjemi a zamołwitymi zjednoćenstwa kaž tež z pjeć předsydami dwurěčnych sportowych towarstwow zarjadniskeho zwjazka.
Hackerojo produkciju haća
Tołsta packa, zajětřene wucho, dźěry w kožuchu
Nic jenož na wsach, ale tež w městach maja mnozy domjacy skót. Něchtóžkuli nimo toho drobny skót plahuje. Wšitcy so wo strowotu swojich dwu- abo štyrinohatych lubuškow prócuja. Tomu přinošować chce naša serija z pokiwami z weterinarneje mediciny. (5)
Štóž ma doma tajkeho praweho „tigra“ na dworje, kotryž swój rewěr zakituje, po nocach po wsy za žónkami brodźi, tón drje so prjedy abo pozdźišo nad šmarami abo hłubšimi ranami swojeho lubuška stróži. Hustodosć dochadźa wosebje w nocy k prawym bijeńcam mjez kóčkami. Při tym zasadźujetej kontrahentaj wšě brónje, kotrež matej. Njejsu to jenož pazory, kotrež zaryja so do kože druheho abo šmórnu jemu přez wóčko – ně, zwjetša chce jedyn tamneho z teritorija prawdźepodobnje wukusać. Na druhi dźeń swědča krej a/abo dźěry w kožuchu wo tajkim zasakłym boju.
Z wutřělom předpředań zahajili
Policija (25.04.23)
Pytaja za mužom
Biskopicy. Wot minjeneho štwórtka popołdnja pyta policija w Biskopicach za 26lětnym Christianom Bartschom. Wón bě wokoło 16 hodź. bydlenje za hladanje na Augusta Königowej dróze wopušćił. Młody muž je duchownje wobmjezowany a trjeba medikamenty. Dotal je policija ze wšelakimi naprawami za nim pytała, tola bjez wuspěcha. Policija tuž nětko ludnosć wo pomoc prosy. Christian Bartsch je něhdźe dwaj metraj wulki a ma brune dlěše włosy. Woblečeny je wón žołty kabat, čorne joggingowe cholowy a sportowe črije. Štóž ma informacije, hdźe Christian Bartsch přebywa, abo štóž móže dalše informacije podać, njech so na Budyskim policajskim rewěrje pod telefonowym čisłom 03591 3560 abo na dalšich direkcijach přizjewi.
Na wopory podawka spominali
Budyšin (SN). W spominanju na wopory 22. apryla 1945 je Budyski financny měšćanosta dr. Robert Böhmer minjenu sobotu wěnc kwětkow při wopomnjenskej tafli w Delnjej Kinje połožił a modleše so zhromadnje z přitomnymi měšćanskimi radźićelemi „Wótčenaš“.
22. apryla 1945 je hač do dźensnišeho njezapomnity dźeń. W dobje wot apryla hač do meje 1945 běchu poslednje wojowanja w zwisku z Druhej swětowej wójnu. We a wokoło města Budyšina wojacy mócnje zachadźachu a hłuboke dušine rany zawostajichu. Mjez druhim su přisłušnicy 1. ukrainskeje fronty cyłkownje 195 ludźi do bróžnje w Delnjej Kinje ćěrili a twarjenje po tym zapalili. Wopomnjenska tafla na tónle surowy podawk dopomina a město kóžde lěto na wopory spomina.
Jasny wotum wolerjow
Thomas Leberecht wostanje wjesnjanosta Łazowskeje gmejny
Łaz (AK/SN). Thomas Leberecht (CDU) wostanje wjesnjanosta Łazowskeje gmejny. Tak su wolerjo zawčerawšim rozsudźili. Mějićel zastojnstwa je 69,9 procentow hłosow wólbokmanych dóstał. W absolutnych ličbach běše to runje 1 637 hłosow. Kandidata AfD Franka Förstera je 30,1 procent wobydlerjow wolił, štož wotpowěduje w absolutnych ličbach 704 hłosam. Z něhdźe 6 000 wobydlerjemi a 134 kwadratnymi kilometrami je Łaz po přestrjeni druha najwjetša gmejna Sakskeje a najwjetša Budyskeho wokrjesa. „Wólbny wuslědk je dopokaz za to, mi wobydlerjo dowěrja. Na tym chcu dale dźěłać“, Thomas Leberecht wolóženy wuzběhny.
Cyłkownje 4 358 wobydlerjow gmejny bě zawčerawšim wólbokmanych. Wólbne wobdźělenje wučinješe tuž 54,6 procentow. Za wólby wjesnjanosty je to poměrnje wysoka hódnota.
Wiki móžnosćow na nowym městnje
Wiki móžnosćow we Wojerowskej Łužiskej hali su stajnje wulki podawk w měsće. Nětko njejsu za to jenož nowu městnosć namakali, ale so tež na wosebity termin dojednali.
Wojerecy (SiR/SN). Prěni raz wotměja so Wojerowske wiki móžnosćow lětsa w zwisku z měšćanskim dnjom dźěsća. Po tuchwilnym stawje přizjewjenjow chce so wjace hač třiceći towarstwow njedźelu, 4. junija, wot 10 do 18 hodź. w hrodźe a w susodnym zwěrjencu prezentować a swoje poskitki zjawnosći předstajić.
