Za blidom sedźeli a dźělili
Wojerecy (SN/MiR). Čłonka serbskeje přirady města Wojerec Gabriela Linakowa ma zetkanje za wulkim blidom minjenu njedźelu popołdnju na tamnišim Łužiskim naměsće za přewšo poradźene. Nimo mnohich zastupjerjow w měsće a wokolnych wsach zaměstnjenych zarjadnišćow a towarstwow je so tež wona za nadměru wulku taflu sydnyła. „Nochcych tam jeničce w swojej funkciji jako čłonka přirady pódla być“, wona rjekny, „wjele bóle dźěše mi wo to, wabić za našu Ćišćansku rejwansku skupinu. Rady chcemy dale a bóle z młodymi ludźimi dźěłać. Dokelž tych dosć nimamy, běše nam tafla dobra składnosć zajim zbudźić a zwiski wutworić.“ Zo by za blidom dobra nalada knježiła, su so nimo njeje dalši čłonojo a čłonki mjenowaneje rejwanskeje skupiny wobdźělili. W swojej pyšnej Wojerowskej drasće woni napadnychu a na te wašnje z mnohimi zajimcami wužichu móžnosć so rozmołwjeć. „Nam bě wažne pokazać, zo su Serbja wažny a žiwy dźěl města a jemu přisłušacych wsow“, Gabriela Linakowa wuzběhny. Wulkotna nalada knježeše, jako woni „Hanumarju“ zarejwachu.
Po tym zo su w Chróšćanskej cyrkwi prěnje dźěła zakónčene, ...
„Šoterowe zahrodki“ Budyšinej dwělomnu česć wunjesli
Budyšin je najbóle zazyglowane město Sakskeje. To je aktualna studija w nadawku Cyłkowneho zwjazka Němskeho zawěsćenskeho hospodarstwa (GDV) zwěsćiła. W měšćanskim zarjadnistwje wobkedźbuja, zo wosebje w priwatnym wobłuku mějićeljo swoje płoniny tak njewuhotuja, zo móže woda zasakować.
Budyšin (SN/at). 52,91 procentow sydlenskeje kónčiny města Budyšina je wobtwarjenych, betonowanych abo asfaltowanych. To wuchadźa z datow zazyglowanja, kotrež je satelit Corpernicus z přezcyłnej dokładnosću dźesać króć dźesać metrow z wysokim rozpušćenjom dobył. Mjez dźesać najwjetšimi městami Sakskeje steji sprjewine město na čole, slěduja Lipsk z 51,14 a Drježdźany z 50,67 procentami. Wuslědki studije su minjenu srjedu wozjewili.
Jako bazu wuhódnoćenja satelitowych wobrazow su fachowcy towaršnosće VdS Schadensverhütung GmbH swobodnje přistupne geodaty komunow kaž tež sydlišćowe hranicy Zwjazkoweho zarjada za geodeziju a kartografiju wužiwali.
Krótkopowěsće (09.05.23)
Steinmeier „knježi“ we Łužicy
Zły Komorow. Sedmy raz poda so zwjazkowy prezident Frank-Walter Steinmeier ze swojim hamtskim sydłom na tři dny do republiki – dźensa do Złeho Komorowa. Chce tu wosebje zhonić, kak ludźo we Łužicy z kóncom wudobywanja brunicy a z tym zwisowacej změnu strukturow wobchadźeja. Tež wo zaměstnjenju ćěkancow chce porěčeć.
Mjezykulturelnej tydźenjej
Wojerecy. „Nowe rumy“ je hesło lětušeju mjezykulturelneju tydźenjow. Wot 16. septembra do 1. oktobra wotměja so w komunach Budyskeho wokrjesa mnohe zarjadowanja. Nowe rumy maja so při zetkanjach, mjezsobnym zeznaću a zhromadnych aktiwitach wotkryć. Wo spěchowanje móža so zajimcy nětko w interneće pod požadać.
Lěkarjo dźensa stawkowali
Nabubnjene brjuški nuklow
Nic jenož na wsach, ale tež w městach maja mnozy domjacy skót. Něchtóžkuli nimo toho drobny skót plahuje. Wšitcy so wo strowotu swojich dwu- abo štyrinohatych lubuškow prócuja. K tomu přinošować chce naša serija z pokiwami z weterinarneje mediciny. (6)
Wobornicy w Róžeńće so dźakowali
Wo dowolu něhdy
Budyšin. Přichodne zarjadowanje Budyskeho archiwneho zwjazka wěnuje so jutře, wutoru, w 19 hodź. prašenju, hdźe a kak su wobydlerjo za čas NDR swój dowol přežiwili. Wo tym přednošuje stawiznar dr. Sönke Friedreich. Zastup je darmotny. Štóž ma wobrazy wo swójskich dowolowych dožiwjenjach, předewšěm při Budyskim spjatym jězoru, móže je rady sobu přinjesć. Wosebje zajimawe motiwy chce mjenowany zwjazk jako kopije do swojeho archiwa přewzać.
Dalši forum
Budyšin. Po premjerje w Strowotnej studni wotměje so jutře, wutoru, w 19 hodź. dalši wobydlerski forum z Budyskim wyšim měšćanostu Karstenom Vogtom, tónraz w hotelu Residence na Wjelećanskej. Myslene je zarjadowanje za wobydlerjow južneho města a Hornjeje Kiny. Na nim móža so zajimcy darmotnje a bjez přizjewjenja wobdźělić.
Policija (08.05.23)
Drohi e-bike pokradnyli
Wojerecy. Zo je stajnje lěpje, koleso k štomej, wobchadnemu znamjenju, płotej abo podobnje přizamknyć, wě nětko wobsedźer e-bikea we Wojerecach. Wón bě 2 100 eurow drohe elektrokoleso před kupnicu ze zamkom zamknył. Jako pak so z wobchoda wróći, dyrbješe zwěsćić, zo běchu njeznaći koleso scomt zamkom sobu wzali.
K swjedźenjej z nowym logom
Młodźinske towarstwo na třoch dnjach mejemjetanje organizowało
Pančicy-Kukow (SN/MWj). Z programom dźěćaceje rejwanskeje skupiny Serbskeho ludoweho ansambla Łužičanka a z bjesadu je wčera popołdnju lětuše mejemjetanje w Pančicach-Kukowje wuklinčało. Tři dny je młodźinske towarstwo zabawu za wjesnjanow organizowało a za to wjele chwalby žnjało.
Ludźo maja dołhu lisćinu přećow
Bjedrichecy (AK/SN). Třinaće ludźi je so njedawno w Bjedrichecach na wobydlerskej hodźinje z Łazowskim wjesnjanostu Thomasom Leberechtom (CDU) wobdźěliło. Hnydom wjacore strony přećow a pokiwow wjesnjanow bě do toho chronist Werner Aust napisał a je wjesnjanosće přepodał. Paleta naprawow saha wot saněrowanja dróhi k Balakec młynej přez ponowjenje nadróžnych kromow hač k porjedźenju nadróžneho wobswětlenja we wsy.
„Prioritu w gmejnje ma tuchwilu přijězd do Šćeńcy wot zwjazkoweje dróhi B 96. Potom dyrbimy so hromadźe z wokrjesom wo hłownu dróhu w Šćeńcy a w Bjedrichecach starać“, wuzběhny wjesnjanosta. Tež komunalne puće gmejna z wočow njezhubi. Za to změja w lětušim hospodarskim planje po wšěm zdaću 200 000 eurow zaplanowane.
