Wudawki zdźěla dwělomne
Najebać wyše připokazanki w Rakecach přidatne pjenjezy trěbne
Rakecy (JK/SN). Dobru powěsć měješe Rakečanski wjesnjanosta Swen Nowotny (CDU) na wčerawšim posedźenju tamnišeje gmejnskeje rady za swojich radźićelow. Budyski krajnoradny zarjad je gmejnje přizwolił přidatnje 97 000 eurow klučowych připokazankow. Dźakowano tutym pjenjezam so rozsudźichu, składowu halu z časa NDR na Kubłowej dróze wonkownje wobnowić dać a ju z nowej elektriku wuhotować. Halu wužiwa gmejna jako skład. W minjenych lětach bě wona husćišo objekt, na kotrymž su njeznaći złowólnje zachadźeli a wokna a fasadu skóncowali. Nětko je po měnjenju wjesnjanosty na času, twarjenje wonkownje wobnowić.
Dwurěčna tafla ma slědować
Łaz (AK/SN). Městno k wotpočnjenju přeprošuje nětko na kromje Łaza k posydnjenju. Natwarili su tu blido a ławce z třěchu kaž tež stejaki za kolesa. Wobdali su teren z plesternakami z bywšeho Łazowskeho dwórnišća. Informaciska karta pokazuje łužisku jězorinu. Dalša dwurěčna tafla wo Łazu a wotbagrowanych wsach ma slědować. „Bjez čestnohamtskeho angažementa njeby wjesna zhromadnosć tak derje fungowała“, rjekny wjesnjanosta Thomas Leberecht (CDU) minjenu sobotu při přepodaću. Předewšěm Łazowscy sportowcy su so tule gratu přimali. Financowali su projekt z 3 000 eurami, kotrež dobychu we wubědźowanju simul+.
Na swoje 25lětne wobstaće je tele dny Wojerowski modelotwarski klub ...
„Powołanje je moje žiwjenje“
W małej, starej serbskej wsy, w Lichanju, bydli młody serbski osteopat Syman Pjaca. Po dlěšim času zwonka Łužicy je so 35lětny 2020 do domizny nawróćił. Tu je sebi ze swójbu statok kupił, kiž sebi nětko krok po kroku přetwarja. Na dworje ma wón tež swoju praksu. Wjesele wón swojich pacientow wosrjedź informaciskich plakatow na jara přijomne wašnje wita. Na žiwe a euforisce wašnje wón wo swojim powołanju a žiwjenju powěda.
Pjaca chodźeše na Serbski gymnazij w Budyšinje a złoži tam swoju maturu. Hižo chětro zahe bě jemu jasne, zo chce so po wotzamknjenju na fyzioterapeuta wukubłać dać. Tutón plan zwoprawdźi wón potom w Drježdźanach. Po wukubłanju poda so na lěto do Nowoseelandskeje a wróćiwši so wottam, po krótkim přebytku w Drježdźanach, do Berlina. Tam studowaše wón cyłkownje pjeć lět osteopatiju a da so paralelnje na hojerja wukubłać. Ze swojej z Lipska pochadźacej žonu a dwěmaj synomaj rozsudźi so wón po wosom lětach w Berlinje za nawrót do Łužicy.
Krótkopowěsće (20.04.23)
Wo misionstwje zhonili
Pančicy-Kukow. Po dlěšej přestawce móžeše Domowinska skupina Pančicy-Kukow wčera swoje prěnje zarjadowanje w awli ponowjeneje Šule Ćišinskeho přewjesć. Před něhdźe 40 skupinarjemi a hosćimi přednošowaše dr. Lubina Malinkowa wo Ochranowje a Serbach. Předewšěm wěnowaše so wona misionskemu skutkowanju wjacorych Serbow w rozdźělnych kónčinach swěta.
„Rukatl-Bier“ dobyćer
Frankfurt n.M./Kumwałd. Ze swojej kreaciju „Rukatl-Bier“ je sebi Kumwałdska piwarnja „ProBier“ złotu medaliju zdobyła. Na wubědźowanju International Trophy 2023 zamó piwo z Kumwałda jury přeswědčić. Nicole Kosch, Maik Richter a Frank Walther, kotrež piwarnju wobhospodarjeja, su přez dobyće jara wjeseli, wšako su so lětsa k prěnjemu razej na rozrisanju wobdźělili.
Fabriku na muzej přeměnili
Nutřkowny časnik ludźi rozdźělnje tikota
„Posłuchaj lěkarja, prjed hač jeho trjebaš!“, serbske přisłowo namołwja.
Tuž wěnuje so student mediciny Pětr Dźisławk znatym a mjenje znatym chorosćam, zo by je čitarjam trochu bliže rozłožował (18).
Křesła z kina požadane byli
Budyšin (CS/SN). Zahe stawać dyrbješe minjenu njedźelu, štóž chcyše jedyn z 233 kinowych křesłow měć, kotrež běchu w Budyskim filmowym palasće na předań. Hižo dołho do zahajenja předanje w 10 hodź. steješe tam dołhi rynk ludźi. Předawali su wone čerwjene křesła, z kotrymiž su kino před mjeztym nimale 30 lětami po ponowjenju wotewrěli. Tehdy měješe tu film „Go Trabi go II“ premjeru, k čemuž běštaj hłownaj hrajerjej Wolfgang Stumph a Claudia Schmutzler přijěłoj.
Policija (19.04.23)
Młodostneho nadpadnyli
Wojerecy. Wo nadpadźe na 15lětneho hólca we Wojerecach je policija wčera rano zhoniła. Swědkojo rozprawjachu, zo běchu njeznaći młodostni 15lětneho wotzady storkali a do njeho kopali. Přiwołane wuchowanske mocy dowjezechu zranjeneho do chorownje. Čehodla běchu njeznaći hólca nadpadnyli a štó woni su, dotal znate njeje.
Wo mjenach rostlin
Park a hród předrohej?
Radźićeljo maja rozdźělne měnjenja wo hladanju historiskeje drohoćinki
Njeswačidło (JK/SN). Z jednoreje informacije je so na wčerawšim posedźenju Njeswačanskeje gmejnskeje rady čiła diskusija wuwiła. Wjesnjanosta Gerd Schuster (CDU) radźićelam zdźěli, zo je gmejna dała dwaj dubaj a jedyn jasnik za hrodom pušćić. Štomy stejachu při přirowje, kotryž wodu z parka wotwjedźe a tak přepławjenju parka zadźěwa. Nimo toho běchu štomy zdźěla hižo wobškodźene a chore a hrožeše strach, zo hałzy dele padnu a škodu nadźěłaja. Po prašenju radźićelki Ramony Clauß za wudawkami za akciju zahaji so horca diskusija. Dźěše wo to, štó je zamołwity za hladanje a porjad w parku a w hrodźe. Wjacorym radźićelam dźe to předaloko, hdyž so gmejna tajkim dźěłam wěnuje a při tym mocy a pjenjezy nałožuje. Su dźě wažniše nadawki, hač park a hród hladać. Skerje bychu so tam zasadźane pjenjezy měli nałožować k wobnowjenju pěstowarnje a šule abo znajmjeńša za wažniše naprawy gmejny. Park a hród wotedać do statnych rukow tež hižo njeńdźe a tak maja dale nadawk, so wo kulturnje hódny objekt starać.
